Monite 17 'Epeleli, 2017

MALA HONO FA

Veesi Lauloto: 'Efeso 2:13

"Ka ʻi onoponi, ʻia Kalaisi Sīsū´,  ko kimoutolu naʻe mamaʻo muʻa´, ne fakaofi ʻaki ʻa e taʻataʻa ʻo Kalaisi"

'Ekisoto 8:20-32

"20Pea folofola ‘a Sihova kia Mōsese, Te ke ‘ā hengihengi, ‘o ke ‘alu ‘o tu‘u ‘i he ‘ao ‘o Felo; he vakai ‘oku ne teu hā‘ele atu ki he vai; pea te ke lea kiate ia ‘o pehē, Ko eni ‘a e folofola ‘a Sihova, Tukuange hoku kakai ke nau tauhi kiate au. 21He kapau ‘e ‘ikai te ke tukuange hoku kakai, ko eni, te u tuku atu kiate koe, pea ki ho‘o kau tamaio‘eiki, pea ki ho kakai, pea ki ho ngaahi fale, ‘a e mongomonga. pea ‘e fonu ‘a e ngaahi fale ‘o e kau ‘Isipite ‘i he mongomonga, kae‘uma‘ā ‘a e kelekele ‘oku nau ‘i ai. 22Ka te u vahe‘i ‘i he ‘aho ko ia ‘a e fonua ‘o Kōseni, ‘a ia ‘oku nofo ai hoku kakai, ke ‘oua na‘a ‘i ai ha mongomonga; koe‘uhi ke ke ‘ilo ko Sihova ai pē au ‘i he loto fonua ni. 23Pea te u ‘ai ‘a e fakamo‘ui ‘i he vaha‘a ‘o hoku kakai mo ho kakai: ko e ‘apongipongi ‘e hoko ‘a e faka‘ilonga ni. 24Pea na‘e fai pehē ‘e Sihova, pea na‘e ha‘u ha fu‘u fanga mongomonga e ki he fale ‘o Felo, mo e fale ‘o ‘ene kau tamaio‘eiki, ki he ngaahi feitu‘u kotoa pē ‘o ‘Isipite; na‘e maumau ‘a e fonua ‘i he mongomonga. 25Pea ui ange ‘e Felo ‘a Mōsese mo ‘Ēlone, ‘o ne pehē, ‘Alu pē ‘o feilaulau ki homou ‘Otua ‘i he fonua. 26Pea pehē ‘e Mōsese, ‘Oku ‘ikai ko ia kuo tu‘utu‘uni, he ko e me‘a tapu ‘a e kakai ‘Isipite te mau feilaulau ‘aki kia Sihova ko homau ‘Otua. Te mau feilaulau ‘aki koā ‘a e me‘a tapu ‘a e kakai ‘Isipite ‘i honau ‘ao? ‘ikai te nau tolongi kimautolu? 27Te mau ‘alu ki he Toafa ko e vā‘ihala ‘o e ‘aho ‘e tolu, pea mau feilaulau ai kia Sihova ko homau ‘Otua, ‘o hangē ko ia te ne toki folofola mai. 28Pea tali ‘e Felo, Te u tuku kimoutolu ke ‘alu ‘o feilaulau kia Sihova ko homou ‘Otua ‘i he Toafa; ka ‘e ‘ikai te mau loko ‘alu mama‘o: mou hūfia au. 29Pea tali ‘e Mōsese, Ko ‘eku ‘alu leva meiate koe, pea te u hū kia Sihova ke ne ‘ave ‘a e mongomonga mei he ‘Afiona, mei ho‘o kau tamaio‘eiki, pea mei ho kakai, ‘apongipongi: kae ‘oua na‘a toe fai kākā ‘e he ‘Afiona, ‘o ta‘etukuange ‘a e kakai ke ‘alu ‘o feilaulau kia Sihova. 30Pea hū kitu‘a ‘a Mōsese meia Felo, ‘o ne lotu kia Sihova. 31Pea na‘e fai ‘e Sihova ki he lea ‘a Mōsese; ‘o ne ‘ave ‘a e mongomonga meia Felo mo ‘ene kau tamaio‘eiki mo hono kakai; 32na‘e ‘ikai ke toe ha taha, ka ka fakafefeka ‘e Felo hono loto ‘i he taimi ko ia foki, pea na‘e ‘ikai te ne tukuange ‘a e kakai."

Na'e tuku atu leva 'e he 'Otua´ 'a e mala hono fā´, 'a ia ko e fanga mongomonga´: pea naʻe fonu ʻa e ngaahi fale ʻo e kau 'Isipite´ ʻi he mongomonga´, pehē ki honau ngaahi kelekele´. Ko Kōseni pē, ʻa ia ne nofo ai 'a e kau 'Isileli´, ne 'ikai ke ʻi ai ha mongomonga. Na'e toki maumau lahi 'a e fanga mongomonga´ 'i he fale 'o Felo´ mo e kau 'Isipite´. Ne ui 'e Felo 'a Mosese ke kole ki he 'Otua´ ke to‟o e mongomonga´, kae 'atā pē ke fai 'enau lotu´ mo e feilaulau´ 'i 'Isipite. Talaange 'e Mosese, 'ikai, he'ikai fiefia e kau 'Isipite´ ia he'enau feilaulauʻaki ʻa e ngaahi monumanu tapu ʻa e kakai 'Isipite´ ʻi honau ʻao´. Ko ia ne talaange leva 'e Felo ke nau ō, kae'oua na'a nau 'alu mama'o mo fuoloa. Kaekehe 'i he taimi pē ne to'o ai 'e Sihova 'a e fanga mongomonga´, ne to e fakafefeka pē ʻe Felo ia hono loto´, pea naʻe ʻikai te ne tukuange ʻa e kakai´. Ko Kalaisi pē hotau Hao'anga mei he loi´ mo e kākā´

Lotu: Lotu ‘o kole ki he ‘Otua´ ke Ne tokoni’i koe ke ‘oua na’a ke hangē ko Felo´ ‘o lea loi mo kākā ke lava hono loto´.

Sapate 16 'Epeleli, 2017

MALA HONO TOLU

Veesi Lauloto: 'Efeso 2:13

"Ka ʻi onoponi, ʻia Kalaisi Sīsū´,  ko kimoutolu naʻe mamaʻo muʻa´, ne fakaofi ʻaki ʻa e taʻataʻa ʻo Kalaisi"

'Ekisoto 8:16-19

"16Pea folofola ‘a Sihova kia Mōsese, Lea kia ‘Ēlone ‘o pehē, Ke ke ofa ho tokotoko, ‘o taa‘i ‘a e efu ‘o e fonua, pea ‘e hoko ia ko e namu ‘i he ngaahi feitu‘u kotoa ‘o ‘Isipite. 17Pea na‘a na fai pehē, pea na‘e ofa ‘e ‘Ēlone hono nima mo e tokotoko, ‘o ne taa‘i ‘a e efu ‘o e fonua, pea na‘e hoko ‘a e namu ki he tangata mo e manu; na‘e hoko ‘a e efu kotoa ‘o e fonua ko e namu ‘i he feitu‘u kotoa pē ‘o ‘Isipite. 18Pea na‘e fai pehē ‘e he kau maki ‘aki ‘enau ngaahi tō‘onga fakalou‘akau ke ‘omi ‘a e namu, ka na‘e ‘ikai te nau lava; pea na‘e tō ‘a e namu ki he tangata mo e manu. 19Pea na‘e pehē ‘a e kau maki kia Felo, Ko e tuhu ‘o e ‘Otua eni: ka na‘e fakafefeka ‘a e loto ‘o Felo, pea na‘e ‘ikai te ne tokanga kiate kinaua, ‘o tatau mo e me‘a na‘e fakahā ‘e Sihova."

Pea folofola ʻa Sihova kia Mosese, “Tala kia Elone ke ne ofa atu hono tokotoko´, ʻo taaʻi ʻa e efu ʻo e fonua´, pea ʻe hoko ia ko e namu ʻi he ngaahi feituʻu kotoa ʻo Isipite´ (ko e mala ‘eni hono tolu´). Pea naʻa na fai kotoa ia, pea naʻe hoko ʻa e namu´ ki he tangata´ mo e manu´; pea hoko ʻa e efu kotoa ʻo e fonua´ ko e namu ʻi he feituʻu kotoa pē ʻo Isipite´. Naʻe feinga mo e kau maki´ ʻaki ʻenau ngaahi tōʻonga fakalouʻakau´ ke fai pehē, ka naʻe ʻikai te nau lava ke ʻomi ʻae namu´. Ko ia naʻe pehē ʻa e kau maki´ kia Felo, “Ko e tuhu eni ‘o e ʻOtua´: ka naʻe fakafefeka pē loto ia ʻo Felo´, pea ‘ikai te ne tokanga kiate kinaua, ʻo tatau mo e meʻa naʻe fakahā ʻe Sihova´. Fānau, tokanga na’a ‘oku toutou ‘oatu he ‘Otua´ hao faingamālie ke ke fakatomala mo talangofua, ka ke fakafefeka pē. ‘Ouae ma’u e fa’ahinga laumālie kovi ko ia ne ‘ia Felo´.

Lotu: Lotu ‘o kole ki he ‘Otua´ ke Ne ‘omi ha loto fakavaivai mo tukulolo kiate koe ke ke taliangi ma’upē ki He’ene ngaahi fekau.

