Tusite 28 Fepueli, 2017

LEPANI - FAMILI 'O LEPEKA

Veesi Lauloto: Kaletia 6:7

"Oua na’a tuku ke fakahala’i kimoutolu: tala’ehai´ ‘oku ala pā’usi’i ‘a e ‘Otua´; he ‘ilonga pē me’a ‘oku tō ‘e ha tangata, ko ia ia te ne utu´ foki."

Semisi 29:9-14

"9Pea lolotonga ‘enau talanoa mo e ha‘u ‘a Lesieli mo e fanga sipi ‘a ‘ene ‘eiki; he na‘e ‘a‘ana hono tauhi. 10Pea ‘i he mamata leva ‘e Sēkope kia Lesieli ko e ‘ōfefine ‘o Lēpani ko e tuonga‘ane ‘o ‘ene fa‘ē, mo e fanga sipi ‘a Lēpani ko e tuonga‘ane ‘o ‘ene fa‘ē, na‘a ne ‘unu‘unu atu, ‘o fakateka ‘a e maka mei he ngutu vai, ‘o ne fakainu ‘a e fanga sipi ‘a Lēpani ko e tuonga‘ane ‘o ‘ene fa‘ē. 11Pea na‘e ‘uma ‘e Sēkope kia Lesieli, ‘o ne hua‘aki ‘ene fu‘u fākafoa. 12Pea tala ‘e Sēkope kia Lesieli, ko e tokoua ia ‘a ‘ene tamai, pea ko e tama ‘a Lepeka: pea lele ‘a e ta‘ahine, ‘o fakahā ki he‘ene tamai. 13Pea ‘i he fanongo leva ‘e Lēpani ki he pehē, Ko Sēkope ‘ena ko e tama ‘a hono tuofefine, na‘a ne lele ke fakafetaulaki kiate ia, ‘o ne fā‘ofua ki ai mo ne fekita kiate ia, ‘o ne fakahū mai ki hono fale. Pea fakamatala ‘e ia kia Lēpani ‘a e ngaahi me‘a ko ia kotoa. 14Pea pehē ‘e Lēpani kiate ia, Tā ko hoku hui koe mo hoku kakano. Pea na‘a na nonofo ‘o māhina kātoa."

Kuo ‘osi mateuteu ‘eni ‘a Sekope ke kamata ha fononga fo‘ou mo e ‘Eiki´. Pea ne fononga atu ʻo faifai pē ‘o ne a‘u atu ki Kālana, ki he vai ‘o e kolo´. Na‘a ne faka‘eke‘eke ki he kau tauhisipi ne ‘i ai´ ‘a Lēpani, pea nau talaange ‘oku ne sai pē, ka kuo mei a‘u mai hono ‘ofefine ko Lesieli´ mo ‘enau fanga sipi´ ke fakainu. Lolotonga ʻenau talanoa´ mo e haʻu ʻa Lesieli mo e fanga sipi´, he naʻe aʻana hono tauhi´. Pea ʻi he mamata ki ai ‘e Sēkope´, naʻa ne ʻunuʻunu atu, ʻo fakateka ʻa e maka´ mei he ngutu vai´, ʻo ne fakainu ʻa e fanga sipi ʻa Lēpani´. Pea naʻe ʻuma ʻe Sēkope kia Lesieli, ʻo ne fuʻu fākafoa. Pea ne talaange kia Lesieli, ko e tama ia ʻa Lepeka: pea lele ʻa e taʻahine´, ʻo fakahā ki heʻene tamai´. Na‘e lele atu leva ‘a Lēpani ke fakafetaulaki kiate ia, ʻo ne fāʻufua ki ai mo ne ‘uma kiate ia, ʻo ne fakahū mai ki hono fale´. Pea toki fakamatala ʻe Sēkope kia Lēpani a e ngaahi meʻa kotoa. Toki pehē ʻe Lepani kiate ia, ―Tā ko hoku hui koe mo hoku kakano‖. Pea naʻa nofo ai ‘a Sēkope. Ne kamata heni ke ako ‘a Sēkope ke fakafanongo mo talangofua ki he ‘Otua´.

Lotu: Lotu ‘o kole ki he ‘Otua´ ke Ne tokoni atu ke ke talangofua ki He’ene ngaahi tu’utu’uni kotoa pē he Folofola´.

Monite 27 Fepueli, 2017

TU’UNGA KI LANGI´ - PĒTELI

Veesi Lauloto: Kaletia 6:7

"Oua na’a tuku ke fakahala’i kimoutolu: tala’ehai´ ‘oku ala pā’usi’i ‘a e ‘Otua´; he ‘ilonga pē me’a ‘oku tō ‘e ha tangata, ko ia ia te ne utu´ foki."

Semisi 28:10-15

"10Pea na‘e ‘alu atu ‘a Sēkope mei Peasipa, ‘o ne fononga ki Kālana. 11Pea ne hoko fāinoa ki ha feitu‘u, pea ne nofo ai ‘i he pō ko ia, he kuo tō ‘a e la‘a; pea ne to‘o ha taha ‘o e ngaahi maka ‘o e feitu‘u, ‘o ne fokotu‘u mōno ‘olunga, pea ne tokoto ai ‘i he potu ko ia ke mohe. 12Pea ne misi, pea tā ko ha tu‘unga kuo tu‘u ‘i he kelekele, ‘o tau hake hono ‘ulu ki he langi; pea ko e kau ‘Āngelo ‘ena ‘a e ‘Otua ‘oku ‘alu hake mo ‘alu hifo ‘i ai. 13Pea tā ko Sihova ‘oku tu‘u mei ‘olunga, ‘o ne folofola mai, Ko au ko Sihova ko e ‘Otua ‘o ‘Epalahame ko ho‘o ‘eiki, pea ko e ‘Otua ‘o ‘Aisake; ko e kelekele ‘oku ke tokoto ai, te u ‘atu ia mo‘ou mo ho hako; 14pea ‘e hoko ho hako ke tatau mo e efu ‘o e fonua, pea te ke mafola koe ki lulunga, mo hahake, mo e tokelau, mo e tonga; pea ‘e monū‘ia ‘iate koe ‘a e fa‘ahinga kotoa pē ‘o e kelekele, pea ‘i ho hako foki.   15Pea ko eni ko au te u ‘iate koe, pea te u tauhi koe ‘i ho ngaahi founga kotoa pē, pea te u fakafoki koe ki he kelekele ko eni; he ‘e ‘ikai te u li‘aki koe kae‘oua ke u fai ‘a e ngaahi me‘a kuo u lea ai kiate koe."

Ne ʻalu atu leva ʻa Sekope mei Peasipa ki Kālana. ‘I he mamalu hifo ‘a e pō ko ia´, na‘a ne toʻo ha maka ʻo ne fakotuʻu mōno ʻolunga, pea ne tokoto ai ke mohe. Na‘a ne misi ‘o sio ki ha tuʻunga kuo tuʻu ʻi he kelekele´, mei hono ʻulu´ ki he langi´; pea fe‘aluaki ai ‘a e kau ‘angelo ʻa e ʻOtua´. Pea tā ko Sihova ʻoku tuʻu mei ʻolunga´, ʻo Ne folofola mai, ―Ko Au ko Sihova, ko e ʻOtua ʻo ‘Epalahame mo ‘Aisake´; ko e kelekele ʻoku ke tokoto ai´ te U ʻatu ia moʻou mo ho hako´; pea ʻe hoko ho hako´ ke tatau mo e efu ʻo e fonua´, pea te ke mafola ki lulunga, hahake, tokelau´ mo e tonga´; pea ʻe monūʻia ʻiate koe ʻa e faʻahinga kotoa pē ʻo e kelekele´, pea ʻi ho hako´ foki. Pea te U ʻiate koe, pea te U tauhi koe, pea te U fakafoki koe ki he kelekele ko eni´; heʻikai te U liʻaki koe, kaeʻoua kuo U fai kotoa ‘eni. Ne ofo ‘a Sekope ‘o ne ‘ilo pau kuo ne fe‘iloaki mo e ‘Otua´ pea he‘ikai pē ke to e tatau ‘a e mo‘ui´ ia.

Lotu: Lotu ‘o kole ki he ‘Otua´ ke Ne liliu ho’o mo’ui´ ke ke hangē pē ko Ia´, ke liliu ho Sēkope´ ke ke hoko ko e mo’ui fo’ou ‘ia Kalaisi.

Sapate 26 Fepueli, 2017

'ALU KI MESOPOTEMIA

Veesi Lauloto: Kaletia 6:7

"Oua na’a tuku ke fakahala’i kimoutolu: tala’ehai´ ‘oku ala pā’usi’i ‘a e ‘Otua´; he ‘ilonga pē me’a ‘oku tō ‘e ha tangata, ko ia ia te ne utu´ foki."

Semisi 27:46

"46Pea lea ‘a Lepeka kia ‘Aisake, Kuo kina ‘eku mo‘ui ko e me‘a ‘i he ongo fafine Heti; kapau ‘e mali ‘a Sēkope foki mo ha fefine Heti, ha taha ‘o e fonua ni, ‘o hangē ko e ongo fafine ko eni, pea koe‘uma‘ā ai pē ‘eku mo‘ui?"

