Sapate 19 Novem, 2017

MO’UI IKUNA ‘I HE LAUMALIE MA’ONI’ONI´ 

Veesi Lauloto: 2 Timote 1:7

"He ko e Laumālie na’e foaki ‘e he ‘Otua´ kiate kitaua´, na’e ‘ikai ko e Laumālie 
angafo’i, ka ko e anga-mālohi, mo ‘ofa, mo valoki"

‘Oku ‘i ai nai ha me’a ‘oku ne fa’a ‘ai koe ke ke ongo’i manavahē mo ilifia fanau? Taimi ‘e ni’ihi, ‘okapau te te ta’etokanga ki he ‘Eiki’, ‘oku fa’a hanga ‘e he manavahee’ mo e ilifia’ ‘o ‘ai kita ke te fai ‘a e ngaahi tō’onga ‘oku ‘ikai taau ia ke fai ‘e he fanau ‘a e ‘Otua’.... ‘Oku ‘ikai ke finangalo ‘a e ‘Otua’ ke tau manavahē mo ilifia, ka ke tau tui mo falala ange kiate IA, he na’a NE fakatupu kitaua ‘i Hono ‘Imisi’, ko e ‘Imisi mo e mo’ui ia ‘oku to’a mo kaukaua. Pea ko Hono Laumālie’ ‘oku ‘iate kitaua’, ‘oku ‘ikai ko ha Laumālie ia ‘oku lotosi’i mo fo’ingofua, ka ko e Laumālie ia ‘oku mālohi mo to’a mo ‘ofa’i kitautolu mo fakanonga hotau loto’ ke ‘oua te tau hoha’a noa’ia. Pea ‘oku tu’u ai ‘etau mo’ui ikuna’, ikuna’i hotau ngaahi fili’ pehē ki hotau ngaahi manavahē’anga’

Lotu: Lotu ‘o kole fakamolemole ki he ‘Otua he taimi ‘oku ke fa’a tuku ki lalo ai ho ‘Otua’ ‘i ho’o fa’a manavahee ho fili’, ‘o ‘ikai ke ke to’a mo falala ki ho ‘Otua´.

Tokonaki 18 Novema, 2017

‘OKU MO’UI IKUNA MA’U PE ‘A IA ‘OKU FAILELEI´ 

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 26:25
"25Pea tali ‘e Saula kia Tēvita, ‘ofa ke ke monū‘ia, tama Tēvita: te ke fai me‘a lalahi, pea te ke lava foki. Pea fai atu ‘e Tēvita hono fononga, pea foki ‘a Saula ki hono potu."

Koe’uhi’ ko e loto fakamolemole ‘a Tevita’ mo ‘ene failelei’, ‘o ‘ikai te ne sāuni ha kovi ‘e taha kuo fai mai ‘e Saula kiate ia’, ne iku aipē ‘o tuku leva ‘e Saula ‘ene kumi ‘a Tevita ke fakapoongi’. ‘Oku mahu’inga ‘aupito ke ke ma’uloto ‘etau veesi lauloto’, Matiu 5:44, fanau, he ‘e tokoni lahi ‘aupito ia ke fakamanatu kiate kitautolu ‘a e mahu’inga ‘o e fakamolemole’i mo ‘ofa’i hotau fili’, ‘o ka tolotui mai ‘a e loto sauni’ ‘iate kitautolu. Pea ‘e tokoni’i koe ‘e he ‘Eiki’ ke ke fai’ofa ki ho fili’ ke fakahaa’i atu ai ‘a e ‘ofa ‘a e ‘Otua’. Pea ‘i ho’o fai pehee´, ‘oku fakamahino mai ai ko e tokotaha koe ‘oku ‘iate koe ‘a e loto ‘o Kalaisi’. ‘Io, ko e taha koe ‘i he fanau ‘a e ‘Otua’.... Falala ki he ‘Otua’ fanau, ke Ne solova ‘ete fefa’uhi mo e kakai ‘oku faikovi mai kiate kita’.

Lotu: Lotu ‘o kole ki he ‘Otua´ ke Ne tokoni’i koe ke ke falala ma’upe kiate IA,  ko Ia ia te Ne solova ho ngaahi faingata’a’ia’anga’, ‘oku ‘ikai ko koe.

Falaite 17 Novema, 2017

SAULA MO TEVITA

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 24:16-22
"16Pea ‘i he ‘osi leva ‘e Tēvita ‘ene fakatau folofola pehē kia Saula, pea pehē ‘e Saula, Ko ho le‘o koā ena, tama Tēvita. Pea ofa‘aki ‘e Saula ‘ene fākafoa. 17Pea ne pehē kia Tēvita, ‘Oku ke mā‘oni‘oni ange ‘iate au; he ko koe kuo ke fai lelei kiate au, ka u fai kovi ‘e au kiate koe. 18Pea kuo ke fakamahino he ‘aho ni ‘a e lelei ho‘o ngāue kiate au: he neongo ne tuku au ‘e Sihova ki ho nima, kae ‘ikai te ke tāmate‘i au. 19He ka ‘iloange ‘e ma‘u ‘e ha tangata hono fili, te ne tukuange lelei pē koā ke fai hono fononga? pea ‘ofa ke totongi lelei koe ‘e he ‘eiki koe‘uhi ko e me‘a kuo ke fai kiate au he ‘aho ni. 20Pea ko eni, tā kuo u ‘ilo kuo pau te ke tu‘i, pea ‘e ma‘u ‘a e pule‘anga ‘o ‘Isileli ‘i ho nima. 21Pea ko ia ke ke fuakava kiate au ‘ia Sihova, ‘Ilo ‘e koe, ‘o kapau te ke tu‘usi hoku hako ‘amui, pe tāmate‘i hoku hingoa mei he fale ‘o hoku tupu‘anga. 22Pea fuakava ‘a Tēvita kia Saula. Pea ‘alu ‘a Saula ki ‘api, ka ka ‘alu hake ‘a Tēvita mo ‘ene kau tangata ki he toitoi‘anga."

Ne tafoki mai ‘a Saula ‘o ne ui mai kia Tevita mo ‘ene fākafoa’, “Ko ho leʻo´ koā ena, Tevita? ʻOku ke māʻoniʻoni ange ʻiate au; he ko koe kuo ke fai lelei kiate au, kau fai kovi pe au kiate koe. Pea kuo ke fakamahino he ʻaho ni ʻa e lelei hoʻo ngaue’ kiate au: he neongo ne tuku au ʻe Sihova ki ho nima’, kae ʻikai te ke tamateʻi au. ‘Ofa ke totongi lelei koe ʻe he ʻEiki’ koeʻuhi’ ko e lelei mo e fakamolemole kuo ke fai kiate au he ʻaho ni’. Pea ko eni, ta kuo u ʻilo kuo pau te ke tuʻi, ko ia ai, ke ke fuakava mai mu’a kiate au ʻia Sihova, he’ikai te ke faka’auha hoku famili’, he taimi te ke hoko ai ko e tu’i’”. Pea fuakava ʻa Tevita kia Saula, pea na toki mātuku melino pē he ‘aho ko ia’.

Lotu: Lotu ‘o kole ki he ‘Otua´ ke Ne ngaohi koe ke ke hoko kiate IA ‘o lea mo’oni mo fai ki ho’o ngaahi palōmesi’.

Tu'apulelulu 16 Novema, 2017

FAKAMOLEMOLE'I HO FILI

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 24:8-15
"8Pea tu‘u ‘a Tēvita, ‘o muimui atu, ‘o ne hū kitu‘a mei he ‘ana, ‘o ne ui ange kia Saula ‘o pehē, ‘Ēī ‘a e ‘afiona! Pea ‘i he kilo ‘a Saula ki mui, na‘e tō fo‘ohifo ‘a Tēvita ki he kelekele, ‘o fai ‘ene faka‘apa‘apa. 9Pea fakatau folofola ‘a Tēvita kia Saula, Ko e hā ‘oku ke tokanga ai ki he lau ‘a e kakai, ‘o pehē, ‘Ē, ‘oku feinga ‘a Tēvita ke fai ha kovi kiate koe? 10Vakai, ko e ‘aho ni kuo me‘a ho fofonga ki he tuku koe ‘e Sihova he ‘aho ni ki hoku nima ‘i he ‘ana: pea na‘e lau ha ni‘ihi ke u tāmate‘i koe: ka u mamae‘i koe; pea u pehē, ‘E ‘ikai te u ala ki hoku ‘eiki, he ko e pani ‘a Sihova ia. 11Kae‘uma‘ā ke ke me‘a mai, ‘alā; vakai ‘a e kapa ‘o ho kofu ‘oku ou to‘o; he ko e me‘a ‘i he‘eku tu‘usi ‘a e kapa ‘o ho kofu, kae ‘ikai te u tāmate‘i koe, ke ke ‘ilo ai mo vakai ‘oku ‘ikai ha kovi pe ha pau‘u ‘iate au, pea kuo ‘ikai te u hia kiate koe, ka ko koe ‘oku ke tuli ki he‘eku mo‘ui ke pō ia. 12Ke fakamaau ‘e Sihova ‘i hota vaha‘a, pea ke sauni ‘e Sihova ma‘aku kiate koe; ka ‘e ‘ikai ala ki he ‘afiona ‘e hoku nima. 13‘O hangē ko e lau ‘a e paloveepi ‘a e kakai mu‘a, ‘Oku tupu ‘a e pau‘u mei he pau‘u; ka ko hoku nima ‘e ‘ikai ala atu. 14Ko e hā‘ele atu ‘a e Tu‘i ‘Isileli kia hai? Ko e hā ‘a e me‘a ‘oku tuli ki ai ‘a e ‘afiona? ko e kulī mate pē, ko e momo‘i kutufisi. 15Ko ia, tuku ‘a e fakamaau kia Sihova, pea ke ne fakamaau ‘i hota vaha‘a, ‘o vakai, ‘o taukapo‘i ‘eku me‘a, mo faka‘osi hoku fakamaau."

