Pulelulu 4 Sanuali, 2017

‘AHO HONO FA

Veesi Lauloto: Hepelu 11:3 

"Ko tui ……., ne langa ‘a e ‘univeesi´, ‘e he Folofola ‘a e ‘Otua´……"

Senesi 1:14-19

"14Pea folofola ‘a e ‘Otua, Ke ai ha ngaahi māma‘anga ‘i he ‘atā ‘o e langi mo vahe‘i ‘a e ‘aho mei he pō: pea ke tu‘u mo‘o ngaahi faka‘ilonga, pea mo‘o ngaahi kuonga, pea mo‘o ngaahi ‘aho mo ngaahi ta‘u: 15pea ke tu‘u mo‘o ngaahi māma‘anga ‘i he ‘atā ‘o e langi ke fakamaama ki māmani: pea na‘e hoko ia. 16Pea na‘e ngaohi ‘e he ‘Otua ‘a e ongo māma‘anga lalahi; ko e māma‘anga lahi ke pule ki he ‘aho mo māma‘anga si‘i ke pule ki he pō, 17mo e ngaahi fetu‘u foki. Pea na‘e tuku kinautolu ‘e he ‘Otua ‘i he ‘atā ‘o e langi ke fakamaama ki māmani. 18Pea ke pule ki he ‘aho mo e pō, pea ke vahe‘i ‘a e maama mei he po‘uli. Pea na‘e ‘afio ki ai ‘a e ‘Otua, kuo lelei. 19Pea na‘e efiafi, pea na‘e pongipongi; ko hono ‘aho fā ia."

‘I he ‘aho hono fā´, na‘e folofola ai ‘a e ‘Otua´ ke ‘i ai ha ngaahi maama‘anga ‘i he langi´ ke nau fakamaama ki He‘ene fakatupu´ mo vahe‘i ‘a e ‘aho´ mei he po‘uli´. Pea folofola ʻa e ʻOtua´, ke ai ha ngaahi maamaʻanga ʻi he ʻatā ʻo e langi´mo vaheʻi ʻa e ʻaho´ ʻmei he pō´; pea ke tuʻu moʻo ngaahi maamaʻanga ʻi he ʻatā ʻo e langi´ ke fakamaama ki māmani: pea naʻe hoko ia. Pea naʻe ʻafio ki ai ʻa e ʻOtua´, kuo lelei. Pea naʻe efiafi, pea naʻe pongipongi; ko hono ʻaho fā´ ia.” Na'e ulo mai leva mo fakamaama ‘a e la'ā´ ‘i he 'aho´, pea ko e māhina´ leva mo e ngaahi fetu'u´ ‘i he po‘uli´… ; (1:14-19) Na‘e takitaha tu‘u pē mei hono feitu‘u ‘o ulo mei ai ‘o a‘u mai ki he ‘aho ni, ‘ikai ha fepakipaki pe palopolema ‘e taha. ‘Ange‘ange ai pē ‘etau ‘ofa mo tui falala kakato ki hotau ‘Otua´ fānau, tau sio atu He‘ene teuteu‘i mo fakatupu mai ‘a e lelei taha´ ma‘a kitautolu´.

Lotu: ‘E 'Otua, ‘oku ou fakamālō atu Ho’o fakatupu mai ‘a e ngaahi maama’anga´, la’ā´, māhina´ mo e ngaahi fetu’u´ ke nau ulo mo tala ‘a e ngeia ‘o e ‘Afiona´ . ‘I Ho Huafa´ Sīsū, ‘Emeni.