Senesi 28:1-4
"1KO ia na‘e ui mai ‘e ‘Aisake ‘a Sēkope, ‘o ne fai hono tāpuaki; pea ne tu‘utu‘uni ia ‘o pehē, ‘oua te ke mali mo ha ‘ōfefine ‘o ha taha Kēnani. 2Tu‘u, ‘o ‘alu ki Mesopotēmia, ki he ‘api ‘o Petueli ko e tamai ‘a ho‘o fa‘ē; pea ke kumi ai hao uaifi mei he fānau ‘a Lēpani ko e tuonga‘ane ‘o ho‘o fa‘ē. 3Pea ‘ofa ke tāpuaki‘i koe ‘e Sātai koe ‘Otua, pea ke ne ‘ai ke ke fanafanau mo tupu ke lahi, pea ke ke hoko ko e koto kakai; 4pea ke ne ‘atu ‘a e tāpuaki ‘o ‘Epalahame mo‘ou, pea mo ho hako foki; ke tō mo‘o tofi‘a ‘a e fonua ‘oku ke nofo muli ai, ‘a ia na‘e foaki ‘e he ‘Otua mo‘o ‘Epalahame."

Na‘e ‘ikai tala ‘e Lepeka ia kia ‘Aisake ‘a e ‘uhinga ‘o e ‘alu ‘a Sekope´, ka ne to‘o hake ‘e ia ‘a e angahala‘ia ‘a e mo‘ui ‘a e ongo mali Kēnani ‘o ‘Isoa´, ke faka‘uhinga‘i lelei ‘aki ‘a e tonu ke ‘alu ‘a Sekope ki Mesopotemia´, ke kumi mei ai hano mali ‘oku ‘ikai tatau mo e ongo mali ‘o ‘Isoa´. Na‘e ui leva ‘e ‘Aisake ‘a Sekope ‘o ne fai hono tāpuaki´ mo e lea ki ai, ―ʻOua te ke mali mo ha fefine Kēnani. Tuʻu, ʻo ʻalu ki Mesopotemia, ki he ʻapi ʻo Petueli ko e tamai ʻa hoʻo faʻē´; pea ke kumi ai hao uaifi mei he fānau ʻa Lēpani´, ‘a e tuongaʻane ʻo hoʻo faʻē´. Pea ʻofa ke tāpuakiʻi koe ʻe Sātai ko e ʻOtua, pea ke Ne ʻai ke ke fanafanau mo tupu ke lahi, pea ke ke hoko ko e koto kakai; pea ke Ne ʻatu ʻa e tāpuaki ʻo ‘Epalahame´ moʻou, pea mo ho hako´ foki; ke tō moʻo tofia ʻa e fonua ʻoku ke nofo muli ai´, ʻa ia naʻe foaki ʻe he ʻOtua´ moʻo Epalahame´.

Lotu: Lotu ‘o fakamālō ki he ‘Otua´ He’ene ‘ofa ta’e’osi, ta’elauhia, ‘ofa lī’oa kuo fai ma’au´, pehē foki ki He’ene fakamolemole´ mo ‘Ene meesi.

Tokonaki 25 Fepueli, 2017

FOKOTU'UTU'U 'A LEPEKA

Veesi Lauloto: Matiu 6:33 

"Ka mou kumi mu’a ki Hono pule’anga´, mo e mā’oni’oni ‘A’ana´, pea
‘e ‘atu mo ia foki ‘a e ngaahi me’a ko ia´ kotoa"

Semisi 27:41-45

"41Pea na‘e lama ‘e ‘Īsoa ‘a Sēkope, koe‘uhi ko e tāpuaki‘i ia ‘e he‘ene ‘eiki: pea pehē ‘e ‘Īsoa ‘i hono loto, ‘Oku tu‘unuku mai ‘a e tēngihia ‘o ‘eku ‘eiki; pea u toki fakapoongi ‘a hoku tokoua ko Sēkope. 42Pea na‘e fakahā kia Lepeka ‘a e ngaahi lea ‘a ‘ene tama lahi ko ‘Īsoa; pea ne fekau ke ui mai ‘a ‘ene tama ki mui ko Sēkope, pea ne pehē kiate ia, ‘Ē, ko ho tokoua ko ‘Īsoa ‘oku ne fakalelu ‘a e mamahi ‘o hono loto kiate koe, ko ‘ene pehē te ne fakapoongi koe. 43Pea ko eni, tama, ke ke tuitala ki he‘eku lau, pea ke tu‘u ‘o hola leva ki Kālana kia Lēpani ko hoku tuonga‘ane. 44Pea ke nofo ai ‘o ‘aho si‘i, kae‘oua ke ‘osi ‘a e mamahi ‘a ho tokoua; 45‘oua ke lolou meiate koe ‘a e ‘ita ‘a ho tokoua, pea ngalo ‘a e me‘a kuo ke fai kiate ia: pea te u toki fekau atu ‘o ‘omi koe mei ai; he koe‘uma‘ā ho‘omo fakatou mole meiate au ‘i ha ‘aho pē taha?"

Naʻe lama leva ʻe Isoa ke ne fakapoongi ʻa hono tokoua ko Sekope´, ka na‘a ne tali ke ‘oleva ke pekia ‘a ‘Aisake. ‘I he fakahā kia Lepeka ʻa e ngaahi lea na‘e fai ‘e ‘Isoa´, na‘a ne ui mai leva ʻa Sekope, ‘o ne pehē kiate ia, ʻE, ko ho tokoua ko ‘Isoa´ ʻoku ne lama ha taimi ke ne fakapoongi ai koe. Pea ko eni, tama, ke ke tuitala ki heʻeku lau´, pea ke tuʻu ʻo hola leva ki Kālana kia Lēpani ko hoku tuongaʻane´. Pea ke nofo ai ʻo ʻaho siʻi, kaeʻoua ke ʻosi ʻa e mamahi ho tokoua´, pea ngalo ʻa e meʻa kuo ke fai kiate ia´: pea te u toki fekau atu ke ʻomi koe mei ai; he koeʻumaʻā hoʻomo fakatou mole meiate au ʻi ha ʻano pē taha? Kuo hū e angahala´ ‘o ne veuveuki e fe‘ofo‘ofani ‘a e ki‘i fāmili ni.

Lotu: Lotu ‘o fakamālō ki he ‘Otua´ He’ene fa’a tokoni’i mo solova ho ngaahi palopolema.

Falaite 24 Fepueli, 2017

TOMUI 'A 'ISOA HE TAPUAKI

Veesi Lauloto: Matiu 6:33 

"Ka mou kumi mu’a ki Hono pule’anga´, mo e mā’oni’oni ‘A’ana´, pea
‘e ‘atu mo ia foki ‘a e ngaahi me’a ko ia´ kotoa"

Semisi 27:30-35

"30Pea kuo ‘osi ‘a e tāpuaki‘i ‘e ‘Aisake ‘a Sēkope, pea kuo toki sītu‘a ‘a Sēkope ki he‘ene tamai ko ‘Aisake, mo e hū mai ‘a hono tokoua ko ‘Īsoa mei he‘ene tulimanu. 31Pea kuo ngaohi ‘e ia foki ha lo‘i manu, pea ne ‘omi ki he‘ene tamai, ‘o ne pehē ki ai, ‘Alā, ke ke me‘a hake pea ke ‘ilo ‘a e fita‘a ‘a ho foha: hei‘ilo ‘e fai hoku tāpuaki‘i ‘e ho finangalo. 32Pea fehu‘i kiate ia ‘ene ‘eiki ko ‘Aisake, Ko hai koe? Pea ne tali, Ko ho foha au, ‘a ho ‘uluaki, ‘a ‘Īsoa. 33Pea fu‘u tetetete lahi ‘aupito ‘a ‘Aisake, ‘o ne pehē, Ko hai tū ia ne ne ma‘u manu, ‘o ‘omi kiate au, pea kuo u hili kai ai te‘eki te ke ha‘u, pea kuo u tāpuaki‘i ia? ‘io pea ‘e ‘a‘ana foki ‘a e tāpuaki. 34Pea ‘i he fanongo ‘e ‘Īsoa ki he me‘a ‘a ‘ene ‘eiki, na‘a ne ‘ai ‘ene fu‘u fākafoa lahi mo fakamamahi ‘aupito, mo ne pehē ki he‘ene ‘eiki, Tāpuaki au, ‘alā, ‘a au foki. 35Pea me‘a mai ‘e ia; Kuo ha‘u fakakākā mai ‘a ho tokoua, pea kuo ne ‘ave ho tāpuaki."

‘I he sītuʻa atu ʻa Sekope mei hono tāpuaki‘i ia heʻene tamai ko Aisake´, ne hū mai ʻa hono tokoua ko ‘Isoa´ mei heʻene tulimanu´. Pea kuo ngaohi ʻe ia foki ha loʻimanu, pea ne ʻomi ki heʻene tamai´, ʻo ne pehē ki ai, ʻAlā, ke ke meʻa hake pea ke ʻilo ʻa e fitaʻa ʻa ho foha´: heiʻilo ʻe fai hoku tāpuakiʻi´ ʻe ho finangalo´. Ne fehuʻi kiate ia ʻe Aisake, Ko hai koe? Pea ne tali, Ko ho foha ʻuluaki´ au, ʻa Isoa. Na‘e fuʻu tetetete lahi ʻaupito ʻa Aisake, ʻo ne pehē, Ko hai tū ia ne ne maʻu manu, ʻo ʻomi kiate au, pea kuo u hili ‘eku kai ai teʻeki te ke haʻu´, pea kuo u tāpuakiʻi ia. ʻIo, pea ʻe ‘aʻana foki ʻa e tāpuaki´ ‘I he fanongo ʻe Isoa ki he meʻa ʻa ʻene ʻeiki´, naʻa ne ʻai ʻene fuʻu faakafoa lahi mo fakamamahi ʻaupito, mo ne pehē ki heʻene ʻeiki´, Tāpuaki au, ʻalā, ʻa au foki. Ne meʻa mai ʻe ia; Kuo haʻu fakakākā mai ho tokoua´, pea kuo ne ʻave ho tāpuaki´. Ko e iku‘anga ia ‘o e ta‘etokanga mo e ta‘emahu‘inga‘ia he me‘a ‘oku mahu‘inga´. Toki hahaka hake, kuo mole e tāpuaki´. Ako mei ai fānau.

