Tokonaki 7 Sanuali, 2017

‘AHO HONO FITU

Veesi Lauloto: Hepelu 11:3 

"Ko tui ……., ne langa ‘a e ‘univeesi´, ‘e he Folofola ‘a e ‘Otua´……"

Senesi 2:1-4

"1Pea ko eni kuo ‘osi ‘a e ngaahi langi mo māmani, mo honau ngaahi hōsitē. 2Pea na‘e faka‘osi ‘e he ‘Otua ‘i hono ‘aho fitu ‘a e ngāue na‘a ne fai; pea ne mālōlō ‘i hono ‘aho fitu mei he ngāue kehekehe na‘a ne fai.   3Pea na‘e tāpuaki‘i ‘e he ‘Otua ‘a e ‘aho ko hono fitu, mo ne tapui ia: koe‘uhi ko ia ia na‘a ne mālōlō ai mei he‘ene ngāue kotoa pē, ‘io, mei he fakatupu me‘a mo ngaohi me‘a ‘e he ‘Otua. 4Ko e tohi eni ‘o e hako ‘o langi mo māmani, ‘o kamata mei hono fakatupu, mei he ‘aho na‘e ngaohi ai ‘e Sihova ‘Elohimi ‘a māmani mo e langi."

‘I he ‘aho hono fitu´, na‘e mālōlō leva ‘a e 'Otua´ mei He‘ene ngāue kotoa pē, he kuo ‘osi mo kakato ‘Ene fakatupu´, pea kuo Ne fiemālie ki ai. Ko e ‘aho ai pē ‘eni ‘oku mālōlō ai ‘a e kalisitiane´ mei he ngāue ‘aho ngofua kotoa pē, ke ne nofo taha ke lotu pē mo feohi mo hū ki he ‘Otua´ (Senesi 2:1- 4) pea na’a Ne mālōlō ‘i hono ʻaho fitu´ mei he ngaūe kehekehe naʻa Ne fai´. Pea naʻe tāpuakiʻi ʻe he ʻOtua´ ʻa e ʻaho ko hono fitu´, mo Ne tapui ia: koeʻuhi´ ko ia ia naʻa Ne mālōlō ai mei Heʻene ngāue kotoa pē, ʻio, mei he fakatupu meʻa mo ngaohi meʻa ʻe he 'Otua´…...” ‘Oku tau fakahaa‘i ‘etau hounga‘ia he fu‘u ngāue kāfakafa kuo fai ‘e hotau ‘Otua´ ma‘a kitautolu ko e kalauni ‘o ‘Ene me‘a fakatupu´, ‘aki ‘etau tuli ma‘upē ke fai Hono finangalo´.

Lotu: 'E Otua, ‘oku ou fakamālō atu Ho’o fakatupu haohaoa mo kakato, ‘o kau ai kimautolu´. Tokoni’i au keu tui ma’u ki Ho’o ‘Afio´. ‘I Ho Huafa´ Sīsū, ‘Emeni.