Tu'apulelulu 31 'Akosi, 2017

FAI’OFA ‘A POASI´

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:8-9

"8Pea lea ‘a Poasi kia Lute, ‘Ikai ‘oku ke ongo‘i, nga‘ata? ‘Oua te ke ‘alu ki ha ‘api kehe, pea ‘oua foki ‘e hiki mei heni, ka ke nofo ai pē mo ‘eku tu‘unga fafine ni. 9Sio ma‘u pē ki he konga vao ‘oku tu‘usi ‘e he kau tama na, pea ke muimui ki he kau ta‘ahine ni: ‘ikai kuo u kouna ‘a e kau tama ke ‘oua te nau ala kiate koe? Pea ka ke ka fie inua, ‘alu ki he ngaahi ‘angavai, ‘o inu mei he me‘a kuo ‘utu ‘e he kau tama."

Pea lea ʻa Poasi kia Lute, “Fanongo mai. ʻOua te ke ʻalu ki ha ʻapi kehe, pea ʻoua foki te ke hiki mei heni´, ka ke nofo ai pē mo ʻeku tuʻunga fafine ni. Sio maʻu pē ki he konga vao ʻoku tuʻusi ʻe he kau tama na, pea ke muimui ki he kau taʻahine ni: he kuo u ‘osi kouna ʻa e kau tama na ke ʻoua te nau ala kiate koe. Pea kapau leva te ke fieinua, ʻalu pe ki he ngaahi ʻangavai, ʻo inu mei he meʻa kuo ʻutu ʻe he kau tama´”. Taimi lahi ‘oku tau fa’a ‘ohovale ‘o ka fai’ofa mai ha taha kiate kita, ka ‘oku ‘i ai pe taimi pehē he fononga´. ‘I he’ete fai ma’u pe hoto lelei taha´ ke langilangi’ia ai e ‘Otua´, pea ‘oku tokanga’i leva kita ‘e Sihova he’ete ngaahi me’a kotoa pē.

Lotu: Lotu ‘o kole ki he ‘Otua´ ke Ne tokoni atu ke ke ‘ofa mo fie tokoni tautautefito ki he masiva´ mo e kau faingata’a’ia.

Pulelulu 30 'Akosi, 2017

KO HAI 'A E FEFINE

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:4-7

"4Pea ‘iloange na‘e ha‘u ‘a Poasi mei Pētelihema, pea ne pehē ki he kau tu‘usi, Ke ‘iate kimoutolu ‘a e ‘Eiki! Pea nau tali, ke tāpuaki‘i ‘e he ‘Eiki ‘a koe! 5Pea pehē ‘e Poasi ki he‘ene tama ngāue na‘e pule ki he kau tu‘usi, Ko e ta‘ahine ‘a hai eni? 6Pea tali ‘a e tama na‘e pule ki he kau tu‘usi, ‘o pehē, Ko e ta‘ahine Moape ia na‘e foki mo Neomai mei he tuku‘uta ‘o Moape: 7pea ne poaki mai, ‘o pehē, Fakamolemole mu‘a, ka u tufi heni, ‘o fakaeve ‘a e moveve ‘o e ‘ū koane ofi ki he kau tu‘usi. Ko ia na‘a ne ha‘u, pea kuo ne nofo‘aki fai mei he ‘anehengihengi ‘o a‘u ki he taimi ni; ngata pē ha‘ane ki‘i mālōlō pe ‘i he fale."

Pea ʻiloange´ ne haʻu ʻa Poasi mei Petelihema, pea ne fakatokanga’i ‘a e ‘asi ‘a e fefine fo’ou´ ‘o ne ‘eke ki he kau tuʻusi´ pe kohai., Pea tali ʻa e tama naʻe pule ki he kau tuʻusi´, ʻo pehē, “Ko e taʻahine Moape ia naʻe foki mo Neomai mei he tukuʻuta ʻo Moape´: pea na’a ne poaki mai pe ke fakamolemole muʻa, ka ne tufi pe ‘i heni. Ko ia naʻa ne haʻu, pea kuo ne nofoʻaki fai mei he ʻanehengihengi ʻo aʻu ki he taimi ni; ngata pe haʻane kiʻi mālōlō pe ʻi he fale´.” Na’e ngaue malohi pe ‘a Lute koe’uhi´ ko e tūkunga ‘oku na ‘i ai mo Naomi´, ‘ikai ha tangata ke tokoni. ‘I he’etau ngaue vekeveke´, ‘oku fakaava ai he ‘Otua´ ‘a e ngaahi matapā ki he tāpuaki´.

Lotu: Lotu ‘o kole ki he ‘Otua´ ke Ne tokoni atu ke ke fai ma’u pe ho lelei taha´ ‘i ha fa’ahinga ngaue pe ‘oku fai.

Tusite 29 'Akosi, 2017

LOTO FIE NGAUE

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:3

"3Pea ne ‘alu, ‘o ne a‘u ki he ngoue‘anga, ‘o ne muimui ‘i he kau tu‘usi, ‘o tufi: pea ‘i he‘ene fāinoa na‘a ne ve‘e tonu ki he konga vao ‘o Poasi, ‘a ia na‘a ne kau ki he fāmili ‘o ‘Elimeleki."

Neongo ko Lute´ ko e muli, ka na’e ‘ikai ke fakanofonofo atu ia ke fakafalala pe kia Naomi. Na’a ne sio ki he tūkunga ‘o Naomi´ kuo vaivai, ko ia na’a ne sio leva ki he me’a ‘e ala lava ke ne fai ke tokoni ki he’ena nofo´. Na’a ne tu’u leva ke ‘alu ‘o kumi ngaue. Pea ‘i he’ene ʻalu´, ʻo ne aʻu ki he ngoueʻanga´, ʻo ne muimui ʻi he kau tuʻusi´, ʻo tufi´: na’a ne faainoa atu ‘o ne veʻe tonu ki he konga vao ʻo Poasi, ʻa ia naʻa ne kau ki he fāmili ʻo ‘Elimeleki´. Na’e tapuaki’i pe ‘a Lute ‘e he ‘Otua´, he na’a ne ngaue fie ngaue mo ‘osikiavelenga he ‘ofa ki he’ene fa’ee ko Naomi´. Fanau, ‘ouae fakapikopiko. Tau ako ‘ia Lute, tau feinga, tau tautapa kia Sihova ke Ne tokoni’i kitautolu he’etau ngaahi fiema’u´.

Lotu: Lotu ‘o kole ki he ‘Otua´ ke Ne tokoni atu ke ke ngaungaue, ‘o ‘ikai fakapikopiko, ka ke loto ke fai ‘a e ngaahi pu’i ho’o mātu’a´.

Monite 28 'Akosi, 2017

LUTE

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:1-2

"1PEA na‘e ai ha kāinga ‘o Neomai ‘i hono husepāniti, ko e matāpule koloa‘ia lahi, ‘o kau ki he fāmili ‘o ‘Elimeleki; pea ko hono hingoa ka Poasi. 2Pea pehē ‘e he fefine Moape ko Lute kia Neomai, Ka u ‘alu ki he vao, ‘o tufi koane ‘i ha taha te ne loto lelei kiate au.
Pea pehē ‘e he finemotu‘a, ‘Alu pē, nga‘ata."

‘I he taimi ‘o e utu ta’u pa’ale´ mo e uite´, ‘oku ta’ofi ‘e he Lao ‘o ‘Isileli´ ke utu ‘a e ngaahi tuliki ‘o e ngoue’anga´, pea kau ai mo ha ngaahi me’a ‘oku ngangana. Kuopau ke tuku ia ai ke si’i ha’u ‘a e masiva´ mo e kau uitou´, kau tamaimate´ ‘o tufi ke ma’u ai ha’anau mo’ui. ‘Oku hangee pe ‘a e lao ko’eni´ ‘i ‘Isileli ha polokalama manava’ofa ‘a ‘Isileli ki hono kakai´, pea ‘e ‘ikai ha taha ia ‘e masiva ‘ango’ango he fonua´. Pea koe’uhi´ ko Lute mo Naomi´ ko e ongo uitou, ne ‘ikai ha’ana ma’u’anga mo’ui. Ko ia ne lea ange leva ‘a Lute kia Naomi, “ Tuku ke u ʻalu mu’a ki he vao´, ʻo tufi koane ʻi ha taha te ne loto lelei kiate au, ke ngaahi ‘aki ha’ata me’akai”. Pea tali lelei pe ‘e Naomi.

Lotu: Lotu ‘o kole ki he ‘Otua´ ke Ne fakatupulekina ho’o tui´ mo ho’o falala kiate Ia koe’uhi´ ko ho’o ngaahi fiema’u.

Sapate 27 'Akosi, 2017

KO E KELESI´ PĒ

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

'Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

He ko e kelesi´ pē kuo tau hoko ai ko e fanau ‘a e ‘Otua´, na’e ‘ikai ke tau ngaue’i pe ko ha’atau poto pe tu’umālie, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole. Ko ia ai, ‘i he’etau hounga’ia he me’a’ofa ta’etotongi ‘o Kalaisi mo ‘Ene kelesi´, pea ‘oku tau ‘ofa leva mo tokoni ki he kakai kehe´, ‘o ‘ikai ke fakataumu’a ke fakatokanga’i mo fakamālō’ia’i kita, ka ke hoko ‘etau ma’u hotau fakamo’ui´ ke ne fakafua mai ‘a e ngaue lelei´ ‘iate kitautolu. Na’e ‘ikai fakamo’ui kitautolu´ ke tau nofo faka-pilinisesi pē ‘o ta’efai ha me’a. Ka na’e fakamo’ui kitautolu´ ke tau ngāue ma’ae lāngilangi ‘o Kalaisi´ tokotaha pē, pea mo tokoni ke langa hake Hono siasi´.

Lotu: Lotu ‘o fakamālō ki he ‘Otua´ He’ene me’a’ofa fungani ‘o e kelesi´ mo hotau fakamo’ui´. Tau fakahounga’i ‘aki ‘etau tuli ke fai Hono finangalo´.

Tokonaki 26 'Akosi, 2017

UTU TA’U PA’ALE´

Veesi Lauloto: Saame 55:16

"Ka ko au ʻoku ou tautapa ki he ʻOtua´; Pea ʻoku fakamoʻui au ʻe Sihova."

