Tokonaki 30 Sepitema, 2017

'ALO'I 'O E MISAIA

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Luke 2:1-33

Ne ‘osi mai ha ngaahi ta’u lahi, pea na’e ‘i ai ha taula’eiki ‘ofa ‘Otua ko Simione, na’a ne fakana’una’u ki he hoko mai ‘a e Mīsaia´. Koe’uhi´ na’a ne angatonu mo ‘ofa ‘Otua mo’oni, na’e palōmesi ai ‘a e ‘Otua´ kiate ia, he’ikai te ne mate kae’oua leva kuo ne sio tonu he Mīsaia´. Pea hoko mai e ‘aho ne ‘alo’i ai ha Tama ‘i Petelihema, he kolo ne nofo ai ‘a Lute mo Poasi´. Ko Ia ‘a e Mīsaia´, ko e ‘Alo ia ‘o e ‘Otua´. Pea ne ‘ave ia ‘e Mele mo Siosifa ki he temipale´ ke kamu, he hokosia hono taimi´. Pea ‘i he vakai hifo ki ai ‘a Simione ko e taula’eiki´, na’a ne fakamālō’ia ‘a e ‘Otua´ mo ne pehē, “Fakahoko ā ho’o Folofola´ ‘e hoku ‘Otua, tuku ā ke u foki atu ā he ko ‘eni kuo u mamata ki he Mīsaia´, pea kuo u fiefia mo fakamālō’ia aipē Ho Huafa´ ke ta’engata....”

Lotu: Lotu ‘o fakamālō ki he ‘Otua´ He’ene ongo’i mo tali ho’o lotu´. Fakafeta’ia aipē Hono Huafa´He’ene fai’ofa ma’a kitautolu.

Falaite 29 Sepitema, 2017

FAKAOFO MA'U PE PALANI 'A E 'OTUA

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Lute 4:18-22
"18Pea ko e tohi eni ‘o e hako ‘o Felesi: na‘e tupu ‘ia Felesi ‘a Hēloni; 19pea tupu ‘ia Heseloni ‘a Lame, pea tupu ‘ia Lame ‘a ‘Aminatape; 20pea tupu ‘ia ‘Aminatape ‘a Na‘asoni, pea tupu ‘ia Na‘asoni ‘a Salemone; 21pea tupu ‘ia Salemone ‘a Poasi, pea tupu ‘ia Poasi ‘a ‘Ōpeti; 22pea tupu ‘ia ‘Ōpeti ‘a Sese, pea tupu ‘ia Sese ‘a Tēvita."

Ko e foha ‘o Poasi mo Lute´ ko ‘Opeti, pea ko e foha ‘o ‘Opeti´ ko Sese, ‘a ia ko e tamai ia ‘a Tevita, ko e tu’i ‘Isileli ‘ofa ‘Otua mo ‘iloa. Na’e toko 8 ‘a e fanau tangata ‘a Sese´, pea ko Tevita na’e nofo he vao´ ‘o tokanga’i ‘enau fangasipi´. Ka na’e ui mo fili ia ‘e he ‘Otua´ ke ne hoko ko e tu’i ‘Isileli hono ua´, hoko hake ‘ia Saula´. Na’e fakamanatu kiate ia ‘e he ‘Otua´ ‘e ‘i ai e ‘aho te Ne ‘omi ai ki māmani ha Mīsaia ke Ne fakamo’ui ‘a māmani mo fakahaofi ‘a e tangata´ mei he tautea mate ‘o e angahala´.

Lotu: Lotu ‘o fakamālō ki he ‘Otua´ He’ene ‘omi hotau faingamālie ki he mo’ui ta’engata´, ‘i he’etau tui ki he Mīsaia´.

Tu'apulelulu 28 Sepitema, 2017

TUKUFAKAHOLO

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Lute 4:16-17
"16Pea to‘o ‘e Neomai ‘a e tamasi‘i, ‘o ne ‘ai ki hono fatafata, ‘o ne hoko ko hono tauhi. 17Pea na‘e fakahingoa ia ‘e he kau fefine na‘e nofo ofi he‘enau pehē, Kuo fanau‘i ha tamasi‘i kia Neomai; ko ia na‘a nau ui ia ko ‘Ōpeti (Ko e Taha-ke-tauhi): ko e tamai ia ‘a Sese, ‘a ia ko e tamai ‘a Tēvita."

‘Oku kinikini mai he tohi ‘a Lute´ ‘a e ngaahi talateu mo e falikiliki ki he teu hoko mai ‘a Tevita´, pea pehē ki he teu ‘alo’i mai ‘a e Mīsaia´, hotau Fakamo’ui´. Mahu’inga ke tau sio ma’u pē ki he’etau fononga´ mei he fofonga ‘o e ‘Otua´, ki he fakatātā lahi ‘o e ‘Otua´ mo e tangata´, ‘Ene taumu’a mo e fokotu’utu’u ki he tangata´, pea te tau lika atu leva mo ki’i mahino’i ‘a e moana mo e loloto ‘o ‘Ene Folofola´. Koe’uhi´ ko e angatonu mo e talangofua ‘a Lute´, ne makehe pea tu’ukimu’a hono laini tukufakaholo´, neongo na’e ‘ikai ke ne ‘ilo ki ai. Tau manako fānau ki he mo’ui talangofua´ mo angatonu´, he ‘e makehe hoto ‘alunga´ ki he kaha’u´, pea ko e pale ‘oku tali mei mu’a´ te ne holoholo’i ‘etau ngaahi feilaulau ne fai ka tau tu’uma’u ai he tui totonu´.

Lotu: Lotu ‘o kole ki he ‘Otua´ ke Ne tokoni atu ke ke fakamama’u aipē ki He’ene takimu’a ‘oku fai ki he’etau fononga´.

Pulelulu 27 Sepitema, 2017

'OPETI

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Lute 4:15
"15Pea te ne hoko ko e fakaato ‘o ho‘o mo‘ui, pea te ke kaukauola ki ai ‘i ho‘o a‘ua‘u: he ko e fā‘ele‘i ia ‘e ho‘o ta‘ahine ne ‘ofa kiate koe ‘a ia ‘oku mahu‘inga ‘i ha tama ‘e toko fitu."

Ko e ‘ofa ‘a Lute ‘ia Naomi´ ne fakatokanga’i pē ia he kakai ‘o Petelihema´. Ko ‘ene anga’ofa mo manava’ofa ki he kakai kehe´ na’e mo’ui mo tupulekina. Na’e faka’atā ‘e he ‘Otua´ ‘a e tāpuaki´ ke tupu mo ‘alu hake mei he lotofale ‘o Naomi´, he na’e mahino ‘a e falala ‘Otua ‘a Naomi mo Lute´. Fanau, ‘oku malava hotau ‘Otua´ ‘o liliu e mala´ ko e monū’ia; pea ke ne fakatupu ha monū’ia mo ha tāpuaki mei he mamahi´ mo e faingata’a’ia´. Fakatauange ke tau hangē ko Naomi´, ‘o ‘oua na’a tau sītu’a mei hotau ‘Otua´ he taimi ‘o e faingata’a´ mo e mamahi´. ‘Ouae hanu mo laulau mo lāunga, tatau aipē kapau ‘oku ke tonuhia kae ngaohikovia pē koe .Tu’uma’u ‘i he ‘Eiki´ ho’o falala´, pea te Ne hākeaki’i koe mo fakahaofi ‘i hono taimi totonu.

Lotu: Lotu ‘o kole ki he ‘Otua´ ke Ne tokoni’i koe ke ke tu’uma’u ho’o falala´ ‘i he ‘Otua´, tatau aipē ‘oka tokatāmaki ‘a e fononga’anga.

Tusite 26 Sepitema, 2017

TALAMONU

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Lute 4:14-15
"14Pea na‘e pehē ‘a e kau fefine kia Neomai, Mālō mo e ‘Eiki, he ‘ikai te ne tuku koe he ‘aho ni ta‘eha koeli; pea ‘ofa ke ongoongoa hono hingoa ‘i ‘Isileli. 15Pea te ne hoko ko e fakaato ‘o ho‘o mo‘ui, pea te ke kaukauola ki ai ‘i ho‘o a‘ua‘u: he ko e fā‘ele‘i ia ‘e ho‘o ta‘ahine ne ‘ofa kiate koe ‘a ia ‘oku mahu‘inga ‘i ha tama ‘e toko fitu."

