Tusite 31 Sanuali, 2017

AKONAKI 2 – FANONGO PEA TALANGOFUA

Veesi Lauloto: Senesi 6:22 

"Pea fai ‘e Noa, ‘ilonga ha me’a na’e tu’utu’uni kiate ia ‘e he ‘Otua, na’a ne fai ia."

Semisi 1:22

"22Ka mou hoko ko e kau fai ki he folofola, ‘o ‘ikai ko e kau fanongo pē, ‘o mou kākaa‘i kimoutolu."

Ka mou hoko ko e kau fai ki he Folofola´, ʻo ʻikai ko e kau fanongo pē, ʻo mou kākāʻi kimoutolu‖. Neongo ‘oku mahu‘inga ‘a e fanongo ki he Folofola´, ka ‘oku mahu‘inga lahi ange ‘a e talangofua ‘o fai ki ai´. ‘E lava pē ke tau sio ki he‘etau ngaahi tō‘onga mo‘ui´ mo hotau ‘ulungaanga´, kapau ‘oku ‘i ai ha liliu mo ha fakalakalaka ke to e lelei ange, mahino ‘oku ola lelei ‘ete lau Folofola´, ‘ete taimi mo e ‘Eiki´, ‘ete lotu lilo´, ‘ete ma‘u ‘a e ngaahi ma‘u‘anga kelesi´. Ka ‘okapau ‘oku ‘ikai ha liliu ia, ko e kovi tatau´ aipē, tā ko e fu‘u koto fanongo pē mo sio, kei matolu tu‘u pē angahala´. Talamai he‘etau veesi ‘i ‘olunga´, ko ia ‘oku fanongo pē ‘o ‘ikai talangofua ki he Folofola´, ‘oku ne kākāʻi pe ‘e ia ia. Fakatauange fānau ke tau hangē ko Noa´ ‘i he‘etau veesi lauloto´. Tau fanongo ki he Folofola´, pea tau talangofua ‘o fai ki ai, pea tau iku ai ki Langi.

Lotu: 'E ‘Otua, tokoni’i mu’a au ke u pōto’i he fai Ho’o mo’ui´, ke u fanongo pea u talangofua ki Ho’o ngaahi tu’utu’uni´. ‘I Ho Huafa´ Sīsū, ‘Emeni.

Monite 30 Sanuali, 2017

AKONAKI 1 – TAUTEA ‘O E ANGAHALA´ KO E MATE

Veesi Lauloto: Senesi 6:22 

"Pea fai ‘e Noa, ‘ilonga ha me’a na’e tu’utu’uni kiate ia ‘e he ‘Otua, na’a ne fai ia."

Loma 3:23

"He ‘oku ‘ikai ha fai kehekehe; he kuo fai angahala kotoa pē pea ‘oku ‘ikai te nau a‘usia ‘a e hōifua ‘a e ‘Otua"

He ʻoku ʻikai ha fai kehekehe: he kuo fai angahala kotoa pē, pea ʻoku ʻikai te nau aʻusia ʻa e hōifua ʻa e ʻOtua´‖. Ko e tu‘unga ia ne a‘u ki ai e tangata´ he kuonga ‘o Noa´, ‘o fakatomala ai ‘a e ‘Otua´ He‘ene ngaohi ‘a e tangata´ (Senesi 6:6), pea tu‘unga ai ‘Ene tafi‘i ai e tangata´ mei he māmani´ ‘aki ‘a e lōmaki´. Ko e angahala´ ‘oku ne ‘ai ‘a e ‘Otua´ ke hanga kehe meiate kitautolu, ‘o hangē ha fu‘u ‘ā vahevahe ‘oku tu‘u ‘i hotau vā mo e ‘Otua´, ‘o ne ta‘ofi ‘a e fehā‘aki´ mo e feohi´. Ka ko e angahala kotoa pē ‘oku malava ke fakamolemole‘i... Ko ia ai fānau, tau to e ‘unu mālohi ange ki he ‘A‘ake ‘o e mo‘ui ta‘engata´, ‘a Kalaisi, ko Ia hotau Fakamo‘ui´. Tokanga he ngaahi mio‘i ‘a e tēvolo´, he te ne feinga‘i koe ke ke faiangahala, ke ke kaungā mate mo ia, he ko e tautea ‘o e angahala´ ko e mate.

Lotu: ‘E ‘Otua, tokoni mai ke u unga ma’u atu pē kiate Koe, ke u hao mei he ngaahi fakatauele ‘a e tēvolo´. ‘I Ho Huafa´ Sīsū, ‘Emeni.

Sapate 29 Sanuali, 2017

ALEAPAU (KOVINĀNITE) ‘A E ‘OTUA´ MO NOA

Veesi Lauloto: Senesi 6:22 

"Pea fai ‘e Noa, ‘ilonga ha me’a na’e tu’utu’uni kiate ia ‘e he ‘Otua, na’a ne fai ia."

Senesi 8:22

"22Lolotonga ‘a e tu‘u ‘a māmani, ko e tō ta‘u mo e ututa‘u, mo e momoko mo e pupuha, mo e fa‘ahita‘u māfana mo e fa‘ahita‘u momoko, mo e ‘aho mo e pō, ‘e ‘ikai ngata ia."

Senesi 9:13-17
"13kuo u ‘ai ‘eku ‘umata ‘i he ngaahi ‘ao; pea ‘e hoko ia ko e faka‘ilonga fuakava ‘i he vaha‘a ‘o‘oku mo māmani. 14Pea ka faifai pea u tānaki ‘ao mai ki he fonua, pea ‘e hā ‘a e ‘umata ‘i he ‘ao, 15pea te u manatu ai ki he‘eku fuakava, ‘a e fuakava ‘a‘aku mo kimoutolu mo e fa‘ahinga me‘a mo‘ui kehekehe, ‘io, ‘a e kakano kotoa pē; pea ‘e ‘ikai toe hoko ‘a e vai ko e lōmaki, ‘o maumau‘i ‘a e kakano kotoa pē. 16Pea ‘e tu‘u ‘a e ‘umata ‘i he ‘ao, pea te u mamata ki ai mōku fakamanatu ki he fuakava ta‘engata ‘a e ‘Otua mo e me‘a mo‘ui kotoa pē, ‘io, ‘a e kakano kotoa pē ‘oku ‘i he fonua. 17Pea folofola ‘a e ‘Otua kia Noa, Ko eni ia ‘a e faka‘ilonga ‘o e fuakava kuo u fokotu‘u ‘iate au mo e kakano kotoa pē ‘oku ‘i he fonua."

Pea folofola ʻa e ʻOtua, ―Kuo U ʻai ʻEku ‘umata´ ʻi he ngaahi ʻao´; pea ʻe hoko ia ko e fakaʻilonga fuakava ʻi he vahaʻa ‘Oʻoku mo māmani´. Pea ka faifai pea hā ʻa e umata´ ʻi he ʻao´, pea te U manatu ai ki Heʻeku fuakava´, ʻa e fuakava ‘Aʻaku mo kimoutolu´ mo e faʻahinga meʻa moʻui kehekehe, ʻio, pea ʻe ʻikai toe hoko ʻa e vai´ ko e lōmaki, ʻo maumauʻi ʻa e kakano kotoa pē. Pea ko e tuʻu ʻa e ‘umata´ ʻi he ʻao´, ko e fakamanatu ki he fuakava taʻengata ʻa e ʻOtua´ mo e meʻa moʻui kotoa pē, ʻio ʻa e kakano kotoa pē ʻoku ʻi he fonua´. Fakafeta‘i ki he ‘Otua´ fānau, ko e ‘Otua faitotonu, ka ‘oku ‘ofa mo meesi.

Lotu: ‘E ‘Otua, ‘oku hounga mo’oni kiate au Ho’o fa’a faka’atu’i mai hoku ngata’anga´ ‘o Ke tuku taimi ma’aku ke u fakatomala mo vete ‘eku ngaahi fehalaaki´. Ako’i mai Ho’o mo’ui´ kiate au 'i Ho Huafa´ Sīsū, ‘Emeni.

Tokonaki 29 Sanuali, 2017

FEILAULAU FAKAFETA’I

Veesi Lauloto: Senesi 6:22 

"Pea fai ‘e Noa, ‘ilonga ha me’a na’e tu’utu’uni kiate ia ‘e he ‘Otua, na’a ne fai ia."

Senesi 8:20-21

"20Pea na‘e fokotu‘u ‘e Noa ha ‘ōlita kia Sihova, pea ne to‘o ha ni‘ihi ‘o e fa‘ahinga manu kehekehe na‘e ngofua, mo e ni‘ihi mei he fa‘ahinga manupuna kehekehe na‘e ngofua, ‘o ne fai‘aki ha ngaahi feilaulau ‘i he ‘ōlita. 21Pea na‘e nanamu ‘e Sihova ki he ngangatu fakahōifua; pea pehē ‘e Sihova ‘i hono finangalo, ‘E ‘ikai te u toe fakamala‘ia ‘a e kelekele koe‘uhi ko e tangata, he ko e filio‘i ‘a e loto ‘o e tangata ‘oku kovi mei he‘ene tamasi‘i; pea ‘e ‘ikai te u toe taa‘i ‘a e me‘a mo‘ui kotoa pē, ‘o hangē ko ia kuo u fai."

Pea naʻe fokotuʻu ʻe Noa ha ‘olita kia Sihova, ‘o ne toʻo ha niʻihi ʻo e faʻahinga manu kehekehe naʻe ngofua´, mo e niʻihi mei he faʻahinga manupuna kehekehe naʻe ngofua´, ʻo ne fai ʻaki ha ngaahi feilaulau ʻi he ‘olita´. Pea naʻe nanamu ʻe Sihova ki he ngangatu fakahōifua´; pea pehē ʻe Sihova ʻi hono finangalo´, ʻE ʻikai te U toe fakamalaʻia ʻa e kelekele´ koeʻuhi´ ko e tangata´, he ko e filioʻi ʻa e loto ʻo e tangata´ ʻoku kovi mei heʻene tamasiʻi´; pea ʻe ʻikai te u to e taaʻi ʻa e meʻa moʻui kotoa pē ʻo hangē ko ia kuo u fai´. Tau sio he Folofola´ fānau ki he fakamolemole mo e ‘ofa ‘a e ‘Otua´ ki he tangata´. ‘Oku Ne fakatokanga kae faiangahala pē tangata´ ia, ‘oku Ne tuku taimi mo fakatotoka, pea a‘u pē ‘o Ne hilifaki honau tautea. Ko e tautea ‘o e lōmaki´ ne fe‘unga pē ia mo e fa‘ahinga tūkunga ‘o e faiangahala ‘a e tangata´ he taimi ‘o Noa´. Ka ko ‘eni kuo palōmesi ‘a e ‘Otua´ he‘ikai ke Ne to e tautea lōmaki ‘a e tangata´, tali pē ki he ‘aho fakamaau´.

