Veesi Lauloto: Hepelu 11:3
"Ko tui ……., ne langa ‘a e ‘univeesi´, ‘e he Folofola ‘a e ‘Otua´……"
Senesi 1:1-5
"1‘I he kamata‘anga na‘e fakatupu ‘e he ‘Otua ‘a e ngaahi langi mo māmani. 2Pea na‘e maomaonganoa ‘a māmani mo lala; pea na‘e fakapo‘uli ‘a e funga ‘o e loloto. Pea na‘e ‘ō‘ōfaki ‘e he Laumālie ‘o e ‘Otua ki he fukahi vai.3Pea folofola ‘a e ‘Otua, Ke maama mai: pea na‘e maama. 4Pea ‘afio ‘e he ‘Otua ki he maama, kuo lelei: pea na‘e vahe‘i ‘e he ‘Otua ‘a e maama mei he po‘uli. 5Pea na‘e fakahingoa ‘e he ‘Otua ‘a e maama ko e ‘Aho, pea ne fakahingoa ‘a e po‘uli ko e Pō. Pea na‘e efiafi, pea na‘e na‘e pongipongi; ko e ‘uluaki ‘aho ia."
Ko e 'uluaki tohi he Tohitapu´ 'oku ui ia ko e tohi Sēnesi´, pea ko e 'uhinga 'o e Sēnesi´ ko e kamata‘anga, he 'oku talanoa 'a e tohi Sēnesi´ ki he Fakatupu´ mo e kamata‘anga pe tupu‘anga 'o e me‘a kotoa pē. Tala mai he 'uluaki veesi 'o e tohi Sēnesi´, ʻI he kamataʻanga´, naʻe fakatupu ʻe he ʻOtua´ ʻa e ngaahi langi´ mo māmani”. Naʻe maomaonganoa ʻa māmani mo lala; pea naʻe fakapoʻuli tu‘u 'a e funga ʻo e loloto´, ka naʻe ʻōʻōfaki ʻe he Laumālie ʻo e ʻOtua´ ki he fukahi vai´. Pea kamata leva 'a e fakatupu´; na‘a Ne fakatupu 'a e me‘a kotoa pē mei he hala‘ataa´, 'aki 'Ene folofola pē pea 'i ai. Ko hotau 'Otua´ fānau ko e 'Otua mālohi mo māfimafi. Na‘a Ne fakatupu he 'uluaki 'aho´ 'a e maama´. “Pea folofola ʻa e ʻOtua´, Ke maama mai: pea naʻe maama. Pea ʻafio ʻe he ʻOtua ki he maama´, kuo lelei: pea naʻe vaheʻi ʻe he ʻOtua ʻa e maama´ mei he poʻuli´. Pea naʻe ui ʻe he ʻOtua´ ʻa e maama´ ko e ʻAho, pea ne ui ʻa e poʻuli´ ko e Pō” (Senesi 1:3-5).
Lotu: ‘E ‘Otua, ‘oku ou fakamālō atu Ho’o hoko ko hoku ‘Otua´. Tokoni’i au ke u hounga’ia ma’upē Ho’o fakatupu au Ma’au´. ‘I Ho Huafa´ Sīsū, ‘Emeni.
No comments:
Post a Comment