Monite 24 Siulai, 2017

TUKU KE E’A TOKOTAHA PE ‘A SIHOVA

Veesi Lauloto: Sakalaia 4:6

"Pea tali ʻe ia, ʻo ne folofola mai, ʻo ne pehē, “Ko e folofola ‘ena ʻa Sihova kia Seluipēpeli, ke fakahā, ʻOku ʻikai tuʻu ʻi he ivi, pea ʻoku ʻikai tuʻu ʻi he ngū, ka ko Hoku Laumālie´ pē — ko e folofola ia ʻa Sihova Sāpaoti."

Fakamaau 7:1-2

"1PEA, ko Selupeali (‘a ia ko Kitione) pea mo e kakai kotoa na‘e ‘iate ia, na‘a nau tu‘u hengihengi hake, ‘o nau fokotu‘u tēniti ofi ki he vai ko Hāloti: pea ko e ‘apitanga ‘o Mitiani na‘e tu‘u mai mei he tokelau, mei he mo‘unga ‘o Mole ‘i he fonua ‘i lalo. 2Pea folofola ‘a e ‘Eiki kia Kitione, ‘o pehē, Ko e kakai ‘oku ‘iate koe ‘oku tokolahi fau ke u tuku ai ‘a Mitiani ki honau nima; na‘a pōlepole ‘a ‘Isileli kiate au, ‘o pehē, Ko hoku nima ni kuo ne fakamo‘ui au."

Ne to e folofola ʻa Sihova kia Kitione, ʻo pehē, “‘Oku fu’u tokolahi fau ho’o kau sōtia´ ke lava ke U tuku atu ai ʻa Mitiani ki homou nima´; pea telia naʻa pōlepole ʻa Isileli ʻo pehē na’e tupu ha’anau ikuna mei he tokolahi ‘a e kau sōtia´, ko ia ai te ke fakatokosi’i ho’o kau sōtia´, ke sio ai ‘a Mitiani pea mo ‘Isileli pē foki he māfimafi ‘o Sihova´. Ko e koloa´ mo e tu’umālie´ ‘oku na fa’a takihee’i kitautolu ke tau pehē ‘oku tau lava pē ‘e kitautolu ‘ia kitautolu ‘o fai ha fa’ahinga me’a pē, koe’uhi´ he ‘oku tau ma’u ē mo ē. Mahu’inga ke to’o hotau mata´ meiate kitautolu mo ha fa’ahinga me’a pē he mamani´ ‘o ‘ai kakato ‘etau falala´ he ‘Otua´ tokotaha pē. Pea te tau ikuna leva ha fa’ahinga ta’au pē.

Lotu: Kole ki he ‘Otua´ ke Ne tokoni’i koe k e ke falala ‘Otua ma’u pē ‘i ho’o ako´, ‘i he sivi´, pehē ki ha ngaahi fe’auhi te ke kau ki ai.