Falaite 31 Ma'asi, 2017

FAKAOFO MA’U PĒ PALANI ‘A E ‘OTUA

Veesi Lauloto: 'Efeso 4:32

"Ka mou angaʻofa muʻa ʻi hoʻomou feangai´, mo manavaʻofa, pea mou fe faka-molemoleʻaki, ʻo hangē foki ko e ʻOtua´, ne Ne fakamolemole kimoutolu ʻia Kalaisi"

Senesi 45:9-28

"9Mou fai vave, ‘o ‘alu ki he‘eku tamai, ‘o mou pehē kiate ia, Ko e lea eni ‘a ho foha ko Siosifa, Kuo fokotu‘u au ‘e he ‘Otua ko e ‘eiki ki ‘Isipite kātoa: ke ke ha‘u ange kiate au, ‘oua ‘e fakatotoka. 10pea te ke nofo ‘i he fonua ko Kōseni, pea te ke ofi kiate au, ‘a koe mo ho‘o fānau, mo e fānau ‘a ho‘o fānau, mo ho‘o fanga manu iiki, mo ho‘o fanga manu lalahi, mo e me‘a kotoa ‘oku ke ma‘u; 11pea te u tauhi koe ‘i ai; he ‘oku kei toe ha ta‘u honge ‘e nima: na‘a fakatau koe mo ho fale mo ho‘o me‘a kotoa pē. 12Pea ko eni ‘oku vakai ‘e homou mata, kae‘uma‘ā ‘a e mata ‘o hoku tehina ko Penisimani, ko hoku ngutu ni ia ‘oku lea kiate kimoutolu. 13Pea ke mou fakamatala ki he‘eku tamai ‘a hoku fu‘u lāngilangi‘ia ‘i ‘Isipite, pea mo e ngaahi me‘a kehekehe kuo mou mamata ki ai; pea ke mou fai vave, ‘o ‘ohifo ‘eku tamai ki heni. 14Pea ne tāupe ‘i he u‘a ‘o hono tehina ko Penisimani, ‘o ne tangi; pea tangi foki ‘a Penisimani, ‘o ne tāupe ‘i he u‘a ‘o‘ona. 15Pea na‘a ne ‘uma ki hono ngaahi tokoua kotoa pē, ‘o ne tāupe ‘i honau u‘a ‘o tangi: pea hili ia na‘e talanoa mo ia ‘a hono ngaahi tokoua. 16Pea na‘e pā atu hono tala ki he fale ‘o Felo, tokua kuo ha‘u ‘a ngaahi tokoua ‘o Siosifa; pea na‘e lelei‘ia ai ‘a Felo, mo ‘ene kau tamaio‘eiki. 17Pea me‘a ‘a Felo kia Siosifa, Tala ki ho ngaahi tokoua, Mou fai ‘eni; mou fakaheka ho‘omau fanga manu, ‘o mou ‘alu ‘atu ki he fonua ko Kēnani, 18pea mou ‘omi ho‘omou ‘eiki, mo homou ngaahi fāmili, ‘o mou ha‘u kiate au: pea te u ‘atu kiate kimoutolu ‘a e lelei ‘o e fonua ko ‘Isipite, pea te mou kai ‘a e momona ‘o e fonua. 19Pea ko eni kuo ke ma‘u ‘a e fekau, pea mou fai eni; to‘o ma‘amoutolu ‘i he fonua ko ‘Isipite ‘a e ngaahi sāliote mo‘amou tamaiki, pea mo‘amou ngaahi ‘unoho, pea mou fakaheka ho‘omou ‘eiki, ‘o mou ha‘u. 20Pea ‘oua te mou sio ki ho‘omou nga‘oto‘ota ‘o mamae ki ai; he ko e lelei ‘o e fonua ‘o ‘Isipite kātoa ‘oku ‘amoutolu ia. 21Pea fai pehē ‘e he fānau ‘a ‘Isileli; pea na‘e ‘ange ‘e Siosifa kiate kinautolu ‘a e ngaahi sāliote, ‘o hangē ko e fekau ‘a Felo, pea ne ‘ange hanau ‘oho ki he ‘alu. 22Na‘a ne foaki kiate kinautolu takitaha ha ‘ū kofu fetongitongi; ka ko Penisimani na‘a ne ‘ange ki ai ha pa‘anga ‘e tolungeau mo ha ‘ū kofu ‘e nima. 23Pea ko eni ‘a e me‘a na‘a ne tuku atu ki he‘ene tamai; ko e ‘asi ‘e toko hongofulu kuo fakaheka ki ai ‘a e ngaahi me‘a ngako ‘o ‘Isipite, pea mo e ‘asi fefine ‘e hongofulu kuo fakaheka ki ai ‘a e koane mo e mā mo e me‘akai ma‘a ‘ene ‘eiki ki he fononga. 24Ko ia na‘a ne tuku atu hono ngaahi tokoua, pea na‘a nau ‘alu; pea na‘a ne pehē kiate kinautolu, ‘Oua te mou kē ‘i he hala. 25Pea na‘a nau ‘alu hake mei ‘Isipite, ‘o nau a‘u ki Kēnani ki he‘enau tamai ko Sēkope, 26pea nau tala kiate ia ‘o pehē, ‘Oku kei mo‘ui ‘a Siosifa, kae‘uma‘ā ko e pule ia ‘o ‘Isipite kotoa. Pea na‘e lele ‘ene mo‘ui, he na‘e ‘ikai te ne tui kiate kinautolu. 27Pea na‘a nau fakamatala kiate ia ‘a e ngaahi lea kehekehe kuo fai ‘e Siosifa kiate kinautolu; pea ‘i he‘ene mamata ki he ngaahi sāliote ‘a ia kuo tuku mai ‘e Siosifa ke ‘ave ia, na‘e toki mo‘ui hake ‘a e laumālie ‘o ‘enau tamai ko Sēkope. 28Pea pehē ‘e ‘Isileli, Kuo lahi pē, tā ‘oku kei mo‘ui si‘oku foha ko Siosifa; te u ‘alu hifo ‘o sio kiate ia ‘i he te‘eki te u mate."

Pea ne lea ange, ―Mou fai vave, ʻo alu ki heʻeku tamai´, ʻo talaange ki ai ko ‘eni kuo fokotuʻu au ʻe he ʻOtua´ ko e ʻeiki ki Isipite kātoa: ke ne haʻu kiate au, ʻouae fakatotoka: pea te ne nofo ʻi he fonua ko Kōseni´, pea te ne ofi kiate au, pea te u tauhi ia ʻi ai; he ʻoku kei toe ha taʻu honge ʻe nima, pea ke mou fai vave, ʻo ʻohifo ʻeku tamai´ ki heni. Pea nau toki fefā‘ofua‘aki, kae tautautefito ki hono tehina ko Penisimani´. Ne a‘u atu kia Felo ‘a e me‘a ni, pea ne lelei‘ia ai, ‘o ne tu‘utu‘uni ke ‘ave ha ngaahi saliote ke tokoni he‘enau fetukutuku mai´. Ne ‘ai honau ‘oho pea nau ‘alu leva. ‘I he‘enau a‘u atu ‘o fakamatala kia Sekope´, ne fu‘u ofo lahi e tangata‘eiki´ ‘o ne mei ta‘etui, ka ko ‘ene sio atu ki he ‘ū saliote´, pea ne toki fiefia, ‘o ne pehē, ―Tā ko e mo‘oni pē, ʻoku si‘i kei moʻui pē siʻoku foha ko Siosifa´, te u ʻalu hifo ʻo sio kiate ia teʻeki te u mate.

Lotu: Lotu ‘o fakamālō ki he ‘Otua´ He’ene ngaahi palani ma’a ‘etau mo’ui´, ke ma’u hotau Fakamo’ui´, ke tau hao mai he ngaahi angahala lahi, etc.

Tu'apulelulu 30 Ma'asi, 2017

FAKA’ILO IA KI HONO FANGA TOKOUA

Veesi Lauloto: 'Efeso 4:32

"Ka mou angaʻofa muʻa ʻi hoʻomou feangai´, mo manavaʻofa, pea mou fe faka-molemoleʻaki, ʻo hangē foki ko e ʻOtua´, ne Ne fakamolemole kimoutolu ʻia Kalaisi"

Senesi 45:1-7

"1PEA feinga ‘a Siosifa ke fakama‘uma‘u telia ‘a e kakai na‘e tutu‘u mo ia, ka na‘e ‘ikai te ne lava; ko ia na‘e ne kalanga, Fakahū kitua‘ā ‘a e kakai kotoa pē meiate au. Pea na‘e ‘ikai ha taha ‘e tu‘u mo Siosifa ‘i he‘ene faka‘ilo ia ki hono ngaahi tokoua. 2Pea na‘a ne fu‘u fākafoa; pea na‘e fanongo ai ‘a e kau ‘Isipite, pea fanongo mo e fale ‘o Felo. 3Pea pehē ‘e Siosifa ki hono ngaahi tokoua, Ko Siosifa au; ‘oku kei mo‘ui koā ‘eku tamai? Pea na‘e ‘ikai lava ‘e hono ngaahi tokoua ke tali ki ai; he kuo nau puputu‘u ‘i hono ‘ao. 4Pea pehē ‘e Siosifa ki hono ngaahi tokoua, ‘Unu‘unu mai mu‘a kiate au. Pea na‘a nau ‘unu‘unu atu. Pea ne pehē, Ko Siosifa au, ko homou tokoua, ‘a ia na‘a mou fakatau ki ‘Isipite. 5Pea ko eni, ‘oua te mou mamahi, pea ‘oua te mou tautea kimoutolu ‘i ho‘omou fakatau au ki heni: he na‘e tuku mai au ‘e he ‘Otua ke u mu‘omu‘a kiate kimoutolu ke fai ha fakamo‘ui. 6He ko e ta‘u eni ‘e ua mo e honge ‘a e fonua: pea ‘oku kei toe ha ta‘u ‘e nima, ‘a ia ‘e ‘ikai fai ai ha tōta‘u pe ha ututa‘u. 7Ko ia na‘e tuku mai au ‘e he ‘Otua ke mu‘omu‘a kiate kimoutolu, koe‘uhi ke fakaili ha toe ‘iate kimoutolu ‘i he fonua, pea ke fai ma‘amoutolu ha haofaki mo ha fakamo‘ui lahi."