Lotu: ‘E ‘Otua, tokoni mai ke u ongongofua ki Ho’o ngaahi fakatokanga´, pea ke u tulituli ke talangofua ma’upē kiate Koe .‘I Ho Huafa´ Sīsū, ‘Emeni.

Falaite 27 Sanuali, 2017

HŪ KI TU‘A MEI HE ‘A’AKE

Veesi Lauloto: Senesi 6:22 

"Pea fai ‘e Noa, ‘ilonga ha me’a na’e tu’utu’uni kiate ia ‘e he ‘Otua, na’a ne fai ia."

Senesi 8:15-19

"15Pea folofola ‘a e ‘Otua kia Noa, ‘o pehē, 16Hū atu koe mei he ‘a‘ake, pea ō mo koe ‘a ho uaifi, mo ho‘o fānau, mo e ngaahi uaifi ‘o ho‘o fānau. 17Pea ko e fanga manu kotoa pē ‘oku ‘iate koe, ‘a ia ne ‘omi mei he fa‘ahinga kakano kehekehe, ‘a e manupuna mo e manu lalata, mo e me‘a kotoa pē ‘oku totolo ‘i he fonua, te ke ‘alu atu mo koe ki tu‘a; pea, ke hangē ha neveneve ‘enau tupu ‘i he fonua, pea ke nau mafola ‘i māmani. 18Pea ‘alu ki tu‘a ‘a Noa, pea ō mo ia ‘a ‘ene fānau, mo hono uaifi, mo e ngaahi uaifi ‘o ‘ene fānau: 19ko e fanga manu kehekehe, ‘a e manu totolo, mo e manupuna, ‘a e me‘a kehekehe ‘oku ngalengale ‘i he funga fonua, ‘i honau ngaahi fa‘ahinga, na‘a nau ‘alu atu mei he ‘a‘ake."

Pea folofola ʻa e ʻOtua´ kia Noa, ke nau hū atu ā ki tu‘a mo hono fāmili´ kotoa mo e fanga manu´, pea tukuange atu ke nau tupu ʻi he fonua´, mo nau mafola ʻi māmani. Pea ʻalu ki tuʻa ʻa Noa, pea ō mo ia ʻa ʻene fānau´, mo hono uaifi´, mo e ngaahi uaifi ‘o ʻene fānau´, pehē ki he fanga manu´ kotoa, ʻa e manu totolo, mo e manupuna, ʻa e meʻa kehekehe ʻoku ngalengale ʻi he funga fonua, ʻi honau ngaahi faʻahinga, naʻa nau ʻalu atu mei he ‘a‘ake´. Na‘e toki fokotu'u 'e Noa ha 'olita, 'o ne to‘o ha ni‘ihi ‘o e fangamanu na‘e ngofua´ ‘o ne fai ‘a e feilaulau ki he 'Otua´ (8:20)

Lotu: 'E ‘Otua, ko e fakakoloa mo’oni kiate au he’eku kau he tāpuaki ‘o e hoko ko e fānau ‘a e ‘Afiona´. Tokoni’i au ke u muimui pau ki Ho’o ngaahi tu’utu’uni ma’aku ‘i Ho’o Folofola´ pehē ki he’eku mātu’a´. ‘I Ho Huafa´ Sīsū, ‘Emeni.
.

Tu'apulelulu 26 Sanuali, 2017

TU’U ‘A E ‘A E LŌMAKI

Veesi Lauloto: Senesi 6:22 

"Pea fai ‘e Noa, ‘ilonga ha me’a na’e tu’utu’uni kiate ia ‘e he ‘Otua, na’a ne fai ia."

Senesi 8:1-14

"1PEA manatu ‘a e ‘Otua kia Noa, pea ki he ngaahi manu kaivao mo e ngaahi manu lalata na‘e ‘iate ia ‘i he ‘a‘ake: pea na‘e fakaangi ‘e he ‘Otua ha matangi ki he funga fonua, pea taumatala ai ‘a e vai; 2pea na‘e tāpuni ‘a e ngaahi matavai ‘o e loloto mo e ngaahi kātupa ‘o e langi, pea na‘e tuku ‘ene lōvai mei langi; 3pea na‘e foki atu ‘a e vai mei he fonua, ‘o fai ma‘u pē ‘ene foki; pea ‘i he ‘osi ‘a e ‘aho ‘e teau mā nimangofulu kuo si‘isi‘i ai ‘a e vai. 4Pea toka ‘a e ‘a‘ake ‘i hono fitu ‘o e māhina, ‘i hono ‘aho hongofulu mā fitu ‘o e māhina, ki he ngaahi mo‘unga ‘o ‘Alalate. 5Pea ko e vai na‘e faka‘a‘au hifo ai pē ‘o a‘u ki hono hongofulu ‘o e māhina: ‘i hono māhina hongofulu ‘i he ‘uluaki ‘aho ‘o e māhina, na‘e toki hā ‘a e ngaahi tumutumu‘i mo‘unga. 6Pea kuo hili ha ‘aho ‘e fāngofulu pea to‘o ‘e Noa ‘a e kātupa ‘o e ‘a‘ake kuo ne ngaohi; 7pea ne tuku atu ‘a e lēveni, pea ‘alu atu pē ia mo foki, kae‘oua ke mātu‘u ‘a e vai ‘i he fonua. 8Pea ne tuku atu ‘a e lupe, ke vakai pe kuo manifinifi ‘a e vai ‘i he funga kelekele; 9ka na‘e ‘ikai ‘ilo ‘e he lupe ha potu ke tu‘u ai hono ‘aofiva‘e ke ne mālōlō, pea ne foki kiate ia ki he ‘a‘ake, he ko e vai na‘e kei ‘i he funga fonua kotoa: pea ne ala ‘o puke ia ‘o ne fakahū mai ki he ‘a‘ake. 10Pea toe tatali ia ke hili mo ha ‘aho ‘e fitu; ‘o ne toe tuku atu ‘a e lupe mei he ‘a‘ake; 11pea ha‘u ‘a e lupe kiate ia fe‘unga mo ‘ene efiafi; pea tā kuo ‘i hono ngutu ha lou‘i ‘ōlive mata: pea ‘ilo ai ‘e Noa kuo manifi ‘a e vai ‘i he fonua. 12Pea toe tatali ia ke hili mo ha ‘aho ‘e fitu; ‘o ne tuku atu ‘a e lupe; pea na‘e ‘ikai toe foki ia kiate ia. 13Pea faifai pea ‘i hono onongeau mā taha ta‘u ‘i he ‘uluaki ‘aho ‘o e ‘uluaki māhina, kuo mātu‘u ‘a e vai ‘i he fonua: pea tatala ‘e Noa ‘a e ‘ato ‘o e ‘a‘ake, ‘o ne fakasio, pea tā kuo mātu‘u ‘a e funga kelekele. 14Pea ‘i hono ua ‘o e māhina, ‘i hono ‘aho uofulu mā fitu ‘o e māhina, kuo mōmoa ‘a e fonua."

Pea manatu ʻa e ʻOtua´ kia Noa, pea ki he fangamanu´ kotoa: pea Ne fakaangi ha matangi ki he funga fonua´, pea Ne tāpuni ʻa e ngaahi matavai ʻo e loloto´ mo e ngaahi kātupa ʻo e langi´, pea ʻi he ʻosi ʻa e ʻaho ʻe 150 kuo siʻisiʻi ai ʻa e vai´. Na‘e toka ʻa e ‘a‘ake´ he ngaahi moʻunga ʻo Alalate´. Pea hili ha ʻaho ʻe 40 ne toʻo ʻe Noa ʻa e kātupa ʻo e ‘a‘ake´ pea ne tuku atu ha lēveni, pea ʻalu atu pe ia mo foki, he na‘e te‘eki mātuʻu ʻa e vai´ ʻi he fonua´. Pea ne tuku atu ʻa e lupe, ke vakai pe kuo manifinifi ʻa e vai´; ka naʻe ʻikai ʻilo ʻe he lupe´ ha potu ke tuʻu ai hono ʻaofivaʻe´ ke ne mālōlō. Pea toe tatali ia ke hili mo ha ʻaho ʻe fitu; ʻo ne toe tuku atu ʻa e lupe mei he ‘a‘ake´; pea haʻu ʻa e lupe´ kiate ia feʻunga mo e efiafi´; mo ha louʻi olive mata: pea ʻilo ai ʻe Noa kuo manifi ʻa e vai´ ʻi he fonua´. Pea toe tatali ia ke hili mo ha ʻaho ʻe fitu; ʻo ne tuku atu ʻa e lupe; pea naʻe ʻikai toe foki ia kiate ia. Pea toki tatala ʻe Noa ʻa e ʻato ʻo e ‘a‘ake´, ʻo ne fakasio, pea tā kuo mātuʻu ʻa e funga kelekele´.

Lotu: 'E ‘Otua, ‘Oku ou fakamālō atu he me’a’ofa fakalaumālie ‘oku ou ma’u´. Kapau ‘oku ou ma’u ‘a e me’a’ofa ‘o e manava’ofa´, tokoni mai ke u ngaue’aki ia ke u tokoni ki he kakai kehe´. ‘I Ho Huafa´ Sīsū, ‘Emeni.

Tusite 24 Sanuali, 2017

'A'AKE

Veesi Lauloto: Senesi 6:22 

"Pea fai ‘e Noa, ‘ilonga ha me’a na’e tu’utu’uni kiate ia ‘e he ‘Otua, na’a ne fai ia."

