‘AHO HONO NIMA
Veesi Lauloto: Hepelu 11:3
"Ko tui ……., ne langa ‘a e ‘univeesi´, ‘e he Folofola ‘a e ‘Otua´……"
Senesi 1:20-23
"20Pea folofola ‘a e ‘Otua, Ke ngaue ‘a e ngaahi vai ‘i he me‘a mo‘ui ‘oku ngaolo, pea ke puna ‘a e manupuna ‘i he funga fonua mo e mata ‘o e langi. 21Pea na‘e fakatupu ‘e he ‘Otua ‘a e fa‘ahinga tanini lalahi, mo e me‘a mo‘ui kotoa pē ‘oku totolo, ‘a ia ‘oku ngāue ai ‘a e ngaahi vai, ‘o takitaha ‘i hono fa‘ahinga; pea mo e manupuna ‘oku kapakau, ‘o fakafa‘ahinga: pea na‘e ‘afio ki ai ‘a e ‘Otua, kuo lelei. 22Pea na‘e tāpuaki‘i kinautolu ‘e he ‘Otua, ‘o pehē, Mou fua, mo fakatokolahi, mo fakafonu ‘a e ngaahi tahi, pea ke tokolahi ‘a e manupuna ‘i he fonua. 23Pea na‘e efiafi, pea na‘e pongipongi; ko hono ‘aho nima ia."
‘I he ‘aho hono nima´ na‘e fakatupu 'e he 'Otua´ 'a e fanga manupuna he ‘atā´ mo e fanga ika mo e me'a mo'ui kotoa pē he tahi´; pea Ne tu'utu'uni ke nau fakatokolahi mo fakafonu e ngaahi tahi´, pea pehē ke tokolahi mo e fanga manupuna 'i he ‘atā´.(1:20-23) ―Pea folofola ʻa e ʻOtua´, Ke ngāue ʻa e ngaahi vai´ ʻi he meʻa moʻui ʻoku ngaolo´, pea ke puna ʻa e manupuna´ ʻi he funga fonua´ mo e mata ʻo e langi´……. pea naʻe ʻafio ki ai ʻa e ʻOtua´ kuo lelei. Pea naʻe tāpuakiʻi kinautolu ʻe he ʻOtua´, ʻo pehē, Mou fua, mo fakatokolahi, mo fakafonu ʻa e ngaahi tahi´, pea ke tokolahi ʻa e manupuna ʻi he fonua´. Pea naʻe efiafi, pea naʻe pongipongi; ko hono ʻaho nima´ ia. Ne kamata he ‘aho ni ‘a e ‘asi mai ha ngaahi le‘o he māmani´, ‘a e le‘o ‘o e fanga manupuna´ he ‘atā.
Lotu: 'E ‘Otua, ‘oku ou fakamālō atu Ho’o fakatupu mai ‘a e fanga manupuna´ mo e fanga ika´, Ho’o tokateu tokamu’a ma’ae tangata´ ma’a ‘ene fiema’u´ ke ne ta’imālie ‘i Ho’o ngaahi fakanaunau´. ‘I Ho Huafa´ Sīsū, ‘Emeni.
No comments:
Post a Comment