Ne feinga ʻa Siosifa ke fakamaʻumaʻu telia e kakai ‘Isipite na‘e ‘i ai´, ka naʻe ʻikai te ne lava; ko ia naʻa ne kalanga, ―Fakahū kitu‘a ʻa e kakai kotoa pē meiate au. Pea ne toki fakaʻilo ia ki hono ngaahi tokoua´. Naʻa ne fuʻu fākafoa; pea fanongo mai ʻa e kau Isipite´, mo e fale ʻo Felo´. Pea ne toki lea atu, ―Ko Siosifa au; ʻoku kei moʻui koā ʻeku tamai?‖ Naʻe ʻikai lava ʻe hono ngaahi tokoua´ ke tali, he kuo nau puputuʻu kotoa. Pea ne to e lea atu, ―Mou ʻunuʻunu mai muʻa kiate au. Ko au ‘eni homou tokoua´, ʻa ia naʻa mou fakatau ki Isipite´. Pea ko eni, ʻoua te mou mamahi, pea ʻoua te mou tautea kimoutolu ʻi hoʻomou fakatau au ki heni´: he naʻe tuku mai au ʻe he ʻOtua´ ke u muʻomuʻa kiate kimoutolu ke fakaili ha toe ʻiate kimoutolu ʻi he fonua´, pea ke fai maʻamoutolu ha haofaki mo ha fakamoʻui lahi. He ko e taʻu eni ʻe ua mo e honge ʻa e fonua´: pea ʻoku kei toe ha taʻu ʻe nima, ʻa ia ʻe ʻikai fai ai ha tōtaʻu pe ututaʻu.

Lotu: Lotu ‘o kole ki he ‘Otua´ ke Ne tokoni atu ke ke lava ‘o fakamolemole’i ‘a kinautolu ‘oku faikovi atu.

Pulelulu 29 Ma'asi, 2017

IPU ‘A SIOSIFA

Veesi Lauloto: 'Efeso 4:32

"Ka mou angaʻofa muʻa ʻi hoʻomou feangai´, mo manavaʻofa, pea mou fe faka-molemoleʻaki, ʻo hangē foki ko e ʻOtua´, ne Ne fakamolemole kimoutolu ʻia Kalaisi"

Senesi 43:26-30
" 26Pea ‘i he hū mai ‘a Siosifa ki fale, na‘a nau ‘atu kiate ia ‘a e me‘a‘ofa ‘a ia kuo nau ha‘u mo kinautolu ki fale, pea na‘a nau tulolo kiate ia, ‘o punou ki he kelekele. 27Pea na‘a ne ‘eke kiate kinautolu pe ‘oku nau lelei; pea ne pehē, ‘Oku lelei ho‘omou ‘eiki, ‘a e motu‘a na‘a mou lau ki ai? ‘oku ne kei laumālie? 28Pea nau tali, ‘Oku lelei ho‘o tamaio‘eiki ko ‘emau tamai, ‘oku ne kei laumālie. Pea nau punou ‘o hū. 29Pea ne hanga atu ‘o ne vakai ‘a Penisimani ko hono tehina, ko e tama ‘a ‘ene fa‘ē, ‘o ne pehē, Ko ena homou tehina kimui, ‘a ia na‘a mou lau kiate au? Pea ne pehē, Nga‘ata, ke ‘ofa ‘a e ‘Otua kiate koe! 30Pea fakavave ‘a Siosifa; he na‘e ngaue hono fatu ‘i he ‘ofa ki hono tehina: pea na‘a ne kumi ha potu ke ne tangi ai; pea ne hū ki hono loki ‘o tangi ai."

Senesi 44:1-22

"1PEA ne fekau ki he matāpule ‘o hono fale, ‘o pehē, Fakafonu me‘akai ‘a e ngaahi tangai ‘a e kau tangata ki he ngata‘anga ‘o ‘enau mafai ke ‘ave, pea ‘ai ‘a e pa‘anga ‘a e tangata takitaha ki he‘ene ngutu‘i tangai. 2Pea ko ‘eku ipu, ‘a e ipu siliva, ‘ai ia ki he ngutu‘i tangai ‘a e kimui, fakataha mo ‘ene pa‘anga koane. Pea na‘a ne fai ‘o hangē ko ia kuo me‘a mai ki ai ‘e Siosifa. 3Pea pongipongi hake na‘e ‘alu ‘a e kau tangata, ‘a kinautolu mo ‘enau fanga ‘asi. 4Pea kuo ‘alu kinautolu mei he kolo, ka kuo te‘eki ke nau loko mama‘o, pea pehē ‘e Siosifa ki he matāpule ‘o hono fale, Tu‘u ‘o tuli ki he kau tangata; pea ‘i ho‘o ma‘u atu, ke ke lea ki ai ‘o pehē, Ko e hā kuo mou totongi ai ‘a e lelei ‘aki ‘a e kovi? 5‘Ikai ko ia ia ‘oku inu ai ‘a hoku ‘eiki, pea mo ia ‘oku ne mātu‘aki fai ai ‘ene tonga-fisi? ‘Oku kovi ‘a e me‘a kuo mou fai. 6Pea ne ma‘u atu kinautolu, pea ne fai ‘a e ngaahi lea ko ia kiate kinautolu. 7Pea nau tali, Ko e hā ‘oku lea pehē ai ‘a e Feitu‘u na? molekemama‘o ‘a e fai ‘e ho‘o kau tamaio‘eiki ha me‘a pehē; 8Vakai, ko e pa‘anga na‘a mau ‘ilo ‘i he‘emau ngaahi ngutu‘i tangai, na‘a mau toe ‘omi kiate koe mei he fonua ko Kēnani: pea fēfē ai ha‘amau kaiha‘asi mei he fale ‘o ho ‘eiki ha siliva pe ha koula? 9‘Ilonga ‘a ia ‘i ho‘o kau tamaio‘eiki ‘oku ‘ilo ki ai ‘a e me‘a, ke ne mate, pea ko kimautolu foki te mau nofo ko e kau tamaio‘eiki ‘a e ‘eiki na. 10Pea ne tali, ‘Āua, tau tuku ke pehē, ‘o hangē ko ho‘omou lea: ‘ilonga ‘a ia ‘e ‘ilo ki ai ‘a e me‘a, te ne nofo ko ‘eku tamaio‘eiki; kae ‘atā pē kimoutolu. 11Pea nau fakavave, ‘o takitaha ‘ohifo ki lalo ‘ene tangai, ‘o vete. 12Pea ne kumi, ‘o kamata mei he ‘uluaki ‘o faka‘osi ki he kimui: pea na‘e ‘ilo ‘a e ipu ‘i he tangai ‘a Penisimani. 13Pea nau hae honau kofu, pea nau takitaha fakaheka ‘a e me‘a ki he‘ene ‘asi, ‘o nau foki ki he kolo. 14Pea a‘u ‘a Siuta mo hono ngaahi tokoua ki he fale ‘o Siosifa; pea na‘a ne kei ‘i ai: pea nau tō ‘o fo‘ohifo ki he kelekele. 15Pea lea ‘a Siosifa kiate kinautolu, Ko e hā ‘a e ngāue ni kuo mou fai? Lau ‘e au te mau ‘ilo kuo pau ke fai tongafisi ha tokotaha hangē ko au. 16Pea tali ‘e Siuta, Ko e hā ha‘amau lea ‘e fai ki he Feitu‘u na? Ko e hā ha‘amau fakamatala? Pea te mau fakatonuhia fēfē kimautolu? Kuo fakae‘a ‘e he ‘Otua ‘a e kovi ‘a ho‘o kau tamaio‘eiki: ko kimautolu eni te mau nofo ki he ‘Afiona, ‘a kimautolu pea mo ia na‘e ‘ilo ki ai ‘a e ipu. 17Ka ka tali ‘e ia, Molekemama‘o ha‘aku fai ha me‘a pehē: ko e tangata pē na‘e ‘ilo ki ai ‘a e ipu, ko ia pē te ne nofo ko ‘eku tamaio‘eiki, ka ko kimoutolu, mou ‘alu fiemālie ki ho‘omou ‘eiki. 18Pea ‘unu‘unu kiate ia ‘a Siuta, ‘o ne pehē, Ke fakamolemole ‘a e Feitu‘u na, ko e fai atu ‘e ho‘o tamaio‘eiki ko au ha fo‘i lea ki ho fofonga, pea ke ‘oua na‘a ke tuputāmaki ki ho‘o tamaio‘eiki: he ‘oku ke tatau mo Felo. 19Na‘e fehu‘i ‘e he ‘Afiona ki ho‘o kau tamaio‘eiki, ‘o pehē, Pe ‘oku ‘i ai ha‘amou tamai, pe tokoua? 20Pea na‘a mau tali ki he ‘Afiona, ‘Oku ‘i ai ‘emau tamai ko e motu‘a, pea mo ha foha na‘a ne ma‘u kuo ne motu‘a, ko e tamasi‘i, pea kuo pekia hono tokoua, pea ko ia pē toko taha ‘oku toe ‘i he‘ene fa‘ē, pea ‘oku ‘ofa ai ‘e he‘ene tamai. 21Pea na‘a ke me‘a mai ki ho‘o kau tamaio‘eiki, Ke mou ‘ohifo ia kiate au ke u mamata tonu ki ai. 22Pea na‘a mau tali ki he ‘Afiona, ‘E ‘ikai lava ke māvae ‘a e tama mo ‘ene tamai: he ka māvae mo ‘ene tamai, ‘e pekia ‘ene motu‘a."

