Sapate 19 Novem, 2017

MO’UI IKUNA ‘I HE LAUMALIE MA’ONI’ONI´ 

Veesi Lauloto: 2 Timote 1:7

"He ko e Laumālie na’e foaki ‘e he ‘Otua´ kiate kitaua´, na’e ‘ikai ko e Laumālie 
angafo’i, ka ko e anga-mālohi, mo ‘ofa, mo valoki"

‘Oku ‘i ai nai ha me’a ‘oku ne fa’a ‘ai koe ke ke ongo’i manavahē mo ilifia fanau? Taimi ‘e ni’ihi, ‘okapau te te ta’etokanga ki he ‘Eiki’, ‘oku fa’a hanga ‘e he manavahee’ mo e ilifia’ ‘o ‘ai kita ke te fai ‘a e ngaahi tō’onga ‘oku ‘ikai taau ia ke fai ‘e he fanau ‘a e ‘Otua’.... ‘Oku ‘ikai ke finangalo ‘a e ‘Otua’ ke tau manavahē mo ilifia, ka ke tau tui mo falala ange kiate IA, he na’a NE fakatupu kitaua ‘i Hono ‘Imisi’, ko e ‘Imisi mo e mo’ui ia ‘oku to’a mo kaukaua. Pea ko Hono Laumālie’ ‘oku ‘iate kitaua’, ‘oku ‘ikai ko ha Laumālie ia ‘oku lotosi’i mo fo’ingofua, ka ko e Laumālie ia ‘oku mālohi mo to’a mo ‘ofa’i kitautolu mo fakanonga hotau loto’ ke ‘oua te tau hoha’a noa’ia. Pea ‘oku tu’u ai ‘etau mo’ui ikuna’, ikuna’i hotau ngaahi fili’ pehē ki hotau ngaahi manavahē’anga’

Lotu: Lotu ‘o kole fakamolemole ki he ‘Otua he taimi ‘oku ke fa’a tuku ki lalo ai ho ‘Otua’ ‘i ho’o fa’a manavahee ho fili’, ‘o ‘ikai ke ke to’a mo falala ki ho ‘Otua´.

Tokonaki 18 Novema, 2017

‘OKU MO’UI IKUNA MA’U PE ‘A IA ‘OKU FAILELEI´ 

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 26:25
"25Pea tali ‘e Saula kia Tēvita, ‘ofa ke ke monū‘ia, tama Tēvita: te ke fai me‘a lalahi, pea te ke lava foki. Pea fai atu ‘e Tēvita hono fononga, pea foki ‘a Saula ki hono potu."

Koe’uhi’ ko e loto fakamolemole ‘a Tevita’ mo ‘ene failelei’, ‘o ‘ikai te ne sāuni ha kovi ‘e taha kuo fai mai ‘e Saula kiate ia’, ne iku aipē ‘o tuku leva ‘e Saula ‘ene kumi ‘a Tevita ke fakapoongi’. ‘Oku mahu’inga ‘aupito ke ke ma’uloto ‘etau veesi lauloto’, Matiu 5:44, fanau, he ‘e tokoni lahi ‘aupito ia ke fakamanatu kiate kitautolu ‘a e mahu’inga ‘o e fakamolemole’i mo ‘ofa’i hotau fili’, ‘o ka tolotui mai ‘a e loto sauni’ ‘iate kitautolu. Pea ‘e tokoni’i koe ‘e he ‘Eiki’ ke ke fai’ofa ki ho fili’ ke fakahaa’i atu ai ‘a e ‘ofa ‘a e ‘Otua’. Pea ‘i ho’o fai pehee´, ‘oku fakamahino mai ai ko e tokotaha koe ‘oku ‘iate koe ‘a e loto ‘o Kalaisi’. ‘Io, ko e taha koe ‘i he fanau ‘a e ‘Otua’.... Falala ki he ‘Otua’ fanau, ke Ne solova ‘ete fefa’uhi mo e kakai ‘oku faikovi mai kiate kita’.

Lotu: Lotu ‘o kole ki he ‘Otua´ ke Ne tokoni’i koe ke ke falala ma’upe kiate IA,  ko Ia ia te Ne solova ho ngaahi faingata’a’ia’anga’, ‘oku ‘ikai ko koe.