Tokonaki 15 'Epeleli, 2017

MALA HONO UA

Veesi Lauloto: Palōveepi 3:5-6

"Falala ki he ʻEiki´ ʻaki ʻa e kotoa ʻo ho loto´, ʻo ʻouae faaki ki ho poto ‘oʻou: Ke ke fakaongo kiate IA ʻi ho hala kotoa pē, pea ʻe fakatonutonu ʻe IA ho ngaahi ʻalunga´"

'Ekisoto 8:1-15

"1PEA folofola ‘a Sihova kia Mōsese, Hū atu kia Felo, ‘o lea kiate ia, ‘o pehē, Ko eni ‘a e lea ‘a Sihova, Tukuange hoku kakai ke nau tauhi kiate au. 2Pea kapau te ke fakafisi ke tukuange, ko eni, te u taa‘i ho ngaahi feitu‘u kotoa pē ‘aki ‘a e fanga poto; 3pea ‘e nga‘uta ‘a e vaitafe ‘i he fanga poto, pea te nau ‘alu hake ‘o hū ki ho fale, mo ho fale mohe, pea ki ho mohenga, pea ki he fale ‘o ho‘o kau tamaio‘eiki, pea ki ho kakai, pea ki ho‘o ngaahi ngoto‘umu, pea ki ho ngaahi natu‘anga mā; 4‘io, ‘e ‘alu hake ‘a e fanga poto kiate koe mo ho kakai mo ho‘o kau tamaio‘eiki kotoa pē. 5Pea na‘e folofola ‘a Sihova kia Mōsese, Ke ke lea kia ‘Ēlone, ‘o pehē, Mafao atu ho nima mo ho tokotoko ki he ngaahi vaitafe, ki he ngaahi manga‘i vai pea mo e ngaahi ano, ‘o ‘ai ke ‘alu hake ‘a e fanga poto ki he fonua ‘o ‘Isipite. 6Pea na‘e mafao atu ‘e ‘Ēlone hono nima ki he ngaahi vaitafe ‘o ‘Isipite; pea na‘e ‘alu hake ‘a e fanga poto, ‘o ‘ufi‘ufi ‘a e fonua ‘o ‘Isipite. 7Pea na‘e fai pehē foki ‘e he kau maki ‘aki ‘enau ngaahi tō‘onga fakalou‘akau; pea na‘e ‘alu hake ‘a e fanga poto ki he funga fonua ‘o ‘Isipite. 8Pea ui mai ‘e Felo ‘a Mōsese mo ‘Ēlone, ‘o ne pehē, Mo hūfia kia Sihova ke ‘ave ‘a e fanga poto meiate au mo hoku kakai; pea te u tukuange ‘a e kakai ke nau feilaulau kia Sihova. 9Pea lea ‘a Mōsese kia Felo, Fa‘iteliha kiate au: ko e taimi fē te u hūfia ma‘au mo ho‘o kau tamaio‘eiki mo ho kakai, ke faka‘auha ‘a e fanga poto meiate koe mo ho ngaahi fale, ‘o nau toe ‘i he vaitafe pē? 10Pea folofola ‘e ia, ‘Apongipongi. Pea ne tali, ‘E fai pē ki ho‘o me‘a, koe‘uhi ke ke ‘ilo ‘oku ‘ikai ha taha ‘oku tatau mo Sihova ko homau ‘Otua. 11Pea ‘e hiki ‘a e fanga poto meiate koe, pea mo ho ngaahi fale, pea mei ho‘o kau tamaio‘eiki, pea mei ho kakai; ngata pē ‘i he vaitafe te nau toe ki ai. 12Pea na‘e hū kitu‘a ‘a Mōsese mo ‘Ēlone meia Felo, pea na‘e tautapa ‘a Mōsese kia Sihova koe‘uhi ko e fanga poto, ‘a ia kuo ne ‘omi kia Felo. 13Pea na‘e fai ‘e Sihova ki he lea ‘a Mōsese, pea na‘e mate ‘a e fanga poto mei he ngaahi fale, mei he ngaahi vilisi, pea mei he ngaahi ngoue‘anga. 14Pea na‘a nau tānaki ‘o fokotu‘utu‘u; pea na‘e ‘elo ‘a e fonua. 15Ka ‘i he vakai ‘e Felo ‘oku nongononga, na‘a ne fakafefeka hono loto, pea na‘e ‘ikai te ne tokanga kiate kinaua; ‘o hangē ko e me‘a na‘e fakahā ‘e Sihova."

Ko e mala hono ua´ ko e tukuange mai he ‘Otua´ ‘a e fanga poto´; pea na’e ‘ufi’ufi ‘e he fanga poto´, ʻa e tuliki kotoa pē ʻo ‘Isipite´. Ka naʻe fai pehē pē foki ʻe he kau maki´ ʻaki ʻenau ngaahi tōʻonga fakalouʻakau´. Pea ui mai ʻe Felo ʻa Mosese mo ‘Elone, ʻo ne pehē, “Mo hūfia kia Sihova ke ʻave ʻa e fanga poto´ meiate au mo hoku kakai´; pea te u tukuange ʻa e kakai´ ke nau feilaulau kia Sihova.” Pea ne tali, “ʻE fai pē hoʻo meʻa´, koeʻuhi´ ke ke ʻilo ʻoku ʻikai ha taha ʻoku tatau mo Sihova ko homau ʻOtua´. Pea ʻe hiki ʻa e fanga poto´ meiate koe, pea mo ho ngaahi fale´, pea mei hoʻo kau tamaioʻeiki´ mo ho kakai´” Pea naʻe tautapa ʻa Mosese kia Sihova koeʻuhi´ ko e fanga poto´, pea naʻe fai ʻe Sihova ki he lea ʻa Mōsese´, pea naʻa nau tānaki ʻo fokotuʻutuʻu; pea naʻe nanamu ʻa e fonua´. Ka ʻi he vakai ʻe Felo ʻoku nonga´, naʻa ne to e fakafefeka pē hono loto´, ‘o ta’ofi  kinautolu mei he mavahe mei ‘Isipite.

Lotu: Lotu ‘o fakamālō ki he ‘Otua´ He’ene fakahāhā Hono mafai´ ke sio ho ngaahi fili´ ‘oku tu’u taha pē hotau ‘Otua´, ‘ikai Hano ua.

Falaite 14 'Epeleli, 2017

MALA ‘ULUAKI

Veesi Lauloto: Palōveepi 3:5-6

"Falala ki he ʻEiki´ ʻaki ʻa e kotoa ʻo ho loto´, ʻo ʻouae faaki ki ho poto ‘oʻou: Ke ke fakaongo kiate IA ʻi ho hala kotoa pē, pea ʻe fakatonutonu ʻe IA ho ngaahi ʻalunga´"

'Ekisoto 7:14-25

"14Pea folofola ‘a Sihova kia Mōsese, ‘o pehē, ‘Oku taiki ‘a e loto ‘o Felo ke tukuange ‘a e kakai. 15‘Alu kia Felo ‘apongipongi; vakai, ‘oku ne ‘alu atu ki he vai; pea te ke tu‘u ‘i he ngutu vaitafe ke fakafetaulaki kiate ia; pea ko e tokotoko na‘e liliu ko e ngata te ke ‘alu mo koe. 16Pea te ke lea kiate ia ‘o pehē, Ko Sihova ko e ‘Otua ‘o ha‘a Hepelū kuo ne fekau au kiate koe. Ko ‘ene folofola mai, Ke ke tukuange hoku kakai ke nau tauhi kiate au ‘i he Toafa: pea ko eni kuo te‘eki te ke tokanga ki ai. 17Ko e folofola eni ‘a Sihova, Ko e me‘a ko eni te ke ‘ilo ai ko Sihova au: vakai ko ‘eku taa‘i eni ‘aki ‘a e tokotoko ‘oku ‘i hoku nima ni ‘a e vai ‘o e vaitafe; pea ‘e liliu ke toto. 18Pea ‘e mate ‘a e ika ‘oku ‘i he vaitafe, pea ‘e ‘elo ‘a e vaitafe; pea ‘e ongosia ‘a e kakai ‘Isipite ‘i he fie inu ki he vai ‘o e vaitafe. 19Pea folofola ‘a Sihova kia Mōsese, Ke ke lea kia ‘Ēlone, ‘o pehē, To‘o ho tokotoko, pea mafao atu ho nima ki he ngaahi vai ‘o ‘Isipite, ki honau ngaahi vaitafe, ki honau ngaahi manga‘i vai mo e ngaahi anovai, mo honau ngaahi tokanga vai kotoa pē; pea te nau hoko ‘o toto; pea ‘e toto ‘a e vai ‘i he fonua kotoa ‘o ‘Isipite ‘i he ngaahi ipu ‘akau mo e ngaahi ipu maka. 20Pea na‘e fai pehē ‘e Mōsese mo ‘Ēlone, ‘o hangē ko e tu‘utu‘uni ‘a Sihova; pea na‘a ne ofa‘aki ‘a e tokotoko, ‘o taa‘i ‘a e vai ‘o e vaitafe ‘i he ‘ao ‘o Felo pea mo ‘ene kau tamaio‘eiki, pea na‘e liliu kotoa ‘a e vai ‘o e vaitafe ke toto. 21Pea na‘e mate ai ‘a e ika na‘e ‘i ai, pea na‘e ‘elo ‘a e vaitafe, pea na‘e ‘ikai lava ‘a e kakai ‘Isipite ke inu mei he vaitafe, pea ko e toto ko ia na‘e ‘i he fonua kotoa ‘o ‘Isipite. 22Pea na‘e fai pehē foki ‘a e kau maki ‘o ‘Isipite ‘aki ‘enau ngaahi tō‘onga fakalou‘akau; pea na‘e fakafefeka ‘a e loto ‘o Felo, pea na‘e ‘ikai te ne tokanga kiate kinaua, ‘o hangē ko e me‘a na‘e fakahā ‘e Sihova. 23Pea tafoki ange ‘a Felo, ‘o hū ki hono fale, pea na‘e ‘ikai te ne ‘ai ki hono loto ‘a e me‘a ni foki. 24Pea na‘e keli holo ‘e he kakai ‘Isipite kotoa pē ‘i he ve‘e vaitafe ke ma‘u ha vai ke inu; he na‘e ‘ikai te nau lava ke inu ‘a e vai ‘o e vaitafe. 25Pea na‘e kakato ha ‘aho ‘e fitu hili hono taa‘i ‘o e vaitafe ‘e Sihova."

Ne to e folofola ʻa Sihova kia Mosese, ʻo pehē, “Mo foki kia Felo ʻapongipongi; vakai, ʻoku ne ʻalu atu ki he vai´; pea te ke fakafetaulaki kiate ia; Pea te ke lea kiate ia, “Ko Sihova ko e ʻOtua ʻo haʻa Hepelū´ kuo Ne fekau au ke tala kiate koe, ke ke tukuange Hoku kakai´ ke nau tauhi kiate Au ʻi he Toafa´: he ka ‘ikai te ke tokanga ki ai, te u taaʻi ʻaki ʻa e tokotoko ʻoku ʻi hoku nima ni ʻa e vai ʻo e vaitafe´; pea ʻe liliu  ‘a e vai kotoa pē ko e toto. Pea ʻe mate ʻa e ika´ pea ‘e ‘ikai to e lava ha inu mei he vaitafe´”. Na’e lava pē foki mo e kau maki ia ‘o ‘Isipite´ ‘o fai tatau, ʻaki ʻenau ngaahi tōʻonga fakalouʻakau´; pea naʻe fakafefeka ʻa e loto ʻo Felo´, pea naʻe ʻikai te ne tokanga kiate kinaua, ʻo hangē ko e meʻa naʻe fakahā ʻe Sihova´. Pea naʻe kakato ha ʻaho ʻe fitu hili hono taaʻi ʻo e vaitafe´ ʻe Sihova.