Ne taimi si’i pe kuo huu atu ‘a Saula ki tu’a pea tu’u ‘a Tevita ‘o muimui atu. Ne ui atu ‘a Tevita, pea tafoki mai ‘a Saula, “ ‘E ho’o ‘afio... Ko e hā kuo ke tui ai ki he ngaahi fakahū loi atu ‘a e kakai’ kiate koe ‘o pehē kuo u fa’ufa’u ha kovi ki he feitu’u na? Vakai mai ki he kapa ho kofu na, ne u tu’usi ia he lolotonga ho’o tōfā´ ke fakamo’oni atu ki he feitu’u na, ne vili ‘eku kau tangata’ ke mau fakapoongi koe, he kuo tuku mai ‘e Sihova ‘a e feitu’u na ki hoku ‘aofinima’, ka na’a ku fakahaofi pe koe, he na’e ‘ikai ke u loto ke mau ala ki he feitu’u na, he ko e pani koe ‘a Sihova.... ‘Oku ʻikai ha kovi pe ha pauʻu ʻiate au, pea kuo ʻikai te u hia kiate koe, ka ko koe ʻoku ke tuli ki heʻeku moʻui´.. Tuku ā ke fakamāu ʻe Sihova ʻi hota vahaʻa’, ka ʻe ʻikai ala ki he feitu’u na ʻe hoku nima´.” Tuku ke tau ako heni ‘a e mo’ui fakamolemole’ mo e ‘apasia’ fanau. 

Lotu: Lotu ‘o fakamālō ki he ‘Otua´ He’ene fa’a kātaki’i mo fakamolemole’i ‘etau ngaahi faiaangahala’ mo e fa’a tuku taimi ma’a tautolu´.

Pulelulu 15 Novema, 2017

FAKA'APA'APA KI HE PANI 'A SIHOVA

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 24:5-7
"5Pea hili ‘ene fai pehē na‘e tautea ‘a Tēvita ‘e hono loto, koe‘uhi kuo ne tu‘usi ‘a e kapa‘i kofu ‘o Saula. 6Pea ne pehē ki he‘ene kau tangata, Ko Sihova ē ha‘aku ofi ke fai pehē ki hoku ‘eiki ko e pani ‘a Sihova, ke ala hoku nima ki ai, he ko e pani ia ‘a Sihova. 7Ko ia na‘e ta‘ofi ‘e Tēvita ‘ene kau tangata ‘aki ‘a e ngaahi lea ko ē, ‘o ‘ikai te ne tuku ke nau tu‘u kia Saula. Pea tu‘u atu ‘a Saula mei he ‘ana, ‘o ne fai hono fononga."

Ne vili ‘ene kau sotia’ ke tuku ke nau tamate’i ‘e kinautolu ‘a Saula, ka na’e ta’ofi pe ‘e Tevita ‘o ne pehee atu, “‘Ikai ‘aupito! Na’a mo e tu’usi ko ‘eni e kapa hono kofu’, ne ‘ikai tonu mo ia ke u fai, he ko Saula’ ko e pani ia ‘a e ‘Otua’”. Tatau aipe, faikovi pe failelei ‘a Saula kiate ia’, kuopau pe ke kei faka’apa’apa ki ai, he ko e pani ia ‘a Sihova. Neongo ne ‘osi pani ‘e Samiuela ‘a Tevita ke ne hoko ko e tu’i ‘Isileli, ka na’e ‘osi mahino’i pe ‘e Tevita kuopau ke ne tatali pe ki he taimi ‘a e ‘Otua’. Kuopau ke ne kei faka’apa’apa’i pe ‘e ia ‘a Saula, he ko ia ‘a e tu’i lolotonga ‘o ‘Isileli’, tatau aipe pe ‘oku lahi feefee ‘ene faikovi kiate ia’. ‘Oku ‘ikai faingofua ke te tali mokomoko mo failelei kiate ia ‘oku faikovi mai’, ka ‘e tokoni’i kita he Laumalie Ma’oni’oni’ ke te lava pe.

Lotu: Lotu ‘o fakamālō ki he ‘Otua´ He’ene fakafonu ‘ofa ho loto’ ke ke kei ‘ofa  pe mo kataki’i ho fili’ he’ene ngaahi faikovi mai’.

Tusite 14 Novema, 2017

FAINGAMALIE KE SAUNI

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 24:4
"4Pea lea ‘a e kau tangata ‘a Tēvita kiate ia; Vakai, ko e ‘aho ē na‘e folofola ai ‘a e ‘Eiki kiate koe, ‘o pehē, Ko eni, te u tuku ho fili ki ho nima, ke ke fa‘iteliha kiate ia, Pea tu‘u ‘a Tēvita, ‘o tu‘usi fufū ‘a e kapa ‘o e kofu tōtōlofa na‘e ‘ia Saula."

‘I he vakai atu ‘a Tevita mo ‘ene kau tangata’, ki he hū mai ‘a Saula mo ‘ene kau tangata’, na’e ‘ikai kei mapuke ‘a e fiefia ‘a e kau tangata ‘a Tevita’, ‘o nau fafana atu kia Tevita, “Ko e ‘aho ‘eni na’a ke tali ki ai’. Ko ‘eni kuo ‘omi ‘e he ‘Otua’ ho fili’ kiate koe. Ko ho faingamalie ‘eni ke ke tamate’i ai leva ho fili’.” Ne ‘ikai loto pehē ‘a Tevita. Ka na’a ne tolotolo atu pe ‘o tu’usi ‘a e kapa ‘o e kofu ‘o Saula’, pea ne foki mai. ‘Oku fa’a ‘i ai pe taimi pehee fanau, ‘a e fa’a tolotui hake ‘iate kita ‘a e loto ke sauni ‘a e faikovi mai ha taha. Ka ‘oku ‘ikai finangalo pehee ‘a e ‘Otua’, he ‘oku fakahaa’i ai ‘oku ‘ikai ke tau falala ke tuku ‘etau ngaahi me’a’ kiate IA ke Ne solova mai ‘i He’ene founga’, mo Ne ‘omi e leleitaha’ ma’ata. Ko e fekau ia ‘oku ‘omi he’etau veesi lauloto.

Lotu: Lotu ‘o fakamālō ki he ‘Otua´ He’ene fa’a fakamanatu ma’upe ‘a e lelei’ kiate koe, he taimi ‘oku ‘alu hake ai e loto ke ke fai angahala’ .

Monite 13 Novema, 2017

KUMI ‘E SAULA ‘A TEVITA KE TAMATE’I

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 24:1-3
"1PEA hili ‘a e foki ‘a Saula mei he muimui ki he kau Filisitia, na‘e fakahā kiate ia, ‘o pehē, Tokua ko Tēvita ‘oku ‘i he Toafa ‘o ‘Eniketi. 2Pea ‘ave ‘e Saula ha toko tolu afe na‘e fili mei ‘Isileli kātoa, pea ne ‘alu ke kumi ‘a Tēvita mo hono kakai, ‘i he fonua maka ‘o e fanga kosi kaivao. 3Pea ne a‘u ki he ngaahi loto‘ā sipi ‘i he hala, pea na‘e ‘i ai ha ‘ana, pea hū ki ai ‘a Saula ke fakafiemālie: ka ‘oku nofo ‘a Tēvita mo ‘ene kau tangata ki he mui ‘ana."

‘I he ‘osi pe fakamavae mo e fe’iloaki faka’osi ‘a Tevita mo Sonatane’, ne hola holo aipe ‘a Tevita mo ‘ene kau tangata ‘e meimei toko 600 meia Saula ‘o ne toi mo unga he ngaahi feitu’u kehekehe. Ne nau toi ‘eni ‘i he taha ‘o e ngaahi ‘ana he toafa ‘o ‘Eniketi’. Ko e feitu’u lelei ‘eni ki he toitoi’, he na’e lahi hono ngaahi ‘ana’, pea ‘i ai foki mo e ngaahi ‘ana lalahi ‘i ai ke nau hao tokolahi ‘i ai… Ne a’u atu e tala kia Saula, ‘a e toi ‘a Tevita mo ‘ene kau tangata’ ‘i he toafa ‘o ‘Eniketi’, ko ia ne tu’u leva ‘a Saula ‘o ne ‘alu mo e toko 3,000 ke kumi kia Tevita ke tamate’i. Ne afe atu ‘a Saula ‘o ma’u mālōlō he taha ‘o e ngaahi ‘ana’, hala ke ne ‘ilo’i ko e ‘ana ia ‘oku lolotonga toi ai ‘a Tevita mo ‘ene kau tangata’, ka ‘oku nau ‘i mui ‘i he ‘ana’. ‘Ikai ha me’a ‘e hoko noa fanau.

Lotu: Lotu ‘o fakamālō ki he ‘Otua´ He’ene malu’i koe mei he ngaahi fokotu’utu’u kovi ‘a e fili’, mo ‘Ene tataki hao ho’o fononga’ ma’upe.