Falaite 17 Novema, 2017

SAULA MO TEVITA

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 24:16-22
"16Pea ‘i he ‘osi leva ‘e Tēvita ‘ene fakatau folofola pehē kia Saula, pea pehē ‘e Saula, Ko ho le‘o koā ena, tama Tēvita. Pea ofa‘aki ‘e Saula ‘ene fākafoa. 17Pea ne pehē kia Tēvita, ‘Oku ke mā‘oni‘oni ange ‘iate au; he ko koe kuo ke fai lelei kiate au, ka u fai kovi ‘e au kiate koe. 18Pea kuo ke fakamahino he ‘aho ni ‘a e lelei ho‘o ngāue kiate au: he neongo ne tuku au ‘e Sihova ki ho nima, kae ‘ikai te ke tāmate‘i au. 19He ka ‘iloange ‘e ma‘u ‘e ha tangata hono fili, te ne tukuange lelei pē koā ke fai hono fononga? pea ‘ofa ke totongi lelei koe ‘e he ‘eiki koe‘uhi ko e me‘a kuo ke fai kiate au he ‘aho ni. 20Pea ko eni, tā kuo u ‘ilo kuo pau te ke tu‘i, pea ‘e ma‘u ‘a e pule‘anga ‘o ‘Isileli ‘i ho nima. 21Pea ko ia ke ke fuakava kiate au ‘ia Sihova, ‘Ilo ‘e koe, ‘o kapau te ke tu‘usi hoku hako ‘amui, pe tāmate‘i hoku hingoa mei he fale ‘o hoku tupu‘anga. 22Pea fuakava ‘a Tēvita kia Saula. Pea ‘alu ‘a Saula ki ‘api, ka ka ‘alu hake ‘a Tēvita mo ‘ene kau tangata ki he toitoi‘anga."

Ne tafoki mai ‘a Saula ‘o ne ui mai kia Tevita mo ‘ene fākafoa’, “Ko ho leʻo´ koā ena, Tevita? ʻOku ke māʻoniʻoni ange ʻiate au; he ko koe kuo ke fai lelei kiate au, kau fai kovi pe au kiate koe. Pea kuo ke fakamahino he ʻaho ni ʻa e lelei hoʻo ngaue’ kiate au: he neongo ne tuku au ʻe Sihova ki ho nima’, kae ʻikai te ke tamateʻi au. ‘Ofa ke totongi lelei koe ʻe he ʻEiki’ koeʻuhi’ ko e lelei mo e fakamolemole kuo ke fai kiate au he ʻaho ni’. Pea ko eni, ta kuo u ʻilo kuo pau te ke tuʻi, ko ia ai, ke ke fuakava mai mu’a kiate au ʻia Sihova, he’ikai te ke faka’auha hoku famili’, he taimi te ke hoko ai ko e tu’i’”. Pea fuakava ʻa Tevita kia Saula, pea na toki mātuku melino pē he ‘aho ko ia’.

Lotu: Lotu ‘o kole ki he ‘Otua´ ke Ne ngaohi koe ke ke hoko kiate IA ‘o lea mo’oni mo fai ki ho’o ngaahi palōmesi’.