Lotu: Lotu ‘o fakamālō ki he ‘Otua´ koe’uhi´ ko e ‘Otua lahi mo māfimafi ‘oku tau lotu ki ai´, pea ‘oku tu’u ‘i AI ‘etau falala´.

Tu'apulelulu 13 'Epeleli, 2017

TOKOTOKO ‘O ‘ELONE

Veesi Lauloto: Palōveepi 3:5-6

"Falala ki he ʻEiki´ ʻaki ʻa e kotoa ʻo ho loto´, ʻo ʻouae faaki ki ho poto ‘oʻou: Ke ke fakaongo kiate IA ʻi ho hala kotoa pē, pea ʻe fakatonutonu ʻe IA ho ngaahi ʻalunga´"

'Ekisoto 7:8-13

"8Pea folofola ‘a Sihova kia Mōsese mo ‘Ēlone, ‘o pehē, 9Ka lea mai ‘a Felo kiate kimoua ‘o pehē, Fai ha mana ma‘amoua; pea te ke pehē kia ‘Ēlone, To‘o ho tokotoko, ‘o sī atu ia ‘i he ‘ao ‘o Felo: ‘e hoko ia ko e ngata. 10Pea hū atu ‘a Mōsese mo ‘Ēlone kia Felo, pea na fai ‘o hangē ko e tu‘utu‘uni ‘a Sihova; pea na‘e sī atu ‘e ‘Ēlone hono tokotoko ‘i he ‘ao ‘o Felo mo ‘ene kau tamaio‘eiki, pea na‘e hoko ia ko e ngata. 11Pea ui mai ‘e Felo foki ‘a e kau poto mo e kau fai tuki, pea na‘e lava ‘a e me‘a ko ia ‘e he kau maki ‘o ‘Isipite foki ‘aki ‘enau ngaahi tō‘onga fakalou‘akau. 12He na‘a nau takitaha sī atu hono tokotoko, ‘o nau hoko ko e ngaahi ngata: ka na‘e folo hifo ‘e he tokotoko ‘o ‘Ēlone ‘a e ngaahi tokotoko ‘onautolu. 13Ka na‘e fakafefeka ‘a e loto ‘o Felo, pea na‘e ‘ikai te ne tokanga kiate kinaua; ‘o hangē ko e me‘a na‘e fakahā ‘e Sihova."

Pea folofola ʻa Sihova kia Mosese ʻo pehē, “Ka lea atu ʻa Felo kiate kimoua ke mo fai ha mana pea te ke lea leva kia ‘Elone, ke toʻo hono tokotoko´ ʻo sī atu he ʻao ʻo Felo´: ʻe hoko ia ko e ngata.” Ne hū atu leva ʻa Mosese mo ‘Elone kia Felo, pea na fai ʻo hangē ko e tuʻutuʻuni ʻa Sihova´; pea naʻe sī atu ʻe ‘Elone hono tokotoko´ ʻi he ʻao ʻo Felo mo ʻene kau tamaioʻeiki´, pea naʻe hoko ia ko e ngata. Pea ui mai foki ʻe Felo mo ‘ene kau poto´ mo e kau fai tuki´ (sorcerers), pea naʻa nau lava pē mo kinautolu ‘o fai e mana tatau ʻaki ʻenau ngaahi tōʻonga fakalouʻakau´. Naʻa nau taki taha sī atu hono tokotoko, ʻo nau hoko ko e ngaahi ngata: ka naʻe folo ʻe he tokotoko ʻo ‘Elone´ ʻa e ngaahi tokotoko ʻonautolu´. Kae kei fakafefeka pē loto ia ʻo Felo´, pea naʻe ʻikai te ne tokanga kiate kinaua; ʻo hangē koe meʻa naʻe fakahā ʻe Sihova.

Lotu: Lotu ‘o fakamālō ki he ‘Otua´ He’ene foaki ma’au ‘Ene loto mā’ulalo´, ke ke falala ma’upē kiate IA, ‘o ‘ouae tu’u ho’o fononga´ ‘i hao poto.

Pulelulu 12 'Epeleli, 2017

KO E MAFI ‘O E ‘OTUA

Veesi Lauloto: Palōveepi 3:5-6

"Falala ki he ʻEiki´ ʻaki ʻa e kotoa ʻo ho loto´, ʻo ʻouae faaki ki ho poto ‘oʻou: Ke ke fakaongo kiate IA ʻi ho hala kotoa pē, pea ʻe fakatonutonu ʻe IA ho ngaahi ʻalunga´"

'Ekisoto 7:1-7

"1PEA folofola ‘a Sihova kia Mōsese; Vakai, kuo u ngaohi koe ko e ‘Otua kia Felo, pea ko ‘Ēlone ko ho tokoua ko ho palōfita ia. 2Ko koe te ke tala ‘a e ngaahi me‘a kehekehe te u tu‘utu‘uni atu, pea ko ‘Ēlone ko ho tokoua te ne fakahā kia Felo ke ne tuku atu ‘a ha‘a ‘Isileli mei hono fonua. 3Pea ko au te u fakafefeka ‘a e loto ‘o Felo, pea te u ‘ai ke lahi ‘eku ngaahi faka‘ilonga mo ‘eku ngaahi mana ‘i he fonua ko ‘Isipite. 4Pea ‘e ‘ikai tokanga ‘a Felo kiate kimoua, pea te u ‘ai hoku nima ki ‘Isipite, pea u ‘omi kitu‘a ‘a e ngaahi kongakau ‘o hoku kakai ko ha‘a ‘Isileli ‘aki ‘a e ngaahi tautea lahi. 5Pea ‘e ‘ilo ‘e he kakai ‘Isipite ko Sihova au, ‘oka u ka hiki hoku nima ki ‘Isipite, ‘o ‘omi ‘a ha‘a ‘Isileli mei honau lotolotonga. 6Pea na‘e fai ‘e Mōsese mo ‘Ēlone ‘o hangē ko e tu‘utu‘uni ‘a Sihova kiate kinaua, na‘e pehē ‘ena fai. 7Pea kuo valungofulu ta‘u ‘a Mōsese, pea valungofulu mā tolu ta‘u ‘a ‘Ēlone, ‘i he‘ena fakatau folofola kia Felo."

Ne to e fekau'i 'e he 'Otua´ 'a Mosese mo ‘Elone ke na 'alu kia Felo pea na fai ai mo e ngaahi mana ka na'e to e fakafefeka pē 'e he 'Otua´ ia 'a e loto 'o Felo´ pea 'ikai ke ne tukuange 'a e kakai 'Isileli´ ke nau 'alu, koe’uhi´ ke hā ai Hono mafi´, ke sio ki ai ‘a ‘Isipite mo māmani katoa. (“Pea ko AU te u fakafefeka ʻa e loto ʻo Felo´, pea te U ʻai ke lahi ʻEku ngaahi fakaʻilonga´ mo ʻEku ngaahi mana´ ʻi he fonua ko ‘Isipite´. Pea ʻe ʻikai tokanga ʻa Felo kiate kimoua, pea te U ... ʻomi kituʻa Hoku kakai´ ... ʻaki ʻa e ngaahi tautea lahi. Pea ʻe ʻilo ʻe he kakai Isipite´ ko Sihova Au..”) Pea naʻe fai ʻe Mosese mo ‘Elone ʻo hangē ko e tuʻutuʻuni ʻa Sihova kiate kinaua´. Pea kuo 80 taʻu ʻa Mosese, pea 83 taʻu ʻa Elone, ʻi heʻena fakatau folofola ko ‘eni kia Felo´.

Lotu: Lotu ‘o fakamālō ki he ‘Otua´ He’ene palani’i ‘a e kolosi´ ke fakahaofi ai koe mei he mate koe’uhi´ ko e angahala´, ‘a ‘eni ‘e tō ki ai ‘a Felo.

Tusite 11 'Epeleli, 2017

TOE FAKALOTOLAHI’I ‘E HE ‘OTUA´ ‘A MOSESE

Veesi Lauloto: 1 Tesalonaika 5:14

"Ko IA ʻoku Ne ui kimoutolu ki ai´ ko e Tokotaha ia ʻoku fai ki Heʻene Lea´, pea te Ne fai foki ʻa e meʻa ni."

'Ekisoto 6:1-9

"1PEA folofola ‘a Sihova kia Mōsese, Ko eni te ke mamata ki he me‘a te u fai kia Felo; he ko e tā mamafa ‘e tuku atu ai kimoutolu; ‘io, ‘i he tā mamafa te ne kapusi mei he fonua. 2Pea folofola ‘a e ‘Otua kia Mōsese, ‘o ne pehē kiate ia, Ko Sihova au 3Na‘a ku hā kia ‘Epalahame mo ‘Aisake mo Sēkope ko e ‘Otua ko SĀTAI, ka ‘i hoku hingoa ko SIHOVA na‘e ‘ikai te nau maheni mo au. 4Pea ne u fokotu‘u foki ‘eku fuakava mo kinautolu, ke ‘ange kiate kinautolu ‘a e fonua ko Kēnani, ‘a e fonua ‘o ‘enau nofo pilikimi, ‘a ia na‘a nau nofo ‘āunofo ai. 5Kae‘uma‘ā foki kuo u ongo‘i ‘a e to‘e ‘a ha‘a ‘Isileli, ‘a ia ‘oku fakapōpula‘i ‘e he kau ‘Isipite; pea kuo u manatu ‘eku fuakava. 6Ko ia ke ke lea ki ha‘a ‘Isileli, ‘o pehē, Ko Sihova au, pea te u hamusi kimoutolu mei he ngaahi kavenga ‘a e kau ‘Isipite, pea te u fakahaofi kimoutolu mei he‘enau fakapōpula‘i, pea te u huhu‘i kimoutolu ‘aki ‘a e nima kuo hiki tā, mo e ngaahi tautea lahi: 7pea te u to‘o kimoutolu mo‘oku kakai, pea te u nofo ko homou ‘Otua: pea te mou ‘ilo ko Sihova au ko homou ‘Otua, ‘a ia ‘oku ne hamusi kimoutolu mei he ngaahi kavenga ‘a e kakai ‘Isipite. 8Pea te u ‘ohake kimoutolu ki he fonua, ‘a ia na‘a ku hiki ai hoku nima ke ‘ange ia kia ‘Epalahame mo ‘Aisake mo Sēkope; pea te u foaki ia mo‘omou tofi‘a: ko Sihova au. 9Pea na‘e lea pehē ‘a Mōsese ki ha‘a ‘Isileli, ka na‘e ‘ikai te nau tokanga kia Mōsese ko ‘enau lotosi‘i, pea mo e ongosia ‘i he fatongia."