Pea lea fakalotolahi ‘a e kau fefine´ kia Naomi, “Malo mo e ʻEiki, he ʻikai te Ne tuku koe he ʻaho ni ke ke taʻe ha koeli;. Pea te ne hoko ko e fakaato ʻo hoʻo moʻui´, pea te ke kaukauola ki ai ʻi hoʻo aʻuaʻu´: he ko e faʻeleʻi ia ʻe hoʻo taʻahine ne ʻofa mo’oni ‘iate koe´, ʻa ia ʻoku mahuʻinga ange ia ʻi ha tama ʻe toko fitu. Taimi na’e palani ai he ‘Otua´ ‘a e hoko mai Hono ‘Alo´ ke huhu’i ‘a e tangata´, na’a Ne palani foki mo e laini tukufakaholo ke hoko mai ai´. ‘Oku kau ‘a Poasi he laini ko ia´, pehē foki kia Lute, pea kau aipē mo e pēpē fo’ou´, ‘a ‘Opeti.

Lotu: Lotu ‘o fakamālō ki he ‘Otua´ He’ene palani haohaoa ‘a e laini tukufakaholo ke hoko mai ai hotau Fakamo’ui´.

Monite 25 Sepitema, 2017

KO E ‘API MO E FAMILI FIEFIA MO TAU’ATAINA

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Lute 4:14
"14Pea na‘e pehē ‘a e kau fefine kia Neomai, Mālō mo e ‘Eiki, he ‘ikai te ne tuku koe he ‘aho ni ta‘eha koeli; pea ‘ofa ke ongoongoa hono hingoa ‘i ‘Isileli."

Na’e fiefia e taha kotoa he tapuaki kuo hoko mai ki he lotofale ‘o Naomi´, tautautefito pe kia Naomi. Kuo fiefia vale ‘a e fine’eiki´ he hoko mai hono ki’i mokopuna´, pea ‘e to e fakatolonga foki ‘i ai ‘a e hingoa fakafamili ‘o ‘Elimeleki´. Pea kuo ha’u ‘a e kau fefine ‘o Petelihema´ ‘o kaungā fiefia mo Naomi, mo nau pehēange kia Naomi, “Fakafeta’i ki he ‘Otua´. Kuo ‘ikai ke Ne tuku koe ke ke nofo hala aipe he famili. Pea ko Lute, ‘oku ne ‘ofa mo’oni ‘iate koe, ‘oku ne laka ange ha ngaahi foha ‘e toko 7; pea kuo ne toe fakakoloa’i ‘aki ho lotofale´ ha tama, ka ko ho mokopuna. Ko e lotofale ‘eni ne ha’iha’isia he lotomamahi´, kuo ongo mai mei ai ‘a e kata, mo e hiva mo e fiefia. ‘Oku pehē pē ‘a e fāmili ‘oku nofoma’u he ‘Otua´, ko e ‘api mo e famili fiefia mo tau’ataina.... Ko Sīsū ‘i he fāmili´ ko e ‘api fiefia.

Lotu: Lotu ‘o kole ki he ‘Otua´ ke Ne tokoni atu ke ke nofoma’u ‘iate Ia ke Ne fakatau’ataina koe mei he popula ki he angahala´.

Sapate 24 Sepitema, 2017

SISU KALAISI

Veesi Lauloto: Kaletia 3:22

"Kaekehe, naʻe loki ʻe he Folofola´ ʻa e meʻa kotoa pē, ke moʻulaloa ki he angahala´, koeʻuhi´ ke foaki ʻa e talaʻofa´ ki he kakai tui´, koeʻuhi´ pē ko e tui kia Sīsū Kalaisi´."

Kimu’a pea fakatau’ataina’i kitautolu ‘e Kalaisi ‘i he’etau tui kiate Ia´, ko kitautolu´ na’a tau pōpula ki he angahala´ mo ‘etau ngaahi fehālaaki´. Na’e ‘afio hifo ‘a e ‘Otua´ ki he’etau nofo ha’isia´ pea Ne tokoni mai leva ‘aki ‘Ene ‘omi ha Hao’anga mei he’etau pōpula ki he angahala´, ‘a ia ko ‘etau tui ki Hono ‘Alo´. Ka ‘ikai ‘a Kalaisi, ko e taha kotoa pē ‘oku loka’i ia ‘e he angahala´. Ko ia pē ‘oku tui kia Kalaisi´, ‘oku hao mai mo fakatau’atāina ia mei he pilīsone ko Angahala´. Ko ia ai fanau, ko Kalaisi ‘ena ‘oku ha’u mo e founga´ ke ta tau’ataina ai mei he popula ki he angahala´. Tali ‘a Sisu ki ho loto´ pea ke tui ki Ai, pea ke nofoma’u Ai ke ke mo’ui.

Lotu: Lotu ‘o kole ki he ‘Otua´ ke Ne tokoni’i koe ke ke tui falala kakato kia Kalaisi, kae lava ke ke tau’ataina mei he popula kia angahala´.

Tokonaki 23 Sepitema, 2017

SISU KALAISI

Veesi Lauloto: Loma 5:8

"Ka ko e ʻOtua´, ʻoku Ne fakahā ʻa e moʻoni ‘o ʻEne ʻofa ‘Aʻana kiate kitautolu´, ʻi he pekia ʻa Kalaisi maʻatautolu, lolotonga ʻoku tau kei angahala"

Lute 4:13
"13Pea mali ‘a Poasi mo Lute, ‘o na nonofo; pea ne ‘alu kiate ia, pea tuku ‘e he ‘Eiki ke ne feitama, ‘o ne fā‘ele‘i ha tama tangata."

Na’e mali leva ʻa Poasi mo Lute, pea ‘ikai ke to e fiema’u ia ke to e ‘alu ‘a Lute ki he ngoue’anga´ ‘o tufi uite pe pa’ale ‘o hangē ko ia ne anga ki ai ‘i mu’a´. Na’a ne nofo pe ‘i ‘api, ko Poasi pe na’e ‘alu ki he ngoue’anga´. Kuo fiemālie ‘a Lute. Me’a lelei ko e kātaki mo e tatali ki he taimi ‘a e ‘Otua´ fānau. ‘Ikai ngata pe he’ena fiefia hono fakahoko famili kinaua´, ka kuo to e tuku foki ʻe he ʻEiki´ ke feitama ‘a Lute, ʻo ne faʻeleʻi ha tama tangata, pea na fakahingoa ia ko ‘Opeti, ‘a ia ‘oku ‘uhinga ko e “tokotaha mo’ui fa’a lotu” Ko ‘Opeti te ne hoko ko e ‘ea ki he tofi’a ‘o ‘Elimeleki´. Ko e tapuaki ‘eni ‘o e si’i tu’u ‘a Lute ‘o muimui mai ‘ia Naomi´ mo ‘ene ‘ofa ‘ia Naomi´, kuo ha’u mei hono manava´ ‘a e laini tukufakaholo ‘o Tevita´, mo Sisu Kalaisi, ‘ia Siosifa´.

Lotu: Lotu ‘o kole ki he ‘Otua´ ke Ne tokoni’i koe ke ke tui falala kakato kia Kalaisi, kae lava ke ke tau’ataina mei he popula kia angahala´.

Falaite 22 Sepitema, 2017

TAPUAKI

Veesi Lauloto: Loma 5:8

"Ka ko e ʻOtua´, ʻoku Ne fakahā ʻa e moʻoni ‘o ʻEne ʻofa ‘Aʻana kiate kitautolu´, ʻi he pekia ʻa Kalaisi maʻatautolu, lolotonga ʻoku tau kei angahala"

Lute 4:11-12
"11Pea pehē ‘e he kakai kotoa na‘e ‘i he matanikolo, pea mo e tu‘unga mātu‘a, Ko e fakamo‘oni kimautolu. Tauange mo e ‘Eiki ke hoko ‘a e fefine kuo hū ki ho fale ke hangē ko Lesieli, pea hangē ko Lia, ‘a e ongo me‘a na‘a na langa ‘a e fale ‘o ‘Isileli: pea ke kaukaua koe ‘i ‘Efalata, mo ongoongoa ‘i Pētelihema. 12pea ke hoko ho fale ke hangē ko e fale ‘o Felesi, ‘a ia na‘e fā‘ele‘i ‘e Tema kia Siuta, ‘i ha hako ‘e ‘atu kiate koe ‘e Sihova ‘i he ta‘ahine ni."

Pea pehē atu ʻe he kakai kotoa pē naʻe ʻi he matanikolo´, pea mo e tuʻunga mātuʻa´, “ ‘Io, ko e kau fakamoʻoni kimautolu. Tauange mo e ʻEiki´ ke hoko ʻa e fefine kuo hū ki ho fale´ ke hangē ko Lesieli´, pea hangē ko Lia´, ʻa e ongo fafine naʻa na langa ʻa e fale ʻo ‘Isileli´: pea ke kaukaua koe ʻi ‘Efalata, mo ongoongoa ʻi Pētelihema”. ‘I he’ete nofoma’u ‘i he ‘Eiki´ fānau, ‘e fai tāpuekina kita ‘e he ‘Eiki´ he’ete mo’ui´ mo ‘ete fononga´. Pea te te hoko ko e monū’ia’anga ki he fāmili´ mo e siasi´. Fakatauange fanau, ke tau hoko ko e monu’ia’anga he fanga ki’i famili te mou ma’u he kaha’u´. Ka mou kamata leva he taimi ni ho’o tokanga ke langa ho’o mo’ui´ ‘ia Kalaisi ka ke monū’ia. Tokanga ke ke mo’ui fa’a lotu mo lau ho’o Folofola´ mo fai ki ai.