Tu'apulelulu 16 Novema, 2017

FAKAMOLEMOLE'I HO FILI

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 24:8-15
"8Pea tu‘u ‘a Tēvita, ‘o muimui atu, ‘o ne hū kitu‘a mei he ‘ana, ‘o ne ui ange kia Saula ‘o pehē, ‘Ēī ‘a e ‘afiona! Pea ‘i he kilo ‘a Saula ki mui, na‘e tō fo‘ohifo ‘a Tēvita ki he kelekele, ‘o fai ‘ene faka‘apa‘apa. 9Pea fakatau folofola ‘a Tēvita kia Saula, Ko e hā ‘oku ke tokanga ai ki he lau ‘a e kakai, ‘o pehē, ‘Ē, ‘oku feinga ‘a Tēvita ke fai ha kovi kiate koe? 10Vakai, ko e ‘aho ni kuo me‘a ho fofonga ki he tuku koe ‘e Sihova he ‘aho ni ki hoku nima ‘i he ‘ana: pea na‘e lau ha ni‘ihi ke u tāmate‘i koe: ka u mamae‘i koe; pea u pehē, ‘E ‘ikai te u ala ki hoku ‘eiki, he ko e pani ‘a Sihova ia. 11Kae‘uma‘ā ke ke me‘a mai, ‘alā; vakai ‘a e kapa ‘o ho kofu ‘oku ou to‘o; he ko e me‘a ‘i he‘eku tu‘usi ‘a e kapa ‘o ho kofu, kae ‘ikai te u tāmate‘i koe, ke ke ‘ilo ai mo vakai ‘oku ‘ikai ha kovi pe ha pau‘u ‘iate au, pea kuo ‘ikai te u hia kiate koe, ka ko koe ‘oku ke tuli ki he‘eku mo‘ui ke pō ia. 12Ke fakamaau ‘e Sihova ‘i hota vaha‘a, pea ke sauni ‘e Sihova ma‘aku kiate koe; ka ‘e ‘ikai ala ki he ‘afiona ‘e hoku nima. 13‘O hangē ko e lau ‘a e paloveepi ‘a e kakai mu‘a, ‘Oku tupu ‘a e pau‘u mei he pau‘u; ka ko hoku nima ‘e ‘ikai ala atu. 14Ko e hā‘ele atu ‘a e Tu‘i ‘Isileli kia hai? Ko e hā ‘a e me‘a ‘oku tuli ki ai ‘a e ‘afiona? ko e kulī mate pē, ko e momo‘i kutufisi. 15Ko ia, tuku ‘a e fakamaau kia Sihova, pea ke ne fakamaau ‘i hota vaha‘a, ‘o vakai, ‘o taukapo‘i ‘eku me‘a, mo faka‘osi hoku fakamaau."

Ne taimi si’i pe kuo huu atu ‘a Saula ki tu’a pea tu’u ‘a Tevita ‘o muimui atu. Ne ui atu ‘a Tevita, pea tafoki mai ‘a Saula, “ ‘E ho’o ‘afio... Ko e hā kuo ke tui ai ki he ngaahi fakahū loi atu ‘a e kakai’ kiate koe ‘o pehē kuo u fa’ufa’u ha kovi ki he feitu’u na? Vakai mai ki he kapa ho kofu na, ne u tu’usi ia he lolotonga ho’o tōfā´ ke fakamo’oni atu ki he feitu’u na, ne vili ‘eku kau tangata’ ke mau fakapoongi koe, he kuo tuku mai ‘e Sihova ‘a e feitu’u na ki hoku ‘aofinima’, ka na’a ku fakahaofi pe koe, he na’e ‘ikai ke u loto ke mau ala ki he feitu’u na, he ko e pani koe ‘a Sihova.... ‘Oku ʻikai ha kovi pe ha pauʻu ʻiate au, pea kuo ʻikai te u hia kiate koe, ka ko koe ʻoku ke tuli ki heʻeku moʻui´.. Tuku ā ke fakamāu ʻe Sihova ʻi hota vahaʻa’, ka ʻe ʻikai ala ki he feitu’u na ʻe hoku nima´.” Tuku ke tau ako heni ‘a e mo’ui fakamolemole’ mo e ‘apasia’ fanau. 

Lotu: Lotu ‘o fakamālō ki he ‘Otua´ He’ene fa’a kātaki’i mo fakamolemole’i ‘etau ngaahi faiaangahala’ mo e fa’a tuku taimi ma’a tautolu´.

Pulelulu 15 Novema, 2017

FAKA'APA'APA KI HE PANI 'A SIHOVA

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 24:5-7
"5Pea hili ‘ene fai pehē na‘e tautea ‘a Tēvita ‘e hono loto, koe‘uhi kuo ne tu‘usi ‘a e kapa‘i kofu ‘o Saula. 6Pea ne pehē ki he‘ene kau tangata, Ko Sihova ē ha‘aku ofi ke fai pehē ki hoku ‘eiki ko e pani ‘a Sihova, ke ala hoku nima ki ai, he ko e pani ia ‘a Sihova. 7Ko ia na‘e ta‘ofi ‘e Tēvita ‘ene kau tangata ‘aki ‘a e ngaahi lea ko ē, ‘o ‘ikai te ne tuku ke nau tu‘u kia Saula. Pea tu‘u atu ‘a Saula mei he ‘ana, ‘o ne fai hono fononga."