Kuo lava e fakatau ‘enau me‘akai´, pea nau foki leva ki Kēnani, ‘ikai ke nau ‘ilo ne fufuu‘i e ipu siliva ‘a Siosifa´ he tangai ‘a Penisimani´. Fekau ‘e Siosifa ‘ene sevāniti´ ke tulimui ‘o kumi ko ia pē ‘e ma‘u ai ‘ene ipu´, foki ange tokotaha ko ia´ ke hoko ko ‘ene tamaio‘eiki. Pea tulimui atu e sevāniti´ ‘o ma‘u e ipu´ he tangai ‘a Penisimani´, ko ia ne nau to e foki hake kotoa ki ‘Isipite. Pea lea ʻe Siuta kia Siosifa, ―‖Ko kimautolu eni te mau nofo atu kotoa pē ke tamaio‘eiki ki he feitu‘u na. Ka ke fakamolemole ko ʻemau tamai´ na‘a ne ma‘u homau tehina´ mo e tama ‘e taha ka kuo ne ‘osi pekia, lolotonga ‘ene motu‘a´, pea ko e tama ni pē toko taha ʻoku toe´, pea ‘oku ‘ofa ai ‘emau tamai´. Na‘a mau ‘omi pē ke ke mamata ki ai ka ke tui mai kia mautolu, ka ‘okapau ‘e māvae ‘a e tama ni mo ʻemau tamai´, ko e si‘i pekia aipē ‘emau tamai´ he hulu ‘ene mamahi´. Ne faingata‘a kia Siosifa ke kei mapukepuke hono lo‘imata´.

Lotu: Lotu 'o kole ki he ‘Otua´ ke Ne tokoni’i koe ke ke lava ‘o ‘ofa mo tokoni ki he kakai kehe´, hangē ko ia ne fai he fanga tokoua ‘o Siosifa.

Tusite 28 Ma'asi, 2017

PAU PE KE NAU TO E FOKI KI ‘ISIPITE

Veesi Lauloto: 'Efeso 4:32

"Ka mou angaʻofa muʻa ʻi hoʻomou feangai´, mo manavaʻofa, pea mou fe faka-molemoleʻaki, ʻo hangē foki ko e ʻOtua´, ne Ne fakamolemole kimoutolu ʻia Kalaisi"

Senesi 43:1-8

"1PEA na‘e mamafa ‘a e honge ‘i he fonua. 2Pea ‘i he faifai pea ‘osi ‘enau kai ‘a e koane kuo nau ‘omi mei ‘Isipite, pea lea kiate kinautolu ‘e he‘enau tamai, ‘o pehē, Mou toe ‘alu, ‘o fakatau mai ma‘atautolu ha me‘i me‘akai. 3Pea tali ‘e Siuta kiate ia, ‘o pehē, Na‘e mātu‘aki fakapapau kiate kimautolu ‘e he matāpule ‘o pehē, ‘E ‘ikai te mau toe sio ki hoku mata, ka ‘i ho‘omou omi mo kimoutolu homou tehina. 4Kapau te ke fie tuku mai homau tehina ke ‘alu mo kimautolu, te mau ‘alu hifo ‘o fakatau ha‘o kai: 5pea kapau ‘e ‘ikai te ke tuku mai, ‘e ‘ikai te mau ‘alu hifo: he na‘e lea mai ‘a e matāpule, ‘E ‘ikai te mau mamata ki hoku mata, ka ‘i ho‘omou omi mo homou tehina. 6Pea lea ‘a ‘Isileli, Ko e hā na‘a mou ta‘e‘ofa pehē ai kiate au, ‘o fakahā ki he tangata ‘oku kei toe hamou tehina? 7Pea na‘a nau pehē, Na‘e mātu‘aki ‘eke ‘e he matāpule kiate kimautolu, pea ki homau fāmili, ‘o pehē, ‘Oku kei laumālie ho‘omou tamai? ‘oku ai mo hamou tokoua? Pea na‘a mau fakamatala kiate ia ‘o fakatatau ki he ngaahi lea ko ia: he na‘a mau ‘alo‘alo‘iloa te ne pehē mai, Mou ‘ohifo homou tokoua? 8Pea lea ‘a Siuta ki he‘ene ‘eiki ko ‘Isileli, ‘o pehē, Tuku ‘a e tama kiate au, ka mau tutu‘u ‘o ‘alu, ka tau mo‘ui ‘o ‘oua ‘e mate, ‘a kimautolu mo koe, mo ‘emau tamaiki foki."

Naʻe to e mamafa ange ʻa e honge´ ʻi he fonua´, pea kuo ʻosi mo ‘enau me‘akai´, ko ia ne talaange he‘enau tamai´ ke nau toe ʻalu ʻo fakatau mai ha‘anau meʻakai. Pea tali ʻe Siuta kiate ia, ʻo pehē, ―Kapau te ke fie tuku mai homau tehina´ ke ʻalu mo kimautolu, te mau ʻalu hifo ʻo fakatau haʻo kai: pea kapau ʻe ʻikai te ke tuku mai, ʻe ʻikai te mau ʻalu hifo: he naʻe lea mai ʻa e kōvana´, ʻE ʻikai te mou mamata ki hoku mata´, ka ʻi hoʻomou omi mo homou tehina´, he naʻe mātuʻaki ʻeke ʻe he kōvana´ kiate kimautolu, pe ʻoku kei laumālie pē ‘emau tamai? Pe ʻoku ai mo hamau tokoua? Kaekehe, tuku ʻa e tama´ kiate au, ka mau ʻalu ā, ka tau moʻui ʻo ʻouae mate, ʻakimautolu mo koe, mo ʻemau fānau´ foki. Na‘e toki loto leva ‘a Sēkope ke ‘ave ‘a Penisimani.

Lotu: Lotu 'o fakamālō ki he ‘Otua´ He’ene fa’a tokoni’I koe ke ke lava ‘o fai e ngaahi tali tonu fakatatau ki Hono finangalo´, he ngaahi tūkunga faingata’a.

Monite 27 Ma'asi, 2017

KO E TAUTEA NAI ‘ENI?

Veesi Lauloto: 'Efeso 4:32

"Ka mou angaʻofa muʻa ʻi hoʻomou feangai´, mo manavaʻofa, pea mou fe faka-molemoleʻaki, ʻo hangē foki ko e ʻOtua´, ne Ne fakamolemole kimoutolu ʻia Kalaisi"

Senesi 42:18-24

"18Pea ‘i hono ‘aho tolu na‘e lea ‘a Siosifa kiate kinautolu, ‘o pehē, Mou fai eni, pea te mou mo‘ui; he ko e tokotaha au ‘oku ou ‘a‘apa ki he ‘Otua: 19kapau ko e kau fai mo‘oni kimoutolu, pea ke nofo pōpula ‘i he pilīsone hamou toko taha; ka mou ō kimoutolu ‘o ‘ave koane telia ‘a e honge ‘o homou ngaahi ‘api; 20ka mou ‘omi kiate au homou tehina kimui, pea ‘e fakamo‘oni ai ho‘omou lea; pea ‘e ‘ikai ai te mou mate. Pea na‘a nau fai pehē. 21Pea felāuaki ‘a e tu‘unga me‘a ni, Kuo tau hia mo‘oni ‘i hotau tehina, ‘i he‘etau sio ki he mamahi ‘o hono loto, ‘i he‘ene kōlenga kiate kitautolu kae ‘ikai te tau tokanga; ko hono ō ia kuo hoko ai kiate kitautolu ‘a e mamahi ko eni. 22Pea tali ‘e Lūpeni kiate kinautolu, ‘o pehē, ‘Ikai na‘a ku tala kiate kimoutolu, ‘o pehē, ‘Oua te mou fai ha kovi ki he tama; ka na‘e ‘ikai te mou tokanga? Pea ko eni foki ‘oku ‘eke hono toto. 23Ka ko kinautolu na‘e ‘ikai te nau mahalo ‘oku ‘ilo‘i ‘e Siosifa; he na‘e hikilea ‘enau fe‘iloaki. 24Pea ne tafoki meiate kinautolu, ‘o tangi; pea ne foki mai ‘o alea mo kinautolu, pea ne fili ‘a Simione, ‘o ne ha‘i ia ‘i honau ‘ao."

Ne tukuaki'i 'e Siosifa hono fanga tokoua´ ko e kau sipai, pea ne fekau ke nofo honau tokotaha 'i Isipite kae foki e toenga´ 'o ‘omai honau tehina si'isi'i taha´ ki 'Isipite. Pea felauaki 'a e fanga tokoua 'o Siosifa´ he'enau pehē kuo tō mai 'a e nunu'a 'o e mamahi 'a honau tehina ko Siosifa´ pea kuo tautea ai kinautolu 'i he me'a ni; ka 'i he fanongo 'a Siosifa ki he'enau vete hia´ na'a ne tangi fakafufū. Pea ne ʻave fakataha kinautolu ki he pilīsone´, ʻo ʻaho tolu. Pea ne talaange kapau ‘oku nau mo‘oni, nau ō pea nau foki mai mo honau tehina´ pea ʻe fakamoʻoni ai ‘enau lea´; pea ʻe ʻikai ai te nau mate. Pea naʻa nau fai pehē. Talaange ‘e Lūpeni ko e ‘atunga ia ‘enau faikovi kia Siosifa´, kuo ʻeke hono toto´. Ne fanongo atu pe ‘a Siosifa; pea ne tafoki ʻo tangi; pea ne foki mai ʻo ne fili ʻa Simione, ke nofo ia he pilīsone´ ka nau ō pea nau toki omi.

Lotu: Lotu 'o kole ki he ‘Otua´ ke Ne tokoni atu ke ke lava ‘o fai ‘ofa kiate kinautolu ne faikovi kiate koe´, ‘ouae totongi kovi e kovi´.