Lotu: Lotu ‘o fakamālō ki he ‘Otua´ He’ene huhu’i kitautolu he kolosi´, pea to’o ai hotau mala´, ka tau mo’ui mā’oni’oni.

Tu'apulelulu 21 Sepitema,2017

POASI 'A E KOELI

Veesi Lauloto: Loma 5:8

"Ka ko e ʻOtua´, ʻoku Ne fakahā ʻa e moʻoni ‘o ʻEne ʻofa ‘Aʻana kiate kitautolu´, ʻi he pekia ʻa Kalaisi maʻatautolu, lolotonga ʻoku tau kei angahala"

Lute 4:9-10
"9Pea pehē ‘e Poasi ki he mātu‘a, pea ki he kakai kotoa, Ko e kau fakamo‘oni kimoutolu he ‘aho ni kuo u fakatau ‘a e me‘a kotoa ‘o ‘Elimeleki, mo e me‘a kotoa ‘o Kilioni mo Māloni, meia Neomai. 10Pea ko Lute foki ko e fefine Moape, ko e uaifi ‘o Māloni, kuo u fakatau ia mooku ‘unoho, ke fakamo‘ui ‘a e hingoa ‘o e pekia ‘i hono tofi‘a, ke ‘oua na‘a mole ‘a e hingoa ‘o e pekia mei he lau ‘o hono kāinga, pe mei he matanikolo ‘o hono feitu‘u: ko e kau fakamo‘oni kimoutolu he ‘aho ni."

Ne toki lea atu leva ‘a Poasi ki he mātuʻa´, pea ki he kakai´ kotoa, “Ko kimoutolu´, ko e kau fakamoʻoni kimoutolu he ʻaho ni, kuo u fakatau ʻa e meʻa kotoa ʻa ‘Elimeleki´, mo e meʻa kotoa ʻo Kilioni mo Māloni´, meia Neomai. Pea ko Lute foki ko e fefine Moape, ko e uaifi ʻo Māloni, ka kuo ne pekia. Kuo u fakatau ia mōku ʻunoho he ‘aho ni, ke fakamoʻui ʻa e hingoa ʻo e pekia´ ʻi hono tofiʻa´, ke ʻoua naʻa mole ʻa e hingoa ʻo e pekia´ mei he lau ʻo hono kāinga´, pe mei he matanikolo ʻo hono feituʻu´: ko e kau fakamoʻoni kimoutolu he ʻaho ni.” ‘Oku ui kitautolu ‘e Kalaisi ‘i he “Fekau Lahi” ke tau hoko ko ‘Ene kau fakamo‟oni ‘i māmani he taimi kotoa pē, ‘i he lea, mo e ngāue, mo e tō‟onga mo‟ui.‟I he‟ene pehē´, ‘oku tau hoko leva ko e kau fa‟ifa‟itaki‟anga ‘o Kalaisi.

Lotu: Lotu ‘o kole ki he ‘Otua´ ke Ne tokoni atu ke ke manatu’i ma’u ho tu’unga ko e fakafofonga koe ‘o Kalaisi he potu kotoa pē mo e taimi kotoa pē.

Pulelulu 20 Sepitema, 2017

FOAKI KIA POASI

Veesi Lauloto: Loma 5:8

"Ka ko e ʻOtua´, ʻoku Ne fakahā ʻa e moʻoni ‘o ʻEne ʻofa ‘Aʻana kiate kitautolu´, ʻi he pekia ʻa Kalaisi maʻatautolu, lolotonga ʻoku tau kei angahala"

Lute 4:7-8
"7Pea ko e anga mu‘a ‘i ‘Isileli eni ‘i he fai koeli mo e fetongi me‘a, ke fakapapau ‘a e me‘a kotoa pē, na‘e to‘o ‘e he tangata hono sū, ‘o ‘ange ki he taha; pea ko e fakamo‘oni ia ‘i ‘Isileli. 8Ko ia na‘e pehē ‘e he koeli kia Poasi, Fakatau ia mo‘ou. ‘O ne to‘o hono sū."

Pea ko e anga muʻa ʻi Isileli´, ko e ngaahi me’a fekau’aki mo e koeli´ mo e fetongi meʻa´, mo e fakapapau’i ʻa e me’a kotoa pē, naʻe pau ke toʻo ʻe he koeli´ hono sū´, ʻo ʻange ki he taha; pea ko e fakamoʻoni ia ʻi ‘Isileli´. Ko ia naʻe pehē ʻe he koeli´ kia Poasi, “Fakatau ia moʻou.” ʻO ne toʻo hono sū´ ‘o ‘oange kia Poasi.. Ko e sila’i ia ‘o e aleapau´ mo e fakatau´. Ko e ‘aho ni ‘oku tau ‘ai e pepa ‘o taipe ki ai ‘a e aleapau´, pea ‘i he ‘osi ‘a e alea´, ‘oku fakamo’oni leva ai ‘akinautolu ‘oku kau he aleapau´, pea takitaha tauhi ‘ene kopi. Ka ko e aleapau ia ‘i ‘Isileli he kuonga mu’a´, kuopau ke vete ‘a e sū´ ke sila’i ‘aki ‘a e aleapau´.

Lotu: Lotu ‘o fakamālō ki he ‘Otua´ he tali ‘e Sīsū ‘a e palani Fakamo’ui ma’ae tangata´, ke Ne pekia ai ‘i he kolosi.

Tusite 19 Sepitema, 2017

KOELI

Veesi Lauloto: Loma 5:8

"Ka ko e ʻOtua´, ʻoku Ne fakahā ʻa e moʻoni ‘o ʻEne ʻofa ‘Aʻana kiate kitautolu´, ʻi he pekia ʻa Kalaisi maʻatautolu, lolotonga ʻoku tau kei angahala"

Lute 4:5-6
"5Pea pehē ange ‘e Poasi, Ko e ‘aho ‘oku ke fakatau ai ‘a e konga vao meia Neomai, te ke fakatau ai ‘ia Lute Moape foki ko e uaifi ‘o e pekia, ke fakamo‘ui ‘a e hingoa ‘o e pekia ‘i hono tofi‘a. 6Pea pehē ‘e he koeli, ‘E ‘ikai te u lava ke huhu‘i mo‘oku, na‘a ku maumau‘i ‘a e tofi‘a ‘o‘oku: ma‘u pē koe hoku lakanga koeli; he ‘ikai te u lava ke koeli ‘e au."

Ne fakamatala ‘e Poasi ki he koeli´ ‘a e me’a ne hoko ki he ki’i fāmili ‘o ‘Elimeleki´, pehe kia Lute. Na’a ne ‘oange foki ki ai ‘a e ‘uluaki faingamālie ke huhu’I e tofi’a´ mo Lute´. Kapau ‘oku ne fie fakatau e tofi’a ‘o ‘Elimeleki´, kuopau ke mali foki mo e uītou ‘o e ‘ea´, ‘a Lute. Ne tali ‘ikai ‘a e koeli´, ‘o ne momoi ange hono tu’unga koeli´ kia Poasi, ke ne fai. Pea pehēange ʻe Poasi, Ko e ʻaho ʻoku ke fakatau ai ʻa e konga vao´ meia Neomai´, te ke fakatau ia ʻia Lute Moape foki, ko e uaifi ʻo e ‘ea´ ka kuo ne pekia, ke fakamoʻui ʻa e hingoa ʻo e pekia´ ʻi hono tofiʻa´. Pea pehē ʻe he koeli´, “ ʻE ʻikai te u lava ke huhuʻi moʻoku, naʻa faifai´ pea u maumauʻi ʻa e tofiʻa oʻoku´: maʻu pē koe hoku lakanga koeli; he ʻikai te u lava ke koeli ʻe au.”Ne fakamatala ‘e Poasi ki he koeli´ ‘a e me’a ne hoko ki he ki’i fāmili ‘o ‘Elimeleki´, pehe kia Lute. Na’a ne ‘oange foki ki ai ‘a e ‘uluaki faingamālie ke huhu’I e tofi’a´ mo Lute´. Kapau ‘oku ne fie fakatau e tofi’a ‘o ‘Elimeleki´, kuopau ke mali foki mo e uītou ‘o e ‘ea´, ‘a Lute. Ne tali ‘ikai ‘a e koeli´, ‘o ne momoi ange hono tu’unga koeli´ kia Poasi, ke ne fai. Pea pehēange ʻe Poasi, Ko e ʻaho ʻoku ke fakatau ai ʻa e konga vao´ meia Neomai´, te ke fakatau ia ʻia Lute Moape foki, ko e uaifi ʻo e ‘ea´ ka kuo ne pekia, ke fakamoʻui ʻa e hingoa ʻo e pekia´ ʻi hono tofiʻa´. Pea pehē ʻe he koeli´, “ ʻE ʻikai te u lava ke huhuʻi moʻoku, naʻa faifai´ pea u maumauʻi ʻa e tofiʻa oʻoku´: maʻu pē koe hoku lakanga koeli; he ʻikai te u lava ke koeli ʻe au.”