Senesi 6:10-22;

"10Na‘e ma‘u ‘e Noa ha foha ‘e toko tolu, ‘a Semi, ‘a Hami, pea mo Sēfeti. 11Pea kuo ka‘anga ‘a māmani ‘i he fofonga ki ai ‘a e ‘Otua, pea kuo opeope ‘i he fonua ‘a e fakamālohi. 12Pea na‘e ‘afio ‘a e ‘Otua ki māmani, pea tā kuo ka‘anga; he kuo fakaka‘anga ‘e he kakano kotoa pē hono ‘alunga ‘i māmani. 13Pea folofola ‘a e ‘Otua kia Noa, Kuo ongo mai kiate au kuo a‘u ‘a e kakano kotoa pē ki hono ngata‘anga; he ko e me‘a ‘iate kinautolu kuo opeope ‘i he fonua ‘a e fakamālohi; pea ko eni, te u faka‘auha kinautolu fakataha mo e fonua. 14Ke ke fa‘u mo‘ou ha ‘a‘ake ‘aki ‘a e ‘akau ko e kofa; te ke ngaohi ‘a e ‘a‘ake ke ‘ana‘ia, pea te ke vali ‘aki ha pulu mei loto mo tu‘a. 15Pea ko eni ‘a e me‘a te ke fai ki ai ‘i ho‘o fa‘u: Ko e lōloa ‘o e ‘a‘ake ko e kiupite ‘e tolungeau, ko e māukupu ko e kiupite ‘e nimangofulu, pea ko hono mā‘olunga ko e kiupite ‘e tolungofulu. 16Te ke ngaohi hano māma‘anga ‘o e ‘a‘ake, pea te ke fai hake ko e kiupite ‘e taha, pea ‘osi; pea ko e matapā ‘o e ‘a‘ake te ke ‘ai ‘i he kaokao; pea te ke ngaohi hono funga vaka lalo, mo hono ua, mo hono tolu. 17Pea ko au ē ‘oku ou teu ‘omi ‘a e lōmaki, ko e fu‘u vai ke ‘ufi‘ufi ‘a e fonua, ke faka‘auha ‘a e kakano kotoa pē ‘i he lalo langi ‘a ia ‘oku ‘i ai ha mānava mo‘ui: ‘ilonga ha me‘a ‘oku ‘i he fonua ‘e mate. 18Ka te u fakapapau ‘eku fuakava mo koe; pea te ke hū koe ki he ‘a‘ake, pea ‘e hū mo koe ho ngaahi foha, mo ho uaifi, mo e ngaahi uaifi ‘o ho ngaahi foha. 19Pea ko e me‘a ki he ngaahi me‘a mo‘ui kehekehe, ‘io, ‘a e ngaahi fa‘ahinga kakano, te ke fakahū ki he ‘a‘ake mei ai kotoa pē, ‘o tautau toko ua, ke fakamo‘ui kinautolu fakataha mo koe; ko e manu tangata mo ‘ene fefine. 20Ko e manupuna, fakafa‘ahinga, mo e manu lalata, fakafa‘ahinga, ‘a e me‘a ‘oku totolo ‘i he kelekele, fakafa‘ahinga, ko e toko ua mei ai takitaha ‘e ha‘u kiate koe ke fakamo‘ui. 21Pea ke ke hanga ‘o to‘o ma‘au ‘a e ngaahi fa‘ahinga me‘akai kehekehe, pea ke fa‘oaki atu ma‘ao me‘akai, ma‘au mo kinautolu. 22Pea fai ‘e Noa; ‘ilonga ha me‘a na‘e tu‘utu‘uni kiate ia ‘e he ‘Otua, na‘a ne fai ia."

Senesi 7:1-16
"1PEA folofola ‘a Sihova kia Noa, Hū koe mo ho fāmili kotoa ki he ‘a‘ake; he ko koe kuo u mamata ki ai ‘i he to‘utangata ni ‘oku tonu ho‘o fakafeangai kiate au. 2‘Ilonga ‘a e fa‘ahinga manu ngofua te ke hanga ‘o ma‘u mei ai ‘o taki fitunga‘ahoa, ko e manu tangata mo ‘ene fefine; kae tautau toko ua pē mei he manu ‘oku ‘ikai ngofua, ‘a e tangata mo ‘ene fefine. 3Ko e manupuna foki ‘o e ‘atā te ke taki fitunga‘ahoa mei ai, tangata mo fefine; mo fakaili ki he ngaahi fa‘ahinga ke nofo ‘i he funga fonua kotoa. 4He ‘oku toe pē ‘a e ‘aho ‘e fitu, pea u faka‘uha ki he fonua ‘o ‘aho fāngofulu mo pō fāngofulu; pea te u tafi mei he funga kelekele ‘a e me‘a mo‘ui kotoa pē kuo u ngaohi. 5Pea na‘e fai ‘e Noa ki he me‘a kotoa pē kuo tu‘utu‘uni ‘e Sihova kiate ia. 6Pea kuo a‘u ‘a Noa ki hono onongeau ta‘u, pea hoko ‘a e lōmaki vai ki he fonua. 7Pea hū ‘a Noa ki he ‘a‘ake, mo hono ngaahi foha mo hono uaifi mo e ngaahi uaifi ‘o hono ngaahi foha, telia ‘a e ngaahi vai ‘o e Lōmaki. 8Pea ko e ni‘ihi ‘i he manu na‘e ngofua, mo e ni‘ihi ‘i he manu na‘e ‘ikai ngofua, mo e ni‘ihi ‘i he manupuna, mo e ngaahi fa‘ahinga kehekehe ‘oku totolo ‘i he kelekele, 9na‘a nau hū tauhoa kia Noa ki he ‘a‘ake, ko e tangata mo e fefine; ‘o hangē ko e tu‘utu‘uni ‘a e ‘Otua kia Noa. 10Pea hili ‘a e ‘aho ‘e fitu, na‘e toki hoko ki he fonua ‘a e ngaahi vai ‘o e Lōmaki. 11‘I he ta‘u ko hono onongeau ‘o e mo‘ui ‘a Noa, ‘i hono ua ‘o e māhina, pea mo hono ‘aho hongofulu mā fitu ‘o e māhina, ‘i he ‘aho ko ia na‘e fakapā ai ‘a e ngaahi matavai ‘o e moana lahi, pea na‘e tangaki ‘a e ngaahi kātupa ‘o e langi. 12Pea na‘e lōvai ki māmani ‘o ‘aho fāngofulu mo pō fāngofulu. 13Ko e ‘aho pē ko ia kuo hū ‘a Noa ki he ‘a‘ake, pea mo Semi mo Hami, pea mo Sēfeti, ko e ngaahi foha ‘o Noa, pea mo e uaifi ‘o Noa, mo e ngaahi uaifi ‘e toko tolu ‘o hono ngaahi foha; 14pea na‘e ‘i ai mo kinautolu ‘a e manu kaivao kehekehe ‘o fakafa‘ahinga, mo e ngaahi manu lalata, fakafa‘ahinga, mo e manu kehekehe ‘oku totolo ‘i he funga fonua ‘o fakafa‘ahinga, mo e ngaahi manupuna, fakafa‘ahinga, ‘a e fanga ki‘i manupuna kehekehe, ‘io, ‘a e me‘a kotoa pē ‘oku kapakau. 15Pea na‘a nau hū kia Noa ki he ‘a‘ake, ko e tautau toko ua mei he kakano kotoa pē ‘oku ‘i ai ha mānava mo‘ui. 16Pea ko kinautolu na‘e hū na‘a nau hū ha tangata mo ha fefine mei he kakano kotoa pē, ‘o hangē ko e tu‘utu‘uni ‘a e ‘Otua kiate ia. Pea ko ‘ene hū leva, pea tāpuni ‘e Sihova."

Pea folofola ʻa e ʻOtua´ kia Noa, ―Koe‘uhi´ kuo ongo mai kiate Au ‘a e opeope atu ʻi he fonua´ ‘a e angahala´ te U fakaʻauha kinautolu fakataha mo e fonua´. Ko ia te ke faʻu ha ‘a‘ake ʻaki ʻa e ʻakau ko e kofa´; te ke ngaohi ʻa e ‘a‘ake´ ke ʻanaʻia, pea te ke vali ʻaki ha pulu mei loto mo tuʻa. Pea ko hono lōloa´ ko e kiupite ʻe tolungeau, māukupu´ ko e kiupite ʻe nimangofulu, pea ko hono maʻolunga´ ko e kiupite ʻe tolungofulu. Te ke ngaohi hano maamaʻanga ʻo e ‘a‘ake´, pea ko e matapā ʻo e ‘a‘ake´ te ke ʻai ʻi he kaokao´; pea te ke ngaohi ke funga vaka tolu. Te U fakaʻauha ʻa māmani, ka te U fakapapau ʻeku fuakava mo koe´; te ke hū koe ki he ‘a‘ake´ mo ho uaifi´ mo ho‘o fānau´ mo honau ngaahi hoa´, pehē ki he fanga manu kehekehe mo e manupuna 'o ha‘u tauhoa - tangata mo fefine mei he fa'ahinga kotoa pē. Na‘e fai kotoa pē ‘e Noa ki he tu‘utu‘uni ‘a e ‘Otua´, neongo hono luma‘i ia ‘e he kakai´. 

Lotu: 'E ‘Otua, ‘oku ou fakamālō atu koe’uhi´ ko Noa, hoko ko e ako kiate au ‘ene tu’u loto to’a he taukae mo e lau ‘a e kakai mo’ui angahala’ia´. ‘I ho Huafa´ Sīsū, ‘Emeni.

Monite 23 Sanuali, 2017

NOA

Veesi Lauloto: Senesi 6:22 

"Pea fai ‘e Noa, ‘ilonga ha me’a na’e tu’utu’uni kiate ia ‘e he ‘Otua, na’a ne fai ia."

Senesi 5:28-32;

"28Pea kuo mo‘ui ‘a Lēmeki ko e ta‘u ‘e teau mo e ta‘u ‘e valungofulu mā ua, pea ne ma‘u ha foha: 29pea ne fakahingoa ia ko Noa [ko Mālōlō], he‘ene pehē, Ko eni ia te ne fakafiemālie kitautolu mei he‘etau ngāue mo e mamahi ‘a hotau nima, ‘a ia ‘oku tupu mei he kelekele ne fakamala‘ia ‘e Sihova. 30Pea mo‘ui atu ‘a Lēmeki hili ‘ene ma‘u ‘a Noa ko e ta‘u ‘e nimangeau mo e ta‘u ‘e hivangofulu mā nima, pea ne ma‘u mo ha ngaahi foha mo ha ngaahi ‘ōfefine: 31pea ko e fuoloa ‘o Lēmeki ko e ta‘u ‘e fitungeau mo e ta‘u ‘e fitungofulu mā fitu; pea pekia. 32Pea kuo fe‘unga ‘a Noa mo e ta‘u ‘e nimangeau: pea ne ma‘u ‘e Noa ha ngaahi foha ko Semi, mo Hami, mo Sēfeti."