Lotu: Lotu ‘o kole ki he ‘Otua´ ke Ne tokoni atu ke ke falala kiate Ia ma’u pē, tautefito ‘o ka faihala mai ha taha, pea tatau aipē kapau ‘oku ke tonuhia

Tu'apulelulu 23 Fepueli, 2017

FAKAHOKO 'O E KAKAA

Veesi Lauloto: Matiu 6:33 

"Ka mou kumi mu’a ki Hono pule’anga´, mo e mā’oni’oni ‘A’ana´, pea
‘e ‘atu mo ia foki ‘a e ngaahi me’a ko ia´ kotoa"

Semisi 27:18-24

"18Pea hū atu ia ki he loki ‘o ‘ene tamai, pea ne pehē, ‘Ala: pea pehē ‘e ia, Ko au; ka ko hai koe, siana? 19Pea tali ‘e Sēkope ki he‘ene tamai, Ko ‘Īsoa au, ko ho ‘uluaki; kuo u fai pē ‘o hangē ko ho‘o me‘a mai: me‘a hake ā, ‘o ta‘utu, pea ‘ilo ‘eku fita‘a ni; hei‘ilo ‘e fai hoku tāpuaki‘i ‘e ho finangalo. 20Pea me‘a ‘a ‘Aisake ki hono foha, Tama, na‘e fēfē ho‘o ma‘u vave pehē? Pea pehē ‘e ia, Koe‘uhi na‘e fakafekitaki ia kiate au ‘e Sihova ko ho ‘Otua. 21Pea me‘a ‘a ‘Aisake kia Sēkope, Tama, ‘unu‘unu mai mu‘a ke u fā kiate koe, pe ko hoku foha ko ‘Īsoa mo‘oni koe, pe ‘ikai. 22Pea ‘unu‘unu atu ‘a Sēkope ki he‘ene ‘eiki ko ‘Aisake, pea ne fā ia, ‘o ne pehē, Ko e le‘o ko e le‘o ‘o Sēkope, ka ko e nima ko e nima ‘o ‘Īsoa. 23Pea na‘e ‘ikai te ne mea‘i ia, koe‘uhi na‘e fulufulua hono nima ‘o hangē ko e nima ‘o ‘Īsoa ko hono ta‘okete: ko ia na‘a ne tāpuaki‘i ia. 24Pea ne pehē, Ko hoku foha ko ‘Īsoa mo‘oni koe? Pea tali ‘e ia, Ko au."

Kuo ‘osi eni e kuki ‘a Lepeka´, pea tui ‘e Sēkope ‘a e taha ‘o e ngaahi teunga ‘o ‘Isoa´, pea ‘ai mo e kili‘i kosi ki hono nima´, pea ne hū atu leva mo e me‘akai´ ki he‘ene tamai´, pea ne pehē, ―ʻAlā: Ko ‘Isoa au, ko ho ʻuluaki; meʻa hake ā, ʻo taʻutu, pea ʻilo ʻeku fitaʻa ni; heiʻilo ʻe fai hoku tāpuakiʻi´. Pea meʻa ʻa Aisake ki hono foha´, ―Tama, naʻe fēfē hoʻo maʻu vave pehē´? Pea pehē ʻe ia, ―Koeʻuhi´ naʻe tokoni‘i au ʻe Sihova ko ho ʻOtua´. Pea meʻa ʻa Aisake, ―Tama, ʻunuʻunu mai muʻa ke u fā kiate koe, pe ko hoku foha ko ´Isoa´ moʻoni koe, pe ʻikai. (Pea ʻunuʻunu atu ʻa Sekope, pea ne fā ia, ʻo ne pehē), Ko e leʻo´ ko Sekope, ka ko e nima´ ko e nima ʻo Isoa´. Pea naʻe ʻikai te ne meaʻi ia, he naʻe fulufulua hono nima´ hangē ko ‘Isoa´, ko ia naʻa ne tāpuakiʻi ia.

Lotu: Lotu ‘o kole ki he ‘Otua´ ke Ne tokoni’i koe ke ke fai ma’u pē ho’o me’a kotoa he founga ‘a e ‘Otua´, tuku e founga fakaetangata´ ia, he te tau tō hala ai.

Pulelulu 22 Fepueli, 2016

FA'UFA'U 'O E KAKAA

Veesi Lauloto: Matiu 6:33 

"Ka mou kumi mu’a ki Hono pule’anga´, mo e mā’oni’oni ‘A’ana´, pea
‘e ‘atu mo ia foki ‘a e ngaahi me’a ko ia´ kotoa"

Semisi 27:5-10

"5Ka ka fanongo pē ‘e Lepeka, lolotonga ‘a e fai ‘e ‘Aisake ‘ene me‘a ki hono foha ko ‘Īsoa. Pea na‘e ‘alu ‘a ‘Īsoa ki he vao ke kumi mai ha manu. 6Pea lea ‘a Lepeka ki he‘ene tama ko Sēkope, ‘o pehē, ‘Ē, na‘a ku fanongo ki ho‘o ‘eiki ‘ene me‘a kia ‘Īsoa ko ho ta‘okete, ‘o pehē, 7‘Omi mu‘a ha‘aku manu, pea ngaohi ha‘aku lo‘i manu ke u kai, ka u fai ho tāpuaki‘i ‘i he ‘ao ‘o Sihova ‘i he te‘eki te u mate. 8Ko ia ke ke tuitala, tama, ki he‘eku lea, fai ki he me‘a te u tu‘utu‘uni atu. 9‘Alu pē ki he fanga manu, pea ‘omi mei ai kiate au ha ongo ki‘i kosi lelei; ka u ngaohi ‘aki ia ha lo‘i manu ma‘a ho‘o ‘eiki, ‘a e me‘a ‘oku ne manako ai; 10pea ke ‘ave ‘e koe ki ho‘o ‘eiki ke ne tokoni; hei‘ilo te ne tāpuaki‘i koe ‘i he te‘eki ke ne pekia."

Na‘e fanongo pē ʻa Lepeka ki he talanoa ‘a Aisake kia ‘Isoa´. Pea ‘i he lolotonga e ʻalu ʻa Isoa ki he vao´ ke kumi mai ha manu´, ne ui leva ʻe Lepeka ia ‘a Sekope, ʻo fakamatala ki ai, mo ne pehē ange, ―ʻE, ke ke tuitala mai ki heʻeku lea´, ʻo fai ki he meʻa te u tuʻutuʻuni atu´. ʻAlu pē ki he fanga manu´, pea ʻomi mei ai kiate au ha ongo kiʻi kosi lelei; kau ngaohi ʻaki ia ha loʻi manu maʻa hoʻo ʻeiki´, ʻa e meʻa ʻoku ne manako ai´; pea ke ʻave ʻe koe ki hoʻo ʻeiki´ ke ne tokoni; heiʻilo te ne tāpuakiʻi koe ʻi he teʻeki ke ne pekia´. Fānau, ‘oku to e hala pē mo e me‘a ia ‘oku fai ‘e Lepeka mo Sēkope´. Ko e loi´ mo e kākā´ ko e angahala ia, pea ‘oku ‘ikai finangalo ki ai ‘a e ‘Otua´ ia. ‘Oku ‘i ai pē founga fakalelei ngāue ia ‘a e ‘Otua´ ki he me‘a kotoa, ‘oku ‘ikai ke tau ‘oho fiepoto atu mo ‘etau founga´, he te tau tō hala ai meihe taimi moe finangalo ‘oe ‘Otua´

Lotu: Lotu ‘o kole ki he ‘Otua´ ke Ne tokoni atu ke ke falala kakato ki He’ene founga mo palani ngāue´, neongo ‘ete ‘ilo’i ‘oku hala e tafa’aki ‘e taha.

Tusite 21 Fepueli, 2017

TEUTEU KI HE TAPUAKI

Veesi Lauloto: Matiu 6:33 

"Ka mou kumi mu’a ki Hono pule’anga´, mo e mā’oni’oni ‘A’ana´, pea
‘e ‘atu mo ia foki ‘a e ngaahi me’a ko ia´ kotoa"

Semisi 27:1-4

"1PEA na‘e faifai pea motu‘a ‘a ‘Aisake, pea po‘uli hono fofonga. Pea ne ui mai ‘a hono ‘uluaki foha ko ‘Īsoa, ‘o ne pehē ki ai, Tama; pea tali ‘e ia, Ko au. 2Pea ne pehē, Hanga mai, ko eni kuo u motu‘a, ‘oku ‘ikai te u ‘ilo pe te u pekia fakakū: 3ko ia ke ke kātaki ‘o to‘o ho‘o nāunau, ‘a ho‘o hōfangahau mo ho‘o kaufana, pea ke ‘alu ki he vao ‘o kumi mai ha‘aku kiki; 4pea ke ngaohi ha‘aku lo‘i manu, ‘a e me‘a ‘oku ou manako ai, pea ke ‘omi kiate au ke u kai: hei‘ilo ‘e lava ai ‘a hoku loto ke fai ho tāpuaki‘i ‘i he te‘eki ke u mate."