Lotu: Lotu ‘o kole ki he ‘Otua´ ke Ne ngaohi koe ke ke falala ‘Otua, tautautefito he taimi ‘o e ‘ahi’ahi´.

Monite 18 Sepitema, 2017

KOELI TOTONGI HUHU’I

Veesi Lauloto: Loma 5:8

"Ka ko e ʻOtua´, ʻoku Ne fakahā ʻa e moʻoni ‘o ʻEne ʻofa ‘Aʻana kiate kitautolu´, ʻi he pekia ʻa Kalaisi maʻatautolu, lolotonga ʻoku tau kei angahala"

Lute 4:1-4
"1KA kuo ‘alu hake ‘a Poasi ki he matanikolo, ‘o ne nofo ai: pea ‘iloange na‘e laka ange ‘a e koeli na‘e lau ki ai ‘e Poasi; pea ne pehē, ‘E Me‘a, afe mai, ‘o nofo heni. 2Pea ne afe mai ‘o nofo. Pea ne fili ha tu‘unga tangata ‘e toko hongofulu ‘i he mātu‘a ‘o e kolo, ‘o ne pehē, Mou nofo hē. Pea nau nofo. 3Pea ne pehē ki he koeli, Ko Neomai kuo foki mei he tuku‘uta ‘o Moape ‘oku ne tala fakatau ‘a e konga vao, ko e tofi‘a ‘o hota kāinga ko ‘Elimeleki: 4pea u pehē ke u fanafana kiate koe, ‘o pehē, Fakatau ia ‘i he ‘ao ‘o e nofo ni, ‘io, ‘i he ‘ao ‘o e mātu‘a ‘o hoku kakai, Kapau ‘oku ke loto ke huhu‘i, pe‘i huhu‘i; ka ‘o kapau ‘e ‘ikai te ke huhu‘i, pea tala mai ke u ‘ilo: he tala‘ehai ‘oku toe ai ha taha ke huhu‘i, ko koe pē; pea ‘oku hoko mo au. Pea ne pehē, Te u huhu‘i pē."

Ne ‘alu atu ʻa Poasi ki he matanikolo´, ke alea ai mo e koeli ‘o Lute mo Naomi´. Pea ne fili ha tuʻunga tangata ʻe toko 10 ʻi he mātuʻa ʻo e kolo´, ʻo ne pehē atu ki he koeli´, “Ko Neomai kuo foki mei he tukuʻuta ʻo Moape´, ʻoku ne tala fakatau ʻa e konga vao, ko e tofiʻa ʻo hota kāinga ko ‘Elimeleki´: pea ko ia kou tomu’a fakapā atu pē kiate koe, Fakatau ia ʻi he ʻao ʻo e kau fakamo’oni ni, ʻio, ʻi he ʻao ʻo e mātuʻa ʻo hoku kakai´. Kapau ʻoku ke loto ke huhuʻi, ‘oku lelei ‘aupito, ka ʻo kapau ʻe ʻikai te ke huhuʻi, pea tala mai ke u ʻilo: he talaʻehai´ ʻoku toe ai ha taha ke huhuʻi, ko koe pē; mo au. Pea ne pehē mai, ‘Oku lelei. Te u huhuʻi pē.

Lotu: Lotu ‘o fakamālō ki he ‘Otua´ He’ene founga ne fai ‘aki hotau huhu’i´, neongo ko e pekia Hono ‘Alo´, ka ‘oku sio ai ‘a māmani ‘i Hono ngeia´.

Sapate 17 Sepitema, 2017

'OFA 'A E 'OTUA

Veesi Lauloto: Loma 5:8

"Ka ko e ʻOtua´, ʻoku Ne fakahā ʻa e moʻoni ‘o ʻEne ʻofa ‘Aʻana kiate kitautolu´, ʻi he pekia ʻa Kalaisi maʻatautolu, lolotonga ʻoku tau kei angahala"

Ka ko e ʻOtua´, ʻoku Ne fakahā ʻa e moʻoni ‘o ʻEne ʻofa ‘Aʻana kiate kitautolu´, ʻi he pekia ʻa Kalaisi maʻatautolu, lolotonga ʻoku tau kei angahala´. Ko e ngaahi lea fakaofo ‘eni fanau... Na’e ‘ikai tali ‘a e ‘Otua´ ia ke tau sai, pē foki ange kiate Ia, pea Ne toki ‘ofa mai. ‘IKAI! Talamai he’etau veesi lauloto´, “lolotonga pē ‘oku tau kei angahala´”, tau kei hoko ko e ngaahi fili ‘o e ‘Otua´, kuo NE tuku mai ‘e IA ‘a Kalaisi ke pekia he kolosi´ ka tau mo’ui, ‘o ‘ikai koe’uhi´ kuo tau taau mo sai, ka koe’uhi´ ko e hulu fau ‘ENE ‘ofa mai´. Fanau, kapau na’e faingofua pē ki he ‘Otua´ ke NE ‘ofa mai lolotonga ‘etau mo’ui angahala’ia´, pea huanoa e taimi ni ‘i ho’o kau He’ene fānau´ ‘o ke ‘ofa ki he ‘Otua´. ‘Oku to e ‘ā’āsili aipē ‘Ene fiefia mai kiate koe´ mo tanumaki mai ho’o mo’ui mā’oni’oni´, mo to e fakautuutu aipē ‘Ene ‘ofa mai´.

Lotu: Lotu ‘o kole ki he ‘Otua´ ke Ne tokoni’i koe ke ke fakahounga’i ‘a e ‘ofa mai ‘a e ‘Otua´, ‘aki ho’o ‘ofa ‘aki ho kotoa´ ki he ‘Otua´.

Tokonaki 16 Sepitema, 2017

LUTE MO POASI

Veesi Lauloto: ‘Efeso 1:7

"'A ia, ʻi heʻetau ʻiate IA´, ʻoku tau maʻu´ ni ʻa e Huhuʻi´, ko e meʻa ʻi Hono taʻataʻa´, ko e fakamolemole ‘o ʻetau ngaahi angahala´, ʻo fakatatau ki he mohumeʻa ʻo ʻEne kelesi´"

Lute 3:13-18
"13Nofo pē he pō ni, pea ka pongipongi leva, pea kapau ‘e fie hoko ko ho koeli ‘e he toko taha ko ia, lelei; tuku ke ne koeli: ka ‘oka ‘ikai te ne fie fai kiate koe ‘a e tō‘onga ‘o e koeli, tangi mo‘ui ‘a e ‘Eiki te u fai ‘e au: tokoto pē kae‘oua ke ‘aho.
14Pea ne tokoto pē mei hono va‘e kae‘oua ke ‘aho hake: pea ne tu‘u ‘oku te‘eki ke fe‘ilo‘iloaki. He ne pehē ‘a e tangata, Ke ‘oua foki na‘a ‘ilo ‘a e ha‘u ‘a e fefine ki he haha‘anga. 15Pea ne pehē, ‘Omi ho‘o pulupulu na, ‘o ke fakatali; pea fakatali ai ‘e he fefine, pea ne tata ki ai ha fua‘anga pa‘ale ‘e ono, ‘o ne hilifaki kiate ia: pea toki ‘alu ‘a e tangata ki he kolo. 16Pea ‘i he ha‘u ‘a e fefine ki he‘ene fa‘ē, pea pehē mai ‘e ia, Ko hai koā koe, nga‘ata? Pea na‘a ne fakamatala ki ai ‘a e me‘a kotoa ne fai ‘e he tangata kiate ia.
17Na‘a ne pehē foki, Ko e fua‘anga pa‘ale ‘e ono ko eni na‘a ne ‘omi kiate au; he na‘a ne pehē, ‘Oua na‘a ke ‘alu mola ki ho‘o fa‘ē.
18Pea pehē ‘e he finemotu‘a, Nofo pē, nga‘ata, kae‘oua ke ke ‘ilo pe iku fēfē ‘a e me‘a; he ‘e ‘ikai manofo ‘a e tangata kae‘oua ke ne faka‘osi ‘a e me‘a he ‘aho ni."