Senesi 6:1-9
"1PEA ‘i he faifai pea faka‘a‘au ‘o tokolahi ‘a e kakai ‘i he funga fonua, pea ai ha‘anau fu‘u fānau fefine. 2Tā na‘e sio ‘e he ngaahi foha ‘o e ‘Otua ki he ngaahi ‘ōfefine ‘o e Tangata ‘oku nau hōihoifua; pea nau hanga ‘o mali mo ha ni‘ihi, ‘a ia pē na‘a nau loto ki ai. 3Pea folofola ‘a Sihova, ‘E ‘ikai nofo ma‘u ai pē hoku Laumālie mo e tangata, ke fiu hono o‘i, he ko e kakano foki mo ia: ka ko hono fuoloa ko e ta‘u ‘e teau mo e ta‘u ‘e uofulu. 4Ko e taimi ko ia na‘e ‘i māmani ‘a e kakai lalahi, kae‘uma‘ā hili ‘a e ‘alu ‘a e ngaahi foha ‘o e ‘Otua ki he ngaahi ‘ōfefine ‘o e Tangata, pea nau fānau kiate kinautolu; ko e kau to‘a ia ‘o ono‘aho, ko e fa‘ahinga ongoongo.
5Pea na‘e ‘afio‘i ‘e Sihova kuo fakautuutu ‘a e kovi ‘a e tangata ‘i māmani, pea ‘oku kovi ‘atā ‘a e filio‘i kotoa pē ‘o e ngaahi fakakaukau ‘a hono loto ma‘u ai pē. 6Pea na‘e fakatomala ‘a Sihova ‘i he‘ene ngaohi ‘a e tangata ‘i māmani, ‘o ne fakamamahi ‘i hono finangalo. 7Pea folofola ‘a Sihova, Te u tafi mei he funga ‘o māmani ‘a e tangata kuo u fakatupu; ‘o fai mei he tangata ki he manu, ‘io, mo e me‘a totolo, mo e manupuna ‘o e langi; he kuo u fakatomala ‘i he‘eku ngaohi kinautolu. 8Ka ko Noa na‘e ‘ilo ki ai ha hōifua ‘i he finangalo ‘o Sihova. 9Ko e tohi eni ‘o e hako ‘o Noa. Ko Noa ko e tangata angatonu: na‘a ne haohaoa pe ‘i he ngaahi to‘utangata na‘e fe‘unga mo ia: na‘e takaua ‘a Noa mo e ‘Otua."

Kuo moʻui ʻa Lēmeki ko e taʻu ʻe teau valu ua, pea ne maʻu ha foha: pea ne fakahingoa ia ko Noa [ko Mālōlō], heʻene pehē, Ko ‘eni ia te ne fakafiemālie kitautolu mei he ngaūe mamahi ʻa hotau nima´, ʻa ia ʻoku tupu mei he kelekele ne fakamalaʻia ʻe Sihova´. Pea moʻui atu ʻa Lemeki hili ʻene maʻu ʻa Noa´, ko e taʻu ʻe nimangeau hivangofulu ma nima, pea ne maʻu mo ha ngaahi foha mo ha ngaahi ʻofefine: pea ko e fuoloa ʻo Lemeki´ ko e taʻu ʻe fitugeau mā fitu fitu, pea pekia´. Pea kuo feʻunga ʻa Noa mo e taʻu ʻe nimangeau: pea ne maʻu ha ngaahi foha ko Semi, mo Hami, mo Sefeti. ‘I he kuonga ‘o Noa´, kuo ‘afio‘i ‘e he ‘Otua´ ‘a e fakautuutu ‘a e angahala´ ‘i māman´i. Pea kuo mamahi mo‘oni 'a e finangalo[loto] 'o e 'Otua´ pea ne fakatomala 'i hono ngaohi 'o e tangata´ he kuo kovi 'atā 'a ‘ene ngaahi tō‘onga´. Ka ko Noa na'e ne tui ki he 'Otua´ pea fakahōifua 'ene tō'onga mo'ui´.

Lotu: 'E ‘Otua, ‘oku ou fakamālō atu he tā sīpinga lelei ne fai ‘e Noa´ ke u muimui ai, neongo e fakautuutu ‘a e kovi’ he māmani´, ka na’e ‘ikai tuka ai ‘ene taukave ma’ae ‘Afiona´. ‘I Ho Huafa´ Sīsū, ‘Emeni.

Sapate 22 Sanuali, 2017

METUISELA

Veesi Lauloto: Kolose 1:10 

"Ke taau ho’omou laka´ pea mo e ‘Eiki, mo mou tupu he ‘ilo ki he ‘Otua."

Senesi 5:25-29

"25Pea kuo mo‘ui ‘a Mētuisela ko e ta‘u ‘e teau mo e ta‘u ‘e valungofulu mā fitu, pea ne ma‘u ha foha ko Lēmeki; 26pea mo‘ui atu ‘a Mētuisela hili ‘ene ma‘u ‘a Lēmeki ko e ta‘u ‘e fitungeau mo e ta‘u ‘e valungofulu mā ua, pea ne ma‘u mo ha ngaahi foha mo ha ngaahi ‘ōfefine: 27pea ko e fuoloa ‘o Mētuisela ko e ta‘u ‘e hivangeau mo e ta‘u ‘e onongofulu mā hiva; pea pekia. 28Pea kuo mo‘ui ‘a Lēmeki ko e ta‘u ‘e teau mo e ta‘u ‘e valungofulu mā ua, pea ne ma‘u ha foha: 29pea ne fakahingoa ia ko Noa [ko Mālōlō], he‘ene pehē, Ko eni ia te ne fakafiemālie kitautolu mei he‘etau ngāue mo e mamahi ‘a hotau nima, ‘a ia ‘oku tupu mei he kelekele ne fakamala‘ia ‘e Sihova."

Kuo moʻui ʻa Lēmeki ko e taʻu ʻe teau valu ua, pea ne maʻu ha foha: pea ne fakahingoa ia ko Noa [ko Mālōlō], heʻene pehē, ―Ko ‘eni ia te ne fakafiemālie kitautolu mei he ngaūe mamahi ʻa hotau nima´, ʻa ia ʻoku tupu mei he kelekele ne fakamalaʻia ʻe Sihova´. Pea moʻui atu ʻa Lemeki hili ʻene maʻu ʻa Noa´, ko e taʻu ʻe nimangeau hivangofulu ma nima, pea ne maʻu mo ha ngaahi foha mo ha ngaahi ʻofefine: pea ko e fuoloa ʻo Lemeki´ ko e taʻu ʻe fitugeau mā fitu fitu, pea pekia´. Pea kuo feʻunga ʻa Noa mo e taʻu ʻe nimangeau: pea ne maʻu ha ngaahi foha ko Semi, mo Hami, mo Sefeti. ‘I he kuonga ‘o Noa´, kuo ‘afio‘i ‘e he ‘Otua´ ‘a e fakautuutu ‘a e angahala´ ‘i māman´i. Pea kuo mamahi mo‘oni 'a e finangalo[loto] 'o e 'Otua´ pea ne fakatomala 'i hono ngaohi 'o e tangata´ he kuo kovi 'atā 'a ‘ene ngaahi tō‘onga´. Ka ko Noa na'e ne tui ki he 'Otua´ pea fakahōifua 'ene tō'onga mo'ui´.

Lotu: 'E ‘Otua, ‘oku ou fakamālō atu he tā sīpinga lelei ne fai ‘e Noa´ ke u muimui ai, neongo e fakautuutu ‘a e kovi’ he māmani´, ka na’e ‘ikai tuka ai ‘ene taukave ma’a e ‘Afiona´. ‘I Ho Huafa´ Sīsū, ‘Emeni.

Tokonaki 21 Sanuali, 2017

'INOKE - TAKAUA MO E 'OTUA

Veesi Lauloto: Kolose 1:10 

"Ke taau ho’omou laka´ pea mo e ‘Eiki, mo mou tupu he ‘ilo ki he ‘Otua."