Sapate 12 Novema, 2017

‘OFA’I MO FKMOLEMOLE’I KINAUTOLU ‘OKU FAIKOVI MAI

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

‘I he taimi ne pule’i ai ‘e Loma ‘a e kau Siu’, ne fakana’una’u e kau Siu’ ia ki ha Mīsaia ‘e ha’u ‘o taki tau ke taa’i ‘a Loma. Ka na’e ‘ikai pehee finangalo ia mo e palani fakamo’ui ‘a e ‘Otua’. ‘Uhinga ia ‘o e ‘ikai ke nau tali ‘a e hoko mai ‘a Kalaisi’. Nau fehi’a ki Loma, pea nau loto ke sauni, kae talamai ‘e Sisu ia ‘i he’etau veesi lauloto’, kuopau ke tau ‘ofa’i mo hufia hotau ngaahi fili’, ‘a kinautolu ‘oku nau fakatanga’i kitautolu’. Ko e founga fo’ou’ ia, ‘oku ‘ikai ko e sauna mo totongi tuha ‘a e faikovi mai’, ka ko e totongi ‘aki ‘a e lelei’ ‘a e ngaahi faikovi mai’. He ‘i he’etau fai e akonaki ko ia kuo ‘omi ‘e Kalaisi’, ‘oku tau fakahaa’i atu ai ki mamani, ko Kalaisi ‘oku Pule mo ‘Eiki ‘i he’etau mo’ui’… Ko e fekau faingata’a, ka ko kinautolu ‘oku ‘o Kalaisi’, ‘e malava p eke fai.

Lotu: Lotu ‘o kole ki he ‘Otua´ ke Ne tokoni’i koe ke ‘oua te ke fiu he failelei’, neongo e tanunu mai ho mgaohikovia’ mo fakatanga’i.

Tokonaki 11 Novema, 2017

FETĀNGIHI ‘A TEVITA MO SONATANE’

Veesi Lauloto: 'Efeso 4:24

"Pea ke mou kofu’aki ‘a e tangata fo’ou, ‘a ia na’e ngaohi ke hoko ki he ‘Otua, ‘i he angatonu mo e ma’oni’oni ‘a Mo’oni
"

1 Samiuela 20:35-42
"35Pongipongi hake na‘e hū kitu‘a ‘a Sonatane ki he vao, ki he potu kuo na tālanga ki ai mo Tēvita; pea ‘alu mo ia ha tamasi‘i. 36Pea ne pehē ki he‘ene tama, Lele, ‘o kumi mai ‘a e ngaahi ngahau ‘oku ou fana‘i. Lele ‘a e tama, ka ne fana‘i fakalaka ‘a e ngahau ‘iate ia. 37Pea ‘i he a‘u ‘a e tama ki he potu ‘oku ‘i ai ‘a e ngahau kuo ne fana‘i, pea kalanga atu ‘a Sonatane ki he tama, ‘o pehē, ‘Ikai, ‘oku ‘i kō atu ‘a e ngahau. 38Pea kalanga atu ‘e Sonatane ki he tama, Ngaue, fai vave, ‘oua ‘e tatali. Pea tufi ‘e he tama ‘a e ngaahi ngahau, ‘o ne ‘omi ki hono ‘eiki. 39Pea ko e tama na‘e ‘ikai te ne ‘ilo ha me‘a: ngata ‘ia Sonatane mo Tēvita na‘a na ‘ilo hono ‘uhinga. 40Pea ‘ange ‘e Sonatane ‘ene nāunau ki he‘ene tama, ‘o ne pehē ki ai, ‘Alu, ‘o ‘ave pē ki kolo.
41Pea kuo ‘alu ‘a e tama, pea tu‘u ‘a Tēvita mei he tafa‘aki ‘esi, ‘o ne tō fo‘ohifo, ‘o faka‘apa‘apa tu‘o tolu: ‘o na fekita, mo fetāngihi, pea faifai pea hulu ‘a Tēvita. 42Pea pehē ‘a Sonatane kia Tēvita, ‘alu fiemālie pē, he kuo ta fuakava kitaua ‘i he huafa ‘o e ‘Eiki, ‘o pehē, Ko Sihova te ne ‘i hota vaha‘a, pea ‘i he vaha‘a ‘o hota hako, ‘o ta‘engata. Pea ne tu‘u ‘o ‘alu; ka ka hū ‘a Sonatane ki kolo." 

Ne ‘alu atu leva ‘a Sonatane ki he potu na’a na alea mo Tevita, te ne fana’i ai 
‘a e ngahau’, ke ‘ilo ‘e Tevita pe ‘oku ‘ita ‘a Saula pe lotolelei ange kiate ia. 
Na’a ne fana’i e ngahau’ ki koo atu he fokotu’unga maka’, pea ‘alu ‘a e tama’ 
‘o ‘omi, pea tukuange ia ‘e Sonatane ke ne ‘alu. Pea toki ha’u ‘a Tevita ʻo ne tō 
foʻohifo, ʻo fakaʻapaʻapa tuʻo tolu kia Sonatane. Na’a na toki fe’iloaki mo e 
fetangihi lahi. Pea toki lea atu ʻa Sionatane kia Tevita, “ ʻAlu fiemālie pē, he 
kuo sila’i kitaua ʻi he huafa ʻo e ʻEiki’, pea ko Sihova te Ne ʻi hota vahaʻa´, pea 
ʻi he vahaʻa ʻo hota hako’ ʻo taʻengata”. Neongo na’e ‘osi ‘ilo’i pe ‘e Sonatane 
‘e mole ‘a e tu’unga tu’i’ meiate ia kia Tevita, ka na’e ma’olunga ange ‘ene 
manavahee ki he ‘Otua’ mo ‘ene ‘ofa kia Tevita’.

Lotu: Lotu ‘o kole fakamolemole ki he ‘Otua´ ho’o fa’a faihala koe’uhi’ ko ho’o manavahee ki he tangata’ kae ‘ikai manavahee ki he ‘Otua’…

Pulelulu 11 'Okatopa, 2017

SAULA - ‘ULUAKI TU’I ‘ISILELI´

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

1 Samiuela 9:27
"27Fe‘unga mo e ō hifo ‘a e ongo me‘a ‘i he taupotu ‘o e kolo, pea pehē ‘a Sāmiuela kia Saula, Tala ki he talavou ke ne mu‘omu‘a atu (pea ne laka atu); ka ke tu‘u si‘i pē koe, ka u ongoongo kiate koe ‘a e folofola ‘a e ‘Otua." 
Ko e kau tu’i ‘Isileli’ kuopau ke hilifaki kalauni kinautolu, ‘a ia ko e ouau fakapule’anga’ ia. Pea kuopau pe ke pani pe fakatāpui kinautolu ‘e ha palōfita pe ko ha taula’eiki, ‘a ia ko e ouau fakalotu’ ia. Ko e lolo na’e ngaue’aki’ ko e lolo ‘olive na’e fefiohi mo e mula mo e ngaahi sipaisi mahu’inga kehekehe. Pea na’e hua’i e lolo’ he ‘ulu ‘o e tu’i’, ko e faka’ilonga ‘o e fakamalumalu mo e mafai ‘o e Laumalie Ma’oni’oni ‘o e ‘Otua’ ‘i he mo’ui ‘a e tu’i’. ‘Oku tokoni ‘a e ouau ‘o e pani’ mo e fakatāpui’ ke fakamanatu ki he tu’i’ ‘a e mahu’inga hono fatongia’, kuopau ke ne taki ‘a e kakai ‘a e ‘Otua’ ‘aki ‘a e poto mo e finangalo ‘oe ‘Otua’, ‘o ‘ikai ‘aki ‘ene fakakaukau pe ‘a’ana. Ne talaange foki ‘e Samiuela mo e faka’ilonga ‘e 3 ke ne fakapapau’i ‘aki ‘a hono fili ia ‘e he ‘Otua’.

Lotu: Lotu 'o fakamālō ki he ‘Otua´ He’ene ‘ofa’i koe neongo ho’o fa’a
ta’emahino’ mo ho’o fa’a faifailoto’.