Lute 1:22

"22Ko ia na‘e foki ‘a Neomai, pea omi mo ia ‘a Lute, ko e uaifi ‘o ‘ene tama, ko e fefine Moape, ko ‘ena foki mei he tuku‘uta ‘o Moape: pea na‘a na a‘u ki Pētelihema ‘i he kamata utu ‘a e ta‘u pa‘ale."

Ko e foki ko ia ʻa Neomai mo Lute ki Petelihema´, ko e fakakakato pe ia ‘a e palani ‘a e ‘Otua´, he ko Petelihema ‘a e kolo na’e fanau’i ai ‘a Tevita´ (hako ‘o Lute mo Poasi) ‘o hangē ko ia ne palōfisai ‘e he palōfita ko Maika´ (Maika 5:2), Hangē pe ko Kalaisi´, na’e ‘alo’i mo ia ‘i Petelihema. Ko ia ai ko e foki ko ‘eni ‘a Lute mo Naomi ki Petelihema´ ko e fakahoko pe ia ‘a e me’a ne kikite’i mo tala he Folofola´. Pea naʻa na aʻu ki Petelihema ʻi he kamata utu ʻa e taʻu pa’ale´. Ko e taimi ‘eni ‘o e mohu ai ‘a Petelihema. Ko e kolo na’e lahi hono ngaahi ngoue’anga´, pea ‘i he taimi ‘o e ututa’u´, na’e lahi ‘aupito e ngaahi fakatoe ‘i he ngaahi ngoue’anga´ ke tufi mo ma’u mo’ui mei ai ‘a e masiva´ mo e kau uitou´.

Lotu: Lotu ‘o fakamālō ki he ‘Otua´ He’ene palani ‘a e lelei ke ke fou ai ‘o ma’u ai ‘a e mo’ui ‘oku ta’engata.

Falaite 25 'Akosi, 2017

A’U KI PETELIHEMA´

Veesi Lauloto: Saame 55:16

"Ka ko au ʻoku ou tautapa ki he ʻOtua´; Pea ʻoku fakamoʻui au ʻe Sihova."

Lute 1:19-21

"19Pea na fononga ai kinaua, ‘o na a‘u ki Pētelihema. Pea ‘i he‘ena hū ki Pētelihema, pea ngatētē tu‘u ‘a e kolo kotoa kiate kinaua, pea pehē ‘e he kau fefine, Ko Neomai koā eni? 20Pea ne pehē kiate kinautolu, ‘Oua ‘e ui au ko Neomai (ko Melie), ui au ko Mala (ko Kona); he kuo fai kona ‘a Sātai kiate au. 21Na‘a ku ‘alu atu kuo u fonu, pea kuo fakafoki au ‘e Sihova kuo u maha: ko e hā ‘oku mou ui ai au ko Neomai; ‘osi, kuo hopo mo au ‘a Sihova, pea kuo fakamamahi‘i au ‘e Sātai?"

Ne fononga atu leva ‘a Naomi mo Lute, ʻo na aʻu atu ki Pētelihema. Pea ʻi heʻena hū ki Petelihema´, ne omi fiefia ʻa e kolo´ kotoa ke fe’iloaki mo kinaua, pea pehē ʻe he kau fefine´, “Ko Neomai koā eni? Pea ne pehē kiate kinautolu, ʻOua ʻe ui au ko Neomai (ko Melie), ui au ko Mala (ko Kona); he kuo fai kona ʻa Satai kiate au. Naʻa ku ʻalu atu kuo u fonu, pea kuo fakafoki mai au ʻe Sihova kuo u maha: ko e hā ʻoku mou ui ai au ko Neomai, ʻosi kuo hopo mo au ʻa Sihova, pea kuo fakamamahiʻi au ʻe Satai!!” Ne liliu ‘e Neomai hono hingoa´ ki he Naomi´ ke fakahaa’i ‘a e mamahi kuo ne tofanga ai´. Na’a ne ‘alu atu mo hono mali, pea kuo foki mai ‘a Naomi kuo ne masiva mo uitou. Taimi ‘oku ke fou ai ha mamahi fanau, manatu’i ‘oku fanongo mai ‘a e ‘Otua´ ki ho’o ngaahi lotu´, pea te Ne ofi ke tokoni.

Lotu: Lotu ‘o kole ki he ‘Otua´ ke Ne tokoni atu ke ke tautapa ki he ‘Otua´ ‘i he taimi ‘oku ke faingata’a’ia ai´, pea te Ne tokoni’i koe.

Tu'apulelulu 24 'Akosi, 2017

MUIMUI PĒ ‘A LUTE IA ‘IA NAOMI´

Veesi Lauloto: Saame 55:16

"Ka ko au ʻoku ou tautapa ki he ʻOtua´; Pea ʻoku fakamoʻui au ʻe Sihova."

Lute 1:10-14

"15Pea pehē ‘e he finemotu‘a; Vakai, kuo foki ho tokoua ki hono kakai, pea ki hono ‘otua: muimui koe ki ho tokoua. 16Ka ka pehē ‘e Lute, ‘Oua te ka o‘i au ke li‘aki koe, pea ke tuku ‘eku muimui ‘iate koe: he ko e potu ‘oku ke ‘alu ki ai, te u ‘alu ki ai au; pea ko e potu ‘oku ke mohe ai, te u mohe ai: ko ho kakai ko hoku kakai, pea ko ho ‘Otua ko hoku ‘Otua: 17ko e potu te ke pekia ai, te u pekia ai, pea ‘e tanu ai au. ‘Ilo ‘e au, ‘o lahi hake, ‘o kapau ‘e ai ha me‘a ‘e fakamāvae kitaua, ko e mate pē. 18Pea ‘i he vakai ‘e he finemotu‘a kuo pau hono loto ke omi mo ia, na‘a ne tuku ‘ene lea ki ai."

Pea lea atu ‘a Naomi kia Lute, “ Vakai, kuo foki atu ho tokoua´ ki hono kakai´, pea ki hono ʻotua´: muimui atu aa ki ho tokoua”. Ka ka pehē atu ʻe Lute ia, “ʻOua te ke oʻi au ke liʻaki koe, pea ke tuku ʻeku muimui ʻiate koe´: he ko e potu ʻoku ke ʻalu ki ai´, te u ʻalu ki ai au; pea ko e potu ʻoku ke mohe ai´, te u mohe ai: ko ho kakai´ ko hoku kakai, pea ko ho ʻOtua´ ko hoku ʻOtua: ko e potu te ke pekia ai´, te u pekia ai, pea ʻe tanu ai au. Pea ko ‘eni ‘oku ou lea atu si’eku fa’ee, ‘e ‘ikai pē ha me’a ia te ne lava ke fakamāvae kitaua, ka ko e mate´ pe”. Pea ʻi he vakai ʻe he finemotuʻa´ kuo pau hono loto´ ke ‘alu mo ia´, naʻa ne tuku leva ʻene lea ki ai´. Ko Lute ko e fakatātā ia ‘o e ‘ofa ta’efilifilimānako ‘a e ‘Otua´. Neongo na’e kau ‘a Lute ki he matakali ne fakalili’a ki ai ‘a ‘Isileli, ka na’e tāpuaki’i ia ‘e he ‘Otua´ koe’uhi´ ko ‘ene tōnunga´ mo ‘ene faitotonu´ mo ‘ene ‘ofa ‘ia Naomi´.

Lotu: Lotu ‘o kole ki he ‘Otua´ ke Ne tokoni’i koe ke ke fai’ofa ki he kakai kehe´ ‘o hangē ko e fai’ofa mai ‘a Sīsū ma’a kitautolu ‘o tau ma’u ai ‘a e mo’ui´.

Pulelulu 23 'Akosi, 2017

FOKI 'A 'O'OPA

Veesi Lauloto: Saame 55:16

"Ka ko au ʻoku ou tautapa ki he ʻOtua´; Pea ʻoku fakamoʻui au ʻe Sihova."

Lute 1:10-14

"10Pea na pehē kiate ia, ‘Ikai, ka te tau foki mo koe ki ho kakai. 11Ka ka pehē ‘e Neomai, Foki atu pē, nga‘ata; ko ‘etau omi mo au koe‘uma‘ā? ‘Oku toe koā ha ngaahi tama ‘i hoku manava ke mali mo kimoua? 12Foki ā, nga‘ata, ‘o ō; he kuo u motu‘a fau ke toe ma‘u husepāniti. Ka ne u pehē ‘oku ai ha‘aku ‘amanaki ki ai, ‘io, ka ne u ma‘u ha tangata he pō ni, ‘o u fā‘ele‘i ha ongo tama; te mo tatali koā ki he‘ena tangata? 13te mo nofo alafianga ai koā, ‘o ta‘ema‘u husepāniti? ‘Oua, nga‘ata; he ‘oku ou mamahi telia kimoua,he kuo tō kiate au ‘a e tā ‘a Sihova. 14Pea nau toe ofa‘aki ‘enau fākafoa: pea ‘uma ‘a ‘Opa ki he‘ene fa‘ē ka ka pīkitai ki ai ‘a Lute."

Na tangi pe mo pehee atu kia Naomi, “ʻIkai, tau foki pe mo koe ki ho kakai´”. Ne vilitaki atu pe ‘a Naomi, “Mo foki atu pe, ngaʻatā; ko ʻetau omi mo au koeʻumaʻa? Taumaiaa te u to e lava ke fanau ke ‘i ai ha taha ke mou mali. Mo foki atu ki ho’omo mātu’a´, pea ‘oku mo ‘ataa leva ke kumi hamo husepaniti. Ke mo ‘ilo’ia mai, ʻoku ou mamahi telia kimoua, he kuo to kiate au ʻa e taa ʻa Sihova´. Pea nau toe ofaʻaki ʻenau fākafoa´: pea ʻuma ʻa ‘O’opa ia kia Naomi, ‘o ne foki atu ia he hala´ ki hono fāmili´; ka ka pīkitai pe ‘a Lute ia kia Naomi. Ne loto ‘a ‘O’opa ia ke nofo pe ia ‘i hono kakai´ ‘o to e kumi hano mali, ka ko Lute na’a ne loto pe ke muimui ‘ia Naomi ke tauhi ia he kuo ne a’ua’u.