Ne fakalotolahi'i 'e he 'Otua´ 'a Mosese ke tu’uma’u ‘ene falala ange kiate Ia´. Pea Ne folofola kia Mosese, “....te ke mamata ki he meʻa te U fai kia Felo´; he ko e tā mamafa ʻe tuku atu ai kimoutolu´; Ko SIHOVA Au. Kuo U ongoʻi ʻa e toʻe ʻa haʻa ‘Isileli´, hono fakapōpulaʻi ʻe he kau ‘Isipite´; pea kuo U manatu ki Heʻeku fuakava´. Ko ia, lea ki haʻa ‘Isileli, ʻo pehē, Ko Sihova Au, te U hamusi kimoutolu mei ‘Isipite, te U fakahaofi kimoutolu, pea te U huhuʻi kimoutolu ʻaki ʻa e nima kuo hikitā, mo e ngaahi tautea lahi: pea te mou hoko ko Hoku kakai, pea te U nofo atu ko homou ʻOtua: pea te mou ʻilo ko Sihova Au ko homou ʻOtua´, pea te U ʻohake kimoutolu ki he fonua na’a Ku palōmesi ‘aki mo’o mou tofi’a ki homou fanga kui´.” Pea naʻe lea pehē ʻa Mosese ki haʻa ‘Isileli, ka naʻe ʻikai te nau tokanga kia Mosese ko ʻenau loto siʻi´, pea mo e ongosia ʻi he fatongia´. Tui falala ki he 'Otua´ tatau ai pē, pe 'oku mahino kiate koe pe 'ikai.

Lotu: Lotu ‘o kole ki he ‘Otua´ ke Ne tokoni’i koe ke tu’uma’u ho’o falala kiate Ia´, tatau aipē ‘o ka ngaohikovia koe mo leakovia.

Monite 10 'Epeleli, 2017

LAUNGA ‘A E KAKAI

Veesi Lauloto: 1 Tesalonaika 5:14

"Ko IA ʻoku Ne ui kimoutolu ki ai´ ko e Tokotaha ia ʻoku fai ki Heʻene Lea´, pea te Ne fai foki ʻa e meʻa ni."

'Ekisoto 5:10-23

"10Pea ‘alu atu ‘a e kau ‘ōfisa ‘o e kakai mo ‘enau kau matāpule, ‘o nau lea ki he kakai, ‘o pehē, Ko eni ‘a e folofola ‘a Felo, ‘E ‘ikai te u ‘atu ha kau‘i koane kiate kimoutolu: 11ka mou ō pē, ‘o tufi kau‘i koane ma‘amoutolu mei ha potu te mou ‘ilo ai; ka ‘e ‘ikai fakasi‘isi‘i ho‘omou ngāue ha momo‘i me‘a. 12Ko ia na‘e movetevete ‘a e kakai ki he feitu‘u kehekehe ‘o ‘Isipite ke tufi veve ma‘anau kau‘i koane. 13Pea na‘e fakapuha‘a‘i ‘e he kau ‘ōfisa, ‘o pehē, Mou fakakakato ho‘omou ngāue, ‘a e ‘inasi ‘o e ‘aho ‘i he ‘aho pē ko ia, ‘o hangē ko ia ‘i he ‘i ai ‘a e kau‘i koane. 14Pea na‘e taa‘i ‘a e kau matāpule ‘o ha‘a ‘Isileli, ‘a ia kuo fakanofo ‘e he kau ‘ōfisa ‘a Felo ke pule kiate kinautolu, pea na‘e lau kiate kinautolu, ‘o pehē, Ko e hā kuo ‘ikai ai te mou faka‘osi ho‘omou ngafa maka ‘umea ‘a e ‘aneafi mo e ‘aho ni ‘o hangē ko ia ‘i mu‘a? 15Pea ‘alu ai ‘a e kau matāpule ‘o ha‘a ‘Isileli, ‘o tautapa kia Felo, ‘o nau pehē, Ko e hā kuo ke fai pehē ai ki ho‘o kau tamaio‘eiki? 16‘Oku ‘ikai ‘omai ha kau‘i koane ki ho‘o kau tamaio‘eiki; ka ko e me‘a ki he maka ‘umea, ‘oku nau lau ai pē kiate kimautolu, Mou ngaohi pē: pea ko eni ‘oku taa‘i ho‘o kau tamaio‘eiki, ka ko ho kakai pē ‘oku hala. 17Ka ka folofola ‘e ia, ‘Oku mou fakapikopiko, ‘oku mou fakapikopiko, ko ia ‘oku mou pehē mai ai, Ke mau ‘alu mu‘a ‘o feilaulau kia Sihova. 18Ko ia mou ‘alu leva, ‘o ngāue; ka ‘e ‘ikai ‘atu ha kau‘i koane kiate kimoutolu, ka te mou ‘atu pē ho‘omou ngafa maka ‘umea. 19Pea na‘e hā ki he kau matāpule ‘o ha‘a ‘Isileli kuo kovi ‘enau me‘a, ‘i he pehē mai, ‘E ‘ikai te mou fakasi‘isi‘i ho‘omou ngaahi maka ‘umea, ka ko e ngafa ‘o e ‘aho ‘e fai ‘i hono ‘aho. 20Pea ‘i he‘enau fe‘iloaki mo Mōsese mo ‘Ēlone, ‘a ia na‘a na tutu‘u mai ke fakafetaulaki kiate kinautolu ‘i he‘enau hū mai meia Felo. 21Pea nau pehē kiate kinaua, Ke ‘afio ‘a Sihova kiate kimoua, ‘o fakamāu‘i ‘a e me‘a, koe‘uhi ko ho‘omo fakanamukuu‘i kimautolu ‘i he ‘ao ‘o Felo mo ‘ene kau tamaio‘eiki, ‘o ‘ai ha heletā ki hono nima ke tāmate‘i ‘a kimautolu. 22Pea na‘e foki ‘a Mōsese kia Sihova, ‘o ne pehē, ‘Ēī, ko e hā kuo ke fai kovi ai ki he kakai ni? Ko e hā na‘a ke fekau mai ai au ‘i he me‘a ko eni? 23He talu ‘eku ha‘u kia Felo, ke lea ki ai ‘i ho huafa, mo ‘ene ngaohikovi‘i ‘a e kakai ni; pea tala‘ehai kuo ke momo‘i fakahaofi ho kakai."

Ne tu'utu'uni leva 'e he kau 'ofisa 'a Felo´ ki he kakai Hepelū´ ke nau takitaha 'alu 'o tufi kau'i koane, ka kuopau ke nau kei fakakakato pe 'a e 'inasi piliki 'o e 'aho takitaha. Pea nau taaʻi ʻa e kau pōpula Hepelū´, kapau na’e ‘ikai faka’osi honau ngaahi ngafa makaʻumea´ he ‘aho takitaha. Ne fu’u ongo hono ngaohikovia kinautolu´, ko ia ne ‘alu atu leva ‘a e kau mātu’a 'Isileli´ 'o lāunga kia Felo; ‘o nau ‘ilo ai tā ko e ‘uhinga´ - ko e kole 'a Mosese mo 'Elone ke tukuange 'a e kakai´ ke nau ‘alu ki he toafa´ ‘o fai ‘enau lotu ai ki honau ‘Otua´ ha fo’i ‘aho ‘e 3, ko ia ne nau to e tafoki hake ai ‘o tukuaki'i 'a Mosese mo 'Elone 'i hono ngaohi kovi'i kinautolu 'e Felo´. Ne 'alu atu leva 'a Mosese 'o tautapa kia Sihova. Ko e me’a pē ke fai ‘i ha fa’ahinga tūkunga faingata’a ‘o e fononga´ fānau, ko e ui pē ki he ‘Otua´, mahu’inga ‘aupito e lotu´.

Lotu: Lotu ‘o kole ki he ‘Otua´ ke Ne tokoni atu ke ke mo’ui fa’a lotu, tautefito he taimi ‘oku lahi ai e ‘ahi’ahi´ mo e faingata’a.

Sapate 9 'Epeleli, 2017

FONONGA KIA FELO

Veesi Lauloto: 1 Tesalonaika 5:14

"Ko IA ʻoku Ne ui kimoutolu ki ai´ ko e Tokotaha ia ʻoku fai ki Heʻene Lea´, pea te Ne fai foki ʻa e meʻa ni."

'Ekisoto 5:1-9

"1PEA hili ia na‘e ‘alu atu ‘a Mōsese mo ‘Ēlone, ‘o na fakahā kia Felo, ‘o pehē, Ko e folofola eni ‘a Sihova ko e ‘Otua ‘o ‘Isileli, Tukuange hoku kakai ke fai ha kātoanga kiate au ‘i he Toafa. 2Pea tali ‘a Felo, Ko hai ‘a Sihova ke u tokanga ai ki he‘ene lea, ‘o tuku atu ‘a ‘Isileli? ‘Oku ‘ikai te u ‘ilo ‘a Sihova, pea ‘e ‘ikai foki te u tuku atu ‘a ‘Isileli. 3Pea na‘a na pehē, Ko e ‘Otua ‘o ha‘a Hepelū kuo ne hā‘ele mai kiate kimautolu: ko ia ke mau ‘alu mu‘a ki he Toafa, ko e vaa‘i hala ‘o e ‘aho ‘e tolu, ke feilaulau kia Sihova ko homau ‘Otua; na‘a ne taa‘i kimautolu ‘aki ‘a e mahaki faka‘auha, pe ko e heletā. 4Pea folofola kiate kinaua ‘e he Tu‘i ‘Isipite, ‘E Mōsese mo ‘Ēlone, ko e hā ‘oku mo fakalelu‘i ai ‘a e kakai mei he‘enau ngāue? Mou ō ki ho‘omou ngaahi kavenga. 5Pea folofola ‘a Felo; Vakai, ‘oku tokolahi eni ‘a e kau tuku‘uta na, pea ‘oku mo fakamālōlō kinautolu mei he‘enau ngaahi kavenga. 6Pea na‘e tu‘utu‘uni ‘e Felo ‘i he ‘aho ko ia ki he kau ‘ōfisa na‘e pule ki he kakai, mo honau kau matāpule, ‘o pehē, 7‘E ‘ikai te mau toe ‘ange kau‘i koane ki he kakai ke ngaohi ‘aki ‘a e maka ‘umea, ‘o hangē ko e taimi mu‘a: tuku ke nau ‘alu ‘o tufi kau‘i koane ma‘anautolu. 8Ka ko e lau ‘o e ngaahi maka ‘umea, ‘a ia na‘a nau ngaohi mu‘a, te mau hilifaki ai pē kiate kinautolu; ‘e ‘ikai te mau fakasi‘isi‘i ki ai: he ‘oku nau fakapikopiko, ko ia ‘oku nau tangi ai ‘o pehē, Ke mau ‘alu ‘o feilaulau ki homau ‘Otua. 9Fakamamafa ange ‘a e ngāue ‘a e kau siana na, koe‘uhi ke nau mo‘ua ai, ‘o ‘ikai tokanga ki he ngaahi tala launoa."