Naʻe faifai pea motuʻa ʻa Aisake, pea ‘ikai kei sai ‘ene sio´. Pea ne ui mai ʻa ‘Isoa, ʻo ne pehē ki ai, ―Tama; Hanga mai, ko eni kuo u motuʻa, ʻoku ʻikai te u ʻilo pe te u pekia fakakū: ko ia ke ke kātaki ʻo ʻalu ki he vao´ ʻo kumi mai haʻaku kiki; pea ke ngaohi haʻaku loʻi manu, ʻa e meʻa ʻoku ou manako ai´, pea ke ʻomi kiate au ke u kai: heiʻilo ʻe lava ai ʻa hoku loto´ ke fai ho tapuakiʻi´ ʻi he teʻeki ke u mate´ Ko e tala ‘o e ongo māhanga´, ne ‘osi mahino pē ia he ‘aho hona fanau‘i´, ‘e pule ‘a e si‘i´ ki he lahi´, ‘i hono fehu‘i ‘e Lepeka ki he ‘Otua´. Pea na‘e tonu ke puke ki ai ‘a ‘Aisake, he ko e fokotu‘utu‘u ia ‘a e ‘Otua, na‘e ‘ikai ko Lepeka ia, ka na‘a ne kei vilitaki pē ke ‘ave ‘a e tu‘unga hoko´ mo e tāpuaki´ kia ‘Isoa, ‘o hangē ko e anga maheni´

Lotu: Lotu ‘o kole ki he ‘Otua´ ke Ne tokoni atu ke ke fai ma’u pē ‘a e me’a ‘oku finangalo ki ai ‘a e ‘Otua´, tatau ai pē pe ‘oku ke loto ki ai pe ‘ikai.

Sapate 19 Fepueli, 2017

KO E ONGO MAHANGA

Veesi Lauloto: Saame 37:5 

"Tekaki kia Sihova ho ‘alunga´; ‘Io, falala ki Ai, pea te Ne fai ‘e Ia´."

Semisi 25:21-27

"21Pea na‘e hūfia ‘e ‘Aisake hono uaifi kia Sihova, he na‘e pa‘a ia: pea na‘e ongo ‘ene hū kia Sihova, pea feitama hono uaifi ko Lepeka. 22Pea feteketeke‘i ‘a e fānau ‘i hono manava; pea pehē ‘e he fefine, Kapau ko ia, ko e hā ‘oku ou pehē ai? pea ne ‘alu ‘o fehu‘i kia Sihova. 23Pea folofola ‘a Sihova kiate ia, Ha kakai ‘e ua ‘oku ‘i ho manava, ‘E mavahe mei ho fatu ha ongo fa‘ahinga, ‘o kaukaua ‘a e taha ‘i he taha; Ko ta‘okete te ne tauhi ‘a tehina. 24Pea faifai pea kakato hono ngaahi māhina ke fā‘ele, pea tā na‘e māhanga. 25Pea tō mai ‘a e ‘uluaki kuo kulokula, ‘o hangē ko e kofu fulufulu‘i manu hono kotoa; pea nau fakahingoa ia ko ‘Īsoa [ko Fulufulua]. 26Pea hili ia na‘e tō mai hono tokoua ‘oku ne puke ‘a e muiva‘e ‘o ‘Īsoa; pea nau fakahingoa ia ko Sēkope [ko Hākiva‘e]; pea na‘e fe‘unga ‘a ‘Aisake mo e ta‘u ‘e onongofulu ‘i he‘ene fā‘ele‘i kinaua. 27Pea hoko ‘o lalahi ‘a e ongo tamaiki: pea ko e faiva ‘o ‘Īsoa ko e tulimanu, ko e tama taka vao ia; ka ko Sēkope na‘e anga māopo, ko e tama taka fale. 28Pea pele ‘aki ‘e ‘Aisake ‘a ‘Īsoa, koe‘uhi ko ‘ene kai kiki mei he‘ene tulimanu: ka ko Sēkope ‘a e pele ‘a Lepeka."

Pea naʻe hūfia ʻe Aisake hono uaifi´ kia Sihova, he naʻe paʻa ia: pea naʻe ongo ʻene hū´ kia Sihova, pea feitama ‘a Lepeka. Na‘e feteketekeʻi ʻa e fanau´ ʻi hono manava´; pea ne ʻalu ʻo fehuʻi kia Sihova. Pea folofola ʻa Sihova kiate ia, ‘Oku ‘i ai ha kakai ʻe ua ʻi ho manava´, ʻE kaukaua ʻa e taha ʻi he taha; Ko taʻokete te ne tauhi ʻa tehina´‖. Pea na‘e fāʻele mai ‘a Lepeka ko e ongo māhanga. Ne tō mai ʻa e ʻuluaki´ kuo kulokula, pea nau fakahingoa ia ko Isoa [ko Fulufulua]. Pea hili ia´ naʻe tō mai hono tokoua´ ʻoku ne puke ʻa e muivaʻe ʻo Isoa´; pea nau fakahingoa ia ko Sēkope [ko Hakivaʻe]: pea naʻe ta‘u 60 ʻa Aisake ʻi he faʻeleʻi mai e ongo māhanga´. ‘I he lalahi ʻa e ongo tamaiki´, na‘e manako ‘a Isoa ki he tulimanu´, ko e tama taka vao ia; ka ko Sekope naʻe angamaopo, ko e tama taka fale ia.

Lotu: Lotu 'o fakamālō ki he ‘Otua´ He’ene fakatupu makehe na’e fai ma’a, pea ke ke fiemālie ki he fōtunga na’a Ne fa’u koe ki ai´.

Tokonaki 18 Fepueli, 2017

FE'ILOAKI 'A 'AISAKE MO LEPEKA

Veesi Lauloto: Saame 37:5 

"Tekaki kia Sihova ho ‘alunga´; ‘Io, falala ki Ai, pea te Ne fai ‘e Ia´."

Semisi 24:61-66

"61Pea tutu‘u ‘a Lepeka mo hono kau fefine, pea nau heka kāmeli ‘o muimui ki he tangata; pea ‘ave ‘e he tamaio‘eiki ‘a Lepeka, ‘o ne fononga. 62Pea tā na‘e ha‘u ‘a ‘Aisake mei he‘ene ‘alu ki Pea-lehai-lo‘ai; he na‘a ne nofo ‘i he feitu‘u ko Tonga. 63Pea ‘alu ‘a ‘Aisake ke fai ‘ene lotu ‘i he ngoue ‘i he‘ene efiafi hifo: pea ne tāngaki hake ‘o ne vakai, tā ‘oku ha‘u ha fononga kāmeli. 64Pea tāngaki hake foki ‘a Lepeka, ‘o ne ‘ilo ‘a ‘Aisake; pea ne hopo ki lalo mei he kāmeli. 65Pea ne pehē ki he tamaio‘eiki, Ko hai ‘a e tangata ko ‘ena ‘oku laka mai ‘i he ngoue ke fakafetaulaki mai kiate kitautolu? Pea pehē ‘e he tamaio‘eiki, Ko ‘eku ‘eiki ia. Pea to‘o ‘e he fefine hono pūlou, ‘o ‘ai. 66Pea fakamatala ‘e he tamaio‘eiki kia ‘Aisake ‘a e ngaahi me‘a kotoa pē kuo ne fai."

Na‘e tali loto fiefia pē ‘e Lepeka ke ‘alu mo ‘Eliesa ki Kēnani ke hoko ko e uaifi ‘o ‘Aisake´. Pea nau tāpuakiʻi ʻa Lepeka, pea toki tuʻu leva ʻa Lepeka mo ‘ene kau fefine´ ‘o nau heka kāmeli ʻo muimui atu ‘ia ‘Eliesa, ʻo nau fononga atu leva ki Kēnani. Pea tā naʻe haʻu ʻa Aisake mei heʻene ʻalu ki Pea-lehai-loʻai´ ke fai ʻene lotu ʻi he ngoue´,mo ‘ene vakai atu, tā ʻoku haʻu ha fononga kāmeli. Taimi tatau ne to e sio hake foki mo Lepeka, ʻo ne ʻilo ʻa Aisake. Ne hopo ‘a Lepeka ki lalo mei he kāmeli´, ‘o ne fehu‘i atu kia ‘Eliesa, Ko hai ʻa e tangata ko ena ʻoku laka mai ʻi he ngoue´ ke fakafetaulaki mai kiate kitautolu´? Pea pehē atu ‘e ‘Eliesa, Ko ‘Aisake ia, ko e foha ‘o ‘eku ʻeiki´. Pea toʻo ʻe he fefine´ hono pūlou´, ʻo ʻai, ko ‘ene faka‘apa‘apa kia ‘Aisake. Pea fakamatala ʻe he tamaioʻeiki´ kia Aisake ʻa e ngaahi meʻa kotoa pē kuo ne fai´. Ne mali leva ‘a ‘Aisake mo Lepeka, pea na‘e tāpuaki‘i kinaua ‘e he ‘Otua´, he na‘a na tukulolo mo fou he palani ‘a e ‘Otua´ ma‘a kinaua´.

Lotu: Lotu ‘o fakamālō ki he ‘Otua´ koe’uhi´ ko e ngaahi lelei kotoa pē mo e ngaahi tāpuaki kuo Ne ‘oatu ma’au mo ho fāmili´.

Falaite 17 Fepueli, 2017

FAMILI 'O LEPEKA

Veesi Lauloto: Saame 37:5 

"Tekaki kia Sihova ho ‘alunga´; ‘Io, falala ki Ai, pea te Ne fai ‘e Ia´."

Semisi 24:48-53

"48Pea u punou ‘o hū kia Sihova, ‘o u fakamālō kia Sihova ko e ‘Otua ‘o ‘eku ‘eiki ko ‘Epalahame, ‘a ia kuo ne taki au ‘i he hala totonu ke kumi ‘a e ‘ōfefine ‘o e tokoua ‘o ‘eku ‘eiki ma‘a hono foha. 49Pea ko eni, kapau ‘oku mou pehē ke fai ‘a e ‘ofa mo e mo‘oni ki he‘eku ‘eiki, tala mai: pea ka ‘ikai, pea tala mai; ka u afe ki he to‘omata‘u, pe ki he to‘ohema. 50Pea tali ‘e Lēpani mo Petueli, ‘o na pehē, Ko e me‘a ia meia Sihova; ‘e ‘ikai te mau fa‘a tali atu ha lelei pe ha kovi. 51Ko Lepeka ‘ena, ‘ave; pea tuku ke ne hoko ko e uaifi ‘o e foha ‘o ho‘o ‘eiki, ‘o hangē ko e folofola ‘a Sihova. 52Pea ‘i he ‘iloange na‘e fanongo ‘e he tamaio‘eiki ‘a ‘Epalahame ki he‘ena lea, na‘a ne fo‘ohifo ki he kelekele, ‘o ne hū kia Sihova. 53Pea to‘o mai ‘e he tamaio‘eiki ha ngaahi teunga siliva, mo ha ngaahi teunga koula, mo ha ngaahi kofu, ‘o ne ‘ange kia Lepeka: pea ne foaki mo e ngaahi me‘a mahu‘inga ki hono tuonga‘ane mo ‘ene fa‘ē."