Na’e palōmesi ‘a Poasi kia Lute ke ne foki pē kia Naomi, ka te ne kumi leva ki he tangata ko ia ‘oku fika ‘uluaki ki he koeli´, pea te ne fakamatala ki ai ‘a e tūkunga´, pea kapau leva he’ikai te ne fie koeli pea te ne hoko leva ia ko e koeli kia Lute. Na’a ne fua ange leva ‘a e pa’ale ke foki mo Lute kia Naomi, pea foki atu leva ‘a Lute ki ‘api. Ne loto lelei pē ‘a Poasi ia ke hoko ko e koeli ‘o Lute, ka kuopau pē ke ne ‘uluaki fakapā ki he tangata ‘e taha ‘oku toe ofi ange ia ‘ia Poasi kia ‘Elimeleki. Na’a ne fakamatala ‘a e me’a kotoa pē ki he’ene fa’ē´, pea na fiefia pē mo tali ki he fetu’utaki mai ‘a Poasi´. He ko e tangata fai ki he’ene lea´, he ka ‘ilonga ha me’a kuo ne tala te ne fai, ‘e ‘ikai mālōlō ia kae’oua leva kuo ‘osi fai e me’a ko ia´. Ko e fa’ahinga ‘ulungaanga lelei ia ‘oku tokoni ki hono langa e mo’ui faitotonu´ mo falala’anga´ ‘iate kita.

Lotu: Lotu ‘o fakamālō ki he ‘Otua´ He’ene fakafehūmālie’aki ‘a e ngaahi me’a ‘oku hoko ‘i ho’o mo’ui´, ke kau aipē ki ho’o lelei´.

Falaite 15 Sepitema, 2017

LUTE MO POASI

Veesi Lauloto: ‘Efeso 1:7

"'A ia, ʻi heʻetau ʻiate IA´, ʻoku tau maʻu´ ni ʻa e Huhuʻi´, ko e meʻa ʻi Hono taʻataʻa´, ko e fakamolemole ‘o ʻetau ngaahi angahala´, ʻo fakatatau ki he mohumeʻa ʻo ʻEne kelesi´"

Lute 3:8-12
"8Pea ‘i he tu‘uapō, ‘iloange na‘e ‘oho ‘a e tangata, ‘o ne tafoki ke vakai: pea tā ko e fefine ‘oku tokoto mei va‘e. 9Pea ne pehē, Ko hai koe? Pea ne tali, Ko Lute au, ko ho‘o kaunanga: ko ia ke ke fofola ho kafu ki ho‘o kaunanga, he ko e koeli koe. 10Pea pehē ‘e he tangata, ‘Ofa ange ‘a e ‘Eiki ke ke monū‘ia, nga‘ata: ‘oku lahi hake ho‘o fai ‘ofa ki mui ‘i he ‘uluaki, ‘i he ‘ikai te ke tokanga talavou, pe masiva, pe koloa‘ia. 11Pea ko eni, nga‘ata, ‘oua te ke manavahē; te u fai ma‘au ‘a e me‘a kotoa kuo ke lea ki ai: he ‘oku ‘ilo ‘e he kolo kotoa ‘o hoku kakai ko e fefine māopo koe. 12Pea ko eni, ‘oku mo‘oni ko e koeli au; ka ‘oku ai foki ha kāinga ‘oku ofi ‘iate au."

Pea ʻi he tuʻapō´, ʻiloange ne ʻoho ʻa Poasi, ʻo ne tafoki ke vakai: pea tā ko e fefine ʻoku tokoto mei vaʻe. Pea ne pehē, “Ko hai koe?” Pea ne tali, “Ko Lute au, ko hoʻo kaunanga: ko koe hoku koeli´”. Pea pehē atu ʻe Poasi, “ ʻOfaange ʻa e ʻEiki´ ke ke monūʻia, ngāʻata: ʻoku lahi hake hoʻo fai ʻofa ki mui´ ʻi he ʻuluaki´, ʻi he ʻikai te ke tokanga talavou, pe masiva pe koloaʻia. Pea ko ‘eni, ʻoua te ke manavahē; te u fai maʻau ʻa e meʻa kotoa kuo ke lea ki ai´: he ʻoku ʻilo ʻe he kolo´ kotoa ʻo hoku kakai´, ko e fefine angamaopo koe. Pea ‘oku ke mo’oni pē, ko au ho koeli´; ka ʻoku ‘i ai foki ha kāinga ʻoku ofi ange ia ‘iate au, tuku ke u fekumi ki ai, pe ko e hā ha’ane lau.

Lotu: Lotu ‘o fakamālō ki he ‘Otua´ He’ene taki tonu ho’o fononga´ ki he ngaahi monū’ia mo e tāpuaki ‘oku ke fa’a tofanga ai´.

Tu'apulelulu 14 Sepitema, 2017

LUTE MO POASI

Veesi Lauloto: ‘Efeso 1:7

"'A ia, ʻi heʻetau ʻiate IA´, ʻoku tau maʻu´ ni ʻa e Huhuʻi´, ko e meʻa ʻi Hono taʻataʻa´, ko e fakamolemole ‘o ʻetau ngaahi angahala´, ʻo fakatatau ki he mohumeʻa ʻo ʻEne kelesi´"

Lute 3:5-7
"5Pea ne tali ki ai, Te u fai ‘o hangē tofu pē ko ho‘o lea mai.
6Pea ne ‘alu hifo ki he haha‘anga, ‘o ne fai ‘o hangē tofu pē ko hono tu‘utu‘uni ‘e he‘ene fa‘ē. 7Pea kuo ‘osi ‘a e kai mo inu ‘a Poasi, pea kuo ne lo‘imohea, ‘o ne ‘alu ‘o tokoto ‘i he tafa‘aki puke koane: pea toki faka‘ete‘ete mai ‘a e fefine, ‘o tatala ‘a e kafu ‘o hono va‘e, ‘o tokoto ai"

Ne ʻalu hifo leva ‘a Lute ki he hahaʻanga he ngoue ‘a Poasi´, ʻo ne fai pē ʻo hangē ko ia ko hono tuʻutuʻuni ange ʻe heʻene faʻē ko Naomi´. Neongo ko e muli ia, pea na’e ‘ikai anga ki he ‘ulungaanga faka-fonua ‘o e kakai Siu´, ka na’e talangofua pē ‘a Lute, he ko ‘ene fa’ē ko Naomi´, ko e fefine ‘anga’ofa, falala’anga mo angatonu. ‘Oku mahu’inga ‘aupito fanau ke tau fakaongo mo talangofua ki he ngaahi akonaki mo fakahinohino lelei ‘etau mātu’a´ mo e kau kalisitiane lotu mo’oni´. Ko e ngaahi taukei mo e ‘ilo ‘a e kalisitiane lotu mo’oni´ ‘oku fu’u ‘aonga lahi ia kiate kitautolu he’etau fononga´. Kapau na’e ‘ikai fakaongo ‘a Lute kia Naomi, te ne tōhala mei he tāpuaki ‘a e ‘Otua´.

Lotu: Lotu ‘o fakamālō mo fakafeta’i ki hotau ‘Otua´ He’ene ngaahi akonaki mo e talatalaifale ma’a kitautolu ‘i he Folofola´.

Pulelulu 13 Sepitema, 2017

KOELI ‘O LUTE´

Veesi Lauloto: ‘Efeso 1:7

"'A ia, ʻi heʻetau ʻiate IA´, ʻoku tau maʻu´ ni ʻa e Huhuʻi´, ko e meʻa ʻi Hono taʻataʻa´, ko e fakamolemole ‘o ʻetau ngaahi angahala´, ʻo fakatatau ki he mohumeʻa ʻo ʻEne kelesi´"

Lute 3:4
"4Pea ‘i he‘ene fai ke tokoto, tokanga‘i ‘a e potu te ne toka ai; pea te ke toki hū, ‘o hu‘i ‘a e kafu ‘o hono va‘e, ‘o ke tokoto ai; pea te ne fakahā ‘e ia kiate koe ‘a e me‘a ke ke fai."

Ne fai pau pē ‘e Lute ki he me’a na’e fakamatala ki ai ‘e Naomi´. Na’e fakamatala kiate ia ‘e Naomi ‘a e me’a ke ne fai fakatatau ki he ‘ulungaanga faka-fonua mo e lao faka-Siu´, ke lava ke ‘ilo ai ‘e Poasi ko ia ‘a e koeli kia Lute´ ‘okapau ‘oku ne loto ki ai, he ‘oku ‘ikai ke fakamalohi’i ia. Kuopau ke tali ‘a Lute ke tokoto ‘a Poasi ‘o mohe, pea te ne toki ‘unu’unu atu leva ‘o huke’i e kafu hono va’e´ ka ne ‘olunga he va’e ‘o Poasi´, ko hono faka’ilo ia ‘e Lute kia Poasi ‘a e ngofua ke ne hoko ko hono koeli´. ‘Oku nōmolo pē foki ‘eni ‘i he ‘ulungaanga faka-fonua ‘o e kau Siu´, ‘a ia ‘oku fa’a tokoto pē mo e kau sevāniti´ he va’e honau kau pule´. ‘Oku ‘ikai ke tau anga ai he taumaiā ‘oku ‘i ai hatau ‘ulungaanga faka-fonua pehē. Kaekehe na’e talangofua kakato pe ‘a Lute ki he me’a na’e tu’utu’uni ki ai ‘e Naomi´.