Pea hili ia´, ne ʻalu atu leva ʻa Mosese mo ‘Elone, ʻo na fakahā kia Felo ‘a e folofola ‘a Sihova´, ke tukuange 'a e kakai Hepelū´ ke nau ʻalu atu ki he toafa´, ha ʻaho ʻe tolu, ke feilaulau kia Sihova; ka na'e kalokalo 'a Felo pea ne fakahā 'oku 'ikai ke ne ‘ilo pe kohai 'a Sihova. ‘Oku fefeka pehē pē ‘a e loto ia ‘o e kau ta’etui ‘Otua´ fānau, ‘oku nau ta’e’apasia mo e ta’emahino lahi….  Neongo e kole ‘a ‘Elone mo Mosese´, ka na'e 'ikai pē 'a Felo, ‘o ne tu'utu'uni ‘e ia ke to e fakalahi ange ‘a e ngāue 'a e kakai Hepelū´, koeʻuhi´ ke nau moʻua ai, ʻo ʻikai ke nau to e tokanga ki he ngaahi tala ‘oku ha’u mo Mosese mo ‘Elone´. ‘O ne tala ki he kau pule ngāue´ ke ‘oua toe ʻange ha kauʻi koane ki he kau Hepelū´ ke ngaohiʻaki e makaʻumea´, hangē ko e taimi muʻa´: tuku ke nau ʻalu ʻo tufi kauʻi koane maʻanautolu, pea ke nau kei ngaohi pē maka’umea lahi tatau.

Lotu: Kole ki he ‘Otua´ fānau, ke Ne pukepuke ho’o tui´ mo ho’o ‘ofa ‘Otua´, ke ke tu’uma’u he taimi ‘oku fai ai ho fakatanga’i´ mo ngaohikovia.

Tokonaki 8 'Epeleli, 2017

‘ELONE, KE TOKONI KIA MOSESE

Veesi Lauloto: 1 Tesalonaika 5:14

"Ko IA ʻoku Ne ui kimoutolu ki ai´ ko e Tokotaha ia ʻoku fai ki Heʻene Lea´, pea te Ne fai foki ʻa e meʻa ni."

'Ekisoto 4:10-18

"10Pea lea ‘a Mōsese kia Sihova, ‘Ēī, fakamolemole, ‘oku ‘ikai ko e tangata lea au, talu mei mu‘a mo ‘eku pehē, pea neongo ho‘o folofola ki ho‘o tamaio‘eiki ka ‘oku ou kei pehē pē: he ko e loungutu mamafa au, pea mamafa mo hoku ‘elelo. 11Pea folofola ‘a Sihova kiate ia, Ko hai na‘a ne ngaohi ‘a e ngutu ‘o e tangata? Pea ko hai na‘a ne ngaohi ‘a e noa, pe ko e tuli, pe ko e ‘ā, pe ko e kui? ‘Ikai ko au, Sihova? 12Pea ko ia ke ke ‘alu pē, pea te u ‘i ho ngutu ‘e au, pea te u fakahinohino kiate koe ‘a e lea te ke fai.
13Pea ne pehē, Fakamolemole, ‘Eiki, ka ke fai mu‘a ho‘o fekau ‘i ha taha te ke fekau ai. 14Pea tuputāmaki ‘a Sihova kia Mōsese, ‘o ne folofola, ‘Ikai ‘oku ‘i ai ‘a ‘Ēlone ko e Līvai, ko ho tokoua? ‘Oku ou ‘ilo ‘oku mātu‘aki lea ia. Kae‘uma‘ā foki ‘oku ne ha‘u ke fakafetaulaki kiate koe: pea ‘i he‘ene sio kiate koe ‘e fiefia hono loto. 15Pea te ke lea kiate ia, ‘o ‘ai ‘a e ngaahi lea ko ia ki hono ngutu; pea ko au te u ‘i ho ngutu ‘o‘ou, pea ‘i hono ngutu ‘o‘ona, pea te u hīnoi‘i kimoua ki he me‘a te mo fai. 16Ko ho tangata lea ia ki he kakai: ‘io, te ne fetongi ‘e ia ho ngutu, pea ko koe te ke fetongi ‘a e ‘Otua kiate ia. 17Pea te ke to‘o ‘a e tokotoko ko ena, pea ko e me‘a ko ia te ke fai‘aki ‘a e ngaahi faka‘ilonga. 18Pea ‘alu ‘a Mōsese ‘o fakahā kia Setelō, ko e kāinga ‘o hono uaifi, ‘o ne pehē ki ai, Ka u ‘alu mu‘a ‘o foki ki hoku kāinga ‘oku ‘i ‘Isipite, ‘o vakai pe ‘oku nau kei mo‘ui. Pea tali ‘e Setelō kia Mōsese, ‘Oku lelei; ke ke ‘alu"

Pea pehē 'e Mosese 'oku 'ikai ko e tangata pōto'i lea ia, ka na'e fakamanatu ange 'e he 'Otua´, ko IA 'a e 'Otua 'o e Fakatupu´, pea te Ne 'ia Mosese 'o tokoni'i ia, ka na'e fakatoupīkoi pe 'a Mosese; pea tuputāmaki ai 'a e 'Otua´ ‘ia Mosese 'o Ne fakanofo 'a 'Elone, ‘a e ta’okete ‘o Mosese´ ke hoko ko e tangata lea, ke ne fai ‘e ia ‘a e fatongia lea´…. Taimi lahi ‘oku tau fa’a pehē pē mo kitautolu fānau, fa’a si’isi’i ‘etau tui´ pea tau fa’a lotosi’i he taimi ‘e ni’ihi ke tu’u ke fai ha me’a kuo tu’utu’uni he ‘Eiki´ ke fai, pea iku ai ‘o ngaue’aki ai ‘e he ‘Otua´ ia ha taha kehe ke fakahoko ‘Ene fekau´. Tauange fānau ke tau ma’u ha lotolahi he fakalotolahi ‘oku ‘omi he’etau veesi lauloto´, ko e ‘Otua na’a Ne ui kitautolu´, ko IA pe ia te Ne tokoni’i kitautolu ke tau lava ke fai ‘Ene ngaahi fekau´, pehē ki Hono finangalo´.

Lotu: Lotu ‘o fakamālō ki he ‘Otua´ He’ene fa’a fakalotolahi’i kitautolu ‘i He’ene Folofola´ mo Hono Laumālie Mā’oni’oni´ ke mālohi ‘etau tui´.

Falaite 7 'Epeleli, 2017

MAFAI MEI HE ‘OTUA´

Veesi Lauloto: 1 Pita 5:7

"ʻO mou lī atu ā hono kotoa ʻo hoʻomou lotomoʻua´ ki he 'Ene ʻAfio´; he ʻoku Ne mamahiʻi kimoutolu"

'Ekisoto 4:1-9

"1PEA tali ‘e Mōsese ‘o pehē, Ka ko eni, ‘e ‘ikai te nau tui kiate au, pea ‘e ‘ikai te nau tali ‘eku lea; he te nau pehē, Kuo ‘ikai hā ‘a Sihova kiate koe. 2Pea folofola ‘a Sihova kiate ia, Ko e hā ena ‘i ho nima? Pea ne pehē, Ko e tokotoko. 3Pea ne folofola mai, Sī ia ki lalo. Pea ne sī ia ki lalo, pea na‘e hoko ia ko e ngata; pea na‘e hola ‘a Mōsese mei ai. 4Pea folofola ‘a Sihova kia Mōsese, Mafao atu ho nima, ‘o puke ‘i hono iku: (pea ne mafao atu hono nima, ‘o ne kuku ia, pea na‘e liliu ia ‘i hono nima ko e tokotoko) 5koe‘uhi ā ke nau tui kuo hā kiate koe ‘a Sihova, ko e ‘Otua ‘o honau tupu‘anga, ko e ‘Otua ‘o ‘Epalahame, ko e ‘Otua ‘o ‘Aisake, pea ko e ‘Otua ‘o Sēkope.  6Pea fai atu ‘e Sihova ‘ene folofola kiate ia, Ke ke ‘ai mu‘a ho nima ki ho kona. Pea ne ‘ai hono nima ki hono kona: pea ‘i he‘ene to‘o mai, tā kuo kilia hono nima hangē ko e sinou. 7Pea ne folofola mai, Toe ‘ai ho nima ki ho kona. (Pea ne toe ‘ai hono nima ki hono kona, pea ‘i he‘ene to‘o mai, tā kuo liliu ‘o hangē ko hono kili.) 8Tala atu, kapau ‘e ‘ikai te nau tui kiate koe, ‘o ‘ikai te nau tali ‘a e lea ‘a e ‘uluaki faka‘ilonga, ka te nau tui pē ki he lea ‘a hono ua. 9Pea pehē, kapau ‘e ‘ikai te nau tui ki he ongo faka‘ilonga ko ena, ‘o ‘ikai te nau tali ho‘o lea, pea te ke ohu ha vai mei he vaitafe, ‘o lilingi ki he funga fonua; pea ko e vai ‘oku ke ohu mei he vaitafe, ‘e hoko ia ko e toto ‘i he funga kelekele. "

Ne kei lotosi’i pē ‘a Mosese, ko ia na’e folofola ʻa Sihova kiate ia, ‘o ne fakahā ange ‘a e mana ‘e 3 ke ne fai he ‘ao ‘o Felo mo e kau ‘Isileli´, koe’uhi´ ke nau tui kia Mosese. (1) Te ne lī ‘ene tokotoko´ ki lalo, pea ‘e hoko ia ko e ngata,  pea ko ‘ene puke pē ʻi hono iku´ ʻo ne kuku’i pea ʻe to e liliu ia ko e tokotoko. (2) Ke ne ʻai hono nima´ ki hono kona´, pea ʻi heʻene toʻo mai´, tā kuo kilia hono nima´, ka ‘i he’ene toe ʻai hono nima´ ki hono kona´, pea ne toe toʻo mai´, tā kuo ma’a e kilia´.  (3) Ke ne ohu ha vai mei he vaitafe´ ʻo lilingi ki he funga fonua´: pea ʻe hoko ia ko e toto ʻi he funga kelekele´. ‘Oku fie me’angaue’aki kitautolu ‘e he ‘Otua´... Te Ne fakaivia kitautolu ke tau lava ke ‘ikai ki he angahala´, ke tau talangofua ki He’ene Folofola’, ke talaki ‘Ene ‘ofa´... Te ke loto ki ai, pe ‘oku ke lotosi’i koe hangē ko Mosese´.