Neongo na‘e faingata‘a ki he fāmili ‘o Lepeka´, ka na‘e ‘ikai puli ko e finangalo ‘eni ia ‘o e ‘Otua´, ko ia na‘e lea atu ‘a Lēpani mo Petueli, ―Ko e meʻa ‘ena ia meia Sihova; ʻe ʻikai ke to e fai ha‘amau lau. Ko Lepeka ʻena, ʻave; pea tuku ke ne hoko ko e uaifi ʻo e foha ʻo hoʻo ʻeiki´, ʻo hangē ko e folofola ʻa Sihova´. Na‘e tō foʻohifo ki he kelekele´ ‘a ‘Eliesa, ʻo ne hū kia Sihova. Pea ne toʻo mai ha ngaahi teunga siliva, mo ha ngaahi teunga koula, mo ha ngaahi kofu, ʻo ne ʻange kia Lepeka: pea ne foaki mo e ngaahi meʻa‘ofa ki hono tuongaʻane´ mo ʻene faʻē. Fānau, ‘oku ‘i ai e palani ngāue ‘a e ‘Otua´ ma‘ae taha kotoa pē. Pe te tau mahino‘i pe ‘ikai, ‘oku mahu‘inga ke tau talangofua mo falala ki he ‘Otua´, te Ne fai ‘etau me‘a kotoa pē, hangē ko ‘etau veesi lauloto ‘i ‘olunga´.

Lotu: Lotu ‘o kole ki he ‘Otua´ ke Ne tokoni atu ke ke muimui ofi He’ene palani mo e fokotu’utu’u ma’a ho’o mo’ui´.

Tu'apulelulu 16 Fepueli, 2017

FAMILI 'O LEPEKA

Veesi Lauloto: Saame 37:5 

"Tekaki kia Sihova ho ‘alunga´; ‘Io, falala ki Ai, pea te Ne fai ‘e Ia´."

Semisi 24:28-33

"28Pea lele ‘a e ta‘ahine ‘o ongoongo ki he fale ‘o ‘ene fa‘ē ‘a e ngaahi me‘a ko ia. 29Pea na‘e ai hano tuonga‘ane ‘o Lepeka, ko Lēpani hono hingoa: pea lele ‘a Lēpani ki he tangata kitua‘ā ki he vai. 30Pea ‘i he ‘iloange na‘a ne sio ki he mama-ihu mo e ongo lelu ‘i he nima ‘o hono tuofefine, kae‘uma‘ā ‘ene fanongo ki he ngaahi lau ‘a hono tuofefine ko Lepeka, Tokua na‘e pehē mo pehē ‘a e lea ‘a e tangata kiate au; ko ia na‘a ne ‘alu ki he tangata, tā ‘oku ne tu‘u mo e fanga kāmeli ‘i he ngutu vai. 31Pea ne pehē, Hū mai, ‘a e pele ‘a Sihova; ko e hā ‘oku ke tu‘u ai ‘i tua‘ā? Ka kuo ‘osi ‘eku teu ‘a e fale, mo ha potu ki he fanga kāmeli. 32Pea hū mai ‘a e tangata ki he fale; ka ka vete ‘e ia ‘a e teuteu ‘o e fanga kāmeli, ‘o ne ‘ange ha hulu mo ha me‘akai ki he fanga kāmeli, mo ha vai ke tafitafi ‘aki ‘a e va‘e ‘o e tangata, mo e va‘e ‘o e kau tangata na‘e ō mo ia. 33Pea na‘e teu ha‘ane kai; ka ka pehē ‘e ia, ‘E ‘ikai te u kai kae‘oua ke u fakahā hoku fononga. Pea pehē ‘e ia, Lea pē."

‘I he ‘ilo ‘e Lepeka ko e tamaio‘eiki eni ‘a hono kāinga ko ‘Epalahame´, na‘a ne lele leva ‘o fakahā ki hono fāmili´, kae punou ‘a ‘Eliesa ‘o ne hū mo fakamālō kia Sihova He‘ene tataki tonu ‘ene fononga´. Ne fanongo ‘a e tuonga‘ane ‘o Lepeka´, ‘a Lēpani, ki he fakamatala ‘a Lepeka´, pea ne to e mamata ki he ngaahi koloa siueli ne foaki ‘e ‘Eliesa ma‘a Lepeka´, na‘a ne lele leva ‘o fakaafe‘i mai ‘a e tamaio‘eiki´ mo ‘ene kau fononga´ ke nau kai efiafi, mo nau mālōlō ai. Na‘e toki lea atu ‘a ‘Eliesa, Mou kātaki, ‘e ʻikai te u kai kaeʻoua ke u fakahā hoku fononga´. Ko e tamaioʻeiki au ʻa Epalahame. Pea kuo akamonūʻia ʻaupito ʻe Sihova ʻeku ʻeiki; pea kuo ne hoko ʻo lahi: pea kuo ne fakafuakava‘i au ke u kumi ange ha uaifi ki hono foha´ mei hono kāinga´. Na‘a ne to e fakamatala foki ki he tali lotu ‘a e ‘Otua´ he ve‘e vai´, mo ne pehē, Pea ko eni, kapau ʻoku mou pehē ke fai ʻa e ʻofa ki heʻeku ʻeiki´, tala mai: pea ka ʻikai, pea tala mai; kau afe ki he toʻomataʻu, pe ki he toʻohema.

Lotu: Lotu ‘o kole ki he ‘Otua´ ke Ne tokoni atuke ke poto he ngāue fakasevāniti ma’ana´, ‘o hangē ko ia ne fai ‘e ‘Eliesa ma’a ‘ene ‘eiki ko ‘Epalahame´.

Pulelulu 15 Fepueli, 2017

TALI LOTU 'A E 'OTUA

Veesi Lauloto: Saame 37:5 

"Tekaki kia Sihova ho ‘alunga´; ‘Io, falala ki Ai, pea te Ne fai ‘e Ia´."

Semisi 24:17-27

"17Pea lele ‘a e tamaio‘eiki ke fakafetaulaki kiate ia, mo ne pehē, Tuku ke u inu ha hu‘a vai mei ho‘o siā, ‘inē koā? 18Pea pehē ‘e he fefine, ‘Epu pē; pea ne fakavave, ‘o ne tuku hifo ‘ene siā, ‘o ne hapai ‘o fakainu ia. 19Pea kuo ‘osi ‘ene fakainu ia, pea pehē ‘e he fefine, Te u ‘utu foki ki ho‘o fanga kāmeli, ‘o fai pē ke nau fiu he inu. 20Pea fakato‘oto‘o ia ‘o lilingi ‘ene siā ki he kumete, pea ne toe lele ki he vai ke ‘utu mai, pea ne ‘utu ki he‘ene fanga kāmeli kotoa pē. 21Pea mo‘uvakaia ‘e he tangata ‘a e fefine mo fakalongo pē, ke ‘ilo pe kuo fakamonū‘ia ‘e Sihova hono fononga pe ‘ikai.
22Pea ‘i he faifai pea fiu ‘a e fanga kāmeli he inu, pea to‘o ‘e he tangata ha mama-ihu koula, ko e haafe sikeli hono mamafa, pea mo e ongo lelu ma‘a e nima ‘o e fefine, ko hona mamafa ko e sikeli koula ‘e hongofulu; 23pea ne pehē, Ko e ‘ōfefine ‘o hai koe, ‘inē? Tala mai pe ‘oku ‘ata‘atā ‘a e ‘api ‘o ho‘o ‘eiki ke mau ‘apitanga ai. 24Pea pehē ange ‘e he fefine, Ko e ‘ōfefine au ‘o Petueli, ko e tama ia ‘a Milika, ‘a ia na‘a ne fanau‘i kia Nēhoa. 25Na‘e ne pehē foki ki he tangata, ‘Oku lahi foki ‘a e hulu mo e me‘akai ‘i ‘api, pea ‘oku ‘ata‘atā ke mou ‘apitanga ai. 26Pea punou ‘a e tangata ‘o ne hū kia Sihova, 27‘o ne pehē, Mālō mo Sihova, ko e ‘Otua ‘o ‘eku ‘eiki ko ‘Epalahame, he ‘ikai tūkua ‘ene ‘alo‘ofa mo ‘ene mo‘oni ki he‘eku ‘eiki: ‘i he‘eku ‘i he hala na‘e taki au ‘e Sihova ki he fale ‘o e tokoua ‘o ‘eku ‘eiki."