Lotu: Lotu ‘o kole ki he ‘Otua´ ke Ne tokoni atu ke ke ma’u e loto ‘ofa ‘o Kalaisi´, ke ke ‘ofa ki he masiva’ mo e kau mahaki´, kau uiitou´ mo e kau vaivai´.

Tusite 22 'Akosi, 2017

FOKI KI PETELIHEMA

Veesi Lauloto: Saame 55:16

"Ka ko au ʻoku ou tautapa ki he ʻOtua´; Pea ʻoku fakamoʻui au ʻe Sihova."

Lute 1:6

"6Pea nau tutu‘u, ‘e ia mo e ongo uaifi ‘o ‘ene ongo tama, ke ne foki mei he tuku‘uta ‘o Moape: he kuo ne fanongo ‘i he tuku‘uta ‘o Moape kuo ‘a‘ahi ‘a e ‘Eiki ki hono kakai, he‘ene tuku ke nau ma‘u me‘akai."

Fai atu pē ‘enau nofo´, kuo fanongo ‘a Naomi kuo fai’ofa ‘a Sihova ki Siuta, kuo ‘i ai e me’akai ‘i ai. Ko ia na’a nau teuteu leva ki he foki ki Siuta. Pea nau tutuʻu, ʻe ia mo e ongo uaifi o ʻene ongo tama´, ke ne foki mei he tukuʻuta ʻo Moape´, ke ne foki aa ki Petelihema, Siuta. Pea ne ʻalu atu mei he potu kuo ne nofo ai´, pea ō mo ia ʻene ongo fafine´; pea nau fou ʻi he hala´ ke foki ki he fonua ʻo Siuta´. Pea lea ʻa Naomi ki heʻene ongo fafine´, ‘Lute mo ‘O’opa, mo ha’u ke mo foki aa taki taha ki he fale ‘o ʻene faʻē´; tauange mo Sihova ke ne fai ʻofa kiate kimoua, ʻo hangē ko hoʻomo fai’ofa kiate au mo hoku hoa´, mo homo ongo hoa´. Ke tuku mai ʻe Sihova ke mo maʻu ha maloloʻanga taki taha ʻi he fale ʻo hano husepāniti. Pea ne toki ʻuma kiate kinaua; pea nau fefāka-foa’aki. ‘Ikai loto ‘a Lute ia mo ‘O’opa ke nau māvae, kae loto ‘a Naomi ke na oo aa l. Mahu’inga ma’u pe fanau, ke ‘oua te tau siokita, ka tau tokanga foki ki he ngaahi me’a hotau kaunga’api´.

Lotu: Lotu ‘o kole ki he ‘Otua´ ke Ne tokoni atu ke ke ‘ofa ki ho kaunga’api´ ‘o hange tofu pe ko ‘ete ‘ofa kiate kita´.

Monite 21 'Akosi, 2017

HIKI KI MOAPE

Veesi Lauloto: Saame 55:16

"Ka ko au ʻoku ou tautapa ki he ʻOtua´; Pea ʻoku fakamoʻui au ʻe Sihova."

Lute 1:1-5

"1PEA ko eni, ‘i he taimi na‘e pule ai ‘a e Kau Fakamaau na‘e honge ‘a e fonua. Pea na‘e ‘alu ha tangata mei Pētelihema-Siuta ke ‘āunofo ‘i he tuku‘uta ‘o Moape, ‘a ia mo hono uaifi mo hono ongo foha. 2Pea ko e hingoa ‘o e tangata ko ‘Elimeleki, pea ko hono uaifi ka Neomai, pea ko hono ongo foha ko Māloni mo Kilioni, ko e tu‘unga ‘Efalata kinautolu mei Pētelihema-Siuta. Pea na‘a nau a‘u ki he tuku‘uta ‘o Moape, ‘o nofo ai. 3Pea pekia ‘a ‘Elimeleki ko e husepāniti ‘o Neomai; pea na‘e tuku ‘a e finemotu‘a mo ‘ene ongo tama. 4Pea na mali mo ha ongo fafine Moape; ko e hingoa ‘o e taha ko ‘Opa, pea ko e taha ko Lute: pea nau nofo ai ‘o hongofulu ta‘u nai. 5Pea pekia ‘a Māloni mo Kilioni fakatou‘osi; pea tuku ‘a e finemotu‘a ta‘eha‘ane ongo tama mo hano husepāniti."

‘I he kuonga ‘o e kau fakamaau´, naʻe honge ʻa Siuta. Ko ia, naʻe ʻalu ai ha tangata mo hono fāmili´ mei Petelihema, Siuta ke ʻāunofo ʻi he tukuʻuta ʻo Moape´, ʻa ia mo hono uaifi´ mo hono ongo foha ‘e toko 2. Pea ko e hingoa ʻo e tangata´ ko ‘Elimeleki, pea ko hono uaifi´ ko Neomai(pe Naomi), pea ko hono ongo foha´ ko Māloni mo Kilioni. Ne fuoloa si’i atu pē kuo pekia ʻa ‘Elimeleki ia. Pea mali leva ‘a Maloni mo Kilioni mo ha ongo fafine Moape; ko e hingoa ʻo e taha´ ko ‘O’opa, pea ko e taha ko Lute: pea nau nofo ai ʻo hongofulu taʻu nai. Pea toe pekia ʻa Maloni mo Kilioni fakatouʻosi; ko e tā o’o ‘eni kia Naomi. ‘Ai ai ‘ene mama’o mei hono fonua´, mo e to e pekia hono hoa´ mo hona ongo foha´.

Lotu: Lotu ‘o kole ki he ‘Otua´ ke tokoni atu ke ke ma’u e nonga´ mo e fiemālie´, he taimi ho’o mamahi´.

Sapate 20 'Akosi, 2017

‘OTUA MOHU ‘ALO’OFA

Veesi Lauloto: 1 Timote 5:22

"Ka ko e ngaahi holi fakatalavou´, ke ke hola mei ai; ka ke tuli ki he māʻoniʻoni´, ki he tui´, ki he ʻofa´, pea ki he feʻofoʻofani mo e kakai ʻoku lotu ki he ʻEiki´, mei he loto maʻa."

Fakamaau 16:22-30

"  22Ka na‘e kamata ke toe tupu hono lou‘ulu hili hono fafai.
23Pea fakataha ‘a e hou‘eiki hau ‘o e kau Filisitia ke feia ha feilaulau lahi kia Tākoni ko honau fa‘ahikehe, pea ke fakafiefia: he na‘a nau pehē, Ko hotau ‘otua kuo ne tuku ki hotau nima ‘a hotau fili ko Samisoni. 24Pea ‘i he sio kiate ia ‘e he kakai na‘a nau halelu‘ia ki honau ‘otua; he na‘a nau pehē, Ko hotau ‘otua kuo ne tuku ki hotau nima ‘a hotau fili, ‘a e toko taha na‘a ne maumau‘i ‘a hotau fonua, pea kuo ne tāmate‘i hotau tokolahi. 25Pea ‘i he faifai pea māfana honau loto, na‘a nau pehē, Ui mai ‘a Samisoni ke ne fai faiva ma‘atautolu. Pea na‘a nau ui mai ‘a Samisoni mei he fale pōpula; pea na‘a ne fai faiva ‘i honau ‘ao pea na‘a nau taki ia ki he vaha‘a pou. 26Pea na‘e lea ‘a Samisoni ki he tama na‘e puke hono nima, Tuku ke u fāfā ki he ongo pou ‘a ia ‘oku tu‘u ai ‘a e fale, ka u faaki ki ai. 27Ka ko e fale na‘e fonu ‘i he kakai tangata mo e kakai fefine; pea na‘e ‘i ai ‘a e hou‘eiki hau kotoa ‘o e kau Filisitia; pea na‘e nofo mei he tu‘a fale ha toko tolu afe nai, ‘a tangata mo fafine, ‘o nau mamata ki he fai faiva ‘a Samisoni. 28Pea tautapa ‘a Samisoni kia Sihova, ‘o ne pehē: ‘Ātonai Sihova ē, manatu‘i au; ‘io, fakamālohi‘i au, ‘Elohimi ē, ‘a e tātu‘otaha ko eni: kehe pē ke u sauni ki he kau Filisitia ha taha ‘o hoku ongo poko‘i mata ‘o‘oku ni! 29Pea fā‘ofua ‘e Samisoni ‘a e ongo fu‘u pou loto, ‘a ia na‘e tu‘u ai ‘a e fale, ‘o ne puke ‘a e taha ‘aki hono nima to‘omata‘u mo e taha ‘aki hono to‘ohema. 30Pea pehē ‘e Samisoni, Ke mole ‘eku mo‘ui fakataha mo e kau Filisitia! Pea ne tulolo ‘aki hono ivi kotoa, pea na‘e holo ‘a e fale ki he hou‘eiki mo e kakai kotoa na‘e ‘i ai. Ko ia ko e kakai na‘a ne tāmate‘i ‘i he‘ene pekia na‘e tokolahi ‘i he kakai na‘a ne tāmate‘i ‘i he‘ene mo‘ui. 31Pea na‘e ‘alu hifo hono kāinga mo e fale kotoa ‘o ‘ene ‘eiki, pea na‘a nau fata ia, ‘o ‘ohake, ‘o nau telio ‘i he vaha‘a ‘o Sola mo ‘Esitaoli, ‘i he fonualoto ‘o ‘ene ‘eiki ko Mānoa. Pea kuo ne fakamaau ‘a ‘Isileli ‘i he ta‘u ‘e uofulu."

Neongo ‘a e ngaahi fehālaaki ‘a Samisoni´, ka na’e tali pē ‘e he ‘Otua´ ‘ene lotu´ ke faka’auha ‘a e fu’u temipale lotu hīteni ‘o e kau Filisitia´ mo e fu’u kau Filisitia ne nau ‘i ai ‘o hū kia Tākoni´. Na’e kei ‘ofa pē ‘a e ‘Otua´ kiate ia, ‘o ne tokoni ofi kiate ia he’ene tautapa faka’osi ki hono ‘Otua´. Fakatauange fanau, ke ‘oua na’a hanga he’etau ongo’i halaia koe’uhi´ ko ‘etau angahala´ ‘o ta’ofi kitautolu mei he tautapa ki he ‘Otua´, ‘a e me’a ‘e fai ai hotau fakalelei´ mo fakafoki ki he ‘Otua´. ‘Ouae tali ke te ongo’i sai pea te toki lotu´. Neongo e kula ‘aho’aho ho’o hia´, tafoki leva ki he ‘Otua´. Kapau na’a Ne kei fakamolemole’i pe ‘a Samisoni, fēfē ai kitaua. Kehe pe ke ke loto ki ai.