Lotu: Lotu ‘o fakamālō ki he ‘Otua´ He’ene tokoni’i koe ke ke to’a he fakafōtunga tonu ‘Ene mo’ui´ neongo ho’o kei si’i.

Tusite 12 Sepitema, 2017

PALANI 'A NAOMI

Veesi Lauloto: ‘Efeso 1:7

"'A ia, ʻi heʻetau ʻiate IA´, ʻoku tau maʻu´ ni ʻa e Huhuʻi´, ko e meʻa ʻi Hono taʻataʻa´, ko e fakamolemole ‘o ʻetau ngaahi angahala´, ʻo fakatatau ki he mohumeʻa ʻo ʻEne kelesi´"

Lute 3:2-3
"2Pea ko eni, ‘ikai ko hota kāinga ‘a Poasi, ‘a ia na‘a ke ‘i he‘ene kau ta‘ahine? Tokua ‘oku ne fakama‘a pa‘ale ‘i he haha‘anga ‘apō. 3Ko ia ke ke kaukau mo tākai, pea ‘ai ho‘o teu, pea ke ‘alu hifo ki he haha‘anga: kae‘oua na‘a fakahā koe ki he tangata kae‘oua ke ‘osi ‘ene kai mo inu."

Ne fakamatala leva ‘e Naomi ‘a e lao mo e ‘ulungaanga faka-fonua ‘o e kau Siu´ fekau’aki mo e koeli´. Ko e koeli ‘o Lute´ ko e kāinga ofi taha ia ‘o ‘Elimeleki mo Māloni´, kuopau ke ne ‘uluaki ma’u e faingamalie ke fili pe te ne mali mo Lute´, ka kuopau ke ne ‘uluaki fakatau ‘a e tofi’a ‘o e pekia´ (Maloni) pea kapau he’ikai loto ia ke ne hoko ko e koeli ‘o e uītou´, pea toki ‘oange leva ‘a e faingamālie´ ki he kainga hoko hake´. Ko ia na’e fakahinohino leva ‘e Naomi kia Lute ‘a e me’a ke ne fai´, ke ‘ilo ai ‘e Poasi ko ia ‘a e koeli kia Lute´. Ko ia na’e teuteu lelei leva ‘a Lute ‘o ne ‘alu hifo ki he ngoue’anga ‘a Poasi´ ki he feitu’u na’e ‘i ai ‘a Poasi´, ke haha ‘a e uite´, kae ‘atā ‘a e utu´ ke fai ia he ‘aho´, fakatatau ki he me’a ne tala ki ai ‘e Naomi´

Lotu: Lotu ‘o fakamālō ki he ‘Otua´ He’ene ngaahi manava’ofa kotoa pē kuo fai ma’au, fakafou mai ‘i ho’o mātu’a´ mo ho fāmili.

Monite 11 Sepitema, 2017

NAOMI

Veesi Lauloto: ‘Efeso 1:7

"'A ia, ʻi heʻetau ʻiate IA´, ʻoku tau maʻu´ ni ʻa e Huhuʻi´, ko e meʻa ʻi Hono taʻataʻa´, ko e fakamolemole ‘o ʻetau ngaahi angahala´, ʻo fakatatau ki he mohumeʻa ʻo ʻEne kelesi´"

Lute 3:1
"1PEA lea kiate ia ‘e he‘ene fa‘ē ko Neomai, Nga‘ata, ‘ikai koā te u kumi hao mālōlō‘anga, ka ke tu‘umālie ai."

‘I he nofo atu ‘a Naomi mo Lute´, neongo hono ‘ofa’i kinaua ‘e Poasi´, ka na’e ‘ilo ‘e Naomi he’ikai ke na nofo pehē ai pē, ‘o na ma’u mo’ui ai pē mei he tufi ‘a Lute mei he ngoue’anga´. Na’a ne ‘ilo kuo taimi pē ke kumi ha falala’anga ‘o Lute, pea na’a ne ui pē ‘a Lute ‘o fakahā kiate ia ‘ene faka’amu´. Tautautefito kuo ‘ilo’i ‘e Naomi ko Poasi´ kuo ne ‘i he tu’unga ke ne hoko ko e koeli kia Lute. Na’e tokanga ‘ofa ‘aupito ‘a Naomi kia Lute, he kuo ne a’ua’u ia, ka ko Lute na’a ne loto ke ‘i ai si’ano husepāniti. Fakafeta’i fanau, ko e loto lelei ‘a Sīsū ke Ne mate ke huhu’i kitautolu mei he angahala´, mo totongi fakafoki kitautolu ki he Tamai´. Ko Sīsū hotau Koeli.

Lotu: Lotu 'o fakamālō ki he ‘Otua´ He’ene palani ‘ofa ma’a kitautolu ‘a e kolosi´, ke hoko ai ‘a Kalaisi ko e Koeli ma’a kitautolu.

Sapate 10 Sepitema, 2017

KO HOTAU HUHU'I

Veesi Lauloto: ‘Efeso 1:7

"'A ia, ʻi heʻetau ʻiate IA´, ʻoku tau maʻu´ ni ʻa e Huhuʻi´, ko e meʻa ʻi Hono taʻataʻa´, ko e fakamolemole ‘o ʻetau ngaahi angahala´, ʻo fakatatau ki he mohumeʻa ʻo ʻEne kelesi´"

Ko e pekia ‘a Kalaisi´ ‘oku fa’o ai hotau totongi huhu’i´ mo e fakamolemole ‘o ‘etau angahala´. Na’e totongi ‘e Sīsū ‘aki ‘Ene pekia´ hotau fakatau’atāina mei he pōpula ki he angahala´. Ua, ka ‘ikai ha lingi toto ‘oku ‘ikai ha fakamolemole. ‘I he Fuakava Motu’a´, ko e fakamolemole´ na’e fai ‘aki ia ‘a e toto ‘o e monumanu feilaulau´. Ka ko e feilaulau tā tu’o taha he kolosi´, ko e feilaulau faka’osi´ ia, ko e lilingi ko ia Hono ta’ata’a´ ke fakamolemole’i ‘a e angahala kotoa pē kuo fakatomala ‘o tui kia Kalaisi´. ʻA ia, ʻi heʻetau ʻiate IA´, ʻoku tau maʻu´ ni ʻa e Huhuʻi´, ko e meʻa ʻi Hono taʻataʻa´, ko e fakamolemole ‘o ʻetau ngaahi angahala´, ʻo fakatatau ki he mohumeʻa ʻo ʻEne kelesi´. ‘Oku ‘ikai ke tau taau ki he Fai Fakamo’ui ‘a e ‘Otua´, ka kuo faka’atā mai ‘e Kalaisi, pea ‘oku tau ‘unu’unu atu ‘i he tui mo e pau’ia ke ma’u ia….. ‘Oi he kelesi fakaofo.

Lotu: Lotu 'o kole ki he ‘Otua´ ke Ne fakamaama mai ‘etau lau ‘Ene Folofola´ ke tau kai mo inu ai he moana ‘o ‘Ene mā’oni’oni.

Tokonaki 9 Sepitema, 2017

NGOUE'ANGA 'A POASI

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:23

"23Ko ia, na‘a ne pīkitai ki he kau ta‘ahine ‘a Poasi ‘i he‘ene tufi, kae‘oua ke ‘osi ‘a e tutu‘u ‘o e ta‘u pa‘ale mo e ta‘u uite: ka ne nofo pē mo ‘ene fa‘ē."

Ko ia naʻe toupili holo aipē ‘a Lute he tafa’aki ‘o e kau taʻahine ʻa Poasi´ ʻi heʻene tufi´, kaeʻoua ke ʻosi ʻa e tutuʻu ʻo e taʻu pa’ale´ mo e taʻu uite´: ka na’a ne nofo ai pē mo ʻene faʻē ko Naomi´. Na’a ne lata ‘aupito he nofo Pētelihema´, koe’uhi´ ko e talitali lelei mo e anga’ofa ‘a Poasi mo ‘ene kau ta’ahine ngāue´. Taimi ni’ihi fānau ‘oku hū fo’ou mai ai ha taha ki he ako´ pe ko e siasi´, ‘oku tau nofo atu ‘o sio’i, pea ‘ikai ke tau talitali lelei mo anga’ofa ki ai. ‘Oku pole’i kitautolu he’etau talanoa kia Lute mo Poasi´ ke tau anga’ofa mo anga faka-kaume’a ‘o talitali lelei ka taha fo’ou ‘oku ha’u ki he Lautohi´ pe ako´.