Tusite 10 'Okatopa, 2017

‘INASI ‘O E TU’I

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

1 Samiuela 9:18-26
"18ko eni ia te ne pule‘i hoku kakai. Pea ‘unu‘unu ‘a Saula kia Sāmiuela ki he matanikolo, ‘o ne pehē, Fakamolemole ka ke tala mai pe ko e fē ‘a e fale ‘o e matalōloa.
19Pea tali ‘e Sāmiuela kia Saula, ‘o pehē, Ko au ‘a e matalōloa; mu‘omu‘a hake koe ki he sia, he te tau tokoni mo au he ‘aho ni; pea te u tuku atu koe ‘apongipongi, pea te u tala ‘a e me‘a kotoa ‘oku ‘i ho loto. 20Pea ko e me‘a ki ho‘o fanga ‘asi na‘e mole, ko hono ‘aho tolu eni, ‘oua te ke lotomo‘ua ai; he kuo ‘iloa. Pea ko hai ‘oku fai ki ai ‘a e manako ‘a ‘Isileli? ‘Ikai kia koe, mo e fale kotoa ‘o ho‘o tamai?
21Pea tali ‘e Saula, ‘o ne pehē, ‘ikai ko e Penisimani au, ‘o kau ki he si‘i taha ‘i he ngaahi matakali ‘Isileli? Pea ko hoku fāmili ko e kihi‘i si‘i ‘i he ngaahi fāmili ‘o Penisimani? ko e hā ‘oku ke lea pehē ai kiate au?
22Pea ‘ave ‘e Sāmiuela ‘a Saula mo ‘ene talavou, ‘o ne fakahū ki he falekai, ‘o ne tuku kinaua ki he potu ‘oku ‘i ai ‘a e tu‘ukimu‘a ‘o e kakai kuo tala, ‘a ia na‘a nau toko tolungofulu nai. 23Pea pehē ‘e Sāmiuela ki he ngaohi kai, ‘omi ‘a e ‘inasi na‘a ku tuku kiate koe, ‘a ia na‘a ku pehē ai kiate koe, ‘Ave ia ‘o tauhi pē. 24Pea hiki ‘e he ngaohi kai ‘a e tefito alanga, mo e me‘a na‘e kau ai, ‘o ne tuku ‘i he ‘ao ‘o Saula. Pea ne  ki ai, Ko eni ‘a e me‘a na‘e ta‘ofi! tuku ‘i ho ‘ao ‘o tokoni; he na‘e ta‘ofi ma‘au ki he fe‘iloaki, he‘eku pehē, Kuo u tala ‘a e kakai.9.24 he na‘e ta‘ofi… kakaí. ‘Oku ‘ikai ke mahino faka-Hepeluú, ka ‘oku ngali tonu hono hiki ‘o na‘á ku ta‘ofi ke mou ma‘u fakataha mo e kakai na‘á ku fakaafe‘í. Ko ia, na‘e taumafa ‘a Saula mo Sāmiuela ‘i he ‘aho ko ia.
25Pea kuo nau ō hifo mei he sia ki he kolo, pea ne talanoa mo Saula9.25 peá ne talanoa mo Saula; Ko hono faka-Hepeluú ia, ka ‘oku pehē he hiki fuoloa ‘e taha pea nau teuteu e mohe‘anga mo‘o Saula.  ‘i he tu‘a fale.  26Pea na tutu‘u hengihengi: pea fe‘unga mo e fakalau hake ‘a e ‘ata, na‘e ui ‘e Sāmiuela kia Saula ‘i he tu‘a fale, ‘o pehē, Tu‘u, ka u moimoi koe. Pea tu‘u ‘a Saula, pea na fakatou hū ki tu‘a, ‘a ia mo Sāmiuela." 

Ne fakaafe’i ‘e Samiuela ‘a Saula ke na kai, mo ne fakamatala kia Saula ʻa e meʻa kotoa ʻoku ʻi hono loto’. Talaange ‘e Samiuela kuo ‘osi ma’u e fanga asi ia naʻe mole’, ‘osi ‘eni e ʻaho tolu mei ai. ‘I he’enau hū atu ki he falekai´, ʻo ne tuku kinaua ki he potu ʻoku ʻi ai ʻa e tuʻukimuʻa ʻo e kau fakaafe’, ʻa ia naʻa nau toko tolungofulu nai. Pea toki fekau atu ʻe Samiuela ke ‘omai ‘a e ʻinasi naʻa ne fekau ke tuku’, ʻo ne tuku ʻi he ʻao ʻo Saula´. Ko ia naʻe taumafa ʻa Saula mo Samiuela ʻi he ʻaho ko ia’. Pea na toki tu’u hengihengi hake mo e sevaniti’ ke foki… Na’e ui ‘e he ‘Otua’ ‘a Saula ke pani ia ke ne hoko ko e fuofua tu’i ‘Isileli’, ka na’e ‘ikai ke kakato ki nai e loto ia ‘o Saula’ ke ne mahu’inga’ia, pea iku ai ‘amui ‘o mate, mole hono faingamalie’.

Lotu: Lotu o kole ki he ‘Otua´ ke Ne tokoni’i koe ke mahu’inga’ia he ma’u ho Fakamo’ui’…. Pea ke Ne tanumaki ho’o tui’ ke ke hoko ko e kalisitiane malohi.

Monite 9 'Okatopa, 2017

TANGATA MEI HE HA’A PENISIMANI

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

1 Samiuela 9:14-17
"14Pea na ō hake ki he kolo: fe‘unga mo e hū ‘a e ongo me‘a ki loto kolo, tā ko Sāmiuela ena ‘oku hū ki tu‘a ke fakafetaulaki kiate kinaua, ke ‘alu hake ki he sia. 15Pea kuo fafana ‘e he ‘Eiki kia Sāmiuela ‘i he ‘aho ‘e taha kae ha‘u ‘a Saula ‘apongipongi, ‘o pehē, 16Fe‘unga mo e houa ni ‘apongipongi, te u fekau atu kiate koe ha tangata mei he fonua ‘o Penisimani, pea te ke pani ia ke ‘eiki ki hoku kakai ‘Isileli, pea te ne fakahaofi hoku kakai mei he nima ‘o e kau Filisitia: he kuo u vakai hoku kakai, koe‘uhi kuo a‘u kiate au ‘enau tautapa. 17Pea ‘i he vakai ‘e Sāmiuela ‘a Saula, pea tali ‘e Sihova, Ko eni ‘a e tangata na‘a ku lea ai kiate koe!"

Ne ‘osi tala tōmu’a pe he ‘Otua’ kia Samiuela ‘e ha’u ‘a e tangata mei he fonua ‘o Penisimani’ ‘o kumi mai kia Samiuela, pea ko ia ia ‘a e tokotaha ‘e pani ‘e Samiuela ke ne hoko ko e tu’i ki ‘Isileli’. Pea ‘i he’ena hū atu ki he ko!o´, tā ko Samiuela ‘ena ʻoku hū mai ki tuʻa ke fakafetaulaki kiate kinaua. Pea ʻi he vakai ʻe Samiuela ʻa Saula’, ne fafana ʻe he ʻEiki´ kia Samiuela ‘o pehee, “Ko eni ʻa e tangata naʻa Ku lea ai kiate koe! ko ‘eni ia te ne pule ʻi Hoku kakai’.” Kuo ongo kia Sihova ‘a e tautapa ‘a ‘Isileli’, pea neongo ko ‘enau tangi ke ‘ai hanau tu’i’, ko ‘enau situ’a ia mei he’enau tu’i ‘aki ‘a Sihova’, ka na’e ‘ikai pe tuku ‘a e tulimui mai 'Ene ‘ofa’, ‘o Ne finangalo pe ke Ne kei kau he leva’i mai honau tokanga’i’ mo honau tataki’, ‘o kau ai e fili honau tu’i’.

Lotu: Lotu ‘o kole ki he ‘Otua´ ke Ne fakamolemole’i ho’o fa’a ‘ohomu’a ke
fakalele ho’o mo’ui´, mo ho’o fa’a fiepoto ki He’ene taki ho’o fononga’.

Sapate 8 'Okatopa, 2017

SAMIUELA – TANGATA ‘A ‘ELOHIMI

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

1 Samiuela 9:4-10
"4Pea ne ‘asi atu ‘i he fonua mo‘unga ‘o ‘Ifalemi, pea ne ‘asi atu ‘i he fonua ko Sālisa, kae ‘ikai ‘iloa: pea na ‘alu atu ‘i he fonua ‘o ha‘a Sā‘ali, kae ‘ikai: pea na ‘asi atu ‘i he fonua ‘o ha‘a Penisimani, kae ‘ikai te na ‘ilo ai. 5Pea kuo na a‘u ki he fonua ko Sufi, pea pehē ‘e Saula ki he‘ene talavou na‘a na ō, Ha‘u ā ke ta foki; na‘a tuku ‘e he tangata‘eiki ‘ene tokanga ki he fanga ‘asi, ka ne hoha‘a ‘iate kitaua. 6Pea tali ‘e ia, ‘Oua koā, tokua ‘oku ‘i ai ha tangata ‘o ‘Elohimi ‘i he kolo ni, pea ko e toko taha ‘oku lahi hono tokanga‘i; ‘ilonga ha‘ane lea kuo pau ke hoko: ta ō mu‘a ki ai; hei‘ilo te ne tala kiate kitaua ‘a e hala ke ta fou ai. 7Pea lea ‘a Saula ki he‘ene talavou, Ka ko eni, kapau te ta ō ki ai, ko e hā te ta ō mo kitaua ki he matāpule? he kuo ‘osi ‘a e me‘akai ‘i he‘eta ‘angame‘a, pea ‘oku ‘ikai ha me‘a‘ofa ke ‘atu ki he tangata ‘o ‘Elohimi: ko e hā ha‘ata me‘a ‘oku ma‘u? 8Pea toe tali hake ‘e he talavou kia Saula, ‘o pehē, Tā ‘oku toe ‘iate au ‘a e vahe-faa‘i sikeli siliva: pea te u ‘atu ia ki he tangata ‘o ‘Elohimi ka ne fakahinohino hota hala. 9(‘I he taimi mu‘a ‘i ‘Isileli, ka ‘alu ha tangata ke huhū ki he ‘Otua, na‘e pehē ‘ene lau, Ha‘u ange ke tau ō ki he matalōloa: he ko e palōfita ‘o onopooni na‘e ui mu‘a ko e matalōloa.) 10Pea pehē ‘e Saula ki he‘ene talavou, ‘Oku lelei ho‘o lea; ha‘u ke ta ō. Ko ia na‘a na ō ki he kolo ‘oku ‘i ai ‘a e tangata ‘o ‘Elohimi."