Lotu: Lotu ‘o fakamālō ki he ‘Otua´ He’ene kelesi´ mo ‘Ene meesi´, ‘a ē ‘oku to e ‘omi ai hota faingamālie ki he mo’ui ta’engata´... Fakafeta’i ‘Eiki!!!

Tokonaki 19 'Akosi, 2017

IKUNA FAKA’OSI ‘A SAMISONI´

Veesi Lauloto: 1 Timote 5:22

"Ka ko e ngaahi holi fakatalavou´, ke ke hola mei ai; ka ke tuli ki he māʻoniʻoni´, ki he tui´, ki he ʻofa´, pea ki he feʻofoʻofani mo e kakai ʻoku lotu ki he ʻEiki´, mei he loto maʻa."

Fakamaau 16:22-30

"  22Ka na‘e kamata ke toe tupu hono lou‘ulu hili hono fafai.
23Pea fakataha ‘a e hou‘eiki hau ‘o e kau Filisitia ke feia ha feilaulau lahi kia Tākoni ko honau fa‘ahikehe, pea ke fakafiefia: he na‘a nau pehē, Ko hotau ‘otua kuo ne tuku ki hotau nima ‘a hotau fili ko Samisoni. 24Pea ‘i he sio kiate ia ‘e he kakai na‘a nau halelu‘ia ki honau ‘otua; he na‘a nau pehē, Ko hotau ‘otua kuo ne tuku ki hotau nima ‘a hotau fili, ‘a e toko taha na‘a ne maumau‘i ‘a hotau fonua, pea kuo ne tāmate‘i hotau tokolahi. 25Pea ‘i he faifai pea māfana honau loto, na‘a nau pehē, Ui mai ‘a Samisoni ke ne fai faiva ma‘atautolu. Pea na‘a nau ui mai ‘a Samisoni mei he fale pōpula; pea na‘a ne fai faiva ‘i honau ‘ao pea na‘a nau taki ia ki he vaha‘a pou. 26Pea na‘e lea ‘a Samisoni ki he tama na‘e puke hono nima, Tuku ke u fāfā ki he ongo pou ‘a ia ‘oku tu‘u ai ‘a e fale, ka u faaki ki ai. 27Ka ko e fale na‘e fonu ‘i he kakai tangata mo e kakai fefine; pea na‘e ‘i ai ‘a e hou‘eiki hau kotoa ‘o e kau Filisitia; pea na‘e nofo mei he tu‘a fale ha toko tolu afe nai, ‘a tangata mo fafine, ‘o nau mamata ki he fai faiva ‘a Samisoni. 28Pea tautapa ‘a Samisoni kia Sihova, ‘o ne pehē: ‘Ātonai Sihova ē, manatu‘i au; ‘io, fakamālohi‘i au, ‘Elohimi ē, ‘a e tātu‘otaha ko eni: kehe pē ke u sauni ki he kau Filisitia ha taha ‘o hoku ongo poko‘i mata ‘o‘oku ni! 29Pea fā‘ofua ‘e Samisoni ‘a e ongo fu‘u pou loto, ‘a ia na‘e tu‘u ai ‘a e fale, ‘o ne puke ‘a e taha ‘aki hono nima to‘omata‘u mo e taha ‘aki hono to‘ohema. 30Pea pehē ‘e Samisoni, Ke mole ‘eku mo‘ui fakataha mo e kau Filisitia! Pea ne tulolo ‘aki hono ivi kotoa, pea na‘e holo ‘a e fale ki he hou‘eiki mo e kakai kotoa na‘e ‘i ai. Ko ia ko e kakai na‘a ne tāmate‘i ‘i he‘ene pekia na‘e tokolahi ‘i he kakai na‘a ne tāmate‘i ‘i he‘ene mo‘ui."

‘I he fuoloa si’i atu pē kuo to e kamata ke tupu mai ‘a e lou'ulu ‘o Samisoni´. Ne 'omi 'a Samisoni ‘e he kau Filisitia´ ke fai faiva lolotonga 'enau kātoanga feilaulau ki honau 'otua ko Tākoni´. Nau feinga pē ke fakangalivale’i mo’oni ‘a Samisoni mo e ‘Otua ‘o ‘Isileli´. Ne kole 'a Samisoni ki he tangata na’e taki hono nima´ ke 'ave mu’a ia ke ne fā ki he ongo pou 'oku tu'u ai 'a e fale´, pea ne fakatomala mo’oni ‘o ne lotu 'o kole ha mālohi mei he ‘Otua´, ke ne fakahā faka’osi ‘I he ‘ao ‘o e kau ta’elotu ni ‘a e māfimafi ‘o Sihova´. Pea pehē 'e Samisoni, "Ke mole 'eku mo'ui´ fakataha mo e kau Filisitia´."; pea ne tulolo'aki hono ivi´ kotoa, ‘o ne teke’i ‘a e ongo pou ‘o e fale´, pea holo 'a e fale´ ki he hou'eiki´ mo e kakai na'e 'i ai´. Ne tokolahi ange kau Filisitia ne tāmate'i 'e Samisoni he’ene mate´ ‘i he’ene mo'ui.

Lotu: Lotu ‘o fakamālō ki he ‘Otua´ koe’uhi´ ko ‘Ene faka’atu’i mo fakalotolahi he’etau fetō’aki mo ‘etau fa’a tōmohumu.

Falaite 18 'Akosi, 2017

TAUTEA ‘O E TA’ETOKANGA´ MO E ANGAHALA´

Veesi Lauloto: 1 Timote 5:22

"Ka ko e ngaahi holi fakatalavou´, ke ke hola mei ai; ka ke tuli ki he māʻoniʻoni´, ki he tui´, ki he ʻofa´, pea ki he feʻofoʻofani mo e kakai ʻoku lotu ki he ʻEiki´, mei he loto maʻa."

Fakamaau 16:21

" 21Pea puke ia ‘e he kau Filisitia, ‘o nau kape‘i hono ongo mata, ‘o nau ‘ohifo ki Kesa, pea nau ha‘i palasa; pea na‘a ne fai ‘a e momosi ‘i he fale fakapōpula."

Ko Samisoni ‘eni, ko e helo mo e to’a he tau´, kuo ne hoko ko e pōpula. Na’e ‘ikai tāmate’i ia he kau Filisitia´, ka na’a nau loto pē ke fakamaa’i ia he ‘ao ‘o e kakai´. Ko ia, na’a nau puke ia, ʻo nau kapeʻi hono ongo mata´, ʻo nau ʻohifo ki Kesa, pea nau haʻi palasa ia; pea naʻa ne fai ʻa e momosi ʻi he fale faka-pōpula´. Mahalo pē kuo ne fakakaukau loto ki he’ene ngaahi fehālaaki´, pea ne fakatomala. Tauange ke tau ako kei taimi he ngaahi akonaki kuo tuku mai he’etau ngaahi Folofola faka’aho´ fānau, ‘ouae tali ke te tō ki luo ‘o toki fakatomala mei ai, hangē ko Samisoni´.

Lotu: Lotu 'o kole ki he ‘Otua´ ke Ne to e ‘omi pē hao faingamālie ke fakafoki koe kiate Ia, pea ke ‘oua na’a ke to e mavahe meiate Ia.

Tu'apulelulu 17 'Akosi, 2017

MAVAHE ‘A SAMISONI MEI HE ‘OTUA´

Veesi Lauloto: 1 Timote 5:22

"Ka ko e ngaahi holi fakatalavou´, ke ke hola mei ai; ka ke tuli ki he māʻoniʻoni´, ki he tui´, ki he ʻofa´, pea ki he feʻofoʻofani mo e kakai ʻoku lotu ki he ʻEiki´, mei he loto maʻa."

Fakamaau 16:18-20

"18Pea vakai ‘e Tīlila kuo ne tala eni hono loto kotoa, pea ne fekau ‘o ui mai ‘a e hou‘eiki hau ‘o e kau Filisitia, ‘o ne pehē, Me‘a mai ‘a e tātu‘otaha ko eni; he kuo ne fakahā mai ‘a e kotoa ‘o hono loto. Pea hā‘ele hake ki he fefine ‘a e hou‘eiki hau ‘o e kau Filisitia, ‘o nau ‘alu mo kinautolu ‘a e pa‘anga. 19Pea na‘a ne fakamohe ia ‘i hono funga; ‘o ne ui ange ‘a e tangata, pea tele ‘e he fefine ‘a e fiinga ‘e fitu ‘i hono ‘ulu; ‘o ne kamata ke fakavaivai‘i ia, pea na‘e mahu‘i hono ivi meiate ia. 20Pea ne pehē ange, Samisoni ē, ko e kau Filisitia ena ‘oku ‘oho mai kiate koe! Pea ne ‘ā mei he‘ene mohe, ‘o ne pehē, Te u ‘alu atu pē ‘o hangē ko ‘eku fa‘a fai, ‘o tupe‘i. Ka na‘e ‘ikai te ne ‘ilo kuo mahu‘i ‘a e ‘Eiki meiate ia."

Pea naʻa ne fakamohe ia e Tilila i hono funga´; ʻo ne ui ange ʻa e taha ke ne tele ʻa e ʻulu o Samisoni´; ʻo ne kamata ke fakavaivaiʻi ia, pea naʻe mahuʻi hono ivi´ meiate ia. Pea pehē ange a Tilila, “Samisoni, ko e kau Filisitia´ ena ʻoku ʻoho mai kiate koe! Pea ne ʻā mei heʻene mohe´, ʻo ne pehē e ʻalu atu pē ʻo hangē ko ʻene faʻa fai´, ʻo tupeʻi. Ka naʻe ʻikai te ne ʻilo kuo mahuʻi ʻa e ʻEiki´ meiate ia. Ko e fihai taimi ee ene vaingaaki a e ofa a e Otua´ mo hono tuunga Nāsili´. Ko e tenga naa ne tō´, ko ia pē kuo ne utu´. Oku tau koviia he tōonga taetokanga a Samisoni´, ka oku fēfē kitautolu fānau? Oku ke tuumau ho tuunga kalisitiane´ he taimi o e ahiahi´ mo e fakahekeheke a e fili? Ka oku poto a e fili´ he kākā´, ai ke tau to e poto ange tautolu he nofomau ia Sīsū´ mo e tui totonu.