Sapate 26 Ma'asi, 2017

KAU SIPAI

Veesi Lauloto: 'Efeso 4:32

"Ka mou angaʻofa muʻa ʻi hoʻomou feangai´, mo manavaʻofa, pea mou fe faka-molemoleʻaki, ʻo hangē foki ko e ʻOtua´, ne Ne fakamolemole kimoutolu ʻia Kalaisi"

Senesi 42:6-11

"6Pea ko Siosifa ko e kōvana ia ‘o e fonua, ko ia ia na‘a ne fakatau ki he kakai ‘o e fonua: pea na‘e ha‘u ‘a e ngaahi tokoua ‘o Siosifa, ‘o nau tulolo kiate ia, ‘o punou ki he kelekele. 7Pea ‘i he mamata ‘a Siosifa ki hono ngaahi tokoua, na‘a ne ‘ilo kinautolu, ka na‘a ne fai kiate kinautolu ‘o hangē ha muli, ‘o ne lea fakapuhopuha kiate kinautolu, ‘o ne pehē kiate kinautolu, Ko ho‘omou omi mei fē? 8Pea nau pehē, Mei he fonua ko Kēnani ke fakatau me‘akai. Pea na‘e ‘ilo ‘e Siosifa hono ngaahi tokoua, ka ko kinautolu na‘e ‘ikai te nau ‘ilo ia. 9Pea na‘e manatu ‘e Siosifa ki he ngaahi misi na‘a ne fai kiate kinautolu, pea ne pehē ki ai, Ko e kau mataki kimoutolu; kuo mou omi ke vakai ‘a e ta‘eū ‘o e fonua. 10Pea nau tali, ‘Ēī, ‘oku ‘ikai, he kuo omi ‘a ho‘o kau tamaio‘eiki ke fakatau me‘akai. 11Ko kimautolu kātoa ko e fānau ‘a ha tangata pē taha; ko e kakai fai mā‘oni‘oni kimautolu, ‘oku ‘ikai ko e kau mataki ‘a ho‘o kau tamaio‘eiki."

Pea ko Siosifa ko e kōvana ia ʻo e fonua´, ko ia ia naʻa ne fakatau ki he kakai ʻo e fonua´: pea naʻe haʻu ʻa e ngaahi tokoua ʻo Siosifa´, ʻo nau tulolo kiate ia, ʻo punou ki he kelekele´. Pea ʻi he mamata ʻa Siosifa ki hono ngaahi tokoua´, naʻa ne ʻilo kinautolu, ka naʻa ne fai kiate kinautolu ʻo hangē ha muli´, ʻo ne lea mālohi kiate kinautolu, ʻo ne pehēange, ―Ko hoʻomou omi´ mei fē? Pea nau pehē, ―Mei he fonua ko Kēnani´‖. Pea naʻe ʻilo ʻe Siosifa hono ngaahi tokoua´, ka ko kinautolu naʻe ʻikai te nau ʻilo ia. Pea naʻe manatu ʻe Siosifa ki he ngaahi misi naʻa ne fai kiate kinautolu´, pea ne pehē atu, ―Ko e kau mataki kimoutolu; kuo mou omi ke vakai ʻa e taʻeū ʻo e fonua´‖. Pea nau tali, ―ʻEī, ʻoku ʻikai, he ko ‘emau omi´ ke fakatau meʻakai. Ko kimautolu kātoa ko e fānau ʻa ha tangata pē taha; ko e kakai fai māʻoniʻoni kimautolu, ʻoku ʻikai ko ha kau mataki.

Lotu: Lotu ‘o kole ki he ‘Otua´ ke Ne tokoni atu ke ke lava ‘o tu’u loto to’a he fakamo’oni Ma’ana.

Tokonaki 25 Ma'asi, 2017

FAKATAU KOANE MEI ‘ISIPITE

Veesi Lauloto: 'Efeso 4:32

"Ka mou angaʻofa muʻa ʻi hoʻomou feangai´, mo manavaʻofa, pea mou fe faka-molemoleʻaki, ʻo hangē foki ko e ʻOtua´, ne Ne fakamolemole kimoutolu ʻia Kalaisi"

Senesi 42:1-5

"1PEA ‘i he ‘ilo ‘e Sēkope ‘oku ai ha koane ‘i ‘Isipite, na‘a ne pehē ki he‘ene fānau, Ko e hā ‘oku mau fesiofaki ai. 2Pea ne pehē foki, Ko eni kuo u fanongo ‘oku ai ha koane ‘i ‘Isipite: mou ‘alu hifo mu‘a ki ai, ‘o fakatau mei ai ma‘atautolu; koe‘uhi ke tau mo‘ui, ‘o ‘oua te tau mate. 3Ko ia na‘e ‘alu hifo ‘a e ngaahi tokoua ‘e hongofulu ‘o Siosifa ke fakatau koane mei ‘Isipite. 4Ka ko Penisimani, ko e tehina ‘o Siosifa, na‘e ‘ikai tuku ia ‘e Sēkope ke ‘alu mo hono ngaahi tokoua; he‘ene pehē, Na‘a hoko kiate ia ha tu‘utāmaki. 5Pea na‘e ha‘u ‘a e fānau ‘a ‘Isileli ke fakatau fakataha mo e kakai na‘e ha‘u; he na‘e honge ‘a e fonua ko Kēnani."

‘I he ʻilo ʻe Sekope ʻoku ‘i ai ‘a e koane ʻi ‘Isipite´, naʻa ne fekau‘i leva ‘ene fānau´ ke nau ʻalu hifo ki ‘Isipite, ʻo fakatau mei ai ha‘anau me‘akai. Ko ia naʻe ʻalu hifo ʻa e ngaahi tokoua ʻe hongofulu ʻo Siosifa´ ke fakatau koane mei ‘Isipite. Ka ko Penisimani, ko e tehina ʻo Siosifa´, naʻe ʻikai tuku ia ʻe Sekope ke ʻalu mo hono ngaahi tokoua´, telia naʻa hoko kiate ia ha tuʻutāmaki. Pea naʻe ‘alu ʻa e fanau ʻa ‘Isileli´ ke fakatau fakataha mo e kakai naʻe haʻu ki ‘Isipite´, he naʻe honge ʻa e fonua ko Kēnani´. Pea ko Siosifa na‘e kōvana ‘i he fonua´, ko ia ia naʻa ne fakatau ki he kakai ʻo e fonua´. Na‘e ‘ikai pē ke nau ‘ilo ko Siosifa ia, pea 'ikai pē ke fakahā 'e Siosifa ia kiate kinautolu. ‘Oku fiema‘u ke tau falala kakato ki he ‘Otua´ ke tauhi mo tokanga‘i hotau fanga ki‘i fāmili.

Lotu: Lotu ‘o fakamālō ki he ‘Otua´ He’ene ‘i ai ma’u pē ke tokanga’i ‘etau ngaahi fiema’u´ mo fakahaofi kitautolu mei he fili lahi´.

Falaite 24 Ma'asi, 2017

KUMI ME’AKAI KI ‘ISIPITE

Veesi Lauloto: Loma 8:28

"Kaeʻumaʻā ʻoku tau ʻilo, ʻilonga ʻa e kakai ʻoku ʻofa ki he ʻOtua´, ʻoku fengāueʻaki ʻa e meʻa kotoa pē maʻanau lelei"

Senesi 41:53-57

"53Pea na‘e ‘osi ‘a e ta‘u ‘e fitu ‘o e mahu, ‘a ia na‘e hoko ki he fonua ko ‘Isipite. 54Pea na‘e kamata hoko ‘a e ta‘u ‘e fitu ‘o e honge, ‘o hangē ko e lea ‘a Siosifa: pea ko e honge na‘e ‘i he ngaahi fonua kotoa pē; ka ‘i he ngaahi feitu‘u ‘o ‘Isipite na‘e ‘i ai ha me‘akai. 55Pea ‘i he faifai pea honge ‘a e ngaahi feitu‘u kehekehe ‘o ‘Isipite, pea tangi ‘a e kakai kia Felo ke ‘omi ha me‘akai: pea tala ‘e Felo ki he kakai ‘Isipite, Mou ō kia Siosifa; pea ‘ilonga ha me‘a ‘oku ne tala kiate kimoutolu, mou fai. 56Pea ko e honge na‘e ‘i he funga ‘o māmani kotoa, pea na‘e fakaava ‘e Siosifa ‘a e ngaahi feleoko, ‘o ne fakatau ki he kakai ‘Isipite; pea na‘e faifai pea mamafa ‘a e honge ‘i ‘Isipite. 57Pea na‘e ha‘u ki ‘Isipite ‘a e ngaahi fonua kehekehe ke fakatau me‘akai meia Siosifa; he na‘e mamafa ‘a e honge ‘i he fonua kotoa pē."

‘I he ʻosi atu ʻa e taʻu mahu ʻe fitu´, naʻe hoko mai leva ki he fonua´ ʻa e taʻu ʻe fitu ʻo e honge´, ʻo hangē ko e lea ʻa Siosifa´: pea na‘e ‘ikai ko ‘Isipite pē, ka naʻe ʻi he ngaahi fonua´ kotoa pē. Ka ko e ngaahi feituʻu pē ʻo Isipite´ naʻe ʻi ai ha meʻakai. Pea ʻi he faifai pea honge ʻa e ngaahi feituʻu kehekehe ʻo ‘Isipite´, na‘e tangi ʻa e kakai´ kia Felo ke ʻomi ha meʻakai: pea tala ʻe Felo ki he kakai Isipite´ ke nau ō kia Siosifa; pea nau fai ki he me‘a kotoa te ne tala´. Pea ko e honge´ naʻe ʻi he funga ʻo māmani´ kotoa, pea naʻe fakaava ʻe Siosifa ʻa e ngaahi feleoko´, ʻo ne fakatau ki he kakai ‘Isipite´; pea naʻe faifai pea mamafa ʻa e honge´ ʻi ‘Isipite. Pea naʻe haʻu ki ‘Isipite ʻa e ngaahi fonua kehekehe´ ke fakatau meʻakai meia Siosifa; he naʻe mamafa e honge´ ʻi he fonua kotoa pē. Na‘e ngaue'aki ‘e he 'Otua´ 'a Siosifa ke fakahaofi ‘a e kakai´ mei he fiekaia´.

Lotu: Lotu ‘o fakamālō ki he ‘Otua´ He’ene toka’afio’i ‘a e kaha’u´ mo e me’a kotoa pē ‘oku hoko´ mo ‘Ene teuteu’i kitautolu ki ha tūkunga pē ‘oku hoko mai.

