Falaite 6 Sanuali, 2017

‘AHO HONO ONO

Veesi Lauloto: Hepelu 11:3 

"Ko tui ……., ne langa ‘a e ‘univeesi´, ‘e he Folofola ‘a e ‘Otua´……"

Senesi 1:24-31

"24Pea folofola ‘a e ‘Otua, Ke ‘ohake ‘e he fonua ‘a e me‘a mo‘ui, ‘o fakafa‘ahinga; ‘a e manu lalata, mo e manu totolo, mo e manu kaivao, ‘o takitaha ma‘ana: pea na‘e hoko ia. 25Pea na‘e ngaohi ‘e he ‘Otua ‘a e manu kaivao, ‘o fakafa‘ahinga pē, mo e manu lalata ‘o fakafa‘ahinga, mo e me‘a kotoa pē ‘oku totolo ‘i he kelekele, ‘o fakafa‘ahinga: pea ‘afio ki ai ‘a e ‘Otua, kuo lelei. 26Pea folofola ‘a e ‘Otua, Tau ngaohi tangata ‘i hotau ‘īmisi, ‘o fa‘ifa‘itaki ki hotau anga: pea ke nau pule ki he ika ‘o e tahi, mo e manupuna ‘o e ‘atā, mo e manu lalata, ‘io, mo ‘uta kātoa; pea mo e fa‘ahinga totolo ‘oku totolo ‘i he funga fonua. 27Pea na‘e fakatupu ‘e he ‘Otua ‘a e tangata ‘i he ‘īmisi ‘o‘ona, ‘io, ‘i he ‘īmisi ‘o e ‘Otua na‘a ne fakatupu ia; na‘a ne fakatupu ‘a kinaua ko e tangata mo e fefine.   28Pea na‘e tāpuaki‘i ‘a kinaua ‘e he ‘Otua, pea na‘e folofola kiate kinaua ‘e he ‘Otua, ‘o pehē, Mo fakatupu, mo fakatokolahi, mo fakafonu ‘a māmani, pea ikuna ia: pea mo pule ki he ika ‘o e tahi, mo e manupuna ‘o e langi, pea mo e me‘a mo‘ui kotoa pē ‘oku totolo ‘i he fonua. 29Pea folofola ‘a e ‘Otua, Ko eni kuo u ‘atu kiate kimoutolu ‘a e mohuku kotoa pē ‘oku ‘i ai hono tenga ‘i he funga ‘o māmani kātoa, pea mo e ‘akau fuli pē ‘a ia ‘oku ‘i ai ha fua‘i ‘akau mo hono tenga: ko ho‘omou me‘akai ia. 30Pea ki he manu kotoa pē ‘o ‘uta, mo e manupuna kotoa pē ‘o e ‘atā, pea ki he me‘a kotoa pē ‘oku totolo ‘i he fonua, ‘a ‘ia ‘oku ‘i ai ha‘ane mo‘ui, kuo u ‘atu ki ai ‘a e fa‘ahinga mohuku kehekehe ma‘anau me‘akai: pea na‘e hoko ia. 31Pea na‘e ‘afio ‘a e ‘Otua ki he me‘a kotoa pē kuo ne ngaohi, pea tā kuo lelei ‘aupito. Pea na‘e efiafi, pea na‘e pongipongi; ko hono ‘aho ono ia."

‘I he ‘aho hono ono´ na‘e fakatupu he 'Otua´ 'a e manu totolo kotoa he funga 'o e fonua´, pea Ne toki fakatupu leva e tangata´ 'i he ‘Īmisi ‘O'ona´. (1:24-27) “Pea naʻe fakatupu ʻe he ʻOtua´ ʻa e tangata´ ʻi he ‘Īmisi ‘Oʻona´, ʻio i he ‘Īmisi ʻo e ʻOtua´ naʻa Ne fakatupu ia´; naʻa ne fakatupu ʻakinaua ko e tangata mo e fefine. Pea naʻe tāpuakiʻi ʻakinaua ʻe he ʻOtua´, pea naʻe folofola kiate kinaua ʻe he ʻOtua´, ʻo pehē, Mo fakatupu, mo fakatokolahi, mo fakafonu ʻa māmani, pea ikuna ia: pea mo pule ki he ika ʻo e tahi´, mo e manupuna ʻo e langi´, pea mo e meʻa moʻui kotoa pē ʻoku totolo ʻi he fonua´...... Pea naʻe ʻafio ʻa e ʻOtua´ ki he meʻa kotoa pē kuo Ne ngaohi´, pea tā kuo lelei ʻaupito. Pea naʻe efiafi, pea naʻe pongipongi; ko hono ʻaho ono´ ia.” Na‘e makehe atu pē hono fakatupu ‘o e tangata´ mei ha to e me‘a mo‘ui, he na‘a Ne ngaohi ‘a e tangata´ mei he efu ‘o e kelekele´, pea Ne toki hō ki ai ‘a e mānava mo‘ui´, pea ko e tangata´ pē ‘oku ‘i ai hono laumālie.

Lotu: 'E ‘Otua, ‘oku ou hounga’ia mo’oni Ho’o fakatupu au ‘i Ho ‘Īmisi´. ‘Oku ou fakamālō atu Ho’o fakakalauni ‘aki homau fa’ahinga´ ‘a e mafai pule ki Ho’o fakatupu´. Ako’i au ke u ‘apasia ma’u kiate Koe. ‘I Ho Huafa´ Sīsū, ‘Emeni.