Senesi 5:1-24

"1KO E tohi to‘utangata eni ‘o e hako ‘o ‘Ātama. ‘I he taimi na‘e fakatupu ai ‘e he ‘Otua ‘a ‘Ātama, na‘a ne ngaohi ia ‘i he tatau ‘o e ‘Otua: 2na‘a ne fakatupu ‘a kinaua ko e tangata mo e fefine; pea ne tāpuaki‘i ‘a kinaua, pea ne fakahingoa ‘a kinaua ko ‘Ātama, ‘i he ‘aho ‘o hona fakatupu. 3Pea kuo mo‘ui ‘a ‘Ātama ko e ta‘u ‘e uangeau mā tolungofulu, pea ne ma‘u ha foha na‘a ne hokosi ia, pea ‘i hono ‘īmisi; pea ne fakahingoa ia ko Seti: 4pea ko e fuoloa ‘o ‘Ātama hili ‘ene ma‘u ‘a Seti ko e ta‘u ‘e fitungeau: pea ne ma‘u mo ha ngaahi foha mo ha ngaahi ‘ōfefine. 5Pea ko e fuoloa ‘o e mo‘ui ‘a ‘Ātama ko e ta‘u ‘e hivangeau mo e ta‘u ‘e tolungofulu; pea pekia. 6Pea kuo mo‘ui ‘a Seti ko e ta‘u ‘e uangeau mo e ta‘u ‘e nima, pea ne ma‘u ha foha ko ‘Īnosi: 7pea mo‘ui atu ‘a Seti hili ‘ene ma‘u ‘a ‘Īnosi ko e ta‘u ‘e fitungeau mo e ta‘u ‘e fitu, pea ne ma‘u mo ha ngaahi foha mo ha ngaahi ‘ōfefine: 8pea ko e fuoloa ‘o Seti ko e ta‘u ‘e hivangeau mo e ta‘u ‘e hongofulu mā ua; pea pekia. 9Pea kuo mo‘ui ‘a ‘Īnosi ko e ta‘u ‘e teau mo e ta‘u ‘e hivangofulu, pea ne ma‘u ha foha ko Keinani: 10pea mo‘ui atu ‘a ‘Īnosi hili ‘ene ma‘u ‘a Keinani ko e ta‘u ‘e fitungeau mo e ta‘u ‘e hongofulu mā nima, pea ne ma‘u mo ha ngaahi foha mo ha ngaahi ‘ōfefine: 11pea ko e fuoloa ‘o ‘Īnosi ko e ta‘u ‘e hivangeau mo e ta‘u ‘e nima; pea pekia. 12Pea kuo mo‘ui ‘a Keinani ko e ta‘u ‘e teau mo e ta‘u ‘e fitungofulu, pea ne ma‘u ha foha ko Mahalaleli; 13pea mo‘ui atu ‘a Keinani hili ‘ene ma‘u ‘a Mahalaleli ko e ta‘u ‘e fitungeau mo e ta‘u ‘e fāngofulu, pea ne ma‘u mo ha ngaahi foha mo ha ngaahi ‘ōfefine: 14pea ko e fuoloa ‘o Keinani ko e ta‘u ‘e hivangeau mo e ta‘u ‘e hongofulu; pea pekia. 15Pea kuo mo‘ui ‘a Mahalaleli ko e ta‘u ‘e teau mo e ta‘u ‘e onongofulu mā nima, pea ne ma‘u ha foha ko Sēleti: 16pea mo‘ui atu ‘a Mahalaleli hili ‘ene ma‘u ‘a Sēleti ko e ta‘u ‘e fitungeau mo e ta‘u ‘e tolungofulu, pea ne ma‘u mo ha ngaahi foha mo ha ngaahi ‘ōfefine: 17pea ko e fuoloa ‘o Mahalaleli ko e ta‘u ‘e valungeau mo e ta‘u ‘e hivangofulu mā nima; pea pekia. 18Pea kuo mo‘ui ‘a Sēleti ko e ta‘u ‘e teau mo e ta‘u ‘e onongofulu mā ua, pea ne ma‘u ha foha ko ‘Īnoke: 19pea mo‘ui atu ‘a Sēleti hili ‘ene ma‘u ‘a ‘Īnoke ko e ta‘u ‘e valungeau, pea ne ma‘u mo ha ngaahi foha mo ha ngaahi ‘ōfefine: 20pea koe fuoloa ‘o Sēleti ko e ta‘u ‘e hivangeau mo e ta‘u ‘e hongofulu mā ua; pea pekia. 21Pea kuo mo‘ui ‘a ‘Īnoke ko e ta‘u ‘e teau mo e ta‘u ‘e onongofulu mā nima, pea ne ma‘u ha foha ko Mētuisela: 22pea takaua ‘a ‘Īnoke mo e ‘Otua hili ‘ene ma‘u ‘a Mētuisela ‘i he ta‘u ‘e uangeau, pea ne ma‘u mo ha ngaahi foha mo ha ngaahi ‘ōfefine: 23pea ko e fuoloa ‘o ‘Īnoke koe ta‘u ‘e tolungeau mo e ta‘u ‘e onongofulu mā nima. 24Pea takaua ‘a ‘Īnoke mo e ‘Otua; pea ‘iloange kuo ‘ikai; he na‘e ‘ave ia ‘e he ‘Otua."

Ko ‘Inoke´ ko e taha ia ‘o e ngaahi hako ‘o Seti´, na‘e makehe atu pea fu‘u ‘ilonga ‘ene tākaua mo e ‘Otua´. Na‘e fu‘u ‘ilonga ‘a e ulo ‘a ‘ene mo‘ui mā‘oni‘oni´ ‘i hono kuonga´, he na‘e tokolahi ‘aupito ‘a e mo‘ui angahala‘ia´ he māmani´ Na‘e taʻu teau ono nima ‘a ‘Inoke, pea ne maʻu ha foha ko Metuisela: pea takaua ʻa Inoke mo e ʻOtua hili ʻene maʻu ʻa Metuisela´ ʻi he taʻu ʻe uangeau, pea ne maʻu mo ha ngaahi foha mo ha ngaahi ‘ofefine: pea ko e fuoloa ʻo Inoke koe taʻu ʻe tolungeau mo e taʻu ʻe onongofulu ma nima. Ko e tumutumu e mo‘ui ‘a e tokotaha ni, na‘e ‘ave mo‘ui pe ia ‘e he ‘Otua´ ki Langi 'o 'ikai te ne sio 'i he mate.

Lotu: E ‘Otua, ‘Oku ou fakamālō atu he talanoa fakalotolahi ‘o ‘Inoke´. Tokoni mai ke u manako ki he fononga ma’u pē mo Ho’o ‘Afio´. Ako’i au ke u poto he fai ho’o mo’ui´. ‘I Ho Huafa´ Sīsū, ‘Emeni.

Falaite 20 Sanuali, 2017

FOHA FIKA 3 - SETI

Veesi Lauloto: Kolose 1:10 

"Ke taau ho’omou laka´ pea mo e ‘Eiki, mo mou tupu he ‘ilo ki he ‘Otua."

Senesi 4:25-26

"25Pea toe fe‘iloaki ‘a ‘Ātama mo hono uaifi; pea ne fā‘ele‘i ha tama, ‘o ne fakahingoa ia ko Seti [ko Tu‘utu‘uni]; he‘ene pehē, Kuo tu‘utu‘uni ma‘aku ‘e he ‘Otua ha hako ‘e taha ke fetongi ‘a ‘Ēpeli, ‘a ia ne tāmate‘i ‘e Keini. 26Pea ko Seti foki na‘e fanau‘i kiate ia ha foha; ‘o ne fakahingoa ko ‘Īnosi. Ko e taimi ko ia na‘e kamata fai ai ‘a e lotu ki he huafa ‘o Sihova."

Na‘e mali ‘a Keini ‘i Noti ‘o na ma‘u fanau ai mo e fanga mokopuna lahi. Na'e hoko 'a e hako 'o Keini´ ko e kau tufunga me'alea (ko e tupuʻanga ia ʻo e faʻahinga ʻoku faivaʻaki ʻa e ha‘ape´ mo e mimiha´), mo e me'angāue pea pehē ki he ngaahi me'atau´. Neongo ‘a e ngaahi talēniti kehekehe ne ma‘u ‘e hono hako´, ka na'a nau kei hokohoko atu pē he vaa'ihala mo‘ui angahala‘ia´, 'o hangē tofu pē ko Keini´. Nau tokanga pē ki he fiemālie ‘o e nofo māmani´, kae ‘ikai ha mahu‘inga‘ia ia he ‘Otua´ mo Hono finangalo´. Mahu‘inga pē fānau ke to e fakamā‘opo‘opo mai hotau loto´, he ngaahi fakatokanga ‘oku ‘omi he talanoa ko ‘eni kia Keini mo ‘Epeli´… Tau lotu ‘o kole ki he ‘Otua´ ke Ne fakafonu kitautolu ‘aki ha mālohi mo ha poto ke tau lava ai ke fononga mo e ‘Otua´ ma‘upē, he tui mo e talangofua ki Hono finangalo´ mo ‘Ene Folofola´.

Lotu: Lotu ‘o kole ki he ‘Otua´ ke Ne tokoni’i koe ke ke mahu’inga’ia he fai ki Hono finangalo´, pea ke Ne taki ho’o fononga´ ke mo fononga ma’u pē mo Ia.

Tu'apulelulu 19 Sanuali, 2017

HAKO 'O KEINI

Veesi Lauloto: Kolose 1:10 

"Ke taau ho’omou laka´ pea mo e ‘Eiki, mo mou tupu he ‘ilo ki he ‘Otua."

Senesi 4:17-24

"17Pea fe‘iloaki ‘a Keini mo hono uaifi; pea ne feitama ‘o ne fā‘ele‘i ‘a ‘Īnoke: pea ne kamata langa ha kolo, pea na‘a ne fakahingoa ‘a e kolo ki hono foha ko ‘Īnoke. 18Pea na‘e fanau‘i kia ‘Īnoke ‘a ‘Īlati: pea ma‘u foha ‘e ‘Īlati, ko Mehuiaeli: pea ma‘u ‘e Mehuiaeli ‘a Metuisaeli; pea ma‘u ‘e Metuisaeli ‘a Lēmeki. 19Pea mali ‘a Lēmeki mo ha ongo fafine ‘e toko ua; ko e hingoa ‘o e ‘uluaki ko ‘Ata, pea ko e hingoa ‘o hono ua ko Sila. 20Pea na‘e fā‘ele‘i ‘e ‘Ata ‘a Siapale: ko e tupu‘anga ia ‘o e ha‘a nofo tēniti, mo fanga manu. 21Pea ko e hingoa ‘o hono tehina ko Siupale: ko e tupu‘anga ia ‘o e fa‘ahinga ‘oku faiva ‘aki ‘a e ha‘ape mo e mimiha. 22Pea ko Sila foki na‘a ne fā‘ele‘i ‘a Tūpale-keini, ko e tama na‘a ne tuki ‘a e fa‘ahinga me‘a māsila kehekehe mei he kapa mo e ‘aione: pea ko e tuofefine ‘o Tūpale-keini ko Nā‘ama. 23Pea pehē ‘e Lēmeki ki hono ongo uaifi, Fanongo mai, ‘Ata mo Sila; Ongo uaifi ‘o Lēmeki, Tokanga ka u lea: He‘eku tāmate‘i ‘a e tangata ne taa‘i au, ‘Io, ‘a e talavou ne fai hoku pohu. 24He liunga fitu ‘a e sauni ‘o Keini, Kae liunga fitungofulu mā fitu ‘a Lēmeki."