Lotu: Lotu ‘o kole ki he ‘Otua´ ke Ne fakaivia mo tokoni’i koe ke ke talangofua mo lotolahi ke fai ’Ene  ngaahi fekau´.

Tu'apulelulu 6 'Epeleli, 2017

KO AU KO AU AI PĒ

Veesi Lauloto: 1 Pita 5:7

"ʻO mou lī atu ā hono kotoa ʻo hoʻomou lotomoʻua´ ki he 'Ene ʻAfio´; he ʻoku Ne mamahiʻi kimoutolu"

'Ekisoto 3:11-22

"11Pea fakatau folofola ‘e Mōsese kia ‘Elohimi, ‘o pehē, Ko hai au ke u ‘alu kia Felo, pea ke u ‘omi ‘a ha‘a ‘Isileli mei ‘Isipite? 12Pea ne folofola mai, Koe‘uhi ā te u ‘iate koe; pea ko eni ha‘o fakamo‘oni ko Au ia kuo fekau atu koe: ‘Oka ke ka taki atu ‘a e kakai na mei ‘Isipite, te mou tauhi kia ‘Elohimi ‘i he mo‘unga ko eni. 13Pea tali ‘e Mōsese kia ‘Elohimi, Ko eni, ka u ka ‘alu ki ha‘a ‘Isileli, pea u lea kiate kinautolu ‘o pehē, Ko e ‘Otua ‘o ho‘omou ngaahi kui kuo ne fekau au kiate kimoutolu; pea te nau pehē mai kiate au, Ko hai hono huafa? Pea ko e hā ai ha‘aku lea ‘e fai kiate kinautolu? 14Pea folofola ‘a e ‘Otua kia Mōsese, KO AU KO AU AI PĒ. Pea ne toe folofola, Ko eni ‘a e lea te ke fai ki ha‘a ‘Isileli, Ko KO-AU-AI PE kuo ne fekau au kiate kimoutolu. 15Pea folofola atu ‘a e ‘Otua kia Mōsese, Ko eni ho‘o lea ‘e fai ki ha‘a ‘Isileli, Kuo fekau au kiate kimoutolu ‘e Sihova, ko e ‘Otua ‘o ho‘omou ngaahi kui, ko e ‘Otua ‘o ‘Epalahame, ko e ‘Otua ‘o ‘Aisake, pea ko e ‘Otua ‘o Sēkope: ko hoku hingoa ia ‘o ta‘engata, pea ko hoku fakamanatu ia ki he to‘utangata mo e to‘utangata. 16‘Alu ‘o fakataha ‘a e mātu‘a ‘o ‘Isileli, pea ke lea kiate kimoutolu, ‘o pehē, Kuo hā kiate au ‘a Sihova ko e ‘Otua ‘o ho‘omou ngaahi kui, ko e ‘Otua ‘o ‘Epalahame mo ‘Aisake mo Sēkope, pea kuo ne pehē mai, Kuo u mātu‘aki ‘a‘ahi kiate kimoutolu, ‘o vakai ki he ngaahi me‘a ‘oku fai kiate kimoutolu ‘i ‘Isipite: 17pea kuo u pehē, Te u ‘ohake kimoutolu mei he fakamamahi ‘e he kakai ‘Isipite ki he fonua ‘o ha‘a Kēnani, mo ha‘a Heti, mo ha‘a ‘Āmoli, mo ha‘a Pēlisi, mo ha‘a Hevi, mo ha‘a Siepusi, ko e fonua ‘oku mahutafea ‘i he hu‘akau mo e honi. 18Pea te nau tuitala ki ho‘o lea; pea te ke a‘u atu ki he Tu‘i ‘Isipite, ‘a koe mo e mātu‘a ‘o ‘Isileli, pea te mou pehē kiate ia, Ko Sihova ko e ‘Otua ‘o ha‘a Hepelū kuo ne hā‘ele hifo kiate kimautolu; pea ko ia ke mau ‘alu mu‘a ki he Toafa ko e vaa‘i hala ‘o e ‘aho ‘e tolu, ke mau feilaulau ai kia Sihova ko homau ‘Otua. 19Ka ‘oku ou ‘ilo ‘e ‘ikai tukuange kimoutolu ke ‘alu ‘e he Tu‘i ‘Isipite, ‘io, neongo ha tā mamafa. 20Pea te u mafao hoku nima, pea te u taa‘i ‘a ‘Isipite ‘aki ‘eku ngaahi me‘a fakaofo kehekehe, ‘a ia te u fai ‘i honau lotolotonga: pea hili ia te ne tuku atu kimoutolu. 21Pea te u ‘ai ke ‘ofeina ‘a e kakai ni ‘i he ‘ao ‘o e kakai ‘Isipite: pea ‘i he faifai pea mou ‘alu atu, ‘e ‘ikai te mou ‘alu mola: 22ka ‘e kole ‘a e fefine takitaha mei hono kaungā‘api, pea mei he fefine ‘oku ‘āunofo ‘i hono fale, ‘a e teunga siliva mo e teunga koula, mo e kofu; pea te mou ‘ai ia ki ho‘omou fānau tangata mo ho‘omou fānau fefine: ‘io, te mou vete ‘a e kakai ‘Isipite. "

Pea fakatau folofola ʻe Mosese kia ‘Elohimi, “Ko hai au ke u ʻalu kia Felo, pea ke u ʻomi ʻa haʻa Isileli mei Isipite? Pea ka ‘eke ‘e haʻa ‘Isileli Ho Huafa´, ko e hā ha’aku tali? Pea folofola ʻa e ʻOtua´ kia Mosese, “Ko KO AU KO AU AI PE.... Te U ‘ohake kimoutolu mei he fakamamahi ʻe he kakai ‘Isipite´ ki ha fonua ʻoku mahutafea ʻi he huʻakau´ mo e honi´. Pea te nau tuitala ki hoʻo lea´; pea ʻe ʻikai tukuange kimoutolu ʻe he Tuʻi Isipite, ʻio neongo ha tā mamafa. Ka te U taaʻi ʻa ‘Isipite ʻaki ʻeku ngaahi meʻa fakaofo kehekehe, pea hili ia´ te ne toki tuku atu kimoutolu. Pea te u ʻai ke ʻofeina kimoutolu ‘e he kakai Isipite: koe’uhi´ ʻe ʻikai te mou ʻalu mola: ka te nau foaki teunga siliva mo e teunga koula, mo e kofu mo e me’akai ma’a moutolu; ʻio te mou vete ʻa e kakai Isipite´. Mo’oni pē ‘etau veesi lauloto´ fānau, tau tangi ki he ‘Eiki´ kapau ‘oku ngaahikovi’i tautolu mo fai-ta’etotonu mai ha taha, he te Ne tau ma’a tautolu.

Lotu: Lotu ‘o fakamālō ki he ‘Otua´ He’ene ‘ofa’i mo tuku taimi lahi ma’ata, neongo ‘a e lahi ‘ete fa’a ta’emahino´ mo ‘ete lotosi’i´.

Pulelulu 5 'Epeleli, 2017

FOLOFOLA ‘A E ‘OTUA´ KIA MOSESE

Veesi Lauloto: 1 Pita 5:7

"ʻO mou lī atu ā hono kotoa ʻo hoʻomou lotomoʻua´ ki he 'Ene ʻAfio´; he ʻoku Ne mamahiʻi kimoutolu"

'Ekisoto 3:1-10

"1PEA nofo ‘a Mōsese ko e tauhi ‘o e fanga manu ‘a Setelō ko e taula‘eiki ‘o Mitiani, ko e kāinga ‘o hono uaifi; pea na‘a ne taki ‘a e fanga manu ki he tu‘a toafa, ‘o ne a‘u ki he Mo‘unga ‘o ‘Elohimi, ‘a Hōlepi. 2Pea na‘e hā kiate ia ‘a e ‘āngelo ‘a Sihova ‘i he loto afi na‘e ulo hake ‘i he vao talatala‘āmoa; pea ne vakai, tā neongo ‘oku vela ‘a e vao talatala‘āmoa ‘i he afi, ka ‘oku ‘ikai keina ai ‘a e talatala‘āmoa. 3Pea pehē ‘e Mōsese, Ka u afe atu mu‘a, ‘o mamata ki he fu‘u me‘a ni kuo hā, pe ko e hā ‘oku ‘ikai vela ai ‘a e talatala‘āmoa. 4Pea ‘i he ‘afio‘i ‘e Sihova ‘oku ne afe mai ke vakai, na‘e ui kiate ia ‘e he ‘Otua mei he loto talatala‘āmoa, ‘o pehē, ‘E Mōsese! ‘e Mōsese! Pea ne tali, Ko au eni. 5Pea ne folofola, ‘Oua te ke ofi mai ki heni: to‘o ho topuva‘e mei ho va‘e, he ko e potu ‘oku ke tu‘u ai ko e kelekele tapu. 6Pea ne folofola foki, Ko Au ko e ‘Otua ‘o ho tupu‘anga, ko e ‘Otua ‘o ‘Epalahame, ko e ‘Otua ‘o ‘Aisake, pea ko e ‘Otua ‘o Sēkope. Pea na‘e fakapūlou ‘e Mōsese hono mata; he na‘a ne manavahē ke hanga kia ‘Elohimi. 7Pea folofola ‘a Sihova, Kuo u mātu‘aki mamata ki he ngaohikovi‘i ‘o hoku kakai ‘oku ‘i ‘Isipite, pea kuo ongo mai ‘enau tautapa koe‘uhi ko honau kau ‘ōfisa; he ‘oku ou ‘ilo‘i ‘enau ngaahi mamahi; 8pea kuo u ‘alu hifo ke fakahaofi kinautolu mei he nima ‘o e kau ‘Isipite, pea ke ‘ohake kinautolu mei he fonua ko ia ki ha fonua lelei mo lahi, ha fonua ‘oku mahutafea ‘i he hu‘akau mo e honi; ‘a e feitu‘u ‘o ha‘a Kēnani, mo ha‘a Heti, mo ha‘a ‘Āmoli, mo ha‘a Pēlisi, mo ha‘a Hevi, mo ha‘a Siepusi. 9Pea ko eni, kuo a‘u mai kiate au ‘a e tautapa ‘a ha‘a ‘Isileli: kae‘uma‘ā kuo u mamata foki ki he fakamamahi ‘oku fai ‘e he kau ‘Isipite kiate kinautolu. 10Pea ko ia ke ke ha‘u ā, ka u fekau atu koe kia Felo, ke ‘omi mei ‘Isipite ‘a hoku kakai ko ha‘a ‘Isileli."