Lotu: Lotu 'o kole fakamolemole ki he ‘Otua´ ho’o fa’a talangata’a mo taungutu mo faifai loto´.

Pulelulu 16 'Akosi, 2017

TŌ ‘A SAMISONI ‘IA TILILA´

Veesi Lauloto: 1 Timote 5:22

"Ka ko e ngaahi holi fakatalavou´, ke ke hola mei ai; ka ke tuli ki he māʻoniʻoni´, ki he tui´, ki he ʻofa´, pea ki he feʻofoʻofani mo e kakai ʻoku lotu ki he ʻEiki´, mei he loto maʻa."

Fakamaau 16:16-17

"16Pea ‘i he‘ene fakafiu kiate ia, ‘i he‘ene lau ‘i he ‘aho kotoa pē, mo fakakina kiate ia, na‘e faifai pea ‘ikai te ne meimei kātaki ke mo‘ui; 17ko ia na‘a ne tala ki he fefine hono loto kotoa, ‘o ne pehē ki ai, Kuo te‘eki ke ‘ai ha tele ki hoku ‘ulu, he kuo u nofo ko e nāsili ki he ‘Otua talu hoku fanau‘i. Kapau ‘e fafai au, pea ‘e toki mahu‘i meiate au hoku ivi, pea te u vaivai ‘o tatau mo ha tangata kehe."

Pea ʻi he hokohoko ‘aho pē hono fakafiu’i mo fakakina’i ‘e Tilila ‘a Samisoni´, ko ia na’a ne iku ai ‘o ne tala ki he fefine´ hono loto´ kotoa, ʻo ne pehē ki ai, “Kuo teʻeki ke ʻai ha tele ki hoku ʻulu´, he kuo u nofo ko e Nāsili ki he ʻOtua´ talu hoku fanauʻi. Kapau ʻe kosi hoku ‘ulu´, pea ʻe toki mahuʻi meiate au hoku ivi´, pea te u vaivai ʻo tatau mo ha tangata kehe.” Tatau tofu pē ‘eni mo e olo poto na’e fai ‘e he ngata´ kia ‘Ivi he ngouetapu ko ‘Iteni´. ‘Osi pea hola ia kae fehangahangai ‘a ‘Ivi ia mo ‘Atama mo e ‘Otua´. Ko e tu’o ua ‘eni ‘a e fakavaivai ‘a Samisoni ki he fefine, ‘o ne fakamaa’i ai hono ‘Otua´. Fānau, tauange ke ‘oua na’a ke tali ha fakahekeheke’i koe ‘e ha taha ke ke faihala.

Lotu: Lotu ‘o kole ki he ‘Otua´ ke Ne ‘oatu ha konisēnisi tokanga ke ke kalo mo mavahe mei he angahala´ mo e ‘ahi’ahi´.

Tusite 25 'Akosi, 2017

TA'EMANGOI 'A E FILI

Veesi Lauloto: 1 Timote 5:22

"Ka ko e ngaahi holi fakatalavou´, ke ke hola mei ai; ka ke tuli ki he māʻoniʻoni´, ki he tui´, ki he ʻofa´, pea ki he feʻofoʻofani mo e kakai ʻoku lotu ki he ʻEiki´, mei he loto maʻa."

Fakamaau 16:6-15

"6Ko ia, na‘e lea ai ‘a Tīlila kia Samisoni, Tala mai mu‘a pe ‘oku tu‘u ‘i he hā ho fu‘u ivi na, mo e hā ‘e lava ‘aki ho ha‘i ke fakavaivai‘i?
7Pea tali ‘e Samisoni ki ai, Ka ne ha‘i ‘aki au ha fitu‘i fau mata ‘a ia kuo te‘eki ke fakamōmoa, te u toki vaivai ai, ‘o u hoko ‘o hangē ha tangata kehe.
8Pea ‘ohake ki he fefine ‘e he hou‘eiki hau ‘o e kau Filisitia ha fitu‘i fau mata ‘a ia kuo te‘eki ke fakamōmoa; pea na‘a ne ha‘i ‘aki ia. 9Pea na‘e ai ha ni‘ihi na‘e nofo ke tokoni ki he fefine, ‘o nau toi ‘i he loki. Pea pehē ‘e he fefine kiate ia, Samisoni ē, ko e kau Filisitia ena ‘oku ‘oho mai kiate koe! Pea na‘a ne motuhi ‘a e fau, ‘o hangē ko e motu ha filo te‘ekafa ‘oka ki‘i lave ki ai ‘a e maama. Ko ia na‘e ‘ikai ‘iloa hono ivi.
10Pea pehē ‘a Tīlila kia Samisoni, Ko eni kuo ke kākaa‘i au, pea kuo ke lea‘aki mai ha koto loi; ‘ā! ke ke tala mai mu‘a pe ko e hā ‘e ha‘i ‘aki koe.
11Pea pehē ‘e ia ki he fefine, Kapau te nau mātu‘aki ha‘i au ‘aki ha ngaahi maea fo‘ou, ‘a ia kuo te‘eki fai‘aki ha ngāue, pea te u toki vaivai ai, ‘o tatau mo ha tangata kehe.
12Ko ia na‘e to‘o ‘e Tīlila ha ngaahi maea fo‘ou, ‘o ne ha‘i ‘aki ia, ‘o ne toki pehē ki ai, Samisoni ‘ē, ko e kau Filisitia ena ‘oku ‘oho mai kiate koe! (he na‘e ai ha malumu na‘e nofo ‘i he loki). Pea na‘a ne motuhi ‘a e ngaahi maea mei hono nima hangē ha filo.
13Pea lea ‘a Tīlila kia Samisoni, Tā ko ho‘o lea kotoa pē kiate au ko e koto kākā pē mo e loi; tala mai pe ko e hā ‘e ha‘i ‘aki koe.
Pea tali ‘e ia ki ai, Ka ne ke lalanga hoku fitu‘i fiinga ni fakataha mo e lālanga–
14Pea hanga ‘e he fefine, ‘o ne fakama‘u ‘aki ‘a e fa‘o, pea ne pehē ange, Samisoni ē, ko e kau Filisitia ena ‘oku ‘oho mai kiate koe! Pea ne ofo mei he‘ene mohe, ‘o ne ta‘aki ‘a e fa‘o ‘o e me‘a lalanga, pea mo e me‘a kuo lalanga.
15Pea pehē ‘e he fefine kiate ia, ‘Oku fēfē ho‘o lau ‘o pehē, ‘Oku ou ‘ofa kiate koe; ‘osi, ‘oku ‘ikai ‘iate au ho loto? ko e ta tu‘o tolu eni ho‘o kākaa‘i au, pea ‘oku ‘ikai te ke tala mai pe ‘oku tu‘u ‘i he hā ho fu‘u ivi na."

Ne kole fakahekeheke ‘a Tilila kia Samisoni ke fakahā ange mu’a 'a e faka-pulipuli 'o hono mālohi´, mo e toutou lohiaki’i pē ‘e Samisoni. Na’a ne ‘uluaki talaange ke ha'i 'aki ia ha fitu'i fau mata, ka na'a ne motuhi pē ‘e ia kotoa. Pea ne to e talaange ke ha'i 'aki ia ha ngaahi maea fo'ou te'eki ngaue'aki, ka na'a ne motuhi pē ‘e ia hangē ha filo´. Pea to e fakahā ange 'e Samisoni ke lalanga fakataha hono lou'ulu´ mo e lālanga´ ('a ia kuopau ke tuki fa'o ki he papa lālanga´) ka na'a ne kei ta'aki pē. Kuo hanu mo’oni ‘a Tilila he’ene toutou lohiaki’i ia´. Ko e mo’ui angahala’ia´ ia, ko e fa’ahinga lēvolo ma’ulalo taha ia he mo’ui´. Tau’aki loi, tau’aki ‘afungi, tau’aki ta’aki, tau’aki tangata. Hola mei ai fānau. Ko e iku’anga ‘o e fa’ahinga mo’ui ko ia´ ko e ‘auha´.

Lotu: Lotu ‘o kole ki he ‘Otua´ ke Ne tokoni’i koe ke ke hola ma’upē kiate Ia, ke ke hao mei he fakatauvele ‘a e fili´.

Monite 14 'Akosi, 2017

TILILA

Veesi Lauloto: 1 Timote 5:22

"Ka ko e ngaahi holi fakatalavou´, ke ke hola mei ai; ka ke tuli ki he māʻoniʻoni´, ki he tui´, ki he ʻofa´, pea ki he feʻofoʻofani mo e kakai ʻoku lotu ki he ʻEiki´, mei he loto maʻa."

Fakamaau 16:4-5

"4Pea hili ia na‘e faifai pea ne ‘ofa ki ha fefine ‘i he tele‘a ‘o Sōleki, pea ko e hingoa ‘o e fefine ko Tīlila. 5Pea hā‘ele ange ki he fefine ‘a e hou‘eiki hau ‘o e kau Filisitia, ‘o nau pehē kiate ia, Fakatalanoa‘i ia ke vakai pe ‘oku tu‘u ‘i he hā hono fu‘u ivi, pea tu‘u ‘i he hā ha‘atau lava‘i ia, ka mau ha‘i ia ke fakavaivai‘i: pea te mau toki ‘atu ‘e kimautolu takitaha ha afe‘i pa‘anga mo ha teau."