Tu'apulelulu 23 Ma'asi, 2017

PALANI ‘A SIOSIFA KE FAKAFEPAKI’I ‘AKI E HONGE

Veesi Lauloto: Loma 8:28

"Kaeʻumaʻā ʻoku tau ʻilo, ʻilonga ʻa e kakai ʻoku ʻofa ki he ʻOtua´, ʻoku fengāueʻaki ʻa e meʻa kotoa pē maʻanau lelei"

Senesi 41:46-49

"46Pea na‘e ‘alu atu ‘a Siosifa kuo ‘iate ia ‘a e fonua ko ‘Isipite. Pea kuo tolungofulu ta‘u ‘a Siosifa ‘i he‘ene tu‘u ‘i he ‘ao ‘o Felo ko e Tu‘i ‘Isipite. Pea na‘e ‘alu atu ‘a Siosifa mei he ‘ao ‘o Felo, ‘o ne angi atu ‘i he fonua kotoa ‘o ‘Isipite. 47Pea ‘i he ta‘u mahu ‘e fitu na‘e fua ngafuhifuhi ‘a e kelekele. 48Pea na‘a ne tānaki ‘a e me‘akai kehekehe ‘o e ta‘u ‘e fitu, ‘a ia na‘e ‘i he fonua kotoa ‘o ‘Isipite, pea ne tuku ‘a e me‘akai ‘i he ngaahi kolo: ko e me‘akai ‘o e tuku‘uta na‘e takatakai ‘a e kolo takitaha na‘a ne tuku ia ‘i he kolo ko ia. 49Pea na‘e fa‘oaki koane ‘e Siosifa ‘o hangē ko e ‘one‘one ‘o e tahi hono lahi, ‘io, na‘e lahi ‘aupito, ko ia na‘e tuku hono fua; he na‘e ‘ikai mafua."

Kuo tolungofulu taʻu eni ‘a Siosifa ʻi heʻene tuʻu ʻi he ʻao ʻo Felo´. Naʻe ʻalu atu leva ʻa Siosifa mei he ʻao ʻo Felo´, kuo ne hoko ko e angi ʻi he fonua kotoa ʻo ‘Isipite´, ko e fika 2 ia kia Felo´. Pea ʻi he taʻu mahu ʻe fitu´, naʻe fua ngafuhifuhi ʻa e kelekele´. Pea naʻa ne tānaki ʻa e meʻakai kehekehe ʻo e taʻu mahu ʻe fitu´, ʻa ia naʻe ʻi he fonua kotoa ʻo ‘Isipite´, pea ne tuku ʻa e meʻakai´ ʻi he ngaahi kolo´: pea ko e meʻakai ʻo e tukuʻuta naʻe takatakai ʻa e kolo taki taha´ naʻa ne tuku ia ʻi he kolo ko ia´. Pea naʻe faʻoaki koane ʻe Siosifa ʻo hangē ko e ʻoneʻone ʻo e tahi´ hono lahi´, ʻio, naʻe lahi ʻaupito, ko ia naʻe tuku hono fua´; he naʻe ʻikai mafua.

Lotu: Lotu 'o kole ki he ‘Otua´ ke Ne tokoni atu ke ke pōto’i he fai ‘o e fekau kotoa pē kuo tuku kiate koe´, pe ‘oku ke ngāue pē ‘i ‘api pe ko fē pē ha feitu’u.

22 Pulelulu Ma'asi, 2017

FALE’I ‘A SIOSIFA KI HE TU’I

Veesi Lauloto: Loma 8:28

"Kaeʻumaʻā ʻoku tau ʻilo, ʻilonga ʻa e kakai ʻoku ʻofa ki he ʻOtua´, ʻoku fengāueʻaki ʻa e meʻa kotoa pē maʻanau lelei"

Senesi 41:33-41

"33Pea ko ia ke vakai ‘e Felo ha tangata ‘oku mafai mo poto, pea ke ne fokotu‘u ia ke angi ki he fonua ko ‘Isipite. 34Pea ke fai ‘e Felo mo fokotu‘u ha kau ‘ōfisa ki he fonua, ke to‘o hono vahe nima ‘o e fonua ko ‘Isipite ‘i he ta‘u ‘e fitu ‘o e mahu. 35Pea ke nau tānaki ‘a e me‘akai kehekehe ‘o e ta‘u lelei ‘e fitu ko ia ‘oku ha‘u, ‘o nau fa‘oaki uite ‘i he malu ‘o Felo, ko e me‘akai ki he‘enau ngaahi kolo, pea ke nau tauhi ia. 36Pea ko e me‘akai ko ia ko e tokonaki ki he fonua ki he ta‘u honge ‘e fitu, ‘a ia ‘e hoko ki ‘Isipite, koe‘uhi ke ‘oua na‘a ‘auha ‘a e fonua ‘i he honge. 37Pea na‘e hā lelei ‘a e me‘a kia Felo, mo ‘ene kau tamaio‘eiki kotoa. 38Pea folofola ‘a Felo ki he‘ene kau tamaio‘eiki, Te tau ‘ilo ‘i fē ha taha ‘oku hangē ko eni, ha tangata ‘oku ‘i ai ‘a e laumālie ‘o e ‘Otua? 39Pea folofola ‘a Felo kia Siosifa, Ko e me‘a ‘i he fakahā ‘e he ‘Otua kiate koe ‘a e ngaahi fu‘u me‘a ni, ‘oku ‘ikai ha taha ‘oku mafai mo poto ‘o hangē ko koe. 40Ko koe te ke pule ‘i hoku fale, pea ko hoku kakai kotoa pē te nau fai ‘enau nofo ‘o fakatatau ki ho‘o angi; ko e taloni pē te u mā‘olunga ai ‘iate koe. 41Pea folofola ‘a Felo kia Siosifa, Ko eni kuo u fakanofo koe ke pule ki ‘Isipite kātoa."

Na‘e fai leva ‘e Siosifa ha fale‘i kia Felo koe‘uhi´ ko e mafatukituki ‘o e me‘a ‘oku teu ke hoko´. ―Tuku ke vakai ʻe Felo ha tangata ʻoku mafai mo poto, pea ke ne fokotuʻu ia ke angi ki he fonua ko ‘Isipite´. Pea fokotuʻu mo ha kau ‘ofisa ki he fonua´, ke toʻo hono vahe nima ʻo e fonua ko ‘Isipite´ ʻi he taʻu ʻe fitu ʻo e mahu´ ‘o tānaki ia ʻo nau faʻoaki uite ʻi he malu ʻo Felo´, ko e meʻakai ki heʻenau ngaahi kolo´, pea ke nau tauhi ia. Pea ko e meʻakai ko ia´ ko e tokonaki ia ki he fonua´ ki he taʻu honge ʻe fitu ʻa ia ʻe hoko ki ‘Isipite´, koeʻuhi´ ke ʻoua naʻa ʻauha ʻa e fonua´ ʻi he honge´. Pea naʻe hā lelei ʻa e meʻa ko ia´ kia Felo, mo ʻene kau tamaioʻeiki´ kotoa. Pea folofola ʻa Felo ki heʻene kau tamaioʻeiki´, ―Te tau ʻilo ʻi fē ha taha ʻoku hangē ko Siosifa´, ha tangata ʻoku ʻi ai ʻa e laumālie ʻo e ʻOtua´? Pea folofola ʻa Felo kia Siosifa, ―ʻOku ʻikai ha taha ʻoku mafai mo poto ʻo hangē ko koe´. Te ke pule ʻi hoku fale´, ko hoku kakai´ te nau fai ki hoʻo angi´; ko e taloni´ pē te u māʻolunga ai ʻiate koe´. Pea ko eni kuo u fakanofo koe ke pule ki ‘Isipite kātoa..

Lotu: Lotu 'o fakamālō ki he ‘Otua´ he pau mo tu’uma’u ‘Ene ngaahi palani´, pea ko e me’a pē ia ‘e hoko´, ko e palani ‘a e ‘Otua.

Tusite 21 Ma'asi, 2017

FAKA’UHINGA’I ‘A E MISI ‘A FELO´

Veesi Lauloto: Loma 8:28

"Kaeʻumaʻā ʻoku tau ʻilo, ʻilonga ʻa e kakai ʻoku ʻofa ki he ʻOtua´, ʻoku fengāueʻaki ʻa e meʻa kotoa pē maʻanau lelei"

Senesi 41:28-32

"28Ko eni ‘a e me‘a kuo u fakamatala kia Felo; ‘oku fakahā ‘e he ‘Otua ki he ‘Afiona ‘a e me‘a ‘oku ne teu ke fai. 29Vakai, ‘oku ha‘u ha ta‘u ‘e fitu ‘a ia ‘e mahu lahi ai ‘a ‘Isipite kātoa; 30pea ‘e hoko ai ha ta‘u honge ‘e fitu, pea ‘e ngalo kotoa ‘a e mahu ‘i he fonua ko ‘Isipite, pea ‘e ‘auha ‘a e fonua ‘i he honge; 31‘io ‘e ‘ikai ‘iloa ‘a e mahu na‘e ‘i he fonua koe‘uhi ko e honge ko ia ‘e hoko ai; he ‘e mamafa ‘aupito ia. 32Pea ko e me‘a ‘i hono ‘ai ‘o lōua ‘a e misi kia Felo, ko hono ‘uhinga kuo pau ‘a e me‘a mei he ‘Otua, pea ‘e vave ‘ene fai."

Pea na‘e tatala 'e he 'Otua´ kia Siosifa 'a e 'uhinga 'o e misi ‘a Felo´, pea toki fakamatala leva ‘a Siosifa... ―Ko e ongo misi´ fakatoloua ‘oku na ‘uhinga tatau pē ki he me‘a ‘e taha. ‘Oku fakahā ʻe he ʻOtua´ ki he feitu‘una Felo, ʻa e meʻa
ʻoku Ne teu ke fai´. Ko e fanga pulu sisino ‘e 7´ mo e ngaahi fo‘I koane fuolalahi ‘e 7´, ‘oku ‘uhinga ia ki he ta‘u mahu ‘e 7. Pea ko e fanga pulu tutue ‘e 7´ mo e ngaahi fo‘I koane fuomate ‘e 7´, ‘oku ‘uhinga ia ki he ta‘u honge ‘e 7. Vakai, ʻoku haʻu ha taʻu ʻe fitu ʻa ia ʻe mahu lahi ai ʻa Isipite kātoa; pea ‘osi ko ia´ ʻe hoko ai ha taʻu honge ʻe fitu, pea ʻe ngalo kotoa ʻa e mahu´ ʻi he fonua ko ‘Isipite´, pea ʻe ʻauha ʻa e fonua´ ʻi he honge´; ʻio, ʻe ʻikai ʻiloa ʻa e mahu naʻe ʻi he fonua´, koeʻuhi´ ko e honge ko ia ʻe hoko ai´; he ʻe mamafa ʻaupito ia. Pea ko e meʻa ʻi hono ʻai ʻo lōua ʻa e misi´ kia Felo´, ko hono ʻuhinga´ he kuo pau ke hoko ia, pea ʻe vave ʻene hoko mai´.