Na‘e mali ‘a Keini ‘i Noti ‘o na ma‘u fanau ai mo e fanga mokopuna lahi. Na'e hoko 'a e hako 'o Keini´ ko e kau tufunga me'alea (ko e tupuʻanga ia ʻo e faʻahinga ʻoku faivaʻaki ʻa e ha‘ape´ mo e mimiha´), mo e me'angāue pea pehē ki he ngaahi me'atau´. Neongo ‘a e ngaahi talēniti kehekehe ne ma‘u ‘e hono hako´, ka na'a nau kei hokohoko atu pē he vaa'ihala mo‘ui angahala‘ia´, 'o hangē tofu pē ko Keini´. Nau tokanga pē ki he fiemālie ‘o e nofo māmani´, kae ‘ikai ha mahu‘inga‘ia ia he ‘Otua´ mo Hono finangalo´. Mahu‘inga pē fānau ke to e fakamā‘opo‘opo mai hotau loto´, he ngaahi fakatokanga ‘oku ‘omi he talanoa ko ‘eni kia Keini mo ‘Epeli´… Tau lotu ‘o kole ki he ‘Otua´ ke Ne fakafonu kitautolu ‘aki ha mālohi mo ha poto ke tau lava ai ke fononga mo e ‘Otua´ ma‘upē, he tui mo e talangofua ki Hono finangalo´ mo ‘Ene Folofola´.

Lotu: Lotu ‘o kole ki he ‘Otua´ ke Ne tokoni’i koe ke ke mahu’inga’ia he fai ki Hono finangalo´, pea ke Ne taki ho’o fononga´ ke mo fononga ma’u pē mo Ia.

Pulelulu 18 Sanuali, 2017

FAKAMOLEMOLE 'A E 'OTUA

Veesi Lauloto: Hepelu 9:22 

"Ka 'ikai ha lingi toto, 'oku 'ikai ha fakamolemole."

Senesi 4:15-16

"15Pea folofola ‘a Sihova kiate ia, pea telia ‘a e me‘a ko ia, ‘ilonga ‘a ia te ne tāmate‘i ‘a Keini ‘e liunga fitu hono sauni. Pea na‘e tu‘utu‘uni ‘e Sihova ha faka‘ilonga mo‘o Keini ke ‘oua ‘e tāmate‘i ia ‘e he kakai te nau ma‘u ia. 16Pea na‘e ‘alu atu ‘a Keini mei he‘ene taka ofi kia Sihova, ‘o ne nofo ‘i he fonua ko Noti, ‘i he potu hahake ‘o ‘Īteni."

‘Osi ‘etau tumu´ he manava‘ofa mo e meesi ‘a hotau ‘Otua´, na‘a Ne to e holoki pē ‘a e kakaha ‘o ‘Ene tautea na‘e teuaki mo‘o Keini´, ‘o Ne folofola ai ke ʻilonga ʻa ia te ne tāmateʻi ʻa Keini´, ʻe liunga fitu hono sāuni´. Pea naʻe tuʻutuʻuni ʻe Sihova ha fakaʻilonga moʻo Keini ke ʻoua ʻe tamateʻi ia ʻe he kakai te nau maʻu ia´. Pea naʻe ʻalu atu ʻa Keini mei heʻene taka ofi kia Sihova´, ʻo ne nofo ʻi he fonua ko Noti, ʻi he potu hahake ʻo ‘Iteni´. Neongo na‘e ‘ikai tāmate‘i ia ‘e he ‘Otua´ he‘ene tāmate‘i hono tehina´, ka na‘e mole hono fakamo‘ui´, he na‘a ne tokanga pē ia ke kole ke fakasi‘isi‘i hono tautea´, ka na‘e ‘ikai ke ne fakatomala mo vete ‘ene angahala´. Mahu‘inga fānau ke tau tali ‘a Kalaisi mo tui kiate Ia, ka tau ma‘u ‘a e fakamolemole 'a e 'Otua´.

Lotu: 'E Tamai, ‘oku ou fakamālō atu Ho’o founga fakamolemole ‘oku Ke fai ma’aku´. ‘I Ho Huafa´ Sīsū. Emeni.

Tusite 17 Sanuali, 2017

TAUTEA 'O KEINI

Veesi Lauloto: Hepelu 9:22 

"Ka 'ikai ha lingi toto, 'oku 'ikai ha fakamolemole."

Senesi 4:11-14

"11Pea ko eni ko e mala‘ia koe mei he kelekele na na‘e tangaki hono ngutu ‘o fakatali ‘a e toto ‘o ho tehina mei ho nima; 12he ‘oka ke ka ngoue‘i ‘a e kelekele, ‘e ‘ikai te ne toe ‘atu kiate koe ‘ene koloa; te ke nofo fakahee‘i mo fehiki‘aki ‘i māmani. 13Pea pehē ‘e Keini kia Sihova, ‘Oku mamafa fau hoku tautea, ‘o ‘ikai te u fa‘ahi. 14He vakai, kuo ke kapusi au he ‘aho ni ke ‘oua na‘a ku nofo ‘i he kelekele ni, pea te u puli mei ho fofonga; pea te u nofo fakahee‘i mo fehiki‘aki ‘i māmani; pea ‘e faifai pea ‘ilonga ha taha te ne ‘ilo au te ne tāmate‘i au."

Ko e tautea ‘o Keini´, na‘e talaange ‘e Sihova, ko e kelekele ko ia na‘e malingi ki ai ‘a e toto ‘o ‘Epeli´ he‘ikai te ne to e fakafua mai ‘ene ngoue´ ‘o hangē ko ia na‘a ne fa‘a ma‘u ‘i mu‘a´. Te ne hela lahi he ngoueʻi ʻa e kelekele´, ka ko e fua si‘isi‘i pē te ne ma‘u´. ‘Ikai ngata ai´, ka te ne nofo fakaheeʻi mo fehikiʻaki ʻi māmani. Pea pehē ʻe Keini kia Sihova, ʻOku mamafa fau hoku tautea´, he vakai, kuo Ke kapusi au he ʻaho ni ke ʻoua naʻa ku nofo ʻi he kelekele ni, pea te u puli mei Ho fofonga´; pea te u nofo fakaheeʻi mo fehikiʻaki ʻi māmani; pea ʻe faifai pea ʻilonga ha taha te ne ʻilo au te ne tāmateʻi au. Neongo na‘e ‘ai he ‘Otua´ ‘a e maaka ‘ia Keini ke malu‘i ‘aki ia mei hano tamate‘i ‘e ha taha, ka na‘e ‘ikai pē nofo mai ia, na‘a ne mavahe ia mei he ‘Otua´.

Lotu: Lotu ‘o kole ki he ‘Otua´ ke tokoni mai ‘o fakamolū mo fakavaivai’i hotau loto´ ke tau fakaongo ki Hono le’o´ mo talangofua ki He’ene Folofola´.

Monite 16 Sanuali, 2017

TAMATE'I 'E KEINI 'A 'EPELI

Veesi Lauloto: Hepelu 9:22 

"Ka 'ikai ha lingi toto, 'oku 'ikai ha fakamolemole."

Senesi 4:6-10

"6Pea folofola ‘a Sihova kia Keini, Ko e hā ‘oku ke ‘ita ai? Pea ko e hā ‘oku mapelu ai ho mata? 7‘Ikai ‘e ai ha hanga hake, ‘o kapau ‘oku ke feinga ke lelei? Pea ka ‘oku ‘ikai te ke feinga ke lelei ‘oku ‘i he matapā ‘a angahala, ‘o tokotoaki mai: pea ‘oku toka ‘ene holi kiate koe, ka ‘oku ‘a‘au ke pule ki ai.
8Pea lea ai ‘a Keini kia ‘Ēpeli ko hono tehina: pea lolotonga ‘ena ‘i ‘uta na‘e tu‘u ‘a Keini kia ‘Ēpeli ko hono tehina, ‘o ne tāmate‘i ia. 9Pea folofola ‘a Sihova kia Keini, Kofa‘ā ‘a ‘Ēpeli ko ho tehina? Pea ne pehē, ‘Oku ‘ikai te te ‘ilo: he ko e tauhi kita ‘o hoto tokoua? 10Pea ne folofola mai, Ko e hā eni kuo ke fai? Sī, ko e le‘o ena! Ko e ngaahi tulutā toto ‘o ho tehina ‘oku tangi mai kiate au mei he kelekele."

Pea ʻita ʻaupito ʻa Keini, pea ‘ilonga ia koe‘uhi´ ko e mapelu hono mata´. Na‘a ne meheka ‘i hono tehina´, pea ne ‘ita lahi ki he ‘Otua´ He‘ene hōifua ki he feilaulau ‘a ‘Epeli´ kae ‘ikai ki ha‘ana´. Ka na‘e tali ‘e he ‘Otua´ ia ‘a e feilaulau ‘a ‘Epeli´, he na‘a ne fai ‘e ia ‘a e me‘a na‘e tu‘utu‘uni he ‘Otua´ kia ‘Atama mo ‘Ivi´, ko e founga ke ma‘u ai ‘Ene fakamolemole´, kuopau ke feilaulau‘i ha monumanu ta‘emele, ke lilingi hono toto´, ke mate ‘a e monumanu´, kae fakamolemole‘i ‘a ‘ete angahala´, ka ko e tuhu mama‘o ia ‘a e ‘Otua´ ki he Kolosi´. Ko e ‘uhinga ia na‘e tāmate‘i ai ‘e he ‘Otua´ ‘a e monumanu ‘i ‘Iteni, ‘o e to‘o ‘a e loufiki´, kae fakakofu‘aki ‘a ‘Atama mo ‘Ivi ‘a e kili‘i manu´, ke na manatu‘i ma‘u, ka ‘ikai ha lingi toto, ‘oku ‘ikai ha fakamolemole. Kaekehe na‘e 'ikai tali 'e Keini 'a e fale'i 'a e 'Otua´, pea ne tāmate‘i ai hono tehina´. Koe‘uhi´ na‘e ‘ikai ke ne vete 'e ne angahala´, na‘e pau ai ke ne kai mamahi leva he nunu'a 'o 'ene faiangahala´.

Lotu: Lotu ‘o fakamālō ki he ‘Otua´ mo Kalaisi ko e fakahoko e palani ‘o e kolosi´ ke lava fakamolemole’i ai ‘etau ngaahi faihala kotoa pē.

Sapate 15 Sanuali, 2017

KEINI MO 'EPELI

Veesi Lauloto: Hepelu 9:22 

"Ka 'ikai ha lingi toto, 'oku 'ikai ha fakamolemole."