Ne tali lotu ‘a e ‘Otua´ ma‘a ‘Eliesa, he na‘a ne falala ‘Otua mo ui tokoni ki Ai. Pea lele ʻa ‘Eliesa ‘o fakafetaulaki kia Lepeka ‘o ne kole inu kiate ia. Pea pehē ʻe he fefine´, Inu pē; pea te u fakainu foki mo ho‘o fanga kāmeli´ kae ‘oua ke nau fiu he inu´. Na‘e mo‘usioa pē ‘a ‘Eliesa, he vave ‘a e tali lotu ‘a e ‘Otua´... ʻI he faifai pea fiu ʻa e fanga kāmeli´ he inu´, na‘a ne foaki ha ngaahi me‘a‘ofa kia Lepeka, ‘o ne fehu‘i, Ko e ʻofefine ʻo hai koe? ʻOku ʻataʻatā ʻa e ʻapi ʻo hoʻo ʻeiki´ ke mau ʻapitanga ai?. Pea pehē ange ʻe he fefine´, Ko e ʻofefine au ʻo Petueli, ko e tama ia ʻa Milika mo Nehoa. ‘Io, ʻoku lahi pea hulu mo e meʻakai´ʻi ʻapi, pea ʻoku ʻatāʻatā ke mou ʻapitanga ai. Na‘e punou ʻa ‘Eliesa ʻo ne hū kia Sihova, ʻo ne pehē, Mālō Sihova, ko e ʻOtua ʻo ʻeku ʻeiki ko Epalahame´, Ho‘o taki au ki he fale ʻo e tokoua ‘o ʻeku ʻeiki.

Lotu: Lotu ‘o fakamālō ki he ‘Otua´ He’ene tali lotu ma’a ‘Ene kakai´, ke tau ako ai ke tau fa’a tatali mo falala ‘Otua, he te Ne ‘omi ma’u pē leleitaha ma’au.

Tusite 14 Fepueli, 2017

KOLE TOKONI MEI HE 'OTUA

Veesi Lauloto: Saame 37:5 

"Tekaki kia Sihova ho ‘alunga´; ‘Io, falala ki Ai, pea te Ne fai ‘e Ia´."

Semisi 24:10-15

"10Pea ‘ave ‘e he tamaio‘eiki ha kāmeli ‘e toko hongofulu ‘i he fanga kāmeli ‘a ‘ene ‘eiki, ‘o ne ‘alu; he na‘e ‘iate ia ‘a e koloa kotoa ‘a ‘ene ‘eiki ke fa‘iteliha ki ai; pea ne tu‘u ‘o fononga ki Mesopotēmia ki he kolo ‘o Nēhoa. 11Pea ne fakatokoto ‘a e fanga kāmeli ‘i tua‘ā kolo ofi ki he vaikeli, fe‘unga mo ‘ene efiafi, ‘a e taimi ‘oku hū kitua‘ā ai ‘a e kau fefine ke utu vai. 12Pea pehē ‘e ia, ‘E Sihova ko e ‘Otua ‘o ‘eku ‘eiki ko ‘Epalahame, ke ke fakata‘imālie‘i au he ‘aho ni, mo ke fai ‘ofa ki he‘eku ‘eiki ko ‘Epalahame. 13Ko eni ‘oku ou tu‘u ‘i he ngutu vai, pea ‘e ha‘u ‘a e fānau fefine ‘o e kakai ‘o e kolo ke ‘utu vai: 14pea ‘ilonga ‘a e ta‘ahine te u pehē ki ai, ‘Ē, matule mai ho‘o siā ke u inu; pea ka tali mai ‘e ia, ‘Inu pē, pea te u fakainu foki mo ho‘o fanga kāmeli: ‘ofa ko e fefine ia kuo ke tu‘utu‘uni ma‘a ho‘o tamaio‘eiki ko ‘Aisake: pea u ‘ilo ai kuo ke fai ‘ofa ki he‘eku ‘eiki.
15Pea ‘iloange, te‘eki ke ‘osi ‘ene lea, mo e hū mai kitua‘ā ‘a Lepeka, ‘a ia ne fanau‘i kia Petueli ko e tama ‘a Milika, ko e uaifi ‘o Nēhoa ko e tokoua ‘o ‘Epalahame ‘oku hili ‘i hono uma ‘ene siā."

Ne ʻave ʻe ‘Eliesa ha kameli ʻe toko hongofulu ʻi he fanga kameli ʻa ʻene ʻeiki, ʻo ne tuʻu ʻo fononga ki Mesopotemia ki he kolo ʻo Nēhoa, ko e tokoua ‘o ‘Epalahame´. Pea ne fakatokoto ʻa e fanga kāmeli´ ʻi tu‘akolo ofi ki he vaikeli´, feʻunga mo ʻene efiafi´, ʻa e taimi ʻoku hū kituaʻā ai ʻa e kau fefine´ ke ‘utu vai´. Pea lotu ‘a ‘Eliesa ‘o kole tokoni mei he ‘Otua´, ―ʻE Sihova, ko e ʻOtua ʻo ʻeku ʻeiki ko ‘Epalahame´, ke Ke fakataʻimalieʻi mu‘a au he ʻaho ni, mo Ke fai ʻofa ki heʻeku ʻeiki ko ‘Epalahame´. Ko eni ʻoku ou tuʻu he ngutu vai´, pea ʻe haʻu ʻa e fānau fefine ʻo e kakai ʻo e kolo´ ke ʻutu vai: pea ʻilonga ʻa e taʻahine te u kole inu ki ai, pea ne ‘omi haku inu pea ne toe fakainu foki mo ‘eku fanga kāmeli´: ʻofa ko e fefine ia kuo Ke tuʻutuʻuni maʻa ‘Aisake´: pea u ʻilo ai kuo Ke fai ʻofa ki heʻeku ʻeiki´. Teʻeki ke ʻosi ʻene lea´, mo e hū mai kituaʻā ʻa Lepeka, ko e mokopuna ‘o Nēhoa, tokoua ʻo ‘Epalahame´ ʻoku hili ʻi hono uma ʻene siā. Fakaofo ma‘u pē founga ia ‘a e ‘Otua´ fanau.

Lotu: Lotu ‘o kole ki he ‘Otua´ ke Ne tokoni’i koe he tapa kotoa pē ho’o mo’ui´, ke ne taimi’i ho’o me’a kotoa mo tokonaki ‘a e me’a totonu ma’a ho’o mo’ui´.

Monite 13 Fepueli, 2017

KUMI 'A E MALI 'O 'AISAKE

Veesi Lauloto: Saame 37:5 

"Tekaki kia Sihova ho ‘alunga´; ‘Io, falala ki Ai, pea te Ne fai ‘e Ia´."

Semisi 24:1-7

"1PEA kuo motu‘a ‘a ‘Epalahame, ‘o a‘ua‘u: pea kuo fakamonū‘ia ia ‘e Sihova ‘i he me‘a kotoa pē. 2Pea lea ‘a ‘Epalahame ki he‘ene tamaio‘eiki, ‘a e motu‘a ‘o hono ‘api, ‘a ia na‘e pule ki he‘ene ngaahi me‘a, ‘Ē, ke ke ‘ai mai ho nima ki hoku lalo tenga ni. 3Ka u fakafuakava koe ‘ia Sihova ko e ‘Otua ‘o Langi mo e ‘Otua ‘o Māmani, ‘o pehē, ‘e ‘ikai te ke kumi ha uaifi ma‘a hoku foha mei he kau fefine ‘o ha‘a Kēnani, ‘a ia ‘oku ou nofo ai: 4ka te ke ‘alu ki hoku fonua pea ki hoku kāinga, pea ke kumi mei ai ha uaifi ki hoku foha ko ‘Aisake. 5Pea tali ‘a e tamaio‘eiki, Ka na‘a ‘ikai loto ‘a e fefine ke ha‘u mo au ki he fonua ni: pea te u fakafoki hake koā ho foha ki he fonua na‘a ke ha‘u mei ai? 6Pea pehē ange ‘e ‘Epalahame, Ke ke vakai kiate koe ‘o kapau te ke fakafoki hoku foha ki he potu ko ia. 7Ko Sihova ko e ‘Otua ‘o Langi, ‘a ia na‘a ne ‘omi au mei he fale ‘o ‘eku tamai mo e fonua ‘o hoku tupu‘anga, ‘a ia foki na‘a ne fuakava kiate au, ‘o pehē, Te u ‘atu ki ho hako ‘a e fonua ni; te ne fekau ‘e ia ‘ene ‘āngelo ke fakamelomelo kiate koe, pea te ke ‘omi ha uaifi mei ai ma‘a hoku foha."

Kuo pekia ‘eni ‘a Sela pea tanu ia ‘i Kenani. Kuo mātu‘aki toulekeleka ‘eni ‘a ‘Epalahame, pea kuo fakamonū‘ia ia ‘e he ‘Otua´ ‘i he me‘a kotoa pē. Kuo fu‘u tangata ‘a ‘Aisake, ko ia na‘e fiema‘u ‘e ‘Epalahame ke ‘omi ha uaifi ‘o ‘Aisake mei hono kakai´. Na‘a ne fakafuakava‘i leva ‘a ‘Eliesa ke ‘oua na‘a ne kumi ha uaifi ‘o ‘Aisake mei he kau fefine ʻo haʻa Kēnani´, ka ke ne ʻalu pē ki he kāinga ‘o ‘Epalahame´. Pea koe ‘Otua´ te Ne tokoni‘i mo tataki ia´. Na‘e palōmesi ‘a ‘Eliesa te ne fai pē ‘o hangē ko e me‘a kuo fakahā ange ‘e ‘Epalahame´, ko ia na‘a ne fononga atu leva mo e ngaahi me‘a‘ofa ke fekumi ki ha mali ‘o ‘Aisake. Ne to e fehu‘i ‘e ‘Eliesa kia ‘Epalahame, fēfē kapau ‘e ʻikai loto ʻa e fefine´ ia ke haʻu mo ia, ‘e ‘ave pē nai ‘a ‘Aisake ki ai. Ne tali ‘a ‘Epalahame, ‘Ikai! Na‘e ‘omi au ‘e Sihova mei hoku fonua tupu‘anga´ ki heni ‘o Ne folofola mai te ne ‘omi ‘a e fonua ni ma‘a hoku hako´. Ko ia ai ‘alu pē, he ‘e fekau ʻe Sihova ia ʻEne ‘angelo´ ke fakamelomelo kiate koe, pea te ke ʻomi ha uaifi mei ai maʻa hoku foha´. Ko hotau ‘Otua´ he‘ikai te Ne li‘aki kitautolu.