Lotu: Lotu ‘o kole ki he ‘Otua´ ke Ne ngaohi koe ke ke to’a ke tu’u Ma’ana mo fakamo’oni lototo’a Ma’ana ‘i ha feitu’u pē.

Monite 20 Ma'asi, 2017

‘OKU ‘IKAI KO AU, KA KO E ‘OTUA´!

Veesi Lauloto: Loma 8:28

"Kaeʻumaʻā ʻoku tau ʻilo, ʻilonga ʻa e kakai ʻoku ʻofa ki he ʻOtua´, ʻoku fengāueʻaki ʻa e meʻa kotoa pē maʻanau lelei"

Senesi 41:14-16

"14Pea fekau ‘e Felo ke ui ange ‘a Siosifa, pea na‘a nau ‘omi fakavave ia mei he ‘ana: pea na‘a ne tele hono kava, ‘o ne fetongi hono kofu, ‘o ne hū mai kia Felo. 15Pea folofola ‘a Felo kia Siosifa, ‘o pehē, Kuo u misi, pea ‘oku ‘ikai ha taha ke faka‘uhinga ia: ka kuo u fanongo kiate koe, tokua ko ho‘o fanongo leva ki ha misi pea ke faka‘uhinga ia. 16Pea tali ‘e Siosifa kia Felo, ‘o pehē, ‘Oku ‘ikai ko au: ko e ‘Otua pē te ne ‘omi ha me‘a ke tu‘umālie ai ‘a e ‘Afiona."

Pea fekau ʻe Felo ke ui ange ʻa Siosifa, pea naʻa nau ʻomi fakavave ia mei he ʻana´: pea naʻa ne tele hono kava´, ʻo ne fetongi hono kofu´, ʻo ne hū mai kia Felo. Pea folofola ʻa Felo kia Siosifa, ʻo pehē, Kuo u misi, pea ʻoku ʻikai ha taha ke fakaʻuhinga ia: ka kuo u fanongo kiate koe, tokua ko hoʻo fanongo leva ki ha misi pea ke fakaʻuhinga ia. Pea tali ʻe Siosifa kia Felo, ʻo pehē, ʻoku ʻikai ko au: ko e ʻOtua´ pē te ne ʻomi ha meʻa ke tuʻumālie ai ʻa e ʻAfiona´. ‘Oku ‘i ai e ngaahi talēniti mo e ngaahi me‘a‘ofa kuo ‘osi fakanaunau ‘aki he ‘Otua´ kitautolu. ‘Oku mahu‘inga fānau ke tau mahino‘i, ko e ha‘u ia mei he ‘Otua´, ‘o hangē ko e tali ‘a Siosifa´, ―‘Oku ‘ikai ko au te u lava ke faka‘uhinga‘i ho‘o misi´, ko e me‘a pē ia ‘a e ‘Otua; ko e ‘Otua´ tokotaha pē ‘oku Ne malava ke faka‘uhinga‘i ‘ae misi´. ‘Oua na‘a tau kaiha‘asi ha lāngilangi ‘e taha ‘oe ‘Otua´.

Lotu: Lotu ‘o fakamālō ki he ‘Otua´ He’ene fa’a tokoni’i kitautolu he taimi ‘oku tau fai ai ha me’a ke e’a ai Hono lāngilangi´.

Sapate 19 Ma'asi, 2017

FAKA’UHINGA’I ‘A E MISI ‘A FELO

Veesi Lauloto: Loma 8:28

"Kaeʻumaʻā ʻoku tau ʻilo, ʻilonga ʻa e kakai ʻoku ʻofa ki he ʻOtua´, ʻoku fengāueʻaki ʻa e meʻa kotoa pē maʻanau lelei"

Senesi 41:8-14

" 8Pea ‘i he‘ene pongipongi na‘e hoha‘a hono finangalo; ‘o ne fekau ke ui mai ‘a e kau sikalaipe kotoa pē ‘o ‘Isipite, mo hono kau tangata poto kotoa pē: pea na‘e fakamatala ‘e Felo ‘ene misi kiate kinautolu, ka na‘e ‘ikai ha taha te ne faka‘uhinga kia Felo. 9Pea na‘e toki lea kia Felo ‘e he matāpule ‘o e ha‘a ngaohi kava, ‘o pehē, Kuo u toki manatu he ‘aho ni ki he‘eku hia. 10Na‘e tuputāmaki ‘a e ‘Afiona ki he‘ene kau tamaio‘eiki ‘o tuku au ke u nofo pōpula ‘i he fale ‘o e kapiteni ‘o e Kā‘ate, ‘a au mo e matāpule ‘o ha‘a ta‘o mā: 11pea ma misi fakatou‘osi ‘i ha pō pē taha, ‘a au mo ia, ‘o takitaha ma‘ana ‘a e misi mo hono ‘uhinga. 12Pea na‘a mau ‘i ai mo ha talavou ko e tangata Hepelū, ko e tamaio‘eiki ‘o e kapiteni ‘o e Kā‘ate; pea na‘a ma fakamatala kiate ia, pea na‘a ne faka‘uhinga kiate kimaua ‘ema misi; ‘o takitaha ‘a e misi hono ‘uhinga. 13Pea hangē ko ‘ene fakamatala kiate kimaua na‘e pehē ‘ene hoko; ko au na‘e fakafoki ‘e he ‘Afiona ki hoku lakanga, pea ko e tangata ko ē na‘e tautau. 14Pea fekau ‘e Felo ke ui ange ‘a Siosifa, pea na‘a nau ‘omi fakavave ia mei he ‘ana: pea na‘a ne tele hono kava, ‘o ne fetongi hono kofu, ‘o ne hū mai kia Felo."

Ne ‘ikai ha taha ia he pule‘anga´ na‘a ne malava ke faka‘uhinga‘i e misi ‘a Felo´. Faifai kuo toki manatu‘i he pule ngaohi kava ‘a Felo´ ‘a Siosifa, ‘o ne toki fakamatala kia Felo fekau‘aki mo ‘ene faka‘uhinga‘i ‘ena misi mo e tama ta‘omā´ he taimi na‘a na ‘i pilīsone ai´. Pea na‘e hoko tatau pē mo e me‘a na‘e fakamatala ‘e Siosifa´, ne fakafoki ia ki hono lakanga ngaohi kava´, kae tautau ‘a e tama ta‘omā´. Pea fekau ʻe Felo ke ui ange ʻa Siosifa, pea naʻa nau ʻomi fakavave ia mei he ʻana´: pea naʻa ne tele hono kava´, ʻo ne fetongi hono kofu´, ʻo ne hū mai kia Felo. Fuoloa ta‘u mo si‘ene nofo he pilīsone´, ka ko e toki taimi pē ‘eni ia ‘a e ‘Otua´ ke hū mai ai ki tu‘a´. Ko e leleitaha ia ma‘ana.

Lotu: Lotu ‘o kole ki he ‘Otua´ ke Ne tokoni’i koe ke ke fa’a kātaki ke ke fa’a tatali ma’u pē ki He’ene taimi´, ‘ouae ‘oho’oho mo kāimu’a, he ko e fiepoto´ ia.

Tokonaki 18 Ma'asi, 2017

MISI ‘A FELO

Veesi Lauloto: Loma 8:28

"Kaeʻumaʻā ʻoku tau ʻilo, ʻilonga ʻa e kakai ʻoku ʻofa ki he ʻOtua´, ʻoku fengāueʻaki ʻa e meʻa kotoa pē maʻanau lelei"

Senesi 41:1-7

"1PEA ‘i he faka‘osi ‘o ha ta‘u ‘e ua, na‘e misi ‘a Felo: tā ‘oku ne tu‘u ‘i he ve‘e vaitafe. 2Pea ‘iloange na‘e ‘alu hake mei he vaitafe ha fanga kau ‘e toko fitu na‘e matamatalelei mo sisino; pea nau kaikai ‘i he mohuku ano. 3Pea tā na‘e ‘alu hake kimui mei he vaitafe ha fanga kau kehe ‘e toko fitu na‘e matamata kovi mo tutue; ‘o nau tu‘u fakataha mo e fanga kau ko ē ‘i he ngutu ‘o e vaitafe. 4Pea ko e fanga kau na‘e matamata kovi mo tutue na‘a nau folofua ‘a e fanga kau ‘e fitu na‘e matamatalelei mo sisino. Pea ‘ā ai ‘a Felo. 5Pea mohe ia ‘o misi ko hono tu‘o ua: pea tā na‘e ‘alu hake ha fo‘i koane ‘e fitu ‘i ha sino pē taha, ‘o fuo lalahi mo lelei. 6Pea vakai, na‘e tupu hake kimui ha fo‘i koane ‘e fitu na‘e fua mate, pea pakukā ‘i he matangi hahake. 7Pea ko e ngaahi fo‘i koane na‘e fua mate na‘a nau folo ‘a e fo‘i koane ‘e fitu na‘e fuolalahi mo fai kakano. Pea ‘ā ai ‘a Felo, pea tā ko e misi pē."