Lotu: Lotu 'o fakamālō ki he ‘Otua´ koe’uhi´ ko ‘Ene fakafaingofua’i mai Ia kiate kitautolu ke tau feohi mo Ia ‘i ha fa’ahinga taimi pē, pe feitu’u.

Falaite 8 Sepitema, 2017

FALE'I 'A NAOMI

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:22

"22Pea tali ‘e Neomai kia Lute, Ko hono lelei, nga‘ata, ke ke ‘alu atu mo ‘ene kau ta‘ahine, ‘o ‘ikai te nau lave‘i kiate koe ‘i ha vao kehe."

Pea lea atu ‘a Neomai kia Lute, “‘Oku faka’ofo’ofa ‘aupito Lute, ‘oku ou falala ange ki ho’o lafi holo pē he kau taʻahine ngāue ‘a Poasi´, te ke malu ange ‘i ai ‘i ha to e ngoue’anga kehe.” Pea ‘e ongo’i ange pē koe ‘e Poasi, he ko hota kāinga ia, pea ko e taha ia hota koeli´. Ko e koeli´, ‘i he lao ‘a ‘Isileli´ ko e kāinga ofi taha ‘o ha tangata ne pekia, kuopau ke ne ‘uluaki ma’u e faingamalie ke fakatau e tofi’a ‘o e pekia´, ka kuopau foki ke ne mali mo e uitou ‘o e ‘ea´, ‘o ka ‘oku loto ki ai ‘a e koeli´.

Lotu: Lotu ‘o kole ki he ‘Otua´ ke Ne tokoni atu kiate koe ke ke tui falala kakato kiate Ia mo ‘Ene tataki mo tauhi ‘oku fai ma’a ho’o mo’ui.

Tu'apulelulu 7 Sepitema, 2017

'OFA 'A POASI

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:21

"21Pea pehē ‘e Lute Moape, Kae‘uma‘ā foki na‘a ne pehē mai, Te ke taka ofi ki he‘eku kau tama ni, kae‘oua ke ‘osi‘osingamālie ‘enau tu‘usi hoku ta‘u."

Pea to e pehē ʻe Lute kia Naomi, “Kaeʻumaʻā foki naʻe to e talamai ‘e Poasi, ke u taka ofi ma’upe he’ene kau tama’, kaeʻoua ke ʻosiʻosingamālie ʻenau tuʻusi ‘ene taʻu´.” ‘Oku hulu’i mai he fai’ofa ‘a Poasi kia Lute ko e muli´, ‘a e ‘ofa mo e kelesi ‘a e ‘Otua´, ‘a ē ‘oku talanoa ki ai ‘etau veesi lauloto´ mo Sione 3:16, mo e ngaahi veesi Folofola lahi. Ko kitautolu´ ko e Senitaile mo’ui angahala’ia ne pau ki he mate´; ko hotau Hao’anga´ ko e kelesi mo e ‘ofa mo e ta’ata’a ne falō he Kolosi´, ko hotau Koeli, ko hotau Huhu’i mo hotau Fakamo’ui. Tuku ke tohi tongi ia ki he’etau manatu´ pea ‘oua na’a ngalo ‘Ene ‘ofa’i kitautolu´. Tu’u ava ki he ngāue Hono Laumālie´ ‘i he’etau mo’ui´ mo fakafaingamālie’i, ‘ouae fakafaingata’a’ia’i, ka tau utu ‘a e mo’ui ta’engata´.

Lotu: Lotu ‘o fakamālō ki he ‘Otua´ koe’uhi´ ko ‘Ene Kelesi´, ‘a ia kuo tau ma’u mo’ui mei ai´, fakamālō ki He’ene ‘ofa´ ‘oku ne pukepuke kitautolu.

Pulelulu 6 Sepitema, 2017

POASI - KO E KOELI

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:20

"20Pea pehē ‘e Neomai ki he‘ene ta‘ahine, ‘Ofa ke ne fai tāpuekina mei he ‘Eiki, ‘a ia kuo ‘ikai tūkua ‘ene fai ‘ofa ki he mo‘ui, pe ki he pekia! Pea pehē ‘e Neomai ki he fefine, Ko hota kāinga ofi ‘a e tangata, ko e taha ‘i hota koeli."

Pea pehē ʻe Neomai kia Lute, “Kuo ʻikai tūkua ʻa e fai ʻofa ‘a Sihova´, tatau pē ki he moʻui´, pea pehē pē ki he pekia´! Pea pehē ʻe Neomai kia Lute, “Ko hota kāinga ofi ʻa Poasi, he ko e taha ia ʻi hota koeli´.” Na’e ‘ikai ko e fakatu’upakē, ko e konga kotoa pē ia he palani ‘a e ‘Otua´; ‘Ene fakafou atu ‘a Lute ke ne tufi he ngoue’anga ‘a Poasi´.

Lotu: Lotu ‘o kole ki he ‘Otua´ ke Ne tokoni atu kiate koe ke ke fakatokanga ki he me’a ‘oku fokotu’utu’u he ‘Otua´ ke ke fou ai´. Ako ai ke ke falala ‘Otua.

Tusite 5 Sepitema, 2017

NGOUE’ANGA ‘A POASI´

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:19

"19Pea pehē ‘e he‘ene fa‘ē kiate ia, Na‘a ke tufi ‘i fē he ‘aho ni? pea ke ngāue ki fē? ‘Ofa ke fai tāpuekina ‘a ia na‘a ne tokanga‘i koe! Pea ne fakahā ki he‘ene fa‘ē ‘a e toko taha kuo ne ngāue ai, ‘o ne pehē, Ko e hingoa ‘o e matāpule, ‘a ia na‘a ku ngāue ai he ‘aho ni, ko Poasi."

Pea fehu’i ʻe heʻene faʻē´ kiate ia, “Naʻa ke tufi ʻi fē he ʻaho ni´? pea na’a ke ngāue´ ki fē? ʻOfa ke fai tāpuekina ʻa ia naʻa ne tokangaʻi koe!” Pea fakahā ‘e Lute ki heʻene faʻē´ ʻa e toko taha kuo ne ngaūe ai´, ko e matāpule, ko hono hingoa´ ko Poasi. Pea ne fakamatala ki he ngaahi fai’ofa kotoa pē kuo fai ‘e Poasi ma’ana´. Neongo na’e kona e loto ‘o Naomi´ he pekia hono hoa´ mo ‘ena ongo tamaiki tangata´, ka ko ‘ene falala mo ‘ofa ‘Otua´ na’e kei mo’ui pē mo kaukaua. Ko ia na’a ne fakamālō’ia ‘a e ‘Otua´, koe’uhi´ ko e manava’ofa ‘a Poasi kia Lute´. Ko e ako ‘eni kiate kitautolu fānau, kapau ‘e ‘i ai ha taimi kuo tau fou ai ha ngaahi mamahi, hangē ko e mate, pe mole ngāue, pe puke lahi ha taha he fāmili´, fakatauange ke ‘oua na’a mole ‘etau ‘amanaki´, pe hōloa ai ‘etau tui ‘Otua´, pe momoko ai ‘etau ‘ofa ‘Otua´. ‘Oku ha’u ma’u pē ‘a e ‘aho´ mo e matapā ki he ngaahi faingamālie fo’ou´. Tuku ke mo’ui ta’engata aipē ‘etau tui mo ‘etau ‘ofa ki hotau ‘Otua´.

Lotu: Lotu ‘o fakamālō ki he ‘Otua´ koe’uhi´ He’ene pukepuke hotau loto´ mo ‘etau fakakaukau´ neongo e ngaahi hake mo e hifo ‘o e fononga’anga´.

Monite 4 Sepitema, 2017

NGAUE TANGATA, NGAUE. ‘OUAE FIUNGOFUA´

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:17-18

"17Ko ia, na‘a ne fai ‘ene tufi ‘i he ngoue na, ‘o a‘u ki he efiafi; pea ne toki hahahaha ‘a e me‘a kuo ne tufi, pea na‘e fe‘unga nai mo ha efa pa‘ale. 18Pea ne fafa, ‘o ‘ave ki he kolo; pea hili ‘a e vakai ‘ene fa‘ē ki he me‘a, na‘a ne to‘o mai ‘ene toenga kai, ‘o ‘ange kiate ia. 19Pea pehē ‘e he‘ene fa‘ē kiate ia, Na‘a ke tufi ‘i fē he ‘aho ni? pea ke ngāue ki fē? ‘Ofa ke fai tāpuekina ‘a ia na‘a ne tokanga‘i koe!"