Lotu: Lotu ‘o fakamālō ki he ‘Otua´ He’ene tōnunga he fai hotau tokanga. ‘Oku ne fakasio ma’u mai pē ke fakapapau’i ‘oku tau sai pē. Ko tautolu pē ‘fa’a failoto.

Sapate 12 Fepueli, 2017

KO E TĀPUAKI ‘O E HAKO ‘O ‘EPALAHAME

Veesi Lauloto: 1 Sione 5:3 

"Ko ‘eni ia ʻa e ʻofa ki he ʻOtua´, ʻa ʻetau tauhi ki Heʻene ngaahi tuʻutuʻuni´."

Semisi 22:15-19

"15Pea ui mai mei langi kia ‘Epalahame ‘a e ‘Āngelo ‘a Sihova ko hono tu‘o ua, 16‘ō pehē, Ko e folofola eni ‘a Sihova, Kuo u fuakava ‘iate au, ko e me‘a ‘i ho‘o fai pehē, ‘o ‘ikai te ke mamae‘i ho foha, ‘a ho‘o me‘a pē taha; 17ko ia te u mātu‘aki tāpuaki‘i koe, pea te u mātu‘aki fakatokolahi ho hako ke tatau mo e ngaahi fetu‘u ‘o e langi, pe ko e ‘one‘one ‘i he matātahi; pea ‘e ma‘u ‘e ho hako ‘a e ngaahi matanikolo ‘o honau ngaahi fili; 18pea ko ho hako ‘e monū‘ia ai ‘a e ngaahi pule‘anga ‘o māmani; koe‘uhi ā kuo ke tuitala ki he‘eku lea. 19Pea foki ‘a ‘Epalahame ki he‘ene ongo tama; pea na tu‘u hake, ‘o nau ‘alu fakataha ki Peasipa; pea na‘e nofo ‘a ‘Epalahame ‘i Peasipa."

Pea ui mai mei langi kia Epalahame ʻa e ‘Angelo ʻa Sihova´ ko hono tuʻo ua, ʻo pehē, Ko e folofola ‘eni ʻa Sihova´, Kuo U fuakava ʻiate Au, ko e meʻa ʻi hoʻo fai pehē´, ʻo ʻikai te ke mamaeʻi ho foha´, ʻa hoʻo meʻa pē taha´; ko ia te u mātuʻaki tāpuakiʻi koe, pea te u mātuʻaki fakatokolahi ho hako´ ke neveneve hangē ko e ngaahi fetuʻu ʻo e langi´, pe ko e ʻoneʻone ʻi he matātahi´; pea ʻe maʻu ʻe ho hako´ ʻa e ngaahi matanikolo ʻo honau ngaahi fili´; pea ko ho hako´ ʻe monūʻia ai e ngaahi puleʻanga ʻo māmani´; koeʻuhiā kuo ke tuitala ki Heʻeku lea´. Ko e tui mo e talangofua ‘a ‘Epalahame´ ko ia ‘e kai melie ai hono hako´. ‘E fakapale‘i mo koe fānau, kapau te ke tui mo talangofua ki he ‘Otua´.

Lotu: Lotu ‘o kole ki he ‘Otua´ ke Ne tokoni atu ke ke tui mo talangofua kiate Ia, tatau aipē pe ‘oku ‘i ai ha pale pe ‘ikai.

Tokonaki 11 Fepueli, 2017

KUO 'OSI TOKONAKI 'E HE 'OTUA

Veesi Lauloto: 1 Sione 5:3 

"Ko ‘eni ia ʻa e ʻofa ki he ʻOtua´, ʻa ʻetau tauhi ki Heʻene ngaahi tuʻutuʻuni´."

Semisi 22:10-14

"10Pea ala atu ‘a ‘Epalahame, ‘o to‘o ‘a e hele ke tāmate‘i ‘aki hono foha. 11Ka ka ui mai ‘a e ‘Āngelo ‘a Sihova mei langi ‘o pehē, ‘Epalahame! ‘Epalahame! pea ne pehē, Ko au. 12Pea ne folofola mai, ‘Oua te ke ala ki he tama, pea ‘oua te ke fai ha me‘a ki ai: he ‘oku ou ‘ilo eni ko e tokotaha koe ‘oku ke ‘apasia ki he ‘Otua, koe‘uhi na‘e ‘ikai te ke mamae‘i meiate au ho foha, ‘a ho‘o me‘a pē taha. 13Pea tāngaki hake ‘e ‘Epalahame ‘o vakai, tā na‘e ‘i hono tu‘a ha sipi tangata kuo fihia hono nifo ‘i he vao: pea ‘alu ‘a ‘Epalahame, ‘o puke ‘a e sipi tangata, ‘o ne fai‘aki ‘a e feilaulau tutu ko e fetongi ‘o hono foha. 14Pea na‘e fakahingoa ‘e ‘Epalahame ‘a e potu ko ia ko Sihova-siaila [ko Tokonaki-pē-‘e-Sihova] –‘o hangē ko e lea ‘oku fakatokotokanaki ‘aki ‘i onopooni “‘I he mo‘unga ‘o Sihova ‘e hā.”"

Pea hanga hake ʻe Epalahame ʻo vakai, tā naʻe ʻi hono tuʻa´ ha sipi tangata kuo fihia hono nifo´ ʻi he vao´: pea ʻalu ʻa Epalahame ʻo puke ʻa e sipi tangata´, ʻo ne fai ʻaki ʻa e feilaulau tutu ko e fetongi ʻo hono foha´. Pea naʻe fakahingoa ʻe Epalahame ʻa e potu ko ia´ ko Sihova-Siaila [ko Tokonaki-pē-ʻe-Sihova] Na‘e ‘ikai mamae‘i ‘e ‘Epalahame hono foha pē ‘e taha´, pea fakapale‘i ai ‘e Sihova Siaila, ‘o to e mo‘ui mai ‘a ‘Aisake. Ko Mo‘unga Mōlaia ia. Ko e tuhu lōloa ia ki Mo‘unga Kālevale, na‘e feilaulau‘i ai ‘a e ‘Alo Pele ‘o e ‘Otua´, ka tau ma‘u faingamālie ki he mo‘ui ta‘engata´. Ko kitautolu ia na‘e tonu ke hilifaki ki he funga fefie´, ‘a e kolosi ‘o Kalaisi´, ka na‘e tokonaki ‘e Sihova Siaila ha Lami, ‘a e ‘Alo Pele ‘o e ‘Otua´. Ko Hono pale´ ko e toetu‘u mo e Hau Ta‘eliua!

Lotu: Lotu ‘o fakamālō ki he ‘Otua´ He’ene palani’i hotau fakamo’ui´, ke kau ai ‘a e tukuange Hono ‘Alo´ ke mate he kolosi´ ka tau mo’ui. Faitangane! Fakafeta’i!

Falaite 10 Fepueli, 2017

FAKAPALE'I 'A E TALANGOFUA

Veesi Lauloto: 1 Sione 5:3 

"Ko ‘eni ia ʻa e ʻofa ki he ʻOtua´, ʻa ʻetau tauhi ki Heʻene ngaahi tuʻutuʻuni´."

Semisi 22:9-12

"9Pea faifai pea na a‘u ki he potu kuo fakahā ‘e he ‘Otua kiate ia; pea hanga ai ‘a ‘Epalahame ‘o ne fokotu‘u ai ‘a e ‘ōlita, ‘o ne fakatoka ‘a e fefie, ‘o ne kafai ‘a hono foha ko ‘Aisake, ‘o ne hilifaki ‘i he ‘ōlita ki he makafefie. 10Pea ala atu ‘a ‘Epalahame, ‘o to‘o ‘a e hele ke tāmate‘i ‘aki hono foha. 11Ka ka ui mai ‘a e ‘Āngelo ‘a Sihova mei langi ‘o pehē, ‘Epalahame! ‘Epalahame! pea ne pehē, Ko au. 12Pea ne folofola mai, ‘Oua te ke ala ki he tama, pea ‘oua te ke fai ha me‘a ki ai: he ‘oku ou ‘ilo eni ko e tokotaha koe ‘oku ke ‘apasia ki he ‘Otua, koe‘uhi na‘e ‘ikai te ke mamae‘i meiate au ho foha, ‘a ho‘o me‘a pē taha."

Pea faifai pea na aʻu ki he potu kuo fakahā ʻe he ʻOtua´ kiate ia´; pea hanga ai ʻa ‘Epalahame ʻo ne fokotuʻu ʻa e olita´, ʻo ne fakatoka ʻa e fefie´, ʻo ne kafai ʻa ono foha ko ‘Aisake´, ʻo ne hilifaki ʻi he ‘olita´ ki he makafefie´. Pea ala atu ʻa ‘Epalahame, ʻo toʻo ʻa e hele´ ke tāmateʻi ʻaki hono foha´. Na‘e ‘ikai ke to e fute hake ‘a ‘Aisake, he na‘a ne tupu hake pē ‘o ako he tui mo e talangofua ‘a ‘Epalahame´. Ka ka ui mai ʻa e ‘Angelo ʻa Sihova´ mei langi ʻo pehē, ‘Epalahame! ‘Epalahame! Pea ne pehē, Ko au. Pea ne folofola mai, ʻOua te ke ala ki he tama´, pea ʻoua te ke fai ha meʻa ki ai: he ʻoku ou ʻilo eni ko e toko taha koe ʻoku ke ʻapasia ki he ʻOtua´, koeʻuhi´ naʻe ʻikai te ke mamaeʻi meiate au ho foha´, ʻa hoʻo meʻa pē taha´. Ko e fakapale‘i ia ‘o e talangofua´. Fānau, ‘oku fe‘unga nai ‘etau ‘ofa ki he ‘Otua´ ke tau lava ai ke talangofua kiate Ia, he ngaahi tu‘utu‘uni faingata‘a ‘oku Ne ‘omi ke tau fai´.