Ne vili ‘ene kau sotia’ ke tuku ke nau tamate’i ‘e kinautolu ‘a Saula, ka na’e ta’ofi pe ‘e Tevita ‘o ne pehee atu, “‘Ikai ‘aupito! Na’a mo e tu’usi ko ‘eni e kapa hono kofu’, ne ‘ikai tonu mo ia ke u fai, he ko Saula’ ko e pani ia ‘a e ‘Otua’”. Tatau aipe, faikovi pe failelei ‘a Saula kiate ia’, kuopau pe ke kei faka’apa’apa ki ai, he ko e pani ia ‘a Sihova. Neongo ne ‘osi pani ‘e Samiuela ‘a Tevita ke ne hoko ko e tu’i ‘Isileli, ka na’e ‘osi mahino’i pe ‘e Tevita kuopau ke ne tatali pe ki he taimi ‘a e ‘Otua’. Kuopau ke ne kei faka’apa’apa’i pe ‘e ia ‘a Saula, he ko ia ‘a e tu’i lolotonga ‘o ‘Isileli’, tatau aipe pe ‘oku lahi feefee ‘ene faikovi kiate ia’. ‘Oku ‘ikai faingofua ke te tali mokomoko mo failelei kiate ia ‘oku faikovi mai’, ka ‘e tokoni’i kita he Laumalie Ma’oni’oni’ ke te lava pe.

Lotu: Lotu ‘o fakamālō ki he ‘Otua´ He’ene fakafonu ‘ofa ho loto’ ke ke kei ‘ofa  pe mo kataki’i ho fili’ he’ene ngaahi faikovi mai’.

Tusite 14 Novema, 2017

FAINGAMALIE KE SAUNI

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 24:4
"4Pea lea ‘a e kau tangata ‘a Tēvita kiate ia; Vakai, ko e ‘aho ē na‘e folofola ai ‘a e ‘Eiki kiate koe, ‘o pehē, Ko eni, te u tuku ho fili ki ho nima, ke ke fa‘iteliha kiate ia, Pea tu‘u ‘a Tēvita, ‘o tu‘usi fufū ‘a e kapa ‘o e kofu tōtōlofa na‘e ‘ia Saula."

‘I he vakai atu ‘a Tevita mo ‘ene kau tangata’, ki he hū mai ‘a Saula mo ‘ene kau tangata’, na’e ‘ikai kei mapuke ‘a e fiefia ‘a e kau tangata ‘a Tevita’, ‘o nau fafana atu kia Tevita, “Ko e ‘aho ‘eni na’a ke tali ki ai’. Ko ‘eni kuo ‘omi ‘e he ‘Otua’ ho fili’ kiate koe. Ko ho faingamalie ‘eni ke ke tamate’i ai leva ho fili’.” Ne ‘ikai loto pehē ‘a Tevita. Ka na’a ne tolotolo atu pe ‘o tu’usi ‘a e kapa ‘o e kofu ‘o Saula’, pea ne foki mai. ‘Oku fa’a ‘i ai pe taimi pehee fanau, ‘a e fa’a tolotui hake ‘iate kita ‘a e loto ke sauni ‘a e faikovi mai ha taha. Ka ‘oku ‘ikai finangalo pehee ‘a e ‘Otua’, he ‘oku fakahaa’i ai ‘oku ‘ikai ke tau falala ke tuku ‘etau ngaahi me’a’ kiate IA ke Ne solova mai ‘i He’ene founga’, mo Ne ‘omi e leleitaha’ ma’ata. Ko e fekau ia ‘oku ‘omi he’etau veesi lauloto.

Lotu: Lotu ‘o fakamālō ki he ‘Otua´ He’ene fa’a fakamanatu ma’upe ‘a e lelei’ kiate koe, he taimi ‘oku ‘alu hake ai e loto ke ke fai angahala’ .