Ko ia naʻa ne fai ʻene tufi ʻi he ngoue ‘a Poasi´ ʻo aʻu ki he efiafi; pea ne toki hahahaha ʻa e meʻa kuo ne tufi´, ‘o ne foki atu mo ia kia Naomi. Pea ne fafa, ʻo ʻave ki he kolo´; pea hili ʻa e vakai ʻene faʻē´ ki he meʻa´, na’a ne fiefia mo e hounga’ia he’ene tama´. Pea to e toʻo mai ‘e Lute ‘a e me’akai na’a ne tuku ma’a Naomi´ ʻo ʻange kiate ia. Koe’uhi´ ko e fai’ofa ‘a Poasi´, laka hake ia he fakangatangata ‘a e Lao´ ki he ‘ofa ki he masiva´, na’e lava ai ‘a Lute ‘o ngaue ‘aho kakato ‘i he ngoue’anga´, pea ne kai pē mo inu ai he me’akai mo e vai ‘a e kau ngāue´. Pea lava ke ne foki ai ki ‘api he efiafi´ mo e fakafuofua ki he pauni pa’ale ‘e 30. Ngāue tangata ngāue.... ‘Ouae fiungofua... Kātaki he pupuha´..... Fua he faingata’a... He ‘oku toe houa pē, pea tō ‘a e la’ā´.

Lotu: Lotu ‘o kole ki he ‘Otua´ ke Ne tokoni atu ke ‘oua te ke fa’a hola pe fie’eiki he pu’i atu´, ka ke talangofua fiemālie pē, ‘e ‘i ai e ‘aho te ke fiemālie ai.

Sapate 3 Sepitema, 2017

‘OFA ‘A POASI´

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:15-16

"15Pea ‘i he‘ene tu‘u hake ke tufi, na‘e tu‘utu‘uni ‘e Poasi ki he‘ene kau tama, ‘o pehē, Tuku ke ne tufi foki ‘i he fokotu‘unga ‘ū koane, ‘o ‘oua ‘e fakamaa‘i. 16‘Io, pea mou mātu‘aki fakamanimo mai ma‘ana mei he ngaahi ‘uuni koane, ‘o tuku ke ne ha‘u ‘o tufi, ‘o ‘oua ‘e faka‘itangi."

Pea ʻi he tuʻu hake ‘a Lute ke fai ‘ene tufi kau’i koane´ naʻe tuʻutuʻuni ʻe Poasi ki heʻene kau tama´ ke ‘oua na’a nau fakamaa’i pe ta’ofi ‘a Lute, pea ‘ai pe mo nau fakangangana ha kau’i koane ma’ana ke ne haʻu ʻo tufi, ʻo ʻoua ʻe faka ʻitangi. Na’e fai ‘e Poasi ia ‘a e ‘ofa ‘oku makehe ‘aupito mei he ngatangata’anga ‘o e ‘ofa ki he masiva´. Ko e fehu’i´ fanau. ‘Oku fa’a pehē ho’o fai’ofa ki he taha kehe´, pe ‘oku ke fakatamulu’i pe ho’o foaki´, kehe pē ke fai. Taimi ni’ihi ‘oku te fai’ofa pē koe’uhi´ ko e sio ‘a e kakai´. Fakatauange fanau ke tau ako he ngaahi fakafōtunga ‘ofa kuo fai ‘e Poasi´.

Lotu: Lotu ‘o kole ki he ‘Otua´ ke Ne tokoni atu ke ke lava ‘o fakafotunga tonu ‘Ene mo’ui´ he potu kotoa pē.

Tokonaki 2 Sepitema, 2017

‘OFA ‘A POASI´

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:13-14

"13Pea tali ‘e he fefine, Tangata‘eiki, ‘ofa ke fai ai pē ho‘o āfeitaulalo mai, he kuo ke fakanonga au, pea kuo ke lea fakafiemālie ki ho‘o kaunanga; ka tala‘ehai ko e taha au ‘oku taau ke lau mo ho‘o tu‘unga kau kaunanga.
14Pea ‘i he taimi ‘o e kai na‘e pehē ‘e Poasi ki he fefine, Ha‘u ki heni, ‘o tokoni mei he me‘akai ni, ‘o unu ho‘o me‘a ki he vinika. Pea ne nofo ‘i he tafa‘aki ‘o e kau tu‘usi: pea ne takai ha ‘ū koane tunu ma‘a e fefine, pea ne kai, ‘o ne fiu, kae toe pē."

Pea lea atu ‘a Lute kia Poasi, “Tangataʻeiki, ʻofa ke fai ai pē hoʻo afeitaulalo mai´, he kuo ke fakanonga au, pea kuo ke lea fakafiemālie ki hoʻo kaunanga´; ka talaʻehai´ ko e taha au ʻoku taau ke lau mo hoʻo tuʻunga kau kaunanga.” Ne to e ui pe ‘e Poasi ‘a Lute ke ‘alu ange ke nau kai fakataha mo e kau tu’usi´ he taimi ‘o e kai ho’ata´. Na’e manatu ‘a Lute kia Naomi, ko ia na’a ne to’o leva ‘a e me’a ‘a Naomi ‘o tuku, ke toki ‘alu mo ia ke ne kai.

Lotu: Lotu ‘o kole ki he ‘Otua´ ke Ne tokoni atu ke ke fakahounga’i ma’upe ‘Ene ‘ofa´ ‘aki ho’o talangofua ki He’ene Folofola´.

Falaite 1 Sepitema, 2017

‘OFA ‘A E ‘OTUA´

Veesi Lauloto: ‘Efeso 2:8-9

"He ko e kelesi´ pē kuo mou moʻui mei ai´, ko e meʻa ʻi hoʻomou tui´; ʻio, naʻe ʻikai meiate kimoutolu ia, ka ko e foaki mei he ʻOtua´: naʻe ʻikai tupu mei ha ngaahi ngaūe, koeʻuhi´ ke ʻoua naʻa ai ha taha ʻe faʻa pōlepole."

Lute 2:10-12

"10Pea fakafo‘ohifo ‘e he fefine, ‘o punou ki he kelekele, ‘o ne pehē kiate ia, Ko e hā kuo u ta‘imālie pehē ai ho‘o ‘ofa, ‘o ke tokanga‘i au; ‘osi, ko e kehe au?
11Pea tali ‘e Poasi, ‘o ne pehē ki he fefine, Kuo ‘osi fakahā kiate au ‘a e fu‘u me‘a na‘a ke fai ki he fa‘ē ‘a ho husepāniti talu ‘a e pekia ‘a ho hoa; pea mo ho‘o li‘aki ho‘o tamai mo ho‘o fa‘ē, mo e fonua na‘a ke tupu ai, ka ke ha‘u ki ha kakai na‘e ‘ikai te ke ‘ilo ki ai ‘i mu‘a. 12‘Ofa ke fakaai ho‘o ngāue ‘e he ‘Eiki, pea ke ma‘u kakato ho‘o totongi meia Sihova ko e ‘Otua ‘o ‘Isileli, ‘a ia kuo ke ha‘u ke hūfanga ‘i hono lalo kapakau."

Pea punou ‘a Lute ki he kelekele´, ʻo ne pehē atu kia Poasi, “‘Oku ou fakamālō atu au, ko e muli mo e ta’e’iloa ‘i ho’o fai’ofa pehē ma’aku´... Ka u fie fehu’i atu pē mu’a....Ko e hā kuo u taʻimālie pehē ai ‘i hoʻo ʻofa´, ʻo ke tokangaʻi au, ʻosi ko e kehe au?” Pea tali ʻe Poasi, ʻo ne pehē kia Lute, “Kuo ʻosi fakahā mai kiate au ʻa e fuʻu meʻa naʻa ke fai ki he faʻē ʻa ho husepaniti´, talu ʻa e pekia ʻa ho hoa´; pea mo hoʻo liʻaki hoʻo tamai´ mo hoʻo faʻē´, mo e fonua naʻa ke tupu ai´, ka ke haʻu ki ha kakai naʻe ʻikai te ke ʻilo ki ai ʻi muʻa. ʻOfa ke fakaai hoʻo ngaūe´ ʻe he ʻEiki´, pea ke maʻu kakato hoʻo totongi´ meia Sihova, ko e ʻOtua ʻo Isileli, ʻa ia kuo ke haʻu ke hūfanga ʻi Hono lalo kapakau´”. Tangane ko e fehu’i mo e tali kuo fai´. Fai mei he loto hounga’ia, loto ‘ofa, mo fakatōkilalo. Ko e fakatātā totonu pē ‘eni ‘o e ‘ofa faka-’Otua´ - ‘a e ‘ofa fa’ē ‘a Lute´, mo e ‘ofa ta’efilifilimānako ‘a Poasi.

Lotu: Lotu ‘o fakamālō kihe ‘Otua´ he moana ‘o ‘Ene ‘ofa´’oku tau ta’imālie ai mei he kakai kehekehe ‘oku tau feohi.