‘Aho ‘e taha ne fononga atu ai ‘a Mosese he toafa´, ʻo ne aʻu atu ai ki he Moʻunga ko Hōlepi´. Naʻa ne vakai ki ha afi naʻe ulo hake ʻi he vao talatalaʻamoa; Pea naʻe ui kiate ia ʻe he ʻOtua´ mei he loto talatalaʻamoa, ʻo pehē, “ʻE Mosese! ʻe Mosese! ʻOua te ke ofi mai ki heni: toʻo ho topuvaʻe´ mei ho vaʻe´, he ko e potu ʻoku ke tuʻu ai´ ko e kelekele tapu. Kuo U mātuʻaki mamata ki he ngaohikoviʻi Hoku kakai ʻoku ʻi ‘Isipite´, pea kuo ongo mai ʻenau tangi´; he ʻoku Ou ʻiloʻi pē ʻenau ngaahi mamahi´; Pea ko ia ke ke haʻu ā, ka U fekau atu koe kia Felo, ke ʻomi mei ‘Isipite ʻa Hoku kakai´, ‘a e haʻa ‘Isileli´. Fānau, ka ‘oku ‘oatu leva ‘e he ‘Otua´ ha fekau ke ke fai, ‘o fou atu He’ene Folofola´, loto to’a ke fai, he te Ne ‘oatu mo ha ivi mo e poto kiate koe ke ke malava ‘o talangofua ‘aki ke fakakakato ‘a e fekau ko ia´.

Lotu: Lotu ‘o kole ki he ‘Otua´ ke Ne folofola atu kiate koe ‘i He’ene Folofola´, pea ke Ne tokoni’i koe ke ke talangofua ki He’ene  ngaahi fekau´.

Tusite 4 'Epeleli, 2017

FOUNGA FAKAETANGATA´

Veesi Lauloto: 1 Pita 5:7

"ʻO mou lī atu ā hono kotoa ʻo hoʻomou lotomoʻua´ ki he 'Ene ʻAfio´; he ʻoku Ne mamahiʻi kimoutolu"

'Ekisoto 2:11-21

"11Pea ‘i he faifai pea lahi ‘a Mōsese, na‘a ne ‘alu atu ki tua‘ā ki hono kāinga, ‘o mamata ki he‘enau kavenga‘ia: pea ne vakai ha siana ‘Isipite ‘oku ne taa‘i ha Hepelū, ko e taha ‘i hono kāinga. 12Pea ne fakasio ki hē mo ē, pea ‘i he‘ene vakai ‘oku ‘ikai ha taha, na‘a ne te‘ia ‘a e ‘Isipite, ‘o ne tanu ia ‘i he ‘one‘one. 13Pea ne toe ‘alu atu ‘i he ‘aho na‘a na feholoi, pea tā ko e ongo tangata Hepelū ‘oku na fuhu: pea ne lea ki he toko taha na‘e halaia, Ko e hā kuo ke taa‘i ai ho kaume‘a? 14Pea ne tali, Ko hai na‘a ne fakanofo koe ko e ‘eiki mo e fakamaau kiate kimautolu? ‘oku ke pehē ‘apē ke tāmate‘i au, ‘o hangē ko ho‘o tāmate‘i ‘a e ‘Isipite? Pea na‘e manavahē ‘a Mōsese, ‘o ne pehē, Ta kuo ‘iloa ‘a e me‘a. 15Pea ‘i he fanongo ‘a Felo ki he me‘a ko ia, na‘a ne feinga ke tāmate‘i ‘a Mōsese. Ka ka hola pē ‘a Mōsese mei he ‘ao ‘o Felo, ‘o ne nofo ‘i he fonua ko Mitiani: pea ne nofo hifo ‘o ofi ki he vaikeli.Ngā 7.29; Hep 11.27 16Pea ko e taula‘eiki ‘o Mitiani na‘e toko fitu hono ngaahi ‘ōfefine ‘o‘ona: pea na‘a nau omi ‘o ‘utu vai, ‘o fakafonu ‘a e ngaahi kumete ke fakainu ‘a e fanga manu ‘a ‘enau tamai. 17Pea ha‘u ‘a e kau tauhi sipi, ‘o kapusi kinautolu; ka ka tu‘u ‘a Mōsese, ‘o tokoni‘i kinautolu, ‘o ne fakainu ‘enau fanga manu. 18Pea ‘i he‘enau a‘u ki he‘enau tamai ko Leueli, na‘a ne pehē, Ko e hā kuo mou foki vave pehē ai he ‘aho ni? 19Pea na‘a nau tali, Ko e siana ‘Isipite na‘a ne fakahaofi kimautolu mei he nima ‘o e kau tauhi sipi, kae‘uma‘ā na‘a ne touvai ma‘amautolu, ‘o fakainu ‘a e fanga manu. 20Pea me‘a ia ki hono ngaahi ‘ōfefine, pea kofa‘ā ia? Ko e hā kuo mou fai pehē ai, ‘o li‘aki ‘a e siana? mou ui mai ke ne ha‘u ‘o kai. 21Pea na‘e loto ‘a Mōsese ke nofo mo e matāpule: pea na‘a ne ‘ange kia Mōsese ‘a hono ‘ōfefine ko Sīpola."

Pea ʻi he faifai pea lahi ʻa Mosese´, naʻa ne ‘alu atu ki tuaʻā ki hono kāinga´, ʻo ne vakai ha siana ‘Isipite ʻoku ne taaʻi ha Hepelū. Na’a ne tāmate’i ʻa e ‘Isipite´, ʻo ne tanu ia ʻi he ʻoneʻone. Pea ne toe ʻalu atu he ʻaho hoko´ ‘oku kē mo fuhu mai ha ongo tangata Hepelū, pea ne lea ki he toko taha halaia´, pe ko e hā ‘oku ne taaʻi ai hono kaumeʻa? Pea ne tali, “Ko hai naʻa ne fakanofo koe ko e ʻeiki mo e fakamāu kiate kimautolu? ʻa ia te ke tamateʻi au, ʻo hangē ko hoʻo tamateʻi ʻa e ‘Isipite? Ne manavahē ʻa Mosese, tā kuo ʻiloa ʻene tamate’i e ‘Isipite´. Ne fanongo ai ʻa Felo ‘o ne feinga ke tamateʻi ʻa Mosese. Ka ne hola ʻa Mosese ki Mitiani: ‘o ne mali ai mo Sīpola, ko e ‘ofefine ‘o Setelō taula’eiki ‘o Mitiani´, pea ne nofo ai ‘o tauhi e fanga sipi ‘a Setelō´.... Manatu’i, ‘oua ‘e feinga ke solova fakaetangata ho palopolema´, he ‘e to e lahi ange ai e palopolema´ ia. Tala kia Sīsū, he ‘oku Ne ‘ofa’i mo mamahi’i kitautolu.

Lotu: Kole fakamolemole ki he ‘Eiki´ ho’o fa’a feinga ke solova fakaetangata ho ngaahi palopolema´, pea ke kole ‘Ene tokoni´ ke Ne fai ‘e IA e solova´.

Monite 3 'Epeleli, 2017

KO E ‘OTUA ‘OFA ‘OKU TAU TAUHI KI AI´

Veesi Lauloto: 1 Pita 5:7

"ʻO mou lī atu ā hono kotoa ʻo hoʻomou lotomoʻua´ ki he 'Ene ʻAfio´; he ʻoku Ne mamahiʻi kimoutolu"

'Ekisoto 2:1-10

"1PEA ‘alu ha motu‘a ‘i he fāmili ‘o Līvai, ‘o ne mali mo ha ‘ōfefine ‘o Līvai. 2Pea feitama ‘a e fefine, ‘o ne fā‘ele‘i ha tama tangata: pea ‘i he‘ene vakai ko e tamasi‘i faka‘ofo‘ofa, na‘a ne fufū ia ‘o tolu māhina. 3Pea ‘i he ‘ikai te ne kei lava ke fufū ia, na‘a ne ma‘u mo‘ona ha ‘a‘ake na‘e ngaohi ‘aki ‘a e mahelehele, ‘o ne vali ‘aki ‘a e kelepulu mo e tā; pea ne ‘ai ki ai ‘a e tamasi‘i, ‘o ne tuku ‘i he vao kutu ‘i he tafa‘aki vaitafe. 4Pea na‘e tu‘u hono tuofefine mei he mama‘o ke vakai pe ko e hā ‘e hoko. 5Mo e ‘alu hifo ‘a e ‘Ōfefine ‘o Felo ke pālutu ‘i he vaitafe; pea ‘alu holo hono kau fefine ‘i he ve‘e vai; pea na‘a ne vakai ‘a e ‘a‘ake ‘i he loto kutu, ‘o ne fekau atu ‘ene kaunanga ke ‘omai. 6Pea ‘i he‘ene to‘o ia, na‘a ne mamata ki ai, ki he tamasi‘i, pea tā ko e tama pea ‘oku ne tangi, pea ne manava‘ofa ki ai, ‘o ne pehē, Ko si‘i me‘a eni ‘i he fānau ‘a ha‘a Hepelū! 7Pea lea ange ‘e hono tuofefine ki he ‘Ōfefine ‘o Felo, Ka u ‘alu ‘o ui mai ha fefine tauhi mei he kau fefine Hepelū ke tauhi ma‘au ‘a e tamasi‘i? 8Pea me‘a mai ki ai ‘e he ‘Ōfefine ‘o Felo, ‘Alu pē. Pea ‘alu ‘a e ta‘ahine ‘o ne ui mai ‘a e fa‘ē ‘a e tamasi‘i. 9Pea me‘a mai ki ai ‘a e ‘Ōfefine ‘o Felo, ‘Ave ‘a e tamasi‘i ni, ‘o tauhi ma‘aku, pea te u ‘atu ‘e au ha‘o totongi. Pea to‘o ‘e he fefine ‘a e tamasi‘i, ‘o ne tauhi. 10Pea ‘i he‘ene tupu ‘a e tamasi‘i, na‘a ne ‘ave ia ki he ‘Ōfefine ‘o Felo, pea na‘a ne tama ‘aki ia. Pea na‘a ne fakahingoa ia ko Mōsese (ko Toho-mai) he‘ene pehē, He na‘a ku toho mai ia mei he vai."