Senesi 4:1-5

"1PEA fe‘iloaki ‘a ‘Ātama mo hono uaifi ko ‘Ivi pea ne feitama, ‘o ne fā‘ele‘i ‘a Keini [ko Ma‘u], pea pehē ‘e he fefine, Kuo u ma‘u ha tangata ‘ia Sihova. 2Pea ne toe fā‘ele, ‘o ne ma‘u hono tehina ko ‘Ēpeli. Pea na‘e hoko ‘a ‘Ēpeli ko e tauhi sipi, ka ko Keini ko e tama ngoue. 3Pea ‘i he hili ha ngaahi ‘aho, pea ‘omi ‘e Keini ha fua ‘o ‘ene ngoue ko e feilaulau kia Sihova. 4Pea ko ‘Ēpeli foki na‘e ‘omi ‘e ia ‘a e veloaki ‘o ‘ene fanga sipi, ‘io, ‘a ia pē na‘e ngako. Pea na‘e hāngaifofonga ‘a Sihova kia ‘Ēpeli mo ‘ene feilaulau: 5ka ko Keini mo e feilaulau ‘a‘ana na‘e ‘ikai te ne fofonga ki ai. Pea ‘ita ‘aupito ‘a Keini, pea mapelu hono mata."

‘I he nofo atu ʻa Atama mo ‘Ivi´, na‘e feitama ‘a ‘Ivi ʻo ne faʻeleʻi ha tamasi‘i, pea na ui ia ko Keini, pea ne toe faʻele ha foha ‘o na ui ia ko ‘Epeli. Pea naʻe hoko ʻa Epeli ko e tauhisipi, ka ko Keini ko e tama na‘e ngoue. Pea ʻi he hili ha ngaahi ʻaho, pea ʻomi ʻe Keini ha fua oʻene ngoue´ ko e feilaulau kia Sihova. ea ko ‘Epeli foki naʻe ʻomi ʻe ia ʻa e ‘uluaki ‘oʻene fanga sipi´, pea naʻe fiefia mai ʻa Sihova ki he feilaulau ‘a ‘Epeli´, kae ‘ikai pehē ki he feilaulau ‘a Keini´. ‘Oku tau ako heni fānau ‘a e tūkunga ‘o e ngaahi foaki ke tau fai´, tatau aipē ia pe ko ‘ete foaki hato taimi, pe ko ha‘ate pa‘anga, pe koloa pe talēniti. Mahu‘inga ‘a e loto ‘oku fai ‘aki ‘ete foaki´, loto fiefia mo loto lelei, ‘ikai foaki nana‘i mo e foaki ‘ita. Pea te foaki ma‘u pē ‘a e lelei taha´. ‘Ouae lau ‘a e mole´, he ‘oku tāpuaki‘i ‘e he ‘Otua´ ‘a e loto ‘oku vēkeveke foaki´.

Lotu: Lotu ‘o kole ki he ‘Otua´ ke Ne fakalelei’i mai ‘a e fa’ahinga founga foaki ‘oku ke ‘i ai lolotonga´, ‘a e founga te Ne hōifua mai ai ki he’etau foaki´.

Tokonaki 14 Sanuali, 2017

FAKAMO'UI 'A E 'OTUA

Veesi Lauloto: 2 Kolinito 5:21 

"Naʻa Ne ngaohi ko e koto angahala ʻa e Tokotaha ko ia naʻe ʻikai te Ne ongona ha angahala´, koeʻuhiā ko kitautolu; koeʻuhi´ ke tau hoko ai ʻiate Ia ko e koto māʻoniʻoni fakaʻOtua."

2 Kolinito 5:21

"21Na‘a ne ngaohi ko e koto angahala ‘a e Toko Taha ko ia na‘e ‘ikai te ne ongona ha angahala, koe‘uhi ā ko kitautolu; koe‘uhi ke tau hoko ai ‘iate ia ko e koto mā‘oni‘oni faka‘otua."

Ko e toki tu‘unga fakaloloma mo‘oni kuo a‘u ki ai ‘a e ‘uluaki ongo mātu‘a´. Lolotonga pē ‘ena nofo fiefia he ngouetapu´, kuo hū ‘a e angahala´ he funga ‘o ‘ena ta‘etokanga´. Pea neongo na‘e tautea‘i kinaua pea kapusi mei he feohi mo e ‘Otua´, ka na‘e to e meesi pē ‘a e ‘Otua´ ‘o Ne palōmesi ha founga ke to e fakafoki ‘aki ai ‘a e tangata´ kiate Ia, ‘a ē ‘oku talanoa ki ai ‘etau veesi lauloto ‘i ‘olunga´ ko e fo‘i fakafetongi ta‘epalanisi mo‘oni. Ko e hoko mai ‘a e mā‘oni‘oni, ko e ‘Alo Pele ‘o e ‘Otua´, ke Ne ma‘u ‘e Ia ‘eta angahala´ mo ‘eta mate´, ka ta ma‘u ‘e kitaua ‘Ene mā‘oni‘oni´ mo ‘Ene mo‘ui ta‘engata´. Haleluia! Fakafeta‘i ki he ‘Otua´ he hulu atu ‘Ene ‘ofa´! Tui leva mo tali ‘a Sīsū fānau ke Ne fakamo‘ui kitautolu mei he tautea mate ‘o e agahala´(Lm. 10:13)

Lotu: Lotu ‘o fakamālō ki he ‘Otua´ he lahi fau atu ‘Ene meesi´ mo ‘Ene kelesi´, ‘o Ne palani ai ha founga ke to e fakafoki ai kitautolu kiate Ia.

Falaite 13 Sanuali, 2017

KAPUSI MEI HE NGOUETAPU

Veesi Lauloto: 2 Kolinito 5:21 

"Naʻa Ne ngaohi ko e koto angahala ʻa e Tokotaha ko ia naʻe ʻikai te Ne ongona ha angahala´, koeʻuhiā ko kitautolu; koeʻuhi´ ke tau hoko ai ʻiate Ia ko e koto māʻoniʻoni fakaʻOtua."

Senesi 3:20-24

"20Pea fakahingoa ‘e he tangata hono uaifi ko ‘Ivi [ko Mo‘ui‘anga]; koe‘uhi ko e fa‘ē ia ‘a e kakai kotoa pē. 21Pea na‘e ngaohi ‘e Sihova ‘Elohimi ma‘a ‘Ātama mo hono uaifi ‘a e ngaahi kofu kili‘imanu, ‘o ne ‘ai kiate kinaua. 22Pea na‘e folofola ‘a Sihova ‘Elohimi; Vakai, kuo hoko ‘a e tangata ke hangē ko e toko taha ‘iate kitautolu, ke ne ‘ilo ‘a e lelei mo e kovi: ‘ē, na‘a ‘iloange te ne hanga ‘o toli foki mei he ‘Akau ‘o e Mo‘ui, ‘o ne kai, ‘o ne mo‘ui ‘o ta‘engata: 23ko ia na‘e tuku atu ia ‘e Sihova ‘Elohimi mei he ngouetapu ‘i ‘Īteni, ke ne ngoue‘i ‘a e kelekele ‘a ia na‘e to‘o ia mei ai. 24‘Io, ne kapusi ‘a e tangata; pea ne fakanofo ‘i hahake ‘i he ngouetapu ‘i ‘Īteni, ‘a e Selupimi, mo ha heletā ulo na‘e tavilovilo, mo le‘ohi ‘a e hala ki he ‘Akau ‘o e Mo‘ui."

Naʻe ngaohi ʻe Sihova ha ngaahi kofu kiliʻimanu ke tui ‘e Atama mo ‘Ivi. Pea Ne toki tuku atu leva kinaua mei he ngouetapu ʻi Iteni´, ke na ō ‘o ngoueʻi ʻa e kelekele naʻe toʻo kinaua mei ai´. ʻlo, na‘a Ne kapusi ʻa e tangata´; pea ne fakanofo ʻa e Selupimi´, mo ha heletā ulo naʻe tavilovilo 'i he matapā 'o e ngouetapu´ ke le'ohi 'a e hala ki he 'Akau 'o e Mo'ui´, ke ‘oua na‘a na to e foki mai ‘i ha‘ana founga, ‘oku ‘ikai ko ha founga ‘a e ‘Otua´. Ko e ‘Otua´ kuo Ne tāpuni´, pea ko Ia pē te Ne to e fakaava ‘i He‘ene founga ‘ata‘atā pē ‘A‘ana!

Lotu: Lotu ‘o kole ki he ‘Otua´ ke ke tali ‘Ene founga fakamolemole´, ‘a e Kolosi´. Ko e ta’ata’a Hono ‘Alo´ hotau kofu ke tau fotu’aki ‘i Hono ‘Ao´.

Tu'apulelulu 12 Sanuali, 2017

HILIFAKI 'O E TAUTEA

Veesi Lauloto: 2 Kolinito 5:21 

"Naʻa Ne ngaohi ko e koto angahala ʻa e Tokotaha ko ia naʻe ʻikai te Ne ongona ha angahala´, koeʻuhiā ko kitautolu; koeʻuhi´ ke tau hoko ai ʻiate Ia ko e koto māʻoniʻoni fakaʻOtua."

Senesi 3:14-19

"14Pea folofola ‘a Sihova ‘Elohimi ki he Ngata, Ko e me‘a ‘i ho‘o fai pehē, ‘e lahi taha ho‘o mala‘ia ‘i he manu lalata kotoa pē, mo e manu kaivao kotoa pē; te ke ‘alu ‘aki ho kete, pea te ke kai efu ‘i he ngaahi ‘aho kotoa pē ‘o ho‘o mo‘ui: 15te u ‘ai ke mo fetāufehi‘a‘aki, ‘a koe mo e fefine, pea ko ho hako mo hono hako; ‘e laiki ‘e ia ho ‘ulu, pea te ke laiki ‘e koe ‘a hono muiva‘e. 16Pea ki he fefine na‘a ne folofola, Te u mātu‘aki fakalahi ho‘o mamahi, kae‘uma‘ā ho‘o feitama; pea te ke fā‘ele‘i mamahi ‘a e fānau; kae tō ho‘o holi ki ho husepāniti, pea ‘e ‘a‘ana ‘a e pule kiate koe. 17Pea kia ‘Ātama na‘a ne folofola, Ko e me‘a ‘i ho‘o fakaongo ki he lea ‘a ho uaifi, mo ke kai mei he ‘akau, ‘a ia na‘a ku tu‘utu‘uni ai ‘o pehē, ‘E ‘ikai te ke kai mei ai: kuo mala‘ia ‘a e kelekele koe‘uhi ko koe; te ke kai mei ai ‘i he mamahi ‘i he ‘aho kotoa pē ‘o ho‘o mo‘ui; 18pea ko e ‘akau talatala mo e talatala‘āmoa te ne fakatupu ma‘a u; pea te ke kai ‘a e mohuku ‘o e ngoue; 19te ke kai ho‘o me‘akai ‘i he kakava ‘o ho mata, kae‘oua ke ke foki ki he kelekele ‘a ia na‘e to‘o koe mei ai: he ko e efu koe, pea ko e efu te ke foki ki ai."