Ne na fiu kumi e fanga ‘asi´ mo e ‘ikai pe ke ma’u, pea loto ‘a Saula ia ke na foki ā, kae vili ‘a e sevāniti´ ke na afe atu he kolo´, he ‘oku nofo ai ‘a e tangata ‘a ‘Elohimi´ ke ne tokoni ange na’a lava ke ne talaange ‘a e feitu’u ‘oku ‘i ai e fanga ‘asi´, he ‘oku ʻilonga haʻane lea kuo pau ke hoko: heiʻilo te ne tala kiate kinaua ʻa e hala ke na fou ai´. Ko ia naʻa na ō leva ki he kolo ʻoku ʻi ai ʻa e tangata ʻo Elohimi´. Neongo ‘enau nofo kolo kehekehe’, ka na’a nau nofo kotoa pe he Vahefonua ‘o ha’a Penisimani’. Mahino mei he ‘ikai maheni ‘a Saula mo Samiuela’, ‘a e ‘ikai mahu’inga’ia ‘a Saula he me’a faka’Otua´…. Pea ‘e toki ‘ilonga ia he ‘amui ‘o ‘ene fononga’… Fanau, tauange ke tau ngaue’aonga’aki ha ngaahi faingamalie kuo tau ma’u, ke fai Hono finangalo’.

Lotu: Kole ki he ‘Otua´ fānau, ke Ne tokoni’i koe ke ‘oua te ke va’inga’aki e ‘ofa ‘a e ‘Otua’, ka ke fakahounga’i ke fai pe Hono finangalo’.

Tokonaki 7 'Okatopa, 2017

SAULA – FOHA ‘O KISI, MEI HA’A PENISIMANI

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

1 Samiuela 9:1-3
"1PEA na‘e ai ha matāpule Penisimani ko hono hingoa ko Kisi, ko e foha ‘o ‘Apieli, foha ‘o Sīloli, foha ‘o Pekolate, foha ‘o ‘Āfaia, ko e hako‘i Penisimani, ko e tangata koloa‘ia lahi. 2Pea na‘e ai hono foha na‘e hingoa ko Saula, ko e talavou pea toulekeleka; pea na‘e ‘ikai ha tangata ‘i ha‘a ‘Isileli na‘e toulekeleka ange: ko hono uma ‘o fai ki ‘olunga na‘e hopo hake ‘i he kakai kotoa. 3Pea na‘e mole ‘a e fanga ‘asi fefine ‘a Kisi ko e tamai ‘a Saula. Pea lea ‘a Kisi ki hono foha ko Saula, ‘ave mu‘a ha taha ‘o e kau talavou, pea ke tu‘u ‘o ‘alu ‘o kumi ‘a e fanga ‘asi."

Ne ‘i ai ha matapule koloa’ia, hako’i Penisimani ko Kisi, ne ‘i ai hono foha kaukaua mo talavou ko Saula. Ne fekau atu ‘e Kisi ‘a Saula mo ha sevaniti ke na ō ‘o kumi mai ‘ene fanga ‘asi fefine ne mole. Ko e fanga ‘asi´ ko e fanga monumanu ‘aonga ‘aupito ki he fetukutuku mo toho ha ngaahi uta mamafa, pehee foki ki he ngaue’aki he ngaahi ngaue kehekehe he ngoue’anga’. Na’e a’u ki he ngaahi family masiva’, ne mahu’inga ‘aupito ke ‘i ai ha’anau ki’i ‘asi, pea ko ia ‘oku lahi ‘ene fanga ‘asi’ ko e faka’ilonga ia ‘o e taha mo’umo’ua, ‘o hangee ko Kisi’, ‘a e tamai ‘a Saula’. Tau sio fanau ki he palani ‘a e ‘Otua’,‘oku ‘ikai ha me’a ia ‘e hoko noa. Hoko e mole ‘a e fanga ‘asi’ ke ‘alu ai ‘a Saula ‘o kumi, pea a’u ai kia Samiuela, ‘o pani ai ia ke ne tu’i ‘Isileli.

Lotu: Lotu ‘o fakamālō ki he ‘Otua´ He’ene fa’a fokotu’utu’u mo palani ma’upe ‘a e lelei taha’ ma’au ke ke iku ai ki Hevani.

Falaite 6 'Okatopa, 2017

SITU’A MEIA SIHOVA

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

1 Samiuela 8:21-22
"21Pea ongona ‘e Sāmiuela ‘a e ngaahi lea kotoa ‘a e kakai, ‘o ne ‘a‘au ‘i he fofonga ‘o Sihova. 22Pea folofola ‘a Sihova kia Sāmiuela, Fakaongo pē ki he‘enau lea, ‘o fakanofo hanau tu‘i. Pea pehē ‘e Sāmiuela ki he kau tangata ‘Isileli, takitaha ‘alu ki hono kolo."

Ne ‘a’au ‘e Samiuela ki he ‘Otua ‘a e ngaahi lea kotoa pe ‘a e kakai’, pea folofola ai ‘a e ‘Otua’ kia Samiuela ke ‘alu leva ‘o fakanofo hanau tu’i. Mahu’inga ke tau matu’aki tokanga fanau, he taimi ‘oku tau fu’u fiema’u vivili ai ha me’a, ke tau fakapapau’i ‘aupito pe ko e finangalo ia ‘o e ‘Otua’ pe ‘ikai. He ko e taimi lahi ‘oku kuihi kitautolu he’etau fiema’u’, pea ‘ikai ke tau sio ai ‘o ‘ilo’i ‘a e ngaahi palopalema ‘e ala hoko ‘amui ‘i he me’a ko ia’. Tau siofi e ngaahi tafa’aki kotoa pe, hono lelei mo hono kovi, pea tau tekaki ki he ‘Otua’ ‘i he hūfia, pea tau tui ko e tali lotu ‘a e ‘Otua´, ko e me’a te Ne ‘omi’, ko e lelei taha ia ma’ata’… Ko e fanau ‘a e ‘Otua’ ‘oku nau falala kakato ki Hono finangalo’, mo ‘Ene palani ma’a nautolu’.

Lotu: Lotu ‘o kole ki he ‘Otua´ ke Ne fakamakalohi ho’o tui’, ke ke tu’uma’u mo fakamo’oni malohi Ma’ana.

Tu'apulelulu 5 'Okatopa, 2017

FAILOTO ‘A ‘ISILELI’

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

1 Samiuela 8:10-20
"10Pea na‘e tala ‘e Sāmiuela ‘a e ngaahi folofola kotoa ‘a Sihova ki he kakai na‘e kole ha tu‘i meiate ia. 11Pea ne pehē, Ko eni ‘a e konisitūtone ‘a e tu‘i te ne pule kiate kimoutolu; te ne to‘o ho‘omou fānau tangata, ‘o fokotu‘u ke fai lakanga ma‘ana, ki he‘ene ngaahi sāliote, pea ki he‘ene ka‘ate heka hoosi; pea te nau lele mu‘omu‘a ‘i he‘ene ngaahi sāliote: 12pea te ne tu‘utu‘uni ma‘ane hou‘eiki tau, ke pule ki he toko‘i afe mo e toko‘i nimangofulu; pea ke huo ‘ene ngoue‘anga, pea ke utu hono ta‘u, pea ke ngaohi ‘a e nāunau ‘o e tau mo e nāunau ‘o e sāliote. 13Pea te ne to‘o ho‘omou fānau fefine ma‘ane kau fai lolo, pea ma‘ane kau ngaohi kai, pea ma‘ane kau ta‘o mā. 14Pea te ne to‘o homou ngaahi konga vao, mo ho‘omou ngaahi vaine, mo ho‘omou ngaahi ngoue ‘ōlive, ‘a honau lelei, ‘o foaki ki he‘ene kau tamaio‘eiki. 15Pea te ne to‘o ‘a e vahehongofulu ‘o ho‘omou pulopula, pea mo ho‘omou ngoue vaine, ‘o foaki ki he‘ene kau ‘iunoke mo ‘ene kau tamaio‘eiki. 16Pea te ne to‘o ho‘omou tamaio‘eiki, mo ho‘omou kau kaunanga, mo e lelei ‘o ho‘omou fanga pulu,8.16 fanga pulu: ‘Oku pehē ‘a e hiki fuoloa ‘e taha, ka ko hono faka-Hepeluú, ko e kau talavou. mo ho‘omou fanga ‘asi, ‘o ngāue‘aki ‘i he‘ene me‘a ‘a‘ana– 17‘a e vahehongofulu ‘o ho‘omou fanga sipi mo e kosi: pea ko kimoutolu te mou tamaio‘eiki kiate ia. 18Pea te mou tautapa ‘i he ‘aho ko ia, koe‘uhi ko e tu‘i na‘a mou fili ma‘amoutolu; kae ‘ikai tali kimoutolu ‘e he ‘Eiki ‘i he ‘aho ko ia. 19Ka ka ‘ikai fie fanongo ‘e he kakai ki he lea ‘a Sāmiuela; pea nau pehē, ‘Ikai; ka kuo pau ke ‘ai hatau tu‘i; koe‘uhi foki ke tau tatau mo e pule‘anga kotoa pē; 20pea ke fai fakamaau ma‘atautolu ‘e hotau tu‘i, pea ke ne taki kitautolu, ‘o angi ‘i he‘etau ngaahi tau. "

Ne fakahā leva ‘e Samiuela ‘a e folofola ‘a e ‘Otua’ ki he kakai’, ‘o ne fakamatala ‘a e ngaahi me’a kotoa pē ‘e hoko he taimi ‘e pule ai ‘a e tu’i´, te ne ngaue’aki ‘enau fanau’ ki he ngaahi lakanga kehekehe ke ngaue ma’ana, pehee ki he’enau kau sevāniti’, te ne ‘ave ‘enau ngaahi fangamanu’ pehee ki he’enau ngoue’, mo ‘enau ngaahi polopolo’… pea ‘e ‘i ai e ‘aho ‘e ngaahi kovi’i kinautolu ‘e honau tu’i’, pea te nau tautapa ʻi he ʻaho ko ia´ kia Sihova, ka ‘e ʻikai tali kinautolu ʻe he ʻEiki’ ʻi he ʻaho ko ia´. Ka ka ʻikai pe fie fanongo ʻe he kakai’ ia ki he lea ʻa Samiuela´; nau vilitaki pe ke ‘ai hanau tuʻi; koeʻuhi’ ke nau tatau mo e puleʻanga kotoa pē; pea ke fai fakamāu maʻa nautolu ʻe honau tuʻi’, pea ke ne taki kinautolu, ʻo angi ʻi heʻenau ngaahi tau´.

