Sapate 8 Sanuali, 2017

‘ATAMA & NGOUETAPU KO ‘ITENI

Veesi Lauloto: 2 Kolinito 5:21 

"Naʻa Ne ngaohi ko e koto angahala ʻa e Tokotaha ko ia naʻe ʻikai te Ne ongona ha angahala´, koeʻuhiā ko kitautolu; koeʻuhi´ ke tau hoko ai ʻiate Ia ko e koto māʻoniʻoni fakaʻOtua."

Senesi 2:5-17

"5Pea kuo te‘eki ke ‘i he fonua ‘a e ngaahi ‘akau kehekehe ‘o e ngoue, pea kuo te‘eki ke tupu ‘a e mohuku kehekehe ‘o e ngoue; koe‘uhi kuo te‘eki ke faka‘uha ki he fonua ‘e Sihova ‘Elohimi, mo e ‘ikai ha tangata ke ngoue‘i ‘a e kelekele. 6Pea na‘e ‘alu hake ‘a e mao mei māmani, ‘o fakaviviku ‘a e funga kelekele kotoa. 7Pea na‘e ngaohi ‘e Sihova ‘Elohimi ‘a e tangata mei he efu ‘o e kelekele, ‘o ne hō ki hono ava‘i ihu ‘a e mānava mo‘ui; pea na‘e hoko ‘a e tangata ko e kakano mo‘ui. 8Pea na‘e tō ‘e Sihova ‘Elohimi ha ngouetapu ‘i ‘Īteni, ‘i hahake; pea ne tuku ai ‘a e tangata kuo ne ngaohi. 9Pea na‘e fakatupu ‘e Sihova ‘Elohimi mei he kelekele ‘a e ‘akau kehekehe na‘e hā faka‘ofo‘ofa, pea lelei ki he kai; kae‘uma‘ā ‘a e ‘Akau ‘o e Mo‘ui ‘i he loto ngoue, mo e ‘Akau ‘o e ‘Ilo-‘o-e-lelei-mo-e-kovi. 10Pea na‘e ‘i ai ha vaitafe na‘e tupu ‘i ‘Īteni ke fakaviviku ‘a e ngoue; pea ‘i he‘ene hū kitua‘ā ne mavahevahe ko e matavai ‘e fā. 11Ko e hingoa ‘o e ‘uluaki ko Pīsoni: ko ia ia ‘oku ne takatakai ki hono kotoa ‘o e fonua ko Havila, ‘a e potu ‘oku ‘i ai ‘a e koula; 12pea ‘oku lelei ‘a e koula ‘o e fonua ko ia: ‘oku ‘i ai ‘a e mata‘itofe mo e maka ‘onike. 13Pea ko e hingoa ‘o hono ua ‘o e vaitafe ko Kīhoni: ko ia ia ‘oku ‘alu takatakai ki hono kotoa ‘o e fonua ko Kusa. 14Pea ko e hingoa ‘o hono tolu ‘o e vaitafe ko Hitikeli: ko ia ia ‘oku ‘alu ‘i he tafafonua ‘o ‘Āsilia. Pea ko e vaitafe ko hono fā ko ‘Eufaletesi ia.
15Pea na‘e ‘ave ‘a e tangata ‘e Sihova ‘Elohimi, ‘o ne tuku ia ‘i he ngouetapu ‘o ‘Īteni ke ngoue‘i mo tauhi ia. 16Pea na‘e tu‘utu‘uni ‘e Sihova ‘Elohimi ki he tangata, ‘o pehē, ‘E lelei ‘aupito ho‘o kai mei he ngaahi ‘akau kehekehe ‘o e ngoue; 17ka ko e ‘Akau ‘o e ‘Ilo-‘o-e-lelei-mo-e-kovi ‘e ‘ikai te ke kai mei ai: he ko e ‘aho te ke kai mei ai kuo pau te ke mate."

Na’e tuku ‘e he ‘Otua´ ‘a e ‘uluaki tangata´ ki he ngouetapu kuo Ne tō´ pea Ne tuku ki he tangata´ ke ne ngoue‘i mo tauhi ia. (2:8-9,15) Na‘e ‘ofa mo‘oni ‘a e ‘Otua´ ‘ia ‘Atama, ka na'a Ne tu'utu'uni kia 'Atama ‘e ngofua ke ne kai mei he 'akau kotoa 'i he loto ngoue´, tukukehe pē 'a e 'Akau 'o e 'Ilo-'o-e-lelei´-mo-e-kovi´, ko e tautea ‘o e talangata‘a ki he fekau´, ko e mate (2:16-17). Na‘e ‘ikai ke fakamālohi‘i ‘e he ‘Otua´ ‘a ‘Atama ke ne talangofua ange, na‘a ne tuku ke tau‘atāina pē ‘a ‘Atama ki he fili ‘oku ne fai´, he na‘a Ne faka‘amu ko e ‘ofa mo e talangofua ange kiate Ia´, ‘oku te fai loto lelei ki ai, ko hoto loto´ mo‘oni ia, ‘oku ‘ikai ko ha‘ate fai manavahē koe‘uhi´ ko e tautea´, pe ko ‘ete fai´ he na‘e fakamālohi‘i kita. Ko e ako eni kiate kitautolu fānau ke tau ‘ofa ki hotau ‘Otua mo talangofua ki He‘ene Folofola´, loto lelei ki ai, ‘ikai ko ha‘ate fai manavahē.

Lotu: Lotu ‘o kole ki he ‘Otua´ ke Ne tokoni atu ke ke fiefia he kau He’ene fānau´, pea ke ke ‘ofa mo talangofua ki Ai, ‘aki ho kotoa´ mo e loto fiefia ki ai.