FAKATUPU ‘O ‘IVI
Veesi Lauloto: 2 Kolinito 5:21
"Naʻa Ne ngaohi ko e koto angahala ʻa e Tokotaha ko ia naʻe ʻikai te Ne ongona ha angahala´, koeʻuhiā ko kitautolu; koeʻuhi´ ke tau hoko ai ʻiate Ia ko e koto māʻoniʻoni fakaʻOtua."
Senesi 2:18-25
"18Pea folofola ‘a Sihova ‘Elohimi: ‘Oku ‘ikai lelei ki he tangata ke toko taha; ka u ngaohi ma‘ana ha tokoni ke ‘ao mo ia. 19Pea ngaohi ‘e Sihova ‘Elohimi mei he kelekele ‘a e fanga manu kotoa pē ‘o e fonua, pea mo e manupuna kehekehe ‘o e langi; ‘o ne ‘omi ki he tangata ke vakai pe ko e hā ha hingoa te ne ‘ai ki ai: pea ‘ilonga ha hingoa ne ‘ai ‘e he tangata ki he me‘a mo‘ui takitaha ko hono hingoa leva ia. 20Pea fakahingoa ‘e he tangata ‘a e ngaahi fa‘ahinga manu lalata, mo e manupuna ‘o e langi, mo e ngaahi fa‘ahinga manu kaivao; ka ki he tangata na‘e ‘ikai te ne ‘ilo ha tokoni ke ‘ao mo ia. 21Pea fakatō ‘e Sihova ‘Elohimi ki he tangata ha mohe ma‘u, ‘o ne mohe: pea na‘a ne unuhi hono hui vakavaka ‘e taha, ‘o ne fetongi kakano ke ma‘opo‘opo; 22pea ko e hui vakavaka na‘a ne to‘o mei he tangata na‘e fa‘u ‘aki ia ‘e Sihova ‘Elohimi ha fefine, ‘o ne ‘omi ia ki he tangata. 23Pea pehē ‘e he tangata, Ko e fai ko eni ko e hui mei hoto hui, mo e kakano mei hoto kakano: ‘e fakahingoa eni ko e Fefine, koe‘uhi na‘e to‘o ia mei he Tangata. 24Ko ia ‘e tukuange ‘e he tangata ‘ene tamai mo ‘ene fa‘ē, kae pīkitai ki hono uaifi: pea te na hoko ko e kakano pē taha. 25Pea na‘a na fakatou telefua, ‘a e tangata mo hono uaifi, ka na‘e ‘ikai te na mā."
Na‘e to e 'omi foki 'e he 'Otua´ 'a e manu totolo mo e manupuna kotoa pē kia 'Atama ke nau nofo, pea ke ne fakahingoa (2:19-20). Na‘e ‘ikai ha monumanu ia na‘e fekai, na‘a nau lalata kotoa pē. Pea neongo ‘a e fakalata ‘o e nofo ‘a ‘Atama mo e fanga manu´ he fu‘u ngoue faka‘ofo‘ofa ‘o Palataisi´, ka na‘e ‘afio‘i ‘e he ‘Otua´, pea Ne finangalo ke to e fakatupu ha taha ke tokoni mo feohi mo talatalanoa mo ‘Atama, ko ia na‘a Ne fakamohe‘i leva ‘a ‘Atama, ka Ne unuhi hono fo‘i hui ‘e taha mei hono vakavaka´, ‘o Ne ngaohi mei ai ‘a e fefine´, ke ne hoko ko e uaifi mo e tokoni ‘o ‘Atama. Na‘e fakahingoa ‘e ‘Atama ‘a e fefine´ ko ‘Ivi (2:18, 21-25). Na‘e to e fakalata aipē ‘ena nofo he ngoue´.
Lotu: Lotu ‘o kole ki he ‘Otua´ ke Ne tokoni atu ke ke mo’ui ‘apasia ‘Otua mo faka’apa’apa ‘o hangē ko ia na’e pehē ‘a e ‘uluaki ongomātu’a´.
No comments:
Post a Comment