‘Ikai pē ke ako ‘a Samisoni ‘i hono ‘uluaki mali´. ‘Ikai pē ke tokanga ke mo’ui ma’a mo mo’ui fakatāpui, he ko e Nāsili ia. Kuo to e ha’u pē ia ‘o kaume’a mo e fefine Filisitia ‘e taha ko Tilila, ko e fefine na'e 'ikai ke tui ia mo lotu ki he 'Otua mo'oni´. Ne ‘unu atu e kau Filisitia´ kia Tilila ‘o palōmesi ha pa’anga ma’ana kapau te ne fakahā ange 'a e mālohinga 'o Samisoni´, pe ʻoku tuʻu ʻi he hā hono fuʻu ivi´, pea ‘e fēfē haʻanau lavaʻi ia, ka nau toki haʻi ia ke fakavaivaiʻi: pea te nau toki ʻatu ki ai ha taki taha ha afeʻi paʻanga mo ha teau. Poto mo’oni pē fili´ ia he fai e me’a ko e fakahekeheke. Fielau he ko e pōto’i he pō kakai, mo e mounu’i ‘aki e tangata´ ‘aki e me’a ‘oku matamatalelei mo manakoa ki hono u’a´. Ko e kuonga fakamui´ ‘eni fānau, pea ‘oku to e liuliunga mo mālohi ange ‘a e ‘oho ‘a e fili´. Nofoma’u ‘ia Sīsū, pea ke ‘ā’ā mo tokanga.

Lotu: Lotu ‘o kole ki he ‘Otua´ ke Ne fakama’a ho loto´ , ke ke loto ke mo’ui ma’a mo talangofua ‘o taau mo e fānau ‘a e ‘Otua´.

Sapate 13 'Akosi, 2017

TULI KI HE MO’UI MĀ’ONI’ONI´

Veesi Lauloto: 1 Timote 5:22

"Ka ko e ngaahi holi fakatalavou´, ke ke hola mei ai; ka ke tuli ki he māʻoniʻoni´, ki he tui´, ki he ʻofa´, pea ki he feʻofoʻofani mo e kakai ʻoku lotu ki he ʻEiki´, mei he loto maʻa."

1 Timote 5:22

‘Oku talamai he’etau veesi lauloto´ ke tau hola mei he ngaahi holi faka-talavou´, ka tau tuli ki he mo’ui māʻoniʻoni´, ki he tui´, ki he ʻofa´, pea ki he feʻofoʻofani mo e kakai ʻoku lotu ki he ʻEiki´, mei he loto maʻa. ‘Oku mahu’inga e faka’ehi’ehi´ fānau, kae lava ke te talangofua ki he fekau ‘oku ‘omi he’etau veesi lauloto´. Tau ‘ofa mo tokoni ki he kakai kehe´, ka te mātu’aki tokanga he feohi mo e fānau ‘oku natula talangata’a mo fakafepaki´, telia na’a fai atu pē kuo te fa’ifa’itaki kita ki he’enau mo’ui angahala’ia´ pea te ‘alu kita ai. Pea te hahaka hake pē kuo ‘ikai ke te to e lava ke matanga mei he angahala´.

Lotu: Lotu ‘o kole ki he ‘Otua´ ke Ne fakama’a ho loto´ , ke ke loto ke mo’ui ma’a mo talangofua ‘o taau mo e fānau ‘a e ‘Otua´.

Tokonaki 12 'Akosi, 2017

HUI KOU'AHE 'O HA 'ASI

Veesi Lauloto: 1 Kolinito 10:31

"Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pē ke ongoongolelei ai ʻa e ʻOtua´."

Fakamaau 15:14-20

"14Ha‘u ai ia ki Lehi, pea tuē ‘a e kau Filisitia ‘i he‘enau fakafetaulaki ki ai: ka ka ‘ohofia ia ‘e he Laumālie ‘o e ‘Eiki, pea ko e ongo maea na‘e ‘i hono nima na‘e hoko leva ‘o hangē ha vavae kuo mōfia ‘i he maama, pea na‘e mokulu ‘a e ha‘i mei hono nima. 15Pea na‘a ne ‘ilo ‘a e hui kou‘ahe fo‘ou ‘o ha ‘asi, ‘o ne ala ‘o to‘o, ‘o ne te‘ia ‘aki ha afe‘i tangata. 16Pea lea hake ‘a Samisoni,
Ko ha hui kou‘ahe pē ‘o ha ‘asi,
Kae hono taha ‘a e esi!
Ko e hui kou‘ahe pē ‘o ha ‘asi,
Kuo u tāmate‘i ‘aki ha afe‘i kakai.
17Pea hili ‘ene lea ko ia, na‘a ne li‘aki ‘a e hui kou‘ahe; pea na‘e ui ‘a e potu ko ia ko Lama-Lehi (ko Lī‘anga-hui-kou‘ahe).
18Pea ne mate he fie inu, ‘o ne tautapa ki he ‘Eiki, ‘o ne pehē, Ko eni kuo ke fakafai ‘i ho‘o tamaio‘eiki ‘a e fu‘u fakahaofi ko eni, ka u mate ai au he fie inu, ‘o tō ki he nima ‘o e fa‘ahinga ta‘ekamu na. 19Ka ka foa‘i ‘e he ‘Otua ‘a e luo na‘e ‘i Lehi, pea na‘e ha‘u mei ai ‘a e vai; pea ne inu, pea toe ake hono laumālie, ‘o ne mo‘ui: ko hono ‘uhinga ia na‘e ui ai hono hingoa ko Eni-Hākole (ko e Vaikeli ‘o e Tautapa), ‘a ia ‘oku tu‘u ‘i Lehi ‘o a‘u ki he ‘aho ni.
20Pea ne fai fakamaau ‘i ‘Isileli ‘o uofulu ta‘u, ‘i he kuonga ‘o e kau Filisitia."

Na’e tuetuē ʻa e kau Filisitia´ ʻi hono taki atu ‘o Samisoni kuo ‘osi ha’i´: ka ka ʻohofia ia ʻe he Laumālie ʻo e ʻEiki´, pea ko e ongo maea naʻe ʻi hono nima´ naʻe hangē ha vavae vela´ ‘enau ngangana mei hono sino´. Pea ne vakai atu ‘o ne ma’u ʻa e hui kouʻahe foʻou ʻo ha ‘asi, ʻo ne toʻo hake ʻo ne toki tamate’i ʻaki ha afe ʻi tangata. Pea toki lea hake ʻa Samisoni, “Ko ha hui kouʻahe pē ʻo ha ‘asi, ..... kuo u tāmateʻiʻaki ha afeʻi kakai. Pea hili ʻene lea ko ia´, naʻa ne liʻaki ʻa e huikouʻahe´; Pea ne mate he fie inu´, ʻo ne tautapa ki he ʻEiki´, pea foaʻi ʻe he ʻOtua´ ʻa e luo ‘i ai, pea naʻe haʻu mei ai ʻa e vai; ‘o ne inu, pea toe ake hono laumālie´, ʻo ne moʻui: Pea ne fai fakamāu ʻi Isileli fe’unga mo e ta’u ‘e 20, ʻi he kuonga ʻo e kau Filisitia´.

Lotu: Lotu ‘o fakamālō ki he ‘Otua´ He’ene fa’a fakaai ho’o ngaahi fiema’u´ mo ‘Ene fa’a mahino’i hoto tu’unga ko e efu pē.

Falaite 11 'Akosi, 2017

HA'I 'O SAMISONI

Veesi Lauloto: 1 Kolinito 10:31

"Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pē ke ongoongolelei ai ʻa e ʻOtua´."

Fakamaau 15:7-13

"7Pea pehē ‘e Samisoni kiate kinautolu, Neongo ho‘omou fai pehē, ka te u fai ha sauni kiate kimoutolu, pea hili ia pea u tuku. 8Pea ne tā fesifesi kinautolu, ko e tāmate lahi: ‘o ne toki ‘alu hifo, ‘o nofo ‘i he ava ‘i he makatu‘u ko ‘Eitami.
9Pea ‘alu hake ‘a e kau Filisitia, ‘o fokotu‘u tēniti ‘i Siuta, ‘o nau fakatē ‘enau tau ‘i Lehi. 10Pea fakalea ange ‘a e kau tangata Siuta, Ko e hā kuo mou omi ai kiate kimautolu? Pea na‘a nau tali, Ko ‘emau omi ke ha‘i ‘a Samisoni, ke fai kiate ia ‘o hangē ko ‘ene fai kiate kimautolu.
11Pea na‘e toki ‘alu hifo ha toko tolu afe ‘o ha‘a Siuta ki he ava ‘o e makatu‘u ko ‘Eitami, pea na‘a nau fakalea ange kia Samisoni, ‘o pehē, ‘Ikai ‘oku ke ‘ilo ‘oku pule ‘a ha‘a Filisitia kiate kitautolu? Pea ko e hā eni kuo ke fai kiate kimautolu.
Pea ne tali ki ai, Hangē ko ‘enau fai kiate au, na‘e pehē ‘eku fai kiate kinautolu.
12Pea na‘a nau pehē kiate ia, Ko ‘emau hifo eni ke ha‘i koe, ‘o tuku ki he nima ‘o e kau Filisitia.
Pea pehē ‘e Samisoni kiate kinautolu, Fuakava mai ‘e ‘ikai te mou ala kiate au ‘e kimoutolu.
13Pea na‘a nau tali ki ai ‘o pehē, ‘Ikai; ka te mau ha‘i koe ke ma‘u, ‘o tukuange ki honau nima: ka ‘e ‘ikai te mau kākunga ke tāmate‘i koe. Pea na‘a nau ha‘i ia ‘aki ha ongo maea fo‘ou, ‘o nau ‘ohake ia mei he makatu‘u."

Ne hoko atu e fai sāuni ‘a Samisoni´, ‘o ne tā fesifesi ai mo tāmate’i ha fu’u tokolahi fau, pea ne toki ʻalu hifo, ʻo nofo ʻi he avaʻi makatuʻu ko ‘Eitami´. Ne manavahē ‘a ha’a Siuta ia ki he kau Filisitia´, pea ha’u ai ha toko 3,000 Siuta ‘o kole kia Samisoni ke tukulolo kae ha’u ke nau ha’i ia ‘o ‘ave ki he kau Filisitia´. Pea ne tali ki ha’a Siuta, “Hangē ko ʻenau fai kiate au´, naʻe pehē ʻeku fai kiate kinautolu´. Ka mou fuakava mai ʻe ʻikai te mou ala kiate au ʻe kimoutolu. Ka mou ha’i pe au ‘o ‘ave ki he kau Filisitia´.” Pea loto ki ai ‘a ha’a Siuta, ko ia na’a nau haʻi ia ʻaki ha ongo maea foʻou, ʻo nau ‘ave ia ki he kau Filisitia´. Ko e loto fai sāuni´ ‘oku hangē ia ha fu’u tēvolo ta’emapule’i´, ko ‘ene toki fiemālie pē ka totongi kovi ‘a e kovi´. Ka ko hono fakangata´ pē ko e fakamolemole mo e ‘ofa ‘a Kalaisi´. Ako mei ai fānau.