Lotu: Lotu ‘o kole ki he ‘Otua´ ke Ne tokoni’i koe ke ‘oua te ke fa’a vili kikihi ke fai ho ki’i loto’, ka ke fakaongoongo mo talangofua.

Pulelulu 4 'Okatopa, 2017

OANGE ME’A ‘OKU NAU KOLE

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

1 Samiuela 8:6-9
"6Ka na‘e hā kovi kia Sāmiuela ‘a e me‘a, ‘a ‘enau pehē, ‘Omi hatau tu‘i ke fakamaau kitautolu. Pea lotu ‘a Sāmiuela kia Sihova. 7Pea folofola ‘a Sihova kia Sāmiuela, Fakaongo ki he lea ‘a e kakai ‘i he me‘a kotoa kuo nau lea‘aki kiate koe: he ‘oku ‘ikai ko koe kuo nau li‘aki, ka kuo nau li‘aki au mei he nofo ko honau tu‘i. 8Ko e anga ai pē ia ‘o e me‘a kotoa kuo nau fai, mei he ‘aho na‘a ku ‘ohake kinautolu mei ‘Isipite, ‘o a‘u ki he ‘aho ko eni, ‘a ‘enau li‘aki au, mo tauhi ‘otua kehe, kuo pehē foki ‘enau fai kiate koe. 9Pea ko eni ke ke fakaongo ki he‘enau lea; ngata pē te ke mātu‘aki na‘ina‘i kiate kinautolu, ‘o hīnoi‘i kinautolu ‘a e konisitūtone ‘o e tu‘i te ne pule kiate kinautolu."

Ne taukovi ‘aupito kia Samiuela ʻa e meʻa kuo ha’u mo ia ‘a e kau matu’a ‘Isileli’, ko ia na’a ne lotu kia Sihova, pea fakahā mai ‘e he ‘Otua´ kia Samiuela ke tali ‘enau kole´, kehe pē ke ne mātuʻaki fakatokanga kiate kinautolu, ʻo fekau’aki mo e fa’ahinga lao mo konisitutone ʻo e pule’anga faka-tuʻi´…. Ko hono mo’oni’ kuo nau fakavaivai ki he angahala’, pea kuo nau li’aki ‘a Sihova. Kuo nau fiema’u ke pule’i tangata pe kinautolu, neongo ne ‘ikai puli meiate
kinautolu ko ‘enau ngaahi ikuna he tau’, ne ‘ikai tu’u ‘i honau tokolahi’ pe ko honau ivi’, ka ko e māfimafi pe ‘o Sihova’. Ko Sihova na’a Ne taki mai kinautolu mei ‘Isipite’, fafanga kinautolu he toafa’, pea tau’i mo Kenani kae lava ke nau nofo ai. Ko Sihova tokotaha pē.

Lotu: Lotu ‘o kole ki he ‘Otua´ ke Ne foaki ma’au ha laumalie tokanga ke ‘oua te ke aafe noa he ngaahi fakatauvele´ ka ke nofoma’u he ‘Eiki’ ma’upe....

Tusite 3 'Okatopa, 2017

FIEMA’U ‘E ‘ISILELI HANAU TU’I

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

1 Samiuela 8:4-5
"4Pea toki fakataha mai ‘a e kau mātu‘a ‘o ‘Isileli, ‘o nau a‘u kia Sāmiuela ki Lama; 5pea nau pehē kiate ia, Ko eni ‘oku ke motu‘a, pea ko ho‘o fānau ‘oku ‘ikai te nau fou ‘i ho ngaahi founga: ko ia ke ke fokotu‘u hatau tu‘i ke fakamaau kitautolu, ‘o hangē ko e ngaahi kakai kotoa pē"

Ne toki ‘unu’unu mai ‘a e mātu’a ‘Isileli´ ‘o kole kia Samiuela, ka me’a´ pea fokotu’u ā hanau tu’i, he ‘oku ‘ikai fakamaau totonu ‘a e fakamaau hono ngaahi foha´, pea ‘ikai ngata ai´ na’a nau fiema’u foki ke nau hangē ko e ngaahi fonua kehe´ ‘o pule’i fakatu’i. Nau ngaue’aki ‘a e aafe ‘a e fanau ‘a Samiuela’ ke teke’i mai ai honau loto’ ki mu’a. Ko e ‘atunga ia ‘a e ‘ikai ke nau nofoma’u he ‘Otua´ mo e tui totonu’, ka nau to e fakasiosio holo ki he lotu tamapua ‘a e kau ta’etui ‘Otua he kaunga’api´, kuo nau kau mo nautolu he aafe ki he founga mo e mo’ui fakalusa’. Nau tuhu ki he fanau ‘a Samiuela’, ka ‘oku nau tatau pe, he li’aki ‘a e Sihova, ko honau tu’i totonu’… Nau fiema’u ha tangata, kae tuku ‘a Sihova ia ‘oku totonu pea pau’.

Lotu: Lotu ‘o kole ki he ‘Otua´ ke Ne tokoni’i koe ke ‘oua na’a ke kau ha
palapalani ‘o ha fa’ahinga me’a ‘oku fakafepaki ki he finangalo ‘o e ‘Otua’.

Monite 2 'Okatopa, 2017

AAFE ‘A E FANAU ‘A SAMIUELA

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

1 Samiuela 7:15-17; 18:1-2
"15Pea na‘e fai ‘e Sāmiuela ‘a e fakamaau ‘o ‘Isileli ke ‘osi ‘ene mo‘ui. 16Pea ne ‘alu ‘i he ta‘u kotoa pē, ‘o foli takai ki Pēteli mo Kilikali mo Mīsipa; ‘o ne fai ‘a e fakamaau ‘o ‘Isileli ‘i he ngaahi potu ko ia kotoa. 17Pea ko ‘ene foki na‘e fai ki Lama, he na‘e tu‘u ai hono fale; pea ‘i he potu ko ia na‘a ne fai ‘a e fakamaau ‘o ‘Isileli; pea ne langa ai ha ‘ōlita kia Sihova."

‘I he faka’osi’osi e kuonga ‘o e kau fakamaau´, ne fai fakamaau ai ‘a Samiuela ki ‘Isileli. Pea kuo ne faka’a’au hifo ke motu’a, ko ia na’a ne fakanofo pe hono ngaahi foha´ ke nau fai fakamaau ki ‘Isileli, ka na’e ‘ikai ke fai totonu hono ngaahi foha´, he na’a nau aafe he sio ki he koloa’. Ko e fatongia ‘o e mātu’a´ mo e kau tauhisipi´ ‘oku fu’u mahu’inga ‘aupito, he ko e akonekina mo valokia mo tauhia ‘a e kakai´ ke nau fou he ‘alunga ‘o e mo’ui mā’oni’oni´. Pea ka kuo lava pē fatongia ia ‘o e tauhi´, hono uhu’i e Folofola´ ki he fānau´, kae tupu hake pē ia ‘o aafe ki he kovi´, te nau fua leva ‘enautolu hono tautea´, tukukehe kapau te nau fakatomala ‘o foki mo’oni ki he ‘Eiki´… Kae lolotonga ‘etau kei ma’u faingamalie’, tau too fiefia mo vekeveke ‘a e Folofola´ ma’upe

Lotu: Lotu ‘o kole ki he ‘Otua´ ke Ne tokoni’i koe ke ke nofoma’u ‘iate Ia, ke ‘oua te ke malele ngofua holo he ngaahi fakatauvele ‘a e tevolo´.

Sapate 1 'Okatopa, 2017

‘OUA TE MOU HOKO KO E KAU TA’ELOTO

Veesi Lauloto: 'Efeso 5:17

"Ko ia 'oua te mou hoko ko e kau ta'eloto, ka ko e kakai 'oku mahino ki ai 'a e
finangalo 'o e 'Eiki."