Lotu: Lotu ‘o kole ki he ‘Otua´ ke Ne tokoni’i koe ke ke lava ‘o talangofua ki ho kau taki´, ‘o kamata pē ‘i ho’o mātu’a´ ‘i ‘api mo ho fanga ta’okete´.

Tu'apulelulu 9 Fepueli, 2017

FEHU'I FAINGATA'A

Veesi Lauloto: 1 Sione 5:3 

"Ko ‘eni ia ʻa e ʻofa ki he ʻOtua´, ʻa ʻetau tauhi ki Heʻene ngaahi tuʻutuʻuni´."

Semisi 22:5-8

"5Pea lea ‘a ‘Epalahame ki he‘ene ongo tama, Mo nofo ā ‘i heni mo e ‘asi, ka ko au mo e tama te ma ‘alu ki hē; pea te ma fai ‘ema lotu ‘o foki mai kiate kimoua. 6Pea to‘o ‘e ‘Epalahame ‘a e fefie ki he feilaulau, ‘o ne hilifaki ki hono foha ko ‘Aisake; pea ne to‘o ‘e ia ‘a e afi mo e hele, pea na laka atu fakataha. 7Pea lea ‘a ‘Aisake ki he‘ene tamai ko ‘Epalahame, ‘o pehē, ‘Alā tamai: pea ne tali, Ko au, tama. Pea ne pehē, Ko e afi ē mo e fefie, ka ko e fē ‘a e lami ki he feilaulau? 8Pea pehē ‘e ‘Epalahame, Tama, ko e ‘Otua te ne tokonaki ‘e ia ha‘ane lami ki he feilaulau: pea na laka atu fakataha."

Pea toʻo ʻe Epalahame ʻa e fefie ki he feilaulau´, ʻo ne hilifaki ki hono foha ko Aisake´; pea ne toʻo ʻe ia ʻa e afi´ mo e hele´, pea na laka atu fakataha. 7 Pea lea ʻa Aisake ki heʻene tamai ko ‘Epalahame´ ʻo pehē, ʻAlā tamai: pea ne tali, Ko au, tama. Pea ne pehe, Ko e afi´ ē mo e fefie´, ka ko e fē ʻa e lami ki he feilaulau? Pea pehē ʻe Epalahame, Tama, ko e ʻOtua´ te Ne tokonaki ʻe Ia Haʻane lami ki he feilaulau´. Pea na laka atu fakataha. Ko e tali ‘i he tui ta‘etoe veiveiua ‘e ‘omi ‘e he ‘Eiki´ ha lami. Ka na‘e ‘ikai nofo ‘a ‘Epalahame ia ‘o to e ki‘i tatali na‘a ‘omi ‘e he ‘Otua´ ‘a e lami´, ‘ikai, na‘a ne tu‘u leva ‘o ‘alu ke fai ‘a e tu‘utu‘uni ‘a e ‘Otua´.

Lotu: Lotu ‘o kole ki he ‘Otua´ ke Ne foaki atu ma’au ha tui ‘oku hangē ko e tui ‘a ‘Epalahame´. Ke te tui ta’emamata, fai vēkeveke ‘ete talangofua ki he ‘Otua´.

Pulelulu 8 Fepueli, 2017

TUI MO E TALANGOFUA 'A 'EPALAHAME

Veesi Lauloto: 1 Sione 5:3 

"Ko ‘eni ia ʻa e ʻofa ki he ʻOtua´, ʻa ʻetau tauhi ki Heʻene ngaahi tuʻutuʻuni´."

Semisi 22:2-5

"2pea tali ‘e ia, Ko au. Pea ne folofola mai, ‘Ē, ke ke ‘ave ho foha, ‘a ho‘o me‘a pē taha, ho ‘ofa‘anga, ‘a ‘Aisake, pea ‘alu mo koe ki he fonua ko Molaia; pea fai‘aki ia ha feilaulau tutu ‘i ha funga mo‘unga te u toki fakahā atu. 3Pea pongipongi leva pea tu‘u hengihengi hake ‘a ‘Epalahame, ‘o ne teuteu ‘ene ‘asi; ‘o ‘alu mo ia ha toko ua ‘i he‘ene kau tama mo hono foha ko ‘Aisake; na‘a ne fahi foki ha fefie ki he feilaulau, ‘o ne tu‘u ‘o ‘alu ki he potu ne fakahā kiate ia ‘e he ‘Otua. 4Pea ‘i hono ‘aho tolu na‘e tāngaki hake ‘a ‘Epalahame, ‘o ne vakai mei he mama‘o ki he potu. 5Pea lea ‘a ‘Epalahame ki he‘ene ongo tama, Mo nofo ā ‘i heni mo e ‘asi, ka ko au mo e tama te ma ‘alu ki hē; pea te ma fai ‘ema lotu ‘o foki mai kiate kimoua."

Na‘e ‘ikai ke to e fakafepaki pe to e fakafehu‘i ia ‘e ‘Epalahame ‘a e tu‘utu‘uni ‘a e ‘Otua´. Na‘e hā ‘a e kei mālohi ‘ene tui´ mo e talangofua´, he‘ene ‘ā hengihengi leva ʻo teuteu ʻene asi´ ki he fononga´, ʻo ʻalu mo ia ha toko ua ʻi heʻene kau tama´ mo hono foha ko Aisake´. Taimi ‘e ni‘ihi kuo tau ‘osi ‘ilo e me‘a ‘oku tokanga mai e ‘Otua´ ke fai, ka ‘oku tau tolotoloi mo ta‘eloto ke fai. Hangē ko e fakamolemole‘i ha taha ne fai kovi mai, pe ko e fai ha foaki ki ha taha ‘oku ‘ikai ke te sai‘ia ai. Tuku ke tau hangē ko ‘Epalahame´, ke tau fai leva pea fai fiefia. Naʻa ne fahi foki ha fefie ki he feilaulau´, ʻo ne tuʻu ʻo ʻalu ki he potu ne fakahā kiate ia ʻe he ʻOtua´. Hili e ‘aho ‘e 3 ne nau a‘u ki Mo‘unga Mōlaia, pea lea ‘a ‘Epalahame ki he ongo sevāniti´ ke na tatali ‘i he potu ko ia´, ka ko ia pē mo ‘Aisake te na ‘alu hake ki he mo‘unga´ ke fai ʻena lotu, pea na toki foki mai kiate kinaua. Vakai ko ē ko ‘ena ō ke tāmate‘i ‘a ‘Aisake´, ka ne talaange te na to e foki mai. He toki tui ta‘engaue mo‘oni, ke tau ako mei ai.

Lotu: Lotu ‘o kole ki he ‘Otua´ ke Ne tokoni’i koe ke ke lava ‘o fakahaa’i ho’o ‘ofa kiate Ia´ ‘aki ho’o talangofua leva ‘o fai e me’a kuo Ne tu’utu’uni atu ke fai´.

Tusite 7 Fepueli, 2017

'AHI'AHI'I 'O 'EPALAHAME

Veesi Lauloto: 1 Sione 5:3 

"Ko ‘eni ia ʻa e ʻofa ki he ʻOtua´, ʻa ʻetau tauhi ki Heʻene ngaahi tuʻutuʻuni´."

Semisi 22:1-2

"1PEA hili ‘a e ngaahi me‘a ko ia na‘e sivi ‘a ‘Epalahame ‘e he ‘Otua; ko ia na‘a ne folofola mai, ‘E ‘Epalahame: 2pea tali ‘e ia, Ko au. Pea ne folofola mai, ‘Ē, ke ke ‘ave ho foha, ‘a ho‘o me‘a pē taha, ho ‘ofa‘anga, ‘a ‘Aisake, pea ‘alu mo koe ki he fonua ko Molaia; pea fai‘aki ia ha feilaulau tutu ‘i ha funga mo‘unga te u toki fakahā atu."

Ne hoko mai ki he ‘aho, naʻe sivi ai ʻa Epalahame ʻe he ʻOtua´; ko ia naʻa Ne folofola mai, ʻE Epalahame: pea tali ʻe ia, Ko au. Pea Ne folofola mai, ʻE, ke ke ʻave ho foha´, ʻa hoʻo meʻa pē taha´, ho ʻofaʻanga´, ʻa Aisake, pea ʻalu mo koe ki he fonua ko Mōlaia´; pea fai ʻaki ia ha feilaulau tutu ʻi ha funga moʻunga te U toki fakahā atu. Ko e tesi faingata‘a mo‘oni ‘eni ki he tui mo e talangofua ‘a ‘Epalahame´. Ko kinautolu ‘oku nau tui pīkitai ki he ‘Otua´, ‘e foaki pē ‘e he ‘Otua´ kiate kinautolu ‘a e tui mo e kelesi fe‘unga ke ikuna‘i ‘aki ‘a e faingata‘a kotoa pē. He‘ikai te nau ‘ita pe lotosi‘i he taimi ‘oku ha‘u ai e ‘ahi‘ahi faingata‘a´, he ‘oku nau pau‘ia ‘oku pukepuke kinautolu honau ‘Otua´.

Lotu: Lotu ‘o kole ki he ‘Otua´ ke tokoni atu ke kei mālohi mo tu’uma’u ho’o ‘ofa kiate IA´ he taimi ‘oku ke fetaulaki ai mo e ngaahi ‘ahi’ahi faingata’a´.