Lotu: Lotu ‘o kole ki he ‘Otua´ ke Ne tokoni’i koe ke ke tukulolo mo fakamolū ki he finangalo ‘o e ‘Otua´, ‘oua ‘e fakafefeka.

Tu'apulelulu 10 'Akosi, 2017

FAI SĀUNI ‘A SAMISONI

Veesi Lauloto: 1 Kolinito 10:31

"Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pē ke ongoongolelei ai ʻa e ʻOtua´."

Fakamaau 15:3-6

"3Pea pehē ‘e Samisoni kiate kinautolu, Te u toki tonuhekina eni mei he kau Filisitia, ‘oka u ka fai ha kovi kiate kinautolu. 4Pea ‘alu ‘a Samisoni, ‘o ne pō ha fanga fōkisi ‘e toko tolungeau; ‘o ne to‘o mo e ngaahi tūhulu, ‘o ne fetu‘utaki ‘a e iku mo e iku, ‘o ne ‘ai ha tūhulu ‘e taha ki he vaha‘a ‘o ha ongo iku, ‘o pehē pē. 5Pea ne tutu ‘a e ngaahi tūhulu, ‘o ne toki tukuange kinautolu ki he toutu‘u uite ‘a e kau Filisitia, pea na‘e vela ai ‘a e ngaahi fokotu‘unga uite, pea mo e me‘a na‘e kei tu‘u, ‘o fai atu ki he ngoue ‘ōlive. 6Pea felau‘aki ‘a e kau Filisitia, ‘o pehē, Ko hai kuo ne fai eni? Pea nau tali, Ko Samisoni, ko e foha mali ‘o e motu‘a Timinate, koe‘uhi na‘a ne to‘o hono uaifi, ‘o ‘ange ki hono takaua. Pea ō hake ai ‘a e kau Filisitia, ‘o nau fakamomofi ‘a e fefine mo ‘ene tamai ‘aki ‘a e maama."

Kuo ma’u ‘eni ‘e ‘uhinga lelei ‘a Samisoni ke ne fai ai ha sāuni kovi ki he kau Filisitia´. Ko ia, na’a ne ‘alu ʻo pō ha fanga fōkisi ʻe toko 300; ʻo ne toʻo mo e ngaahi tūhulu, ʻo ne ha’i fakataha ʻa e iku ‘o e ongo fōkisi ‘e 2, ʻo ne ʻai ha tūhulu ʻe taha ki he vahaʻa ʻo ha ongo iku, ʻo pehē ai pē ki he toko 300. Pea ne tutu ʻa e ngaahi tūhulu´, ʻo ne toki tukuange kinautolu ki he toutuʻu uite ʻa e kau Filisitia´, pea naʻe vela ai ʻa e ngaahi fokotuʻunga uite´, pea mo e meʻa naʻe kei tuʻu´, ʻo fai atu ki he ngoue ‘olive´. Pea felauaki e kau Filisitia´, pe ko hai kuo ne fai ‘eni? Pea nau tali, “Ko Samisoni, koeʻuhi´ he na’e to’o ‘e he tamai hono mali´ ‘a hono uaifi´, ʻo ʻange ia ki he taha kehe. Pea ō hake ai ʻa e kau Filisitia´, ʻo nau tutu ʻa e fefine´ mo ʻene tamai´. Fānau, ka kuo tau fai ha fehālaaki, fakatomala leva he’ene kei si’isi’i´, ‘o foki ki he ‘Eiki´. ‘Ouae manako ke ‘aka’aka ki he me’a māsila´, he’ikai ke tau lava’i e houhau ‘a e ‘Otua.

Lotu: Lotu ‘o kole ki he ‘Otua´ ke Ne foaki atu ma’au ha laumālie fakamolemole mo ‘ofa ma’u pē´.

Pulelulu 9 'Akosi, 2017

FOKI KI HONO UAIFI´

Veesi Lauloto: 1 Kolinito 10:31

"Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pē ke ongoongolelei ai ʻa e ʻOtua´."

Fakamaau 14:20; 15:1-2

"20Ka na‘e ‘ange ‘a e uaifi ‘o Samisoni ki hono takaua ‘a ia kuo ne kaume‘a ‘aki.
PEA fuoloa atu, lolotonga ‘a e ututa‘u uite, na‘e ‘a‘ahi ‘a Samisoni ki hono uaifi ‘aki ha ki‘i kosi; ‘o ne pehē, Ka u ‘alu atu mu‘a ki hoku uaifi ki he loki. Ka ka ‘ikai tuku ‘e he tamai ‘a e fefine ke ne ‘alu kiate ia.
2He na‘e pehē ‘e he motu‘a; Na‘a ku mātu‘aki lau kuo ke fehi‘a kiate ia, pea u ‘ange ki ho takaua: vakai, ‘ikai ‘oku faka‘ofo‘ofa ange hono tehina ‘iate ia? ke ke ma‘u mu‘a ia moono fetongi."

Fuoloa atu pē kuo mokomoko hono loto´, kuo tu’u leva ‘a Samisoni, lolotonga ʻa e ututaʻu uite´, ‘o ‘alu mo ha ki’i kosi ke ‘aʻahi ʻaki ki hono uaif´; ʻo ne pehē atu ki he tamai hono uaifi´, ‘Ka u ʻalu atu muʻa ki hoku uaifi´. Ka ka ʻikai tuku ʻe he tamai ʻa e fefine´ ia ke ne ʻalu kiate ia. He naʻe pehē ʻe he tamai´, ‘Naʻa ku mātuʻaki lau kuo ke fehiʻa kiate ia, pea u ʻange ia ki he taha kehe: vakai, ko ‘ena hono tehina´, ʻikai ʻoku fakaʻofoʻofa ange ʻiate ia? ke ke maʻu muʻa ia mōno fetongi. Ne ‘ikai tali ia ‘e Samisoni, ka ne tafoki ‘o foki mo e loto kuo palapalani’i ai ‘a e sāuni te ne fai´. Fakatu’utāmaki ko e ta’efakaongoongo ki he finangalo ‘o e ‘Otua´ fānau, ko hoto loto angahala’ia´ te ne faka’uli kita´.

Lotu: Lotu ‘o kole ki he ‘Otua´ ke Ne tokoni’i koe ke ke kātaki mo faka- ma’uma’u he taimi ‘oku tukuaki’i loi ai mo ngaohikovia koe´.

Tusite 8 'Akosi, 2017

TOTONGI ‘O E MATE TUPU’A´

Veesi Lauloto: 1 Kolinito 10:31

"Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pē ke ongoongolelei ai ʻa e ʻOtua´."

Fakamaau 14:19

"19Pea ‘ohofia ia ‘e he Laumālie ‘o Sihova, ‘o ne ‘alu hifo ki ‘Asikeloni, ‘o ne taa‘i honau tu‘unga tangata ‘e toko tolungofulu, ‘o ne vete honau kofu, ‘o ne ‘ange ‘a e ngaahi tangata–kotoa kiate kinautolu kuo nau fakahā ‘a e tupu‘a. Pea na‘e puke hono ‘ita, ‘o ne ‘alu hake ki he fale ‘o ‘ene tamai."

Koe’uhi´ na’e pau ke totongi ‘e Samisoni ki he kau Filisitia´ ‘a e sote ‘e 30, ki he’enau mate’i tonu ‘ene tupu’a´, na’a ne ‘alu atu leva ke kumi mai ia. Pea ʻohofia ia ʻe he Laumālie ʻo Sihova´, ʻo ne ʻalu hifo ki Asikeloni, ʻo ne taaʻi honau tuʻunga tangata ʻe toko tolungofulu, ʻo ne vete honau kofu´, ʻo ne ʻange ia kiate kinautolu kuo nau fakahā ʻa e tupuʻa´. Pea naʻe puke hono ʻita´, ʻo ne ʻalu hake ki he fale ‘o ʻene tamai´, kae li’aki pē hono mali´ ‘ona ‘i he fale ‘o ‘ene tamai´. Tau sio fānau ki he fehalahalangaki holo e fononga ‘a Samisoni´, ka ko e ‘atunga ia ‘ene ‘alu ‘o fakatakanga ki he kakai hala´. Kuo ne ngaue hala ‘aki e mafai kuo me’a’ofa ange he ‘Otua´ ma’ana ke fai ‘aki ‘Ene ngāue´.

Lotu: Lotu ‘o kole ki he ‘Otua´ ke tokoni atu ke ke nofoma’u he Laumālie ‘o Kalaisi´, ke ‘oua na’a fakaetangata ho’o fononga´.

Monite 7 'Akosi, 2017

TALI KI HE TUPU’A´

Veesi Lauloto: 1 Kolinito 10:31

"Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pē ke ongoongolelei ai ʻa e ʻOtua´."

