Tusite 3 Sanuali, 2017

‘AHO HONO TOLU

Veesi Lauloto: Hepelu 11:3 

"Ko tui ……., ne langa ‘a e ‘univeesi´, ‘e he Folofola ‘a e ‘Otua´……"

Senesi 1:9-13

"9Pea folofola ‘a e ‘Otua, Ke fakatahataha ‘a e ngaahi vai ‘oku ‘i he lalo langi ki ha potu pē taha, pea ke hā mai ‘a e mōmoa: pea na‘e hoko ia. 10Pea na‘e fakahingoa ‘e he ‘Otua ‘a e mōmoa ko e Fonua; pea ko e fakataha ‘o e ngaahi vai na‘a ne fakahingoa ko e tahi: pea na‘e ‘afio ki ai ‘a e ‘Otua, kuo lelei. 11Pea na‘e folofola ‘e he ‘Otua, Ke fakatupu mai ‘e he fonua ‘a e me‘a laumata, ‘a e mohuku ‘oku ‘i ai hono tenga, ‘a e ‘akau fua, ‘a ia ‘oku takitaha ma‘ana hono fua, pea ‘i ai ha tenga–ke tu‘u ia ‘i he funga fonua: pea na‘e hoko ia. 12Pea na‘e ‘ohake ‘e he fonua ‘a e me‘a lau mata, ‘a e mohuku ‘oku ‘i ai hono tenga, ‘o takitaha ma‘ana, mo e ‘akau fua, ‘a ia ‘oku ‘i ai ha tenga, ‘o takitaha ma‘ana: pea na‘e ‘afio ‘a e ‘Otua, kuo lelei. 13Pea na‘e efiafi, pea na‘e pongipongi; ko hono ‘aho tolu ia."

‘I he ‘aho hono 3´, ne fakatupu ai ‘e he ‘Otua´ ‘a e fonua´ mo e ngaahi ‘akau´, pea Ne folofola ke fakatahataha e ngaahi vai´, ‘o Ne ui ko e tahi. Pea folofola ʻa e ʻOtua´, Ke fakatahataha ʻa e ngaahi vai ʻoku ʻi he lalo langi´ ki ha potu pē taha, pea ke hā mai ʻa e mōmoa´: pea naʻe hoko ia. Pea naʻe fakahingoa ʻe he ʻOtua´ ʻa e mōmoa´ ko e Fonua; pea ko e fakataha ʻo e ngaahi vai naʻa ne fakahingoa ko e Tahi: pea naʻe ʻafio ki ai ʻa e ʻOtua, kuo lelei. Pea naʻe folofola ʻe he ʻOtua´, Ke fakatupu mai ʻe he fonua´ ʻa e meʻa lau mata, ʻa e mohuku ʻoku ʻi ai hono tenga, ʻa e ʻakau fua, ʻa ia ʻoku taki taha maʻana hono fua, pea ʻi ai ha tenga ke tuʻu ia ʻi he funga fonua” (Senesi 1:9-11). Kuo ‘i ai ‘eni ‘a e fonua mo e tahi, pehē ki hono ‘etimosifia, pea to e fokotu‘u ki ai mo e ngaahi ‘akau. Tau sio ai ki ngāue fakaofo ‘a e fakatupu na‘e fai hotau ‘Otua´ fānau, ‘aki ‘Ene fo‘i folofola pē.

Lotu: ‘E ‘Otua, ‘oku ou fakamālō atu Ho’o fakatupu mai e fonua´ mo e ngaahi ‘akau´, mo fakanofonofo lelei e me’a kotoa ma’aku . ‘I Ho Huafa´ Sīsū, ‘Emeni.