Monite 13 Novema, 2017

KUMI ‘E SAULA ‘A TEVITA KE TAMATE’I

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

1 Samiuela 24:1-3
"1PEA hili ‘a e foki ‘a Saula mei he muimui ki he kau Filisitia, na‘e fakahā kiate ia, ‘o pehē, Tokua ko Tēvita ‘oku ‘i he Toafa ‘o ‘Eniketi. 2Pea ‘ave ‘e Saula ha toko tolu afe na‘e fili mei ‘Isileli kātoa, pea ne ‘alu ke kumi ‘a Tēvita mo hono kakai, ‘i he fonua maka ‘o e fanga kosi kaivao. 3Pea ne a‘u ki he ngaahi loto‘ā sipi ‘i he hala, pea na‘e ‘i ai ha ‘ana, pea hū ki ai ‘a Saula ke fakafiemālie: ka ‘oku nofo ‘a Tēvita mo ‘ene kau tangata ki he mui ‘ana."

‘I he ‘osi pe fakamavae mo e fe’iloaki faka’osi ‘a Tevita mo Sonatane’, ne hola holo aipe ‘a Tevita mo ‘ene kau tangata ‘e meimei toko 600 meia Saula ‘o ne toi mo unga he ngaahi feitu’u kehekehe. Ne nau toi ‘eni ‘i he taha ‘o e ngaahi ‘ana he toafa ‘o ‘Eniketi’. Ko e feitu’u lelei ‘eni ki he toitoi’, he na’e lahi hono ngaahi ‘ana’, pea ‘i ai foki mo e ngaahi ‘ana lalahi ‘i ai ke nau hao tokolahi ‘i ai… Ne a’u atu e tala kia Saula, ‘a e toi ‘a Tevita mo ‘ene kau tangata’ ‘i he toafa ‘o ‘Eniketi’, ko ia ne tu’u leva ‘a Saula ‘o ne ‘alu mo e toko 3,000 ke kumi kia Tevita ke tamate’i. Ne afe atu ‘a Saula ‘o ma’u mālōlō he taha ‘o e ngaahi ‘ana’, hala ke ne ‘ilo’i ko e ‘ana ia ‘oku lolotonga toi ai ‘a Tevita mo ‘ene kau tangata’, ka ‘oku nau ‘i mui ‘i he ‘ana’. ‘Ikai ha me’a ‘e hoko noa fanau.

Lotu: Lotu ‘o fakamālō ki he ‘Otua´ He’ene malu’i koe mei he ngaahi fokotu’utu’u kovi ‘a e fili’, mo ‘Ene tataki hao ho’o fononga’ ma’upe.

Sapate 12 Novema, 2017

‘OFA’I MO FKMOLEMOLE’I KINAUTOLU ‘OKU FAIKOVI MAI

Veesi Lauloto: Matiu 5:44

"Ka ‘oku ou tala kiate kimoutolu ‘e Au, mou ‘ofa’i homou ngaahi fili, pea hufia ‘a kinautolu ‘oku nau fakatanga’i kimoutolu."

‘I he taimi ne pule’i ai ‘e Loma ‘a e kau Siu’, ne fakana’una’u e kau Siu’ ia ki ha Mīsaia ‘e ha’u ‘o taki tau ke taa’i ‘a Loma. Ka na’e ‘ikai pehee finangalo ia mo e palani fakamo’ui ‘a e ‘Otua’. ‘Uhinga ia ‘o e ‘ikai ke nau tali ‘a e hoko mai ‘a Kalaisi’. Nau fehi’a ki Loma, pea nau loto ke sauni, kae talamai ‘e Sisu ia ‘i he’etau veesi lauloto’, kuopau ke tau ‘ofa’i mo hufia hotau ngaahi fili’, ‘a kinautolu ‘oku nau fakatanga’i kitautolu’. Ko e founga fo’ou’ ia, ‘oku ‘ikai ko e sauna mo totongi tuha ‘a e faikovi mai’, ka ko e totongi ‘aki ‘a e lelei’ ‘a e ngaahi faikovi mai’. He ‘i he’etau fai e akonaki ko ia kuo ‘omi ‘e Kalaisi’, ‘oku tau fakahaa’i atu ai ki mamani, ko Kalaisi ‘oku Pule mo ‘Eiki ‘i he’etau mo’ui’… Ko e fekau faingata’a, ka ko kinautolu ‘oku ‘o Kalaisi’, ‘e malava p eke fai.

Lotu: Lotu ‘o kole ki he ‘Otua´ ke Ne tokoni’i koe ke ‘oua te ke fiu he failelei’, neongo e tanunu mai ho mgaohikovia’ mo fakatanga’i.