Ne ‘osi mai e ta‘u ‘e 2, pea na‘e misi ʻa Felo: tā ʻoku ne tuʻu ʻi ha veʻe vaitafe. Pea ʻiloange´ naʻe ʻalu hake mei he vaitafe´ ha fanga pulu ʻe toko fitu naʻe matamatalelei mo sisino; pea nau kaikai ʻi he mohuku ano´. Pea tā naʻe ʻalu hake kimui mei he vaitafe´ ha fanga pulu kehe ʻe toko fitu naʻe matamata kovi mo tutue; ʻo nau tuʻu fakataha mo e fanga pulu sisino´ ʻi he ngutu ʻo e vaitafe´. Pea na‘e folofua ‘e he fanga pulu tutue´ ʻa e fanga pulu sisino´. Pea u ‘ā ai. Pea u to e mohe pē ʻo misi ko hono tuʻo ua: pea tā naʻe ʻalu hake ha foʻi koane ʻe fitu ʻi ha sino pē taha, ʻo fuolalahi mo lelei. Pea vakai, naʻe tupu hake kimui ha foʻi koane ʻe fitu naʻe fuamate. Pea ko e ngahi foʻi koane naʻe fuamate´ naʻa nau folo ʻa e ngaahi foʻi koane ʻe fitu naʻe fuolalahi´. Na‘e ‘oange he ‘Otua´ ‘a e ngaahi misi´ ni ka Felo´, ko e konga ia ‘o ‘Ene palani fakamo‘ui ma‘a Hono kakai´ ‘amui ange. Neongo na‘e lotu tamapua ‘a Felo ia, ka ‘oku fa‘iteliha pē ‘Otua´ ia he fili e kakai ke fakahoko ai ‘Ene palani´.

Lotu: Lotu ‘o fakamālō ki he ‘Otua´ He’ene ngaahi palōmesi ma’a kitautolu He’ene Folofola´, pea ke Ne tokoni mai ke tau tui ki ai, he ko e ha’u mei he ‘Otua.

Falaite 17 Ma'asi, 2017

FAKA’UHINGA’I ‘O E MISI´

Veesi Lauloto: Matiu 5:44

"Mou ‘ofa’i homou ngaahi fili´, pea hūfia ‘a kinautolu ‘oku nau fakatanga’i kimoutolu´."

Senesi 40:16-22

"16Pea ‘i he vakai ‘e he pule ‘o e ha‘a ta‘o mā ‘oku mālie ‘a e faka‘uhinga, pea ne pehē kia Siosifa, Ko au foki na‘a ku vakai ‘i he‘eku misi, pea tā ‘oku ‘i hoku ‘ulu ha koto mā hinehina ‘e tolu: 17pea ‘i he kato taupotu ki ‘olunga na‘e ai ‘a e ngaahi fa‘ahinga me‘a ‘oku ngaohi ‘e he ta‘o mā ko e me‘a taumafa ‘a Felo; pea na‘e kai ia ‘e he fanga manupuna mei he kato ‘i hoku funga ‘ulu. 18Pea tali ‘e Siosifa, ‘o pehē, Ko hono ‘uhinga eni: Ko e kato ‘e tolu ko e ‘aho ‘e tolu ia: 19‘oku toe pē ha ‘aho ‘e tolu, pea ‘e hiki ‘e Felo ho ‘ulu meiate koe, pea ne tautau koe ‘i ha ‘akau; pea ‘e kai ‘e he manupuna ho kakano meiate koe. 20Pea ‘i he hoko hono tolu ‘o e ‘aho, ‘a ia ko e ‘aho fā‘ele‘i ‘o Felo, na‘a ne fai ha kātoanga mo ‘ene kau tamaio‘eiki kotoa pē: pea ne hiki ‘a e ‘ulu ‘o e pule ‘o e ha‘a ngaohi kava mo e pule ‘o e ha‘a ta‘o mā ki he ha‘oha‘onga ‘o ‘ene kau tamaio‘eiki. 21Pea na‘a ne fakafoki ‘a e pule ‘o e ha‘a ngaohi kava ki he‘ene lakanga ngaohi kava; pea na‘a ne ‘ange ‘a e ipu ki he nima ‘o Felo: 22ka na‘a ne tautau ‘a e pule ‘o e ha‘a ta‘o mā; ‘o hangē ko e faka‘uhinga ‘a Siosifa kiate kinaua."

Ko e tama ta‘omā´ na‘e sio ia ki ha kato mā hinenina ʻe tolu ‘i hono ‘ulu´: pea ʻi he kato taupotu ki ʻolunga´ naʻe fonu ai he ngahi faʻahinga meʻa ta‘o ʻoku fa‘a taʻo ko e meʻa taumafa ʻa Felo´; pea naʻe kai ia ʻe he fanga manupuna´ mei he kato ʻi hoku funga ʻulu´. Ne tali ʻe Siosifa, ―Ko e kato ʻe tolu´ ko e ʻaho ʻe tolu ia: ʻoku toe pē ha ʻaho ʻe tolu, pea ʻe tautau koe ‘e Felo ʻi ha ʻakau; pea ʻe kai ʻe he manupuna´ ho kakano´ meiate koe. Pea ‘i he hili ‘a e ‘aho ‘e tolu´, na‘e hoko kotoa pē ‘a e ngaahi me‘a na‘e fakamatala ‘e Siosifa´. Na‘e foki ‘a e pule ngaohi kava´ ki he palasi´, kae tautau ‘a e tama ta‘omā´. Ka naʻe ʻikai manatu kia Siosifa ʻe he pule ngaohi kava´, ka naʻe ngalo pē.

Lotu: Lotu ‘o fakamālō ki he ‘Otua´ He’ene toka ‘afio’i ‘a e me’a kotoa, ‘o lava ai ke ke falala kakato kiate Ia ke Ne taki mo leva’i mai ho’o fononga´.

Tu'apulelulu 16 Ma'asi, 2017

MISI ‘A E ONGO TANGATA ‘I PILĪSONE

Veesi Lauloto: Matiu 5:44

"Mou ‘ofa’i homou ngaahi fili´, pea hūfia ‘a kinautolu ‘oku nau fakatanga’i kimoutolu´."

Senesi 40:7-14

"7Pea ne fehu‘i ki he ongo ‘ōfisa ‘a Felo, ‘a ia na‘e ‘iate ia ‘o nofo pōpula ‘i he fale ‘o hono ‘eiki, ‘o ne pehē, Ko e hā ‘oku kovi ai homo fofonga he ‘aho ni? 8Pea na tali, Kuo ma misi, pea ‘oku ‘ikai ha taha ke vete hono ‘uhinga.
Pea pehē ‘e Siosifa kiate kinaua, ‘Ikai ‘oku ‘i he ‘Otua ‘a e faka‘uhinga? fakamatala mai mu‘a kiate au. 9Pea fakamatala ‘ene misi kia Siosifa ‘e he pule ‘o e ha‘a ngaohi kava ‘o ne pehē, Na‘e hā kiate au ‘i he‘eku misi, pea tā ‘oku ‘i hoku ‘ao ha vaine; 10pea ‘i he vaine ‘a e va‘a ‘e tolu: pea hangē na‘e muka mai, pea moto mai; pea ko hono ngaahi loholoho na‘a nau laku mai ‘a e ngaahi kālepi: 11pea na‘e ‘i hoku nima ‘a e ipu ‘a Felo; pea u to‘o ‘a e ngaahi kālepi, ‘o tatau ia ki he ipu ‘a Felo, pea u ‘ange ‘a e ipu ki he to‘ukupu ‘o Felo. 12Pea tali ‘e Siosifa kiate ia, Ko hono ‘uhinga eni: Ko e va‘a ‘e tolu ko e ‘aho ‘e tolu ia. 13‘Oku toe ha ‘aho ‘e tolu, pea toki hiki ho ‘ulu ‘e Felo, pea te ne fakafoki koe ki ho tu‘unga, pea te ke ‘ange ‘a e ipu ‘a Felo ki hono nima, ‘o hangē ko ia ‘i mu‘a ‘i ho‘o nofo ko ‘ene ngaohi kava. 14Pea ‘oka ke ka tu‘umālie koe ke ke manatu‘i au, pea ke fai mu‘a ha ‘ofa kiate au, pea ke fakahaa‘ia au kia Felo, ‘o fakahū kitu‘a au mei he fale ko eni. "

Ne faifai pea fai hia ‘a e matāpule ngaohi kava´ mo e matāpule taʻo mā ʻa e Tuʻi Isipite´ ki he tu‘i´, ‘o na iku ai ki he pilīsone ‘a ē naʻe nofo pōpula ai ʻa Siosifa´. Pea na‘e tuku kinaua ‘e he kapiteni ʻo e Kaate´ kia Siosifa, ke ne tauhi kinaua. ‘Aho ‘e taha naʻa na misi fakatouʻosi ai ʻi ha pō pē taha. Na‘a na fakamatala ʻena misi´ kia Siosifa. Pea talaange ‘e Siosifa, ko Sihova te Ne faka‘uhinga‘i ‘ena misi´. Na‘e sio ‘a e pule ngaohi kava´ ki ha vaine na‘e va‘a tolu, na‘e fua mai ai ha ngaahi fuhinga kālepi, pea ne sio na‘a ne to‘o ‘a e kālepi´ ʻo tatau ki he ipu ʻa Felo´, pea ne ʻange kia Felo. Pea tali ʻe Siosifa, Ko hono ʻuhinga´ eni: ‘Osi e ‘aho ‘e 3, ‘e to e fakafoki koe ‘e Felo ki ho tu‘unga ‘i mu‘a´. Ka ‘oku ou kole atu, ka ke ka foki ki he palasi´, manatuʻi mai au, pea ke fai muʻa ha ʻofa kiate au, ‘o ke fakahā au kia Felo, ke fakahū kituʻa au mei he fale ni. He ko e mātuʻaki kaihaʻasia au mei he fonua ʻo e haʻa Hepelū´, pea naʻa mo ʻeku ʻi heni´, kuo ʻikai te u fai ha meʻa ke nau tuku ai au ki he ʻana ni.

Lotu: Lotu ‘o fakamālō mo fakafeta’i ki hotau ‘Otua´ He’ene makehe mo tu’utaha pē ‘Ana ‘i ha to e taha. ‘Oku Ne mafeia e me’a kotoa, pea ke tu’u ai ‘etau falala´.