Fakamaau 14:15-18

"5Pea ko ia ‘i hono fā ‘o e ‘aho14.15 ‘i hono… ‘aho; ‘Oku tu‘u ‘i he tohi Hepelū ‘e ni‘ihi: hono fitu ‘o e ‘aho. na‘a nau pehē ki he uaifi ‘o Samisoni, Ke ke tauhele‘i ho husepāniti ke ne vete mai ‘a e tupu‘a, na‘a mau tutu koe mo ho fale ‘aki ‘a e afi.14.15 tutu… fale; pe tutu koe. Kuo mou tala kātoanga koā kiate kimautolu ke fa‘ao ‘emau koloa? 16‘Ikai ko ia? Pea tangi fakafiu ‘a e uaifi ‘o Samisoni kiate ia, ‘o ne pehē, Uī! ‘oku ke fehi‘a kiate au; ‘oku ‘ikai te ke ‘ofa mai: kuo ke fokotu‘u ha tupu‘a ki he fānau ‘a hoku kakai, pea kuo ‘ikai te ke tala kiate au. Pea ne pehē ki he fefine; Vakai, na‘a mo ‘eku tamai mo ‘eku fa‘ē kuo ‘ikai te u tala ki ai, pea te u tala koā kiate koe? 17Pea na‘a ne tangi fakafiu kiate ia ‘i he fitu‘i ‘aho, ‘a ia na‘e fai ai ‘ena kātoanga; pea ko ia ‘i he hoko ‘a hono fitu ‘o e ‘aho, na‘a ne tala kiate ia, he na‘a ne fakafiu‘i ia: pea tala ‘e he fefine ‘a e tupu‘a ki he fānau ‘a hono kakai. 18Pea lea kiate ia ‘a e kakai ‘o e kolo ‘i hono fitu ‘o e ‘aho, ‘i he te‘eki ke tō ‘a e la‘ā,14.18 ‘i he… la‘aá; ‘Oku pehē he faka-Hepeluú: ‘i he te‘eki ke hū ki he la‘aá, ka ‘oku ngali tonu ‘a hono hiki ‘o: ‘i he te‘eki ke ne hū, ki he loki mohé.‘o pehē, Ko e hā ‘oku melie ange ‘i he honi, pea ko e hā ‘oku mālohi ‘i he laione? Pea pehē ‘e ia kiate kinautolu, Ka ne ta‘e‘oua ho‘omou keli ‘aki ‘eku kau na, ‘E ‘ikai te mou mate‘i ‘eku tupu‘a."

Ne omi ‘a e kau Filisitia´ ‘o mana’i e uaifi ‘o Samisoni´ he ‘aho hono 4´ kapau he’ikai ke ne ‘omi e tali ki he tupu’a´ meia Samisoni, te nau ha’u ‘o tutu ia mo e fale ‘o ‘ene tamai´ ke nau mate kotoa. Pea naʻe tangi fakafiu kia Samisoni ‘a hono mali´; pea ko ia ʻi he hoko ʻa hono fitu ʻo e ʻaho´, naʻa ne tala leva ‘a e tali ki he tupu’a´ kiate ia, he naʻa ne fakafiuʻi ia: pea tala ʻe he fefine´ ʻa e tupuʻa´ ki he kau Filisitia´. Pea nau omi mo e tali´ kia Samisoni ʻi hono fitu ʻo e ʻaho´, ʻi he teʻeki ke tō ʻa e laʻā´, ʻo pehē, “Ko e hā ʻoku melie ange ʻi he honi´, pea ko e hā ʻoku mālohi ange ʻi he laione?” Pea pehē ʻe Samisoni kiate kinautolu, “Ka ne taeʻoua hoʻomou mana’i hoku hoa´, ʻE ʻikai te mou mateʻi ʻeku tupuʻa´.” Ko e kau Filisitia´ ko e taipe ia ‘o e kakai mo’ui angahala’ia´. ‘Ouae manako ke faka-kaungāme’a mo e kakai kovi´ fānau, he ‘e pipihi mai kiate koe ‘enau ngaahi tō’onga kovi´, pea ke toki hahaka hake pē kuo tōmui.

Lotu: 'E Lotu ‘o fakamālō ki he ‘Otua´ He’ene fa’a talilotu tonu mo fe’unga ma’au ‘i ho’o fa’a ui tokoni kiate Ia´.

Sapte 6 'Akosi, 2017

MATE TUPU’A´

Veesi Lauloto: 1 Kolinito 10:31

"Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pē ke ongoongolelei ai ʻa e ʻOtua´."

Fakamaau 14:7-14

"7Pea ‘alu hifo ia, ‘o afea mo e fefine; 8pea lelei‘ia ‘a Samisoni ‘iate ia. Pea faifai pea ne foki ke ‘omai ‘a e fefine, ‘o ne afe ke vakai ‘a e ‘anga‘anga ‘o e laione: pea tā na‘e ‘i ai ha fuifui pī ‘i he kete ‘o e laione, mo ha honi foki. 9Pea ne paki‘i, ‘o to‘o, ‘o ne ‘alu ai pē mo kai, ‘o ne a‘u ki he‘ene tamai mo ‘ene fa‘ē, ‘o ne ‘ange kiate kinaua, ‘o na kai: ka na‘e ‘ikai te ne tala kiate kinaua ko e kete ‘o e laione kuo ne to‘o mei ai ‘a e honi.
10Pea ‘alu hifo ‘ene tamai ki he fefine: pea fai ai ‘e Samisoni ha kātoanga; he ko e anga ia ‘o e fai ‘a talavou. 11Pea ‘i he‘enau fe‘iloaki mo ia, na‘a nau ‘omi ha kāinga ‘e toko tolungofulu ke nonofo mo ia. 12Pea pehē ‘e Samisoni kiate kinautolu, Ka u ‘ai atu mu‘a ha tupu‘a kiate kimoutolu: kapau te mou lava ke tala ia kiate au lolotonga ‘a e fitu‘i ‘aho ‘o e kātoanga, ‘o mou mate‘i ia, pea te u ‘atu kiate kimoutolu ha sote ‘e tolungofulu, pea mo ha tangata–kotoa ‘e tolungofulu: 13pea kapau ‘e ‘ikai te mou lava ke mate‘i ia, te mou ‘omi kiate au ha sote ‘e tolungofulu, pea mo ha tangata–kotoa ‘e tolungofulu.
Pea nau pehē, Fokotu‘u mai ho‘o tupu‘a, ke mau fanongo ki ai.
14Pea ne pehē kiate kinautolu,
Na‘e tupu ha me‘akai mei he u‘akai,
Pea na‘e tupu ha melie mei he mālohi.
Pea na‘e ‘osi ha ‘aho ‘e tolu mo e ‘ikai te nau lava ke mate‘i ‘a e tupu‘a."

Faifai pea foki ‘a Samisoni ke mali mo e fefine´, ‘o ne afe ke vakai ʻa e ʻangaʻanga ʻo e laione na’a ne tamate’I kimu’a´: pea tā naʻe ʻi ai ha fanga pī ʻi he kete ʻo e laione´, mo ha honi foki. Pea ne toʻo, ʻo ne ʻalu ai pē mo kai, ʻo ne aʻu ki heʻene mātu’a´, ʻo ne ʻange kiate kinaua, ʻo na kai: ka naʻe ʻikai te ne tala kiate kinaua ko e kete ʻo e laione kuo ne toʻo mei ai ʻa e honi´ Manatu’I ‘oku tapu ki ha nāsili ke ala ki ha sino ‘o ha mate, ka ko ‘eni kuo maumau’I ia ‘e Samisoni). Pea ‘i he lolotonga ‘o e kātoanga mali´ ne tuku atu ‘e Samisoni ha tupu’a ke nau mate’i mai, ki he kainga Filisitia ʻe toko 30, ka nau ka tonu ‘e ‘oange ‘e Samisoni honau sote ‘e 30 ka ‘ikai te nau ‘ange hono sote ‘e 30. Ko e tupu’a´, “Naʻe tupu ha meʻakai mei he uʻakai´, Pea naʻe tupu ha melie mei he mālohi´”. Ne ʻosi e ʻaho ʻe tolu mo e ʻikai te nau lava ke mate ʻi ʻa e tupuʻa´.

Lotu: Lotu ‘o kole ki he ‘Otua´ ke Ne tokoni’i koe he ngaahi palopolema ‘oku ke fekuki mo ia´ ke ke fakamama’u ki Hono finangalo.

Tokonaki 5 'Akosi, 2017

MALOHI ‘O SAMISONI´

Veesi Lauloto: 1 Kolinito 10:31

"Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pē ke ongoongolelei ai ʻa e ʻOtua´."

Fakamaau 14:5-6

"5Pea ‘alu hifo ‘a Samisoni mo ‘ene tamai pea mo ‘ene fa‘ē ki Tīmina; pea ‘i he‘enau a‘u ki he ngaahi ngoue vaine ‘o Tīmina, ‘iloange na‘e kālou mai ha laione mui, mo fakafetaulaki kiate ia. 6Pea ‘ohofia ia ‘e he Laumālie ‘o e ‘Eiki, pea ne hae ia ‘o hangē ko ‘ene hae ha ki‘i kosi; ka na‘e ‘ikai ha me‘a ‘i hono nima: pea na‘e ‘ikai te ne tala ki he‘ene tamai pe ko ‘ene fa‘ē ‘a e me‘a kuo ne fai."

Faifai pē vili ‘a Samisoni´, pea nau ʻalu hifo leva ki Timina ke fai ‘a e lea mali´, ʻa Samisoni mo ʻene tamai´ pea mo ʻene faʻē´. Pea ʻi heʻenau aʻu atu ki he ngaahi ngouevaine ʻo Tīmina´, ʻiloangē naʻe kālou mai ha laione mui, mo fakafetaulaki kiate ia. Pea ʻohofia ia ʻe he Laumālie ʻo e ʻEiki´, ‘a ia ‘oku ‘uhinga ia ki he fu’u ivi makehe faka-tu’anatula kuo lilingi he Laumālie ‘o e ‘Otua´ ‘ia Samisoni, pea ne malava ai ‘a e ta’emalava´. Ko ia na’a ne tafoki hake ‘o hae ‘a e laione´ ʻo hangē pē ko ʻene hae ha kiʻi kosi´; ka naʻe ʻikai ha meʻa ʻi hono nima´: pea naʻe ʻikai te ne tala ki heʻene tamai´ pe ko ʻene faʻē´ ʻa e meʻa kuo ne fai´. Fānau, neongo e fakaofo e me’a kuo fai ‘e Samisoni´, ka kuo mele pē, koe’uhi´ ko ‘ene talangata’a ki he ‘Otua´ ‘o teu ke mali mo e ta’ekamu´. Ko e fie fai hoto loto´ te ne takihee’i kita.

Lotu: Lotu ‘o kole ki he ‘Otua´ ke Ne tokoni mai ke ‘oua te te va’inga’aki e ‘ofa mo e meesi ‘a e ‘Otua´, ‘aki ha’ate mo’ui ta’e’apasia mo nōnoa’ia.