Tokonaki 11 Novema, 2017

FETĀNGIHI ‘A TEVITA MO SONATANE’

Veesi Lauloto: 'Efeso 4:24

"Pea ke mou kofu’aki ‘a e tangata fo’ou, ‘a ia na’e ngaohi ke hoko ki he ‘Otua, ‘i he angatonu mo e ma’oni’oni ‘a Mo’oni
"

1 Samiuela 20:35-42
"35Pongipongi hake na‘e hū kitu‘a ‘a Sonatane ki he vao, ki he potu kuo na tālanga ki ai mo Tēvita; pea ‘alu mo ia ha tamasi‘i. 36Pea ne pehē ki he‘ene tama, Lele, ‘o kumi mai ‘a e ngaahi ngahau ‘oku ou fana‘i. Lele ‘a e tama, ka ne fana‘i fakalaka ‘a e ngahau ‘iate ia. 37Pea ‘i he a‘u ‘a e tama ki he potu ‘oku ‘i ai ‘a e ngahau kuo ne fana‘i, pea kalanga atu ‘a Sonatane ki he tama, ‘o pehē, ‘Ikai, ‘oku ‘i kō atu ‘a e ngahau. 38Pea kalanga atu ‘e Sonatane ki he tama, Ngaue, fai vave, ‘oua ‘e tatali. Pea tufi ‘e he tama ‘a e ngaahi ngahau, ‘o ne ‘omi ki hono ‘eiki. 39Pea ko e tama na‘e ‘ikai te ne ‘ilo ha me‘a: ngata ‘ia Sonatane mo Tēvita na‘a na ‘ilo hono ‘uhinga. 40Pea ‘ange ‘e Sonatane ‘ene nāunau ki he‘ene tama, ‘o ne pehē ki ai, ‘Alu, ‘o ‘ave pē ki kolo.
41Pea kuo ‘alu ‘a e tama, pea tu‘u ‘a Tēvita mei he tafa‘aki ‘esi, ‘o ne tō fo‘ohifo, ‘o faka‘apa‘apa tu‘o tolu: ‘o na fekita, mo fetāngihi, pea faifai pea hulu ‘a Tēvita. 42Pea pehē ‘a Sonatane kia Tēvita, ‘alu fiemālie pē, he kuo ta fuakava kitaua ‘i he huafa ‘o e ‘Eiki, ‘o pehē, Ko Sihova te ne ‘i hota vaha‘a, pea ‘i he vaha‘a ‘o hota hako, ‘o ta‘engata. Pea ne tu‘u ‘o ‘alu; ka ka hū ‘a Sonatane ki kolo." 

Ne ‘alu atu leva ‘a Sonatane ki he potu na’a na alea mo Tevita, te ne fana’i ai 
‘a e ngahau’, ke ‘ilo ‘e Tevita pe ‘oku ‘ita ‘a Saula pe lotolelei ange kiate ia. 
Na’a ne fana’i e ngahau’ ki koo atu he fokotu’unga maka’, pea ‘alu ‘a e tama’ 
‘o ‘omi, pea tukuange ia ‘e Sonatane ke ne ‘alu. Pea toki ha’u ‘a Tevita ʻo ne tō 
foʻohifo, ʻo fakaʻapaʻapa tuʻo tolu kia Sonatane. Na’a na toki fe’iloaki mo e 
fetangihi lahi. Pea toki lea atu ʻa Sionatane kia Tevita, “ ʻAlu fiemālie pē, he 
kuo sila’i kitaua ʻi he huafa ʻo e ʻEiki’, pea ko Sihova te Ne ʻi hota vahaʻa´, pea 
ʻi he vahaʻa ʻo hota hako’ ʻo taʻengata”. Neongo na’e ‘osi ‘ilo’i pe ‘e Sonatane 
‘e mole ‘a e tu’unga tu’i’ meiate ia kia Tevita, ka na’e ma’olunga ange ‘ene 
manavahee ki he ‘Otua’ mo ‘ene ‘ofa kia Tevita’.

Lotu: Lotu ‘o kole fakamolemole ki he ‘Otua´ ho’o fa’a faihala koe’uhi’ ko ho’o manavahee ki he tangata’ kae ‘ikai manavahee ki he ‘Otua’…