Ne toki folofola ʻa Sihova ki he ngata´, ʻe lahi taha hoʻo malaʻia´ ʻi he manu kotoa pē; te ke ʻalu ʻaki ho kete´, pea te ke kai efu ʻi he ngaahi ʻaho kotoa pē hoʻo moʻui: te ke fetāufehiʻa ʻaki, ʻa koe mo e hako ‘o e fefine´, ʻe laiki ʻe ia ho ʻulu´, pea te ke laiki ʻe koe ʻa hono muivaʻe´.‖ Pea ne toki folofola ki he fefine, Te u mātuʻaki fakalahi hoʻo mamahi´; te ke fāʻeleʻi mamahi ʻa e fānau´; kae tō hoʻo holi´ ki ho husepāniti´, pea ʻe ‘aʻana ʻa e pule kiate koe´.‖Pea ne folofola kia ‘Atama, Ko e meʻa ʻi hoʻo fakaongo ki he lea ʻa ho uaifi´, mo ke kai mei he ʻakau, naʻa Ku tapui ke ke kai mei ai´: kuo malaʻia ʻa e kelekele´ koeʻuhi´ ko koe; te ke kai mei ai ʻi he mamahi ʻi he ʻaho kotoa pē ʻo hoʻo moʻui´; pea te ke kai hoʻo meʻakai´ ʻi he kakava ʻo ho mata´, kaeʻoua ke ke foki ki he kelekele´ ʻa ia naʻe toʻo koe mei ai´: he ko e efu koe, pea ko e efu te ke foki ki ai´. Ko e tautea o‘o mo‘oni fānau, ka ko e nunu‘a ia ‘o e fai angahala´, ‘o e fakaongo ki he tēvolo´, mo e talangata‘a ki he ‘Otua.

Lotu: Lotu ‘o kole fakamolemole ki he ‘Otua´ ‘i ha’o ngaahi fehālaaki he ‘aho ni, pea ke Ne meesi mai ma’au ke to e fakafoki pē koe ki he feohi fiefia mo IA´.

Pulelulu 11 Sanuali, 2017

FETUKUAKI ‘A ‘IVI MO ‘ATAMA

Veesi Lauloto: 2 Kolinito 5:21 

"Naʻa Ne ngaohi ko e koto angahala ʻa e Tokotaha ko ia naʻe ʻikai te Ne ongona ha angahala´, koeʻuhiā ko kitautolu; koeʻuhi´ ke tau hoko ai ʻiate Ia ko e koto māʻoniʻoni fakaʻOtua."

Senesi 3:8-13

"8Pea na‘a na fanongo ki he le‘o ‘o Sihova ‘Elohimi, he‘ene hā‘ele ‘i he ngouetapu ‘i he hauhaufano ‘o e ‘aho: pea toitoi ‘a e tangata mo hono uaifi ‘i ha loto ‘ulu‘akau ‘o e ngoue, ke ‘oua na‘a mea‘i kinaua ‘e Sihova ‘Elohimi. 9Pea ui ki he tangata ‘e Sihova ‘Elohimi, ‘o ne pehē ki ai, Kofa‘ā koe? 10Pea pehē ‘e ia, Na‘a ku fanongo ki ho le‘o ‘i he ngouetapu, pea u manavahē, koe‘uhi kuo u telefua; pea u toitoi. 11Pea ne folofola mai, Ko hai na‘e fakahā kiate koe ‘oku ke telefua? Kuo ke kai koā mei he ‘akau na‘a ku tapui ho‘o kai mei ai, ‘ō? 12Pea tali ‘e he tangata, Ko e fefine na‘a ke ‘omi ke ma nonofo, ko ia ia na‘a ne ‘omi ha‘aku me‘a mei he ‘akau, pea u kai. 13Pea folofola ‘a Sihova ‘Elohimi ki he fefine, Ko e hā eni kuo ke fai? Pea tali ‘e he fefine, Ko e Ngata na‘a ne kākaa‘i au, pea u kai."

Taimi ne hā‘ele mai ai ‘a e ‘Otua´ ki he ngoue´ ke pōtalanoa mo ‘Atama mo ‘Ivi, ‘o hangē ko ‘Ene fa‘a fai´, ma‘a na manavahē ‘o na toitoi. Pea fehu‘I he ‘Otua´ kia ‘Atama, ―Kuo ke kai koā mei he ʻakau naʻa Ku tapui hoʻo kai mei ai? Ne tali ʻe ‘Atama, ―Ko e fefine naʻa ke ʻomi ke ma nonofo´, ko ia ia naʻa ne ʻomi haʻaku meʻa mei he ʻakau´, pea u kai.‖ Pea tali ʻe he fefine´ ia, Ko e ngata´ ia naʻa ne kākāʻi au´, pea u kai. Ka kuo hola foki e ngata´ ia, ko hona fo‘ui pē.

Lotu: Lotu ‘o kole ki he ‘Otua´ ke Ne ‘oatu ha loto tokanga mo ha konisēnisi poto, ke ke ‘ilo’i ngofua ‘a e kovi´ mo e loi´, pea ke nofoma’u ‘i he ‘Eiki´.

Tusite 10 Sanuali, 2017

HINGA ‘A ‘IVI MO ‘ATAMA´- NGATA´ & ANGAHALA

Veesi Lauloto: 2 Kolinito 5:21 

"Naʻa Ne ngaohi ko e koto angahala ʻa e Tokotaha ko ia naʻe ʻikai te Ne ongona ha angahala´, koeʻuhiā ko kitautolu; koeʻuhi´ ke tau hoko ai ʻiate Ia ko e koto māʻoniʻoni fakaʻOtua."

Senesi 3:1-7

"1PEA ko e Ngata na‘e olopoto lahi ‘i he manu kotoa pē ‘o e fonua, ‘a ia ne ngaohi ‘e Sihova ‘Elohimi. Pea ne huhū ange ki he fefine, ‘Oku mo‘oni koā kuo folofola ‘e he ‘Otua ke ‘oua te mo kai mei he ‘akau kehekehe ‘o e ngouetapu? 2Pea tali ‘e he fefine ki he ngata, ‘Oku ngofua pē ‘ema kai ‘a e fua ‘o e ngaahi ‘akau ‘o e ngouetapu: 3ka koe fua ‘o e ‘akau ‘oku ‘i he loto ngoue, kuo folofola ‘a e ‘Otua, ‘E ‘ikai te mo kai mei ai, pea ‘e ‘ikai te mo ala ki ai, na‘a mo mate. 4Pea pehē ‘e he Ngata ki he fefine, ‘E ‘ikai ‘aupito te mo mate: 5kaekehe, ‘oku mea‘i ‘e he ‘Otua ko e ‘aho te mo kai ai ‘e ‘ā ai homo mata, pea te mo hoko ke hangē ko e ‘Otua, ho‘omo ‘ilo ‘a e lelei mo e kovi. 6Pea na‘e vakai ‘e he fefine ko e ‘akau ia ‘oku lelei ki he kai, pea matamatalelei ki he mata, kae‘uma‘ā ko e ‘akau ke fai ki ai ha vēlevele ko ‘ene fakapoto‘i, pea ne hanga ‘o toli hono fua, ‘o kai, pea ne ‘ange foki ki hono husepāniti na‘e ‘iate ia; pea kai mo ia. 7Pea ‘ā ai hona mata ‘osi pē, ‘o na ‘ilo tā ‘oku na telefua; pea na tui lou fiki, ‘o ngaohi ‘aki hana vala."

Ne ‘i ai e ‘aho ‘e taha, ne fakapuli mai ai ‘a sētane he ngata´. Ko sētane´ na‘e ‘angelo ia kimu‘a, ka na‘a ne angatu‘u ia tupu he‘ene fie tatau mo e ‘Otua´, pea kapusi ia ‘e he ‘Otua´ mo e kau ‘angelo na‘e muimui kiate ia´ mei Hēvani. Talu ai mo ‘ene fakalili‘a he ‘Otua´, pea ne feinga‘i aipē mo e kakai´ ke nau fehi‘a ki he ‘Otua´. Ne ha'u leva 'a e ngata´ kia 'Ivi 'o fakafehu'ia 'a e tu'utu'uni 'a e 'Otua´ kiate kinaua´. Ne talaange 'e 'Ivi ki he ngata´ 'oku 'ikai ngofua ke na kai pe ala ki he fu'u akau 'i he loto ngoue´ he te na mate. Na'e lohiaki'i 'e he ngata´ 'a 'Ivi – ―Ko e loi ia, he‘ikai ‘aupito temo mate..... ka temo hoko ke hangē ko e 'Otua´" Ne talangata'a leva 'a Ivi 'o kai mei he 'akau´ pea ne ‘ange kia 'Atama ‘o kai mo ia. Ne ‘ā hona mata´, pea tautea hona loto´ mo ilifia, pea na mā 'o na tui lou fiki 'o vala, pea na toitoi mei he 'Otua´. Ko e kamata‘anga ia ‘o e angahala´, ko e fili ‘e he ‘uluaki mātu‘a´ ke na tui ki he loi ‘a sētane´ ‘o iku ‘o na talangata‘a ai ki he ‘Otua´. Fānau, tokanga, he ko sētane´ ko e pōto‘i he
fakahekeheke´ mo e loi mio‘i.

Lotu: Lotu ‘o kole ki he ‘Otua´ ke Ne tokoni’i koe ke ke mata’ā ‘aupito, he ko sētane´ ‘oku fakapuli mai he kakai tokolahi ke feinga’i kitautolu ke tau fai angahala.