Pulelulu 15 Ma'asi, 2017

FALALA’ANGA ‘I PILĪSONE

Veesi Lauloto: Matiu 5:44

"Mou ‘ofa’i homou ngaahi fili´, pea hūfia ‘a kinautolu ‘oku nau fakatanga’i kimoutolu´."

Senesi 39:20-23

"20Pea na‘e puke ‘a Siosifa ‘e hono ‘eiki ‘o ne tuku ia ki he pilīsone, ‘a e potu na‘e nofo pōpula ai ‘a e kau pōpula ‘a e Tu‘i: pea na‘a ne nofo ‘i he pilīsone. 21Ka na‘e kau ‘a Sihova mo Siosifa, pea ne o‘i ha manava‘ofa ki ai, pea ne tuku ke ne ‘ofeina ‘i he pule ‘o e pilīsone. 22Pea ko e pule ‘o e pilīsone na‘a ne tuku kia Siosifa ‘a e kau pōpula kotoa pē na‘e ‘i he pilīsone; pea ‘ilonga ha me‘a na‘e fai ai, ko ia ia na‘a ne fai. 23Na‘e ‘ikai tokanga‘i ‘e he pule ‘o e pilīsone ha kihi‘i momo‘i me‘a ‘e taha kuo tuku kiate ia; koe‘uhi na‘e kau mo ia ‘a Sihova, pea ‘ilonga ha me‘a na‘a ne fai, na‘e fakamonū‘ia ‘e Sihova."

Na'e kau 'a e 'Otua´ mo Siosifa he‘ene nofo pilīsone´, he na‘a Ne oʻi ‘a e pule ʻo e pilīsone´ ke fai-manavaʻofa mo ne ʻofeinaʻi ‘a Siosifa. Ko ia na‘e tuku ‘e he pule ʻo e pilīsone´ kia Siosifa ʻa e kau pōpula kotoa pē ʻi he pilīsone´ ke ne tokanga‘i mo pule ki ai. Naʻe ʻikai tokangaʻi ʻe he pule ʻo e pilīsone´ ia ha kihiʻi momoʻi meʻa ʻe taha kuo tuku kiate ia; koeʻuhi´ naʻe kau mo ia ʻa Sihova, pea ʻilonga ha meʻa naʻa ne fai, naʻe fakamonūʻia ʻe Sihova. Fānau, 'e pehē pē hano tokoni'i koe 'e he 'Otua´ ke ke 'ikai ki he 'ahi'ahi´, pea ke ke mālohi he fehangahangai mo e kau faikovi´, pea pehē foki ki Ha‘ane tokoni‘i koe ke ke lava ‘o mo‘ui mā‘oni‘oni he potu ‘o e kau angahala´, mo‘o fakalāngilangi‘i aipē ‘a e ‘Otua´. Pea te ke ulo aipē he potu ‘oku po‘uli tu‘u he angahala´

Lotu: Lotu ‘o fakamālō ki he ‘Otua´ He’ene tokoni’i koe ke ke ulo he feitu’u ‘oku fakapo’uli he angahala´, mo ‘Ene fa’a liliu e kovi´ ke hoko ko e lelei ma’au.

Tusite 14 Ma'asi, 2017

IKU KI PILĪSONE

Veesi Lauloto: Matiu 5:44

"Mou ‘ofa’i homou ngaahi fili´, pea hūfia ‘a kinautolu ‘oku nau fakatanga’i kimoutolu´."

Senesi 39:16-20

"16Pea na‘a ne tuku ‘a e kofu ‘i hono tafa‘aki, kae‘oua ke ha‘u ki ‘api ‘a hono ‘eiki. 17Pea ne lea kiate ia ‘o pehē, Ko e tamaio‘eiki Hepelū ni, ‘a ia kuo ke ‘omi kiate kitautolu, na‘a ne ha‘u kiate au ke pā‘usi‘i au; 18pea ‘i he‘eku ‘ai ‘eku fu‘u kalanga, na‘a ne tuku hono kofu ‘i hoku tafa‘aki, ‘o ne hola kitu‘a. 19Pea ‘i he fanongo ‘e hono ‘eiki ki he ngaahi me‘a na‘e lea‘aki ‘e hono uaifi kiate ia, he‘ene pehē, Na‘e pehē mo pehē ‘a e fai ‘a ho‘o tamaio‘eiki kiate au; na‘a ne tuputāmaki. 20Pea na‘e puke ‘a Siosifa ‘e hono ‘eiki ‘o ne tuku ia ki he pilīsone, ‘a e potu na‘e nofo pōpula ai ‘a e kau pōpula ‘a e Tu‘i: pea na‘a ne nofo ‘i he pilīsone."

Pea naʻe tuku ‘e he mali ‘o Pōtifa´ ʻa e kofu´ ʻi hono tafaʻaki´, kaeʻoua ke haʻu ki ʻapi ʻa hono ʻeiki´. Pea ne lea kiate ia ʻo pehē, ―Ko e tamaioʻeiki Hepelū ni, ʻa ia kuo ke ʻomi kiate kitautolu´, naʻa ne haʻu ke paʻusiʻi au; pea ʻi heʻeku ʻai ʻeku fuʻu kalanga´, naʻa ne tuku hono kofu´ ʻi hoku tafaʻaki´, ʻo ne hola kituʻa. 19 Na‘e tuputāmaki lahi ‘a Pōtifa ‘o ne fekau ke puke ʻa Siosifa ‘o tuku ia ki he pilīsone´, ʻa e potu naʻe nofo pōpula ai ʻa e kau pōpula ʻa e Tuʻi´: ko ia na‘e si‘i iku ai ‘a Siosifa ki pilīsone. Kaneongo kotoa ia, na'e kau pē 'a e 'Otua´ mo Siosifa 'o a'u ai pē ki pilīsone. Taimi ‘e ni‘ihi fānau, ‘oku tau kīkīvoi pē tautolu he failelei´ mo e ‘ikai ki he angahala´, kae kei hoko mai pē kiate kitautolu ia ‘a e ngaahi faingata‘a´ mo e ngaahi fai-ta‘etotonu mai´. ‘Oku fa‘a faka‘atā pē ia ‘e he ‘Otua´, pea ‘oku ‘i ai pē ‘Ene ‘uhinga ma‘olunga ki ai. Pe ‘e ‘uhinga kiate kitautolu ‘Ene ‘uhinga´ pe ‘ikai, tau nofoma‘u pē he ‘Eiki´. Ko e pau taha´ ia.

Lotu: Lotu ‘o fakamālō ki he ‘Otua´ ‘Ene mahino’i e ngaahi tūkunga faingata’a ‘oku fa’a hoko ‘i ho’o mo’ui´, neongo kapau ‘oku ‘ikai ke ke mahino’i he taimi ni.

Monite 13 Ma'asi, 2017

LOI ‘A E HOA ‘O POTIFA

Veesi Lauloto: Matiu 5:44

"Mou ‘ofa’i homou ngaahi fili´, pea hūfia ‘a kinautolu ‘oku nau fakatanga’i kimoutolu´."

Senesi 39:11-15

"11Pea faifai pea hoko ha ‘aho ‘a ia na‘a ne hū ai ki fale ke fai ‘ene ngāue, pea na‘e ‘ikai ‘i ai ha toko taha ‘o e kakai ‘o e fale. 12Pea puke ia ‘e he fefine ‘i hono kofu, ‘o ne pehē, Ta mohe ā: pea ne tuku ‘a e kofu ‘i hono nima, ‘o ne hola ‘o hū kitua‘ā. 13Pea ‘i he vakai ‘e he fefine kuo ne tuku hono kofu ‘i hono nima, pea kuo ne hola kitu‘a, 14na‘a ne ui ange ‘a e kakai ‘o e fale, ‘o ne lea kiate kinautolu, ‘o pehē; Vakai, kuo ne ‘omi kiate kitautolu ha tangata Hepelū ke pā‘usi‘i kitautolu; na‘a ne ha‘u kiate au ke ma mohe, pea u kaila le‘o lahi: 15pea ‘i he‘ene fanongo ki he ‘ai ‘eku fu‘u kalanga, na‘a ne tuku hono kofu ‘i hoku tafa‘aki, ‘o ne hola ‘o hū kitu‘a."

Pea faifai pea hoko ha ʻaho ne hū ai ‘a Siosifa ki fale ke fai ʻene ngāue´, pea naʻe ʻikai ʻi ai ha taha ia ‘i fale. Ne puke ia ʻe he fefine´ ‘o ne ma‘u hono kofu´, ʻo ne feinga‘i ‘a Siosifa ke faiangahala. Na‘e tuku ‘e Siosifa hono kofu´ he nima ‘o e fefine´, pea ne hola ʻo hū kitu‘a. Pea ʻihe vakai he fefine´ kuo ne tuku hono kofu´ ʻi hono nima´, pea kuo ne hola kituʻa´, naʻa ne ui ʻa e kakai ʻo e fale´, ʻo ne loi kiate kinautolu na‘e pāʻusiʻi ia ‘e Siosifa; pea koe‘uhi´ ko ‘ene kaila leʻo lahi´, pea ne tuku hono kofu´ kae hola ia ʻo hū kituʻa. Ko e to e faikovi ē kuo to e fai ki si‘i Siosifa´, ko e totongi ē ‘ene failelei´ ‘o hola mei he angahala´ ko e tukuaki‘i loi ki ai e kovi ko ‘eni´. Ka ‘oku pehē pē mo‘ui faka-’Otua´ ia fānau. ‘E feinga ma‘u pē ‘a sētane mo e kakai ‘oku nau kau´ ke fakahalaia‘i e fānau ‘a e ‘Otua´, neongo si‘enau tonuhia´. Kae ‘oua na‘a tau lotosi‘i. Tau to e fakama‘u hifo ‘etau tui´, he ‘oku vave pē taimi ke tau hiki ai ki he Langi´.

Lotu: Lotu ‘o kole ki he ‘Otua´ ke Ne tokoni atu kiate koe ke ke lava ‘o ‘ilo’i ‘a e me’a ‘oku totonu ke ke fai he taimi ‘oku ha’u ai ‘a e ‘ahi’ahi´.