Tu'apulelulu 20 Siulai, 2017

‘OKU TAHA PĒ ‘A E ‘OTUA´ - KO SIHOVA PĒ.

Veesi Lauloto: 'Aisea 12:2

"Vakai, ko hoku Fakamoʻuiʻanga´ ʻa ‘Ela; te u falala pē, ʻo ʻikai te u manavahēa:
He ko hoku Mālohinga´ mo ʻeku Taʻanga´ ʻa IAA´ SIHOVA;
Pea kuo Ne hoko ko hoku Fakamoʻuiʻanga."

Fakamaau 6:24-32

"24‘e ‘ikai te ke mate. Pea fokotu‘u ‘e Kitione ‘i he potu ko ia ha ‘ōlita ki he ‘Eiki, ‘o ne fakahingoa ia ko Sihova-Sālome (ko Sihova-ko-e-melino): ‘oku kei tu‘u ia ‘o a‘u ki he ‘aho ni ‘i ‘Ōfila ‘a ia ‘oku kau ki ha‘a ‘Apiesa. 25Pea ‘i he pō ko ia na‘e folofola ‘a e ‘Eiki kiate ia, ‘Ave ‘a e pulu mui ‘a ho‘o ‘eiki, pea mo hono ua ‘o e pulu ‘oku fitu ta‘u, pea holoki ‘a e ‘ōlita ‘o Peali, ‘a ia ‘oku ‘a ho‘o tangata‘eiki, pea tā ‘a e ‘āsela ‘oku tu‘u ai; 26pea te ke fokotu‘u ha ‘ōlita kia Sihova ko ho ‘Otua ‘i he funga ‘o e talitau‘anga ni ‘aki ‘a e me‘a kuo ‘osi teu; pea ke to‘o hono ua ‘o e pulu, ‘o fai‘aki ha feilaulau-mōifua, ‘o tutu ‘aki ‘a e ‘akau ‘o e ‘āsela ‘a ia kuo ke tā. 27Pea ‘ave ‘e Kitione ha toko hongofulu ‘o ‘ene kau tamaio‘eiki, ‘o ne fai ‘o hangē ko e me‘a ‘a e ‘Eiki kiate ia: pea ko e me‘a ‘i he‘ene manavahē ki he fale ‘o ‘ene tamai, pea mo e kau tangata ‘o e kolo, na‘e ‘ikai te ne lava ke fai ‘aho, ka na‘a ne toki fai po‘uli. 28Pea ‘i he ‘ā hengihengi ‘a e kau tangata ‘i he kolo tā kuo holoki ‘a e ‘ōlita ‘o Peali, pea kuo tā ‘a e ngaahi keke ta‘elēvani ‘aki ha efa ‘āsela na‘e tu‘u ai, pea ko hono ua ‘o e pulu kuo feilaulau ‘aki ‘i he ‘ōlita kuo fokotu‘u. 29Pea nau fepehē‘aki, Ko hai tū kuo ne fai eni? Pea ‘i he‘enau fakatotolo mo ‘eke, na‘e tala, Ko Kitione ko e foha ‘o Soasi na‘a ne fai ‘a e me‘a ko ia. 30Pea pehē ‘a e kau tangata ‘o e kolo kia Soasi, ‘Omi ho foha kitu‘a ke ne mate; koe‘uhi kuo ne holoki ‘a e ‘ōlita ‘o Peali, pea kuo ne tā ‘a e ‘āsela na‘e tu‘u ai. 31Pea lea ‘a Soasi kiate kinautolu kotoa pē na‘e tu‘u mai kiate ia, Te mou taukapo‘i ‘a Peali, ‘e kimoutolu? pea te mou fakahaofi ia? Ko ia te ne taukapo‘i ia ke ne mate pē kei pongipongi. Kapau ko e ‘otua ia, tuku ke ne taukapo‘i ia ‘e ia, he kuo ne holoki hono ‘ōlita. 32Ko ia na‘e fakahingoa ia ‘i he ‘aho ko ē ko Selupeali (ko Taukapo‘i-‘e-Peali) he‘ene pehē, Ke talatalaaki‘i ia ‘e Peali, he kuo ne holoki hono ‘ōlita."

Na‟e fokotuʻu ʻe Kitione ʻi he potu ko ia´ ha 'olita ki he ʻEiki´, ʻo ne fakahingoa ia ko Sihova Salome (ko Sihova ko e Melino): ʻoku kei tuʻu ia ʻo aʻu ki he ʻaho ni. Pea folofola ʻa e ʻEiki´ kiate ia ke ne holoki 'a e 'olita kia Peali ne fa'a lotu ai 'ene tamai´, pea ke ne langa ai ha 'olita kia Sihova, pea ke ne fai ai ha feilaulau-mōifua kia Sihova. Pea ʻave ʻe Kitione ha toko 10 ʻo ene kau tamaioʻeiki´, ʻo ne fai ʻo hangē ko e meʻa ʻa e ʻEiki´ kiate ia´: ka na'a ne manavahē ki heʻene tamai´ mo e kau tangata ʻo e kolo´, naʻe ʻikai te ne lava ke fai ʻaho, ka naʻa ne toki holoki poʻuli. 'I he'ene 'aho hake´ 'o 'ilo ki ai he kau tangata 'o e kolo´, na'a nau fekumi 'o 'ilo ko Kitione. Na'a nau 'alu atu ke tamate'i ia, ka na'e malu'i pe 'a Kitione he'ene tamai´, 'a Soasi.

Lotu: Kole ki he ‘Otua´ ke Ne tokoni’i koe ke ke lototo’a he fakamo’oni Ma’ana´ he taimi kotoa pē.