Sapate 5 Fepueli, 2017

‘A’AHI MEI LANGI

Veesi Lauloto: Hepelu 11:8 

"Ko tui naʻe talangofua ai ʻa Epalahame ʻi hono ui´, ʻo ne ʻalu atu mei hono fonua´ ki ha potu te ne toki maʻu mōno tofiʻa; ʻio, naʻa ne ʻalu atu, ʻo ʻikai te ne ʻilo pe ko ʻene ʻalu´ ki fē."

Semisi 18:6-14

"6Pea tofutu‘u ‘a ‘Epalahame ki he tēniti kia Sela, ‘o ne pehē, Vave ‘aki mai ha tatanga mahoa‘a ‘e tolu, ‘a e ‘elito‘i mahoa‘a, natu ia ‘o ngaohi keke ‘aki. 7Lele foki ‘a ‘Epalahame ki he fanga manu, ‘o ne puke ha kafi toutou mo lelei, pea ne ‘ange ki he siana, pea ne hanga ‘o ngaohi fakato‘oto‘o. 8Pea ne ‘omi ha pota mo ha hu‘akau mo e kafi kuo ne ngaohi, ‘o ne tuku ki honau ‘ao; ka ka tu‘u atu pē ia kiate kinautolu ‘i he lolo ‘akau lolotonga e fai ‘enau taumafa. 9Pea nau me‘a kiate ia, Kofa‘ā ho uaifi, ‘a Sela? Pea ne pehē, Ko ‘ena pē ‘i he tēniti. 10Pea me‘a ‘e ia, Te u mātu‘aki foki mai kiate koe ‘oka hoko hono taimi; pea ‘e ai leva ha tama ‘a Sela ko ho uaifi. Pea fanongo ki ai ‘a Sela mei he mata tēniti, ‘a ia na‘e ‘i hono takafalu. 11Pea ko ‘Epalahame mo Sela na‘a na mātutu‘a, ko e ongo me‘a kuo a‘u; pea ‘oku ‘ikai fai ‘e Sela ‘a e anga ‘o e fefine. 12Pea kata ‘a Sela ‘i hono loto, he‘ene pehē, Ko e pehē koā ke u ma‘u fiemālie, ka kuo fai e vaivai, pea motu‘a mo e tangata‘eiki foki? 13Pea folofola ‘a Sihova kia ‘Epalahame, Ko e hā na‘e kata ai ‘a Sela, ‘o ne pehē, ‘O teitei mo‘oni ha‘aku fanau, ka kuo u motu‘a? 14He ‘oku faingata‘a ha me‘a kia Sihova? Te u foki mai kiate koe ‘i hono taimi kuo tu‘utu‘uni ‘i he ta‘u kaha‘u, pea ‘e ma‘u ‘e Sela ha tama."

‘Aho ‘e taha ne tutuʻu atu ai ha kau tangata ʻe toko 3, pea na‘e nga‘uta ‘a ‘Epalahame mo hono fale´ ke talitali kinautolu. Na‘a nau ‘oatu e vai ke tafitafi ‘aki honau va‘e´, pea nau kuki fakato‘oto‘o ‘a e me‘akai ma‘ae kau ‘a‘ahi ni. Lolotonga e fai ʻenau taumafa ‘i tu‘a he lolo‘akau´, na‘a nau ‘eke kiate ia, pe ‘oku ‘ifē ʻa Sela. Pea ne pehē, ―Ko ena pē ʻi he tēniti´‖. Pea nau lea te nau to e foki mai he taimi ‘e fā‘ele ai ‘a Sela´. Na‘e kata ʻa Sela ʻi hono loto´, he kuo na motu‘a. Na‘e fakapapau‘i ange pē ʻe Sihova kia ‘Epalahame ‘e hoko, he ko e ‘Otua fai Ia ki He‘ene lea´.

Lotu: 'E ‘Otua, 'oku ou fakamālō atu Ho’o ako’i au he lēsoni ‘o e ‘aho ni´ ke ‘oua te u sio pē ‘o ngata he ta’emalava ‘o ha fa’ahinga tūkunga, kae tuku ke u falala pē kiate Koe ‘oku Ke mafeia ‘a e me’a kotoa pē. ‘I ho Huafa´ Sīsū,‘Emeni