'Efeso 5:17

Ko e ngaahi palani mo e fokotu’utu’u ‘a e ‘Otua’ ma’a ‘etau mo’ui’ ko e koto lelei kotoa pē. Taimi lahi fanau, ‘oku ‘ikai ke tau fa’a tokanga ki he’etau mo’ui fakaloto’, ke tupulekina hotau vā mo e ‘Otua´, koe’uhi’ ke ‘alu e ‘aho’ mo ‘etau maheni ange mo Ia’…. Pea ‘e faingofua leva ai ke tau mahino’i mo tali loto fiefia ‘a e finangalo ‘o e ‘Otua´ ma’a ‘etau mo’ui´ he ‘ēlia kotoa pē. Pea he’ikai leva ke tau hoko ko e kakai ‘oku ta’eloto ki Hono finangalo´, mo ta’etali ‘Ene ngaahi fokotu’utu’u’ mo fa’a fehufehu’u’i ‘Ene ngaahi tu’utu’uni’… ‘Oku tau tukuange kakato kitautolu ke fika ‘uluaki ‘a e ‘Otua’ he’etau me’a kotoa pē. Pea ‘alu pe ‘aho’ mo ‘etau hoko ko e kakai ‘oku talangofua ma’upe ki he finangalo ‘o e ‘Otua´, hangee ko e fakamanatu ‘oku ‘omi he’etau veesi lauloto’.

Lotu: Kole ki he ‘Otua´ fānau, ke Ne ngahi ho’o mo’ui’ ke ke hoko ko ha taha ongongofua ki ho’o matu’a’ mo e faiako’ mo e ‘Otua´ foki.

Tokonaki 30 Sepitema, 2017

'ALO'I 'O E MISAIA

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Luke 2:1-33

Ne ‘osi mai ha ngaahi ta’u lahi, pea na’e ‘i ai ha taula’eiki ‘ofa ‘Otua ko Simione, na’a ne fakana’una’u ki he hoko mai ‘a e Mīsaia´. Koe’uhi´ na’a ne angatonu mo ‘ofa ‘Otua mo’oni, na’e palōmesi ai ‘a e ‘Otua´ kiate ia, he’ikai te ne mate kae’oua leva kuo ne sio tonu he Mīsaia´. Pea hoko mai e ‘aho ne ‘alo’i ai ha Tama ‘i Petelihema, he kolo ne nofo ai ‘a Lute mo Poasi´. Ko Ia ‘a e Mīsaia´, ko e ‘Alo ia ‘o e ‘Otua´. Pea ne ‘ave ia ‘e Mele mo Siosifa ki he temipale´ ke kamu, he hokosia hono taimi´. Pea ‘i he vakai hifo ki ai ‘a Simione ko e taula’eiki´, na’a ne fakamālō’ia ‘a e ‘Otua´ mo ne pehē, “Fakahoko ā ho’o Folofola´ ‘e hoku ‘Otua, tuku ā ke u foki atu ā he ko ‘eni kuo u mamata ki he Mīsaia´, pea kuo u fiefia mo fakamālō’ia aipē Ho Huafa´ ke ta’engata....”

Lotu: Lotu ‘o fakamālō ki he ‘Otua´ He’ene ongo’i mo tali ho’o lotu´. Fakafeta’ia aipē Hono Huafa´He’ene fai’ofa ma’a kitautolu.

Falaite 29 Sepitema, 2017

FAKAOFO MA'U PE PALANI 'A E 'OTUA

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Lute 4:18-22
"18Pea ko e tohi eni ‘o e hako ‘o Felesi: na‘e tupu ‘ia Felesi ‘a Hēloni; 19pea tupu ‘ia Heseloni ‘a Lame, pea tupu ‘ia Lame ‘a ‘Aminatape; 20pea tupu ‘ia ‘Aminatape ‘a Na‘asoni, pea tupu ‘ia Na‘asoni ‘a Salemone; 21pea tupu ‘ia Salemone ‘a Poasi, pea tupu ‘ia Poasi ‘a ‘Ōpeti; 22pea tupu ‘ia ‘Ōpeti ‘a Sese, pea tupu ‘ia Sese ‘a Tēvita."

Ko e foha ‘o Poasi mo Lute´ ko ‘Opeti, pea ko e foha ‘o ‘Opeti´ ko Sese, ‘a ia ko e tamai ia ‘a Tevita, ko e tu’i ‘Isileli ‘ofa ‘Otua mo ‘iloa. Na’e toko 8 ‘a e fanau tangata ‘a Sese´, pea ko Tevita na’e nofo he vao´ ‘o tokanga’i ‘enau fangasipi´. Ka na’e ui mo fili ia ‘e he ‘Otua´ ke ne hoko ko e tu’i ‘Isileli hono ua´, hoko hake ‘ia Saula´. Na’e fakamanatu kiate ia ‘e he ‘Otua´ ‘e ‘i ai e ‘aho te Ne ‘omi ai ki māmani ha Mīsaia ke Ne fakamo’ui ‘a māmani mo fakahaofi ‘a e tangata´ mei he tautea mate ‘o e angahala´.

Lotu: Lotu ‘o fakamālō ki he ‘Otua´ He’ene ‘omi hotau faingamālie ki he mo’ui ta’engata´, ‘i he’etau tui ki he Mīsaia´.

Tu'apulelulu 28 Sepitema, 2017

TUKUFAKAHOLO

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Lute 4:16-17
"16Pea to‘o ‘e Neomai ‘a e tamasi‘i, ‘o ne ‘ai ki hono fatafata, ‘o ne hoko ko hono tauhi. 17Pea na‘e fakahingoa ia ‘e he kau fefine na‘e nofo ofi he‘enau pehē, Kuo fanau‘i ha tamasi‘i kia Neomai; ko ia na‘a nau ui ia ko ‘Ōpeti (Ko e Taha-ke-tauhi): ko e tamai ia ‘a Sese, ‘a ia ko e tamai ‘a Tēvita."

‘Oku kinikini mai he tohi ‘a Lute´ ‘a e ngaahi talateu mo e falikiliki ki he teu hoko mai ‘a Tevita´, pea pehē ki he teu ‘alo’i mai ‘a e Mīsaia´, hotau Fakamo’ui´. Mahu’inga ke tau sio ma’u pē ki he’etau fononga´ mei he fofonga ‘o e ‘Otua´, ki he fakatātā lahi ‘o e ‘Otua´ mo e tangata´, ‘Ene taumu’a mo e fokotu’utu’u ki he tangata´, pea te tau lika atu leva mo ki’i mahino’i ‘a e moana mo e loloto ‘o ‘Ene Folofola´. Koe’uhi´ ko e angatonu mo e talangofua ‘a Lute´, ne makehe pea tu’ukimu’a hono laini tukufakaholo´, neongo na’e ‘ikai ke ne ‘ilo ki ai. Tau manako fānau ki he mo’ui talangofua´ mo angatonu´, he ‘e makehe hoto ‘alunga´ ki he kaha’u´, pea ko e pale ‘oku tali mei mu’a´ te ne holoholo’i ‘etau ngaahi feilaulau ne fai ka tau tu’uma’u ai he tui totonu´.

Lotu: Lotu ‘o kole ki he ‘Otua´ ke Ne tokoni atu ke ke fakamama’u aipē ki He’ene takimu’a ‘oku fai ki he’etau fononga´.

Pulelulu 27 Sepitema, 2017

'OPETI

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Lute 4:15
"15Pea te ne hoko ko e fakaato ‘o ho‘o mo‘ui, pea te ke kaukauola ki ai ‘i ho‘o a‘ua‘u: he ko e fā‘ele‘i ia ‘e ho‘o ta‘ahine ne ‘ofa kiate koe ‘a ia ‘oku mahu‘inga ‘i ha tama ‘e toko fitu."

Ko e ‘ofa ‘a Lute ‘ia Naomi´ ne fakatokanga’i pē ia he kakai ‘o Petelihema´. Ko ‘ene anga’ofa mo manava’ofa ki he kakai kehe´ na’e mo’ui mo tupulekina. Na’e faka’atā ‘e he ‘Otua´ ‘a e tāpuaki´ ke tupu mo ‘alu hake mei he lotofale ‘o Naomi´, he na’e mahino ‘a e falala ‘Otua ‘a Naomi mo Lute´. Fanau, ‘oku malava hotau ‘Otua´ ‘o liliu e mala´ ko e monū’ia; pea ke ne fakatupu ha monū’ia mo ha tāpuaki mei he mamahi´ mo e faingata’a’ia´. Fakatauange ke tau hangē ko Naomi´, ‘o ‘oua na’a tau sītu’a mei hotau ‘Otua´ he taimi ‘o e faingata’a´ mo e mamahi´. ‘Ouae hanu mo laulau mo lāunga, tatau aipē kapau ‘oku ke tonuhia kae ngaohikovia pē koe .Tu’uma’u ‘i he ‘Eiki´ ho’o falala´, pea te Ne hākeaki’i koe mo fakahaofi ‘i hono taimi totonu.

Lotu: Lotu ‘o kole ki he ‘Otua´ ke Ne tokoni’i koe ke ke tu’uma’u ho’o falala´ ‘i he ‘Otua´, tatau aipē ‘oka tokatāmaki ‘a e fononga’anga.

Tusite 26 Sepitema, 2017

TALAMONU

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Lute 4:14-15
"14Pea na‘e pehē ‘a e kau fefine kia Neomai, Mālō mo e ‘Eiki, he ‘ikai te ne tuku koe he ‘aho ni ta‘eha koeli; pea ‘ofa ke ongoongoa hono hingoa ‘i ‘Isileli. 15Pea te ne hoko ko e fakaato ‘o ho‘o mo‘ui, pea te ke kaukauola ki ai ‘i ho‘o a‘ua‘u: he ko e fā‘ele‘i ia ‘e ho‘o ta‘ahine ne ‘ofa kiate koe ‘a ia ‘oku mahu‘inga ‘i ha tama ‘e toko fitu."