Ne ‘i ai ha tangata Līvai ko ‘Amilami ne toki fā’ele tamasi’i tangata hono uaifi´, ko Sokopeti, ‘i he taimi ko ia ne tu’utu’uni ai ‘e Felo ke tāmate’i mo laku ki he vaitafe´ ‘a e fanga ki’i pēpē tangata ‘a e kau ‘Isileli´. Na’e fūfuu’i ‘e Sokopeti ‘ene tama´ ‘i ha kato ‘o fakatētē pē he tafa’aki vaovao ‘o e vaitafe´, pea nofo ofi pē ai ‘ene ki’i ta’ahine ko Meliame ke tokanga’i. Ka ne ma’u ia he ‘aho ‘e taha ‘e he ‘ofefine ‘o Felo´, ‘o ne manavaʻofa ki ai, neongo na’a  ne ‘ilo pē mahalo ko e tama ‘a ha Hēpelū. Ne ‘unu atu ‘a Meliame ki he pilinisesi´ pe te ne ui mai ha taha ke ne tauhi e tamasi’i’ ma’ana, ‘o ne ‘io ange, pea ne lele leva ‘o ‘omi ‘a Sokopeti ke ne tauhi. Pea ʻi heʻene tupu ʻa e tamasiʻi, naʻa ne ʻave ia ki he ʻOfefine ʻo Felo, pea naʻa ne tamaʻaki ia. Pea naʻa ne fakahingoa ia ko Mosese (ko Tohomai) heʻene pehē, He naʻa ku toho mai ia mei he vai´.

Lotu: Lotu ‘o fakamālō ki he ‘Otua´ He’ene fokotu’utu’u ‘ofa ma’a ‘etau mo’ui´ mo malu’i kitautolu mei he fili´.

Sapate 2 'Epeleli, 2017

TALANGOFUA  KI HE ‘OTUA´

Veesi Lauloto: 1 Pita 5:7

"ʻO mou lī atu ā hono kotoa ʻo hoʻomou lotomoʻua´ ki he 'Ene ʻAfio´; he ʻoku Ne mamahiʻi kimoutolu"

'Ekisoto 1:15-22

"15Pea me‘a ‘a e Tu‘i ‘Isipite ki he ongo mā‘uli Hepelū, ‘a ia ko e hingoa ‘o e taha ko Sīfila, pea ko e hingoa ‘o hono ua ko Pua. 16Pea ne folofola ‘o pehē, ‘I ho‘omo fai ho‘omo ngāue mā‘uli ki he kau fefine Hepelū, ‘o mamata ki he fā‘ele, kapau leva ko ha tama tangata, pea te mo tāmate‘i ia; ka ‘o kapau ko ha ta‘ahine, ‘e mo‘ui pē ia. 17Ka ko e ongo mā‘uli na‘a na manavahē kia ‘Elohimi, pea na‘e ‘ikai te na fai ‘o hangē ko e tu‘utu‘uni ‘a e Tu‘i ‘Isipite kiate kinaua, ka na‘a na tuku ke mo‘ui ‘a e tamaiki tangata. 18Pea ui ange ‘e he Tu‘i ‘Isipite ‘a e ongo mā‘uli, ‘o ne folofola kiate kinaua, Ko e hā kuo mo fai pehē ai, ‘o tuku ke mo‘ui ‘o e tamaiki tangata?
19Pea tali ‘a e ongo mā‘uli kia Felo, Ko hono ‘uhinga he ko e kau fefine Hepelū ‘oku ‘ikai te nau hangē ko e kau fefine ‘Isipite; ka ‘oku nau mālohi, pea ‘i he te‘eki ke a‘u ‘a e mā‘uli kiate kinautolu kuo nau fā‘ele. 20Ko ia na‘e fai lelei ‘a e ‘Otua ki he ongo mā‘uli; pea na‘e tupu ‘a e kakai, ‘o hoko ‘o kaukaua ‘aupito. 21Pea ko e me‘a ‘i he manavahē ‘a e ongo mā‘uli kia ‘Elohimi, ko ia na‘a ne fakaai hona fale. 22Pea fai fono ‘e Felo ki hono kakai kotoa, ‘o pehē, ‘Ilonga ha tamasi‘i tangata ‘e fā‘ele‘i, te mou lī ki he vaitafe, ka ‘ilonga ha ta‘ahine te mou tuku ke mo‘ui."

Pea meʻa ʻa e tuʻi ‘Isipite´ ki he ongo māʻuli Hepelū, ko hona hingoa´ ko Sifila, mo Pua, ke na tāmate’i ‘a e fanga ki’i pēpē tangata kotoa pē ‘e fā’ele’i mai ‘e he ngaahi fa’ē´ Hepelū´, ka ko e ongo māʻuli´ naʻa na manavahē kia Sihova, pea naʻe ʻikai te na fai ʻe kinaua ki ai. Pea na talaange ‘e kinaua kia Felo, ko e kau fefine Hepelū´ ia ʻoku teʻeki ke aʻu ʻa e māʻuli kiate kinautolu´ kuo nau ‘osi fāʻele nautolu. Ko ia na’e tala leva ʻe Felo ke ʻilonga ha tamasiʻi tangata ʻe fāʻeleʻi, pea lī ki he vaitafe´. Ko e taimi faingata’a lahi ‘eni ki he kakai ‘a e ‘Otua´.... Fānau, ‘oku mahu’inga ke tau talangofua mo faka’apa’apa ki hotau kau taki´ mo ‘etau mātu’a´. Ka ‘okapau leva ‘oku nau tu’utu’uni atu ke ke fai-angahala, pea ‘oku tonu leva ke ke manavahē koe ki he ‘Otua´ ‘o hangē ko e ongo mā’uli Hepelū´. Tala ki he ‘Eiki´ ho faingata’a’ia´, pea ‘oua te ke faihala, he te Ne ‘oatu ha mālohi ma’au ke ke talangofua ‘aki kiate IA, he taimi pehē´.

Lotu: Lotu ‘o kole ki he ‘Otua´ ke ‘oatu ha mālohi mo ha ivi ke ke lava ‘o talangofua ‘aki kiate IA, ‘oka fakaloto’i koe ‘e ha taha ke ke faihala.

Tokonaki 1 'Epeleli, 2017

NOFO  PŌPULA ‘A ‘ISILELI ‘I ‘ISIPITE

Veesi Lauloto: 1 Pita 5:7

"ʻO mou lī atu ā hono kotoa ʻo hoʻomou lotomoʻua´ ki he 'Ene ʻAfio´; he ʻoku Ne mamahiʻi kimoutolu"

'Ekisoto 1:6-14

"6Pea na‘e pekia ‘a Siosifa mo hono ngaahi tokoua kotoa pē, mo e to‘utangata ko ia kātoa. 7Pea na‘e hako ‘a ha‘a ‘Isileli, ‘o nau tupu ‘o hangē ha neveneve, ‘io, na‘a nau hoko ‘o tokolahi mo kaukaua ‘aupito ‘aupito; pea na‘e fonu ‘a e fonua ‘iate kinautolu. 8Pea na‘e hoko ‘o pule ki ‘Isipite ha tu‘i kehe, ‘a ia na‘e ‘ikai te ne ‘ilo ‘a Siosifa. 9Pea ne pehē ki hono kakai; Vakai, ko e kakai ni ko ha‘a ‘Isileli ‘oku nau tokolahi mo mālohi ‘iate kitautolu; 10‘ē, tau fai fakapotopoto ki ai; na‘a nau toe tokolahi ange, pea ka faifai pea hoko ha tau, pea nau kau foki kinautolu mo hotau ngaahi fili, ‘o tau‘i kitautolu, ‘o nau ‘alu ai mei he fonua. 11Ko ia na‘a nau fakanofo kiate kinautolu ha kau ‘ōfisa ‘o e fatongia, koe‘uhi ke fakavaivai‘i kinautolu ‘aki ‘a e fua kavenga. Pea na‘a nau langa mo‘o Felo ‘a e ongo kolo tuku‘anga koloa, ko Pītomi mo Lamesisi. 12Ka ko e lahi leva ‘enau fakamamahi‘i kinautolu, pea lahi ai foki ‘enau tupu mo ‘enau mafola. Pea na‘a nau puputu‘u telia ‘a ha‘a ‘Isileli. 13Ko ia na‘e hanga ai ‘a e kakai ‘Isipite ‘o fakangāue mamafa ‘a ha‘a ‘Isileli: 14pea nau ‘ai ke konā ‘enau mo‘ui ‘aki ‘a e ngāue fakaongosia, ‘a e ngaohi kelepulu mo e maka ‘umea, pea mo e ngāue kehekehe ‘i he vao: ko e ngāue kotoa na‘a nau fakangāue‘i ai kinautolu na‘e mamafa."

Hili ʻa e pekia ‘a Siosifa mo hono fanga tokoua´ mo e toʻutangata ko ia´ kātoa, na’e tāpuaki’i ‘e he ‘Otua´ ʻa haʻa Isileli, ʻo nau tupu ʻo fu’u tokolahi mo kaukaua ʻaupito. Pea naʻe hoko ʻo pule ki ‘Isipite ha tuʻi kehe, ʻa ia naʻe ʻikai te ne ʻilo ʻa Siosifa. Pea na’e manavahē ‘a e Felo ko ‘eni´ telia na’a ‘i ai ha ‘aho kuo tu’u hake ai ‘a e kau ‘Isileli´ ‘o tau’i kinautolu, ko ia na’a ne fakangāue’i pōpula ‘a e kau ‘Isileli´, ke nau langa moʻo Felo ʻa e ongo kolo tukuʻanga koloa lalahi ‘i ‘Isipite, ko Pītomi mo Lamesisi. Ko e ngaūe kotoa pē naʻa nau fakangaūeʻi ai ‘a e kau ‘Isileli´ naʻe mamafa. Ka na’e faka’atā pē ‘e he ‘Otua´ ‘a e vaa’ihala ko ‘eni´ ma’a ‘Isileli, he na’e ‘i ai ‘Ene palani mā’olunga ma’a kinautolu…..  Pehē pē mo kitautolu fānau, ‘oku ‘i ai ‘a e palani ‘a e ‘Otua´ ma’ae taha kotoa pē, pea taimi ‘e ni’ihi ‘oku fa’a kau ai mo e pau ke tau fou atu he ngaahi faingata’a, kae ‘oua na’a ngalo ‘etau veesi lauloto´, 1Pita 5:7

Lotu: Lotu ‘o fakamālō ki he ‘Otua´ He’ene ‘ofa’i koe, tautautefito ki he ngaahi taimi ‘oku ke fa’a fou ai he ngaahi faingata’a´