Pea lea fakalotolahi ‘a e kau fefine´ kia Naomi, “Malo mo e ʻEiki, he ʻikai te Ne tuku koe he ʻaho ni ke ke taʻe ha koeli;. Pea te ne hoko ko e fakaato ʻo hoʻo moʻui´, pea te ke kaukauola ki ai ʻi hoʻo aʻuaʻu´: he ko e faʻeleʻi ia ʻe hoʻo taʻahine ne ʻofa mo’oni ‘iate koe´, ʻa ia ʻoku mahuʻinga ange ia ʻi ha tama ʻe toko fitu. Taimi na’e palani ai he ‘Otua´ ‘a e hoko mai Hono ‘Alo´ ke huhu’i ‘a e tangata´, na’a Ne palani foki mo e laini tukufakaholo ke hoko mai ai´. ‘Oku kau ‘a Poasi he laini ko ia´, pehē foki kia Lute, pea kau aipē mo e pēpē fo’ou´, ‘a ‘Opeti.

Lotu: Lotu ‘o fakamālō ki he ‘Otua´ He’ene palani haohaoa ‘a e laini tukufakaholo ke hoko mai ai hotau Fakamo’ui´.

Monite 25 Sepitema, 2017

KO E ‘API MO E FAMILI FIEFIA MO TAU’ATAINA

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Lute 4:14
"14Pea na‘e pehē ‘a e kau fefine kia Neomai, Mālō mo e ‘Eiki, he ‘ikai te ne tuku koe he ‘aho ni ta‘eha koeli; pea ‘ofa ke ongoongoa hono hingoa ‘i ‘Isileli."

Na’e fiefia e taha kotoa he tapuaki kuo hoko mai ki he lotofale ‘o Naomi´, tautautefito pe kia Naomi. Kuo fiefia vale ‘a e fine’eiki´ he hoko mai hono ki’i mokopuna´, pea ‘e to e fakatolonga foki ‘i ai ‘a e hingoa fakafamili ‘o ‘Elimeleki´. Pea kuo ha’u ‘a e kau fefine ‘o Petelihema´ ‘o kaungā fiefia mo Naomi, mo nau pehēange kia Naomi, “Fakafeta’i ki he ‘Otua´. Kuo ‘ikai ke Ne tuku koe ke ke nofo hala aipe he famili. Pea ko Lute, ‘oku ne ‘ofa mo’oni ‘iate koe, ‘oku ne laka ange ha ngaahi foha ‘e toko 7; pea kuo ne toe fakakoloa’i ‘aki ho lotofale´ ha tama, ka ko ho mokopuna. Ko e lotofale ‘eni ne ha’iha’isia he lotomamahi´, kuo ongo mai mei ai ‘a e kata, mo e hiva mo e fiefia. ‘Oku pehē pē ‘a e fāmili ‘oku nofoma’u he ‘Otua´, ko e ‘api mo e famili fiefia mo tau’ataina.... Ko Sīsū ‘i he fāmili´ ko e ‘api fiefia.

Lotu: Lotu ‘o kole ki he ‘Otua´ ke Ne tokoni atu ke ke nofoma’u ‘iate Ia ke Ne fakatau’ataina koe mei he popula ki he angahala´.

Sapate 24 Sepitema, 2017

SISU KALAISI

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Kimu’a pea fakatau’ataina’i kitautolu ‘e Kalaisi ‘i he’etau tui kiate Ia´, ko kitautolu´ na’a tau pōpula ki he angahala´ mo ‘etau ngaahi fehālaaki´. Na’e ‘afio hifo ‘a e ‘Otua´ ki he’etau nofo ha’isia´ pea Ne tokoni mai leva ‘aki ‘Ene ‘omi ha Hao’anga mei he’etau pōpula ki he angahala´, ‘a ia ko ‘etau tui ki Hono ‘Alo´. Ka ‘ikai ‘a Kalaisi, ko e taha kotoa pē ‘oku loka’i ia ‘e he angahala´. Ko ia pē ‘oku tui kia Kalaisi´, ‘oku hao mai mo fakatau’atāina ia mei he pilīsone ko Angahala´. Ko ia ai fanau, ko Kalaisi ‘ena ‘oku ha’u mo e founga´ ke ta tau’ataina ai mei he popula ki he angahala´. Tali ‘a Sisu ki ho loto´ pea ke tui ki Ai, pea ke nofoma’u Ai ke ke mo’ui.

Lotu: Lotu ‘o kole ki he ‘Otua´ ke Ne tokoni’i koe ke ke tui falala kakato kia Kalaisi, kae lava ke ke tau’ataina mei he popula kia angahala´.

Tokonaki 23 Sepitema, 2017

SISU KALAISI

Veesi Lauloto: Loma 5:8

"Ka ko e ʻOtua´, ʻoku Ne fakahā ʻa e moʻoni ‘o ʻEne ʻofa ‘Aʻana kiate kitautolu´, ʻi he pekia ʻa Kalaisi maʻatautolu, lolotonga ʻoku tau kei angahala"

Lute 4:13
"13Pea mali ‘a Poasi mo Lute, ‘o na nonofo; pea ne ‘alu kiate ia, pea tuku ‘e he ‘Eiki ke ne feitama, ‘o ne fā‘ele‘i ha tama tangata."

Na’e mali leva ʻa Poasi mo Lute, pea ‘ikai ke to e fiema’u ia ke to e ‘alu ‘a Lute ki he ngoue’anga´ ‘o tufi uite pe pa’ale ‘o hangē ko ia ne anga ki ai ‘i mu’a´. Na’a ne nofo pe ‘i ‘api, ko Poasi pe na’e ‘alu ki he ngoue’anga´. Kuo fiemālie ‘a Lute. Me’a lelei ko e kātaki mo e tatali ki he taimi ‘a e ‘Otua´ fānau. ‘Ikai ngata pe he’ena fiefia hono fakahoko famili kinaua´, ka kuo to e tuku foki ʻe he ʻEiki´ ke feitama ‘a Lute, ʻo ne faʻeleʻi ha tama tangata, pea na fakahingoa ia ko ‘Opeti, ‘a ia ‘oku ‘uhinga ko e “tokotaha mo’ui fa’a lotu” Ko ‘Opeti te ne hoko ko e ‘ea ki he tofi’a ‘o ‘Elimeleki´. Ko e tapuaki ‘eni ‘o e si’i tu’u ‘a Lute ‘o muimui mai ‘ia Naomi´ mo ‘ene ‘ofa ‘ia Naomi´, kuo ha’u mei hono manava´ ‘a e laini tukufakaholo ‘o Tevita´, mo Sisu Kalaisi, ‘ia Siosifa´.

Lotu: Lotu ‘o kole ki he ‘Otua´ ke Ne tokoni’i koe ke ke tui falala kakato kia Kalaisi, kae lava ke ke tau’ataina mei he popula kia angahala´.

Falaite 22 Sepitema, 2017

TAPUAKI

Veesi Lauloto: Loma 5:8

"Ka ko e ʻOtua´, ʻoku Ne fakahā ʻa e moʻoni ‘o ʻEne ʻofa ‘Aʻana kiate kitautolu´, ʻi he pekia ʻa Kalaisi maʻatautolu, lolotonga ʻoku tau kei angahala"

Lute 4:11-12
"11Pea pehē ‘e he kakai kotoa na‘e ‘i he matanikolo, pea mo e tu‘unga mātu‘a, Ko e fakamo‘oni kimautolu. Tauange mo e ‘Eiki ke hoko ‘a e fefine kuo hū ki ho fale ke hangē ko Lesieli, pea hangē ko Lia, ‘a e ongo me‘a na‘a na langa ‘a e fale ‘o ‘Isileli: pea ke kaukaua koe ‘i ‘Efalata, mo ongoongoa ‘i Pētelihema. 12pea ke hoko ho fale ke hangē ko e fale ‘o Felesi, ‘a ia na‘e fā‘ele‘i ‘e Tema kia Siuta, ‘i ha hako ‘e ‘atu kiate koe ‘e Sihova ‘i he ta‘ahine ni."

Pea pehē atu ʻe he kakai kotoa pē naʻe ʻi he matanikolo´, pea mo e tuʻunga mātuʻa´, “ ‘Io, ko e kau fakamoʻoni kimautolu. Tauange mo e ʻEiki´ ke hoko ʻa e fefine kuo hū ki ho fale´ ke hangē ko Lesieli´, pea hangē ko Lia´, ʻa e ongo fafine naʻa na langa ʻa e fale ʻo ‘Isileli´: pea ke kaukaua koe ʻi ‘Efalata, mo ongoongoa ʻi Pētelihema”. ‘I he’ete nofoma’u ‘i he ‘Eiki´ fānau, ‘e fai tāpuekina kita ‘e he ‘Eiki´ he’ete mo’ui´ mo ‘ete fononga´. Pea te te hoko ko e monū’ia’anga ki he fāmili´ mo e siasi´. Fakatauange fanau, ke tau hoko ko e monu’ia’anga he fanga ki’i famili te mou ma’u he kaha’u´. Ka mou kamata leva he taimi ni ho’o tokanga ke langa ho’o mo’ui´ ‘ia Kalaisi ka ke monū’ia. Tokanga ke ke mo’ui fa’a lotu mo lau ho’o Folofola´ mo fai ki ai.

Lotu: Lotu ‘o fakamālō ki he ‘Otua´ He’ene huhu’i kitautolu he kolosi´, pea to’o ai hotau mala´, ka tau mo